ນັກກີລາດອກປີກໄກ່ລາວ ສ້າງຜົນງານໃນເວທີສາກົນ

15:07 | 30/08/2019

ນາງ ເພັດມະນີ ແກ້ວເພຍຈັນ ຫຼື ແອນນ່າ ນັກກີລາດອກປີກໄກ່ສະໂມສອນເສດຖາ (ລາວ) ສ້າງຜົນງານໄດ້ຢ່າງໂດດເດັ່ນ ເຖິງຈະເສຍໃຫ້ນັກກີລາສາວຈາກປະເທດອິນໂດເນເຊຍ 0-2 ເຊັດ ໃນຮອບຊີງຊະນະເລີດກໍຕາມ ແຕ່ກໍເປັນຜົນງານຄັ້ງທຳອິດໃນເວທີສາກົນ ໂດຍຄວ້າ 1 ຫຼຽນເງິນ ພ້ອມເງິນລາງວັນ 900 ໂດລາສະຫະລັດ ຫຼື ປະມານ 7 ລ້ານກີບ ສ້າງຊື່ສຽງ ແລະ ກຽດຕິສັກສີໃຫ້ປະເທດຊາດ ໃນລາຍການດອກປີກໄກ່ຢູນນານໂຢເນັກແບັດມິນຕັນແຊັມປ້ຽນຊິບ 2019 ທີ່ແຂວງຄຸນມິງ ສປ ຈີນ ຮັບກຽດເປັນເຈົ້າພາບວັນທີ 24-27 ສິງຫາ 2019.

ນັກກີລາດອກປີກໄກ່ລາວ ສ້າງຜົນງານໃນເວທີສາກົນ

ທີມນັກກີລາດອກປີກໄກ່ຂອງສະໂມສອນເສດຖາ ຕາງໜ້າລາວເຮົາສົ່ງເຂົ້າຮ່ວມແຂ່ງຂັນ 8 ຄົນ ໃນນັ້ນ ຄະນະນຳພາຂອງທ່ານ ວຽງສະຫວັນ ແສງຈັນ ປະທານສະໂມສອນດອກປີກໄກ່ເສດຖາ ຄູເຝິກ 2 ຄົນ ນັກກີລາຮຸ່ນອາວຸໂສ 2 ຄົນ ນັກກີລາຊາຍທົ່ວໄປ 2 ຄົນ ແລະ ນັກກີລາຍິງຮຸ່ນທົ່ວໄປ 1 ຄົນ ການແຂ່ງຂັນມີນັກກີລາຈາກ 9 ປະເທດເຂົ້າຮ່ວມ ປະກອບມີເຈົ້າພາບຈີນ ໄທ ສິງກະໂປ ອິນໂດເນເຊຍ ມຽນມາ ມາເລເຊຍ ສິງກະໂປ ລາວ ຮົງກົງ ແລະ ອົດສະຕາລີ.

ສະເພາະລາຍການດ່ຽວຍິງ ນາງ ເພັດມະນີ ແກ້ວເພຍຈັນ ເຂົ້າຮ່ວມແຂ່ງຂັນມີນັກກີລາເຂົ້າຮ່ວມ 10 ກວ່າຄົນ ໃນນັ້ນໄດ້ມີການຈັບສະຫຼາກປະກົບຄູ່ແຂ່ງຂັນເສຍຕົກຮອບ ແລະ ນາງ ເພັດມະນີ ແກ້ວເພຍຈັນ ສາມາດສ້າງຜົນງານໄດ້ຢ່າງໂດດເດັ່ນໄລ່ເອົາຊະນະນັກກີລາເຈົ້າພາບ ຊະນະນັກກີລາຈາກໄທທະລຸເຂົ້າເຖິງຮອບຊີງຊະນະເລີດ ແຕ່ໜ້າເສຍດ່າຍໄປພາດທ່າເສຍໃຫ້ນັກກີລາຈາກອິນໂດເນເຊຍ ໄດ້ພຽງຫຼຽນເງິນ.

（ແຫຼ່ງຂໍ້ມູນ： vientianemai.net）