 |
ສະຫາຍ ບຸນຍັງ ວໍລະຈິດ
ພີ່ນ້ອງຮ່ວມຊາດ ແລະ ບັນດາສະຫາຍທັງຫລາຍ !
ພັກເຮົາກໍາເນີດເກີດຂຶ້ນຈາກ ຄວາມຮຽກຮ້ອງຕ້ອງການ ຂອງຂະບວນການຕໍ່ສູ້ ຂອງປະຊາຊົນບັນດາເຜົ່າ ຕ້ານການຮຸກຮານຈາກຕ່າງຊາດ, ທັງແມ່ນໝາກຜົນທີ່ຕ້ອງເປັນໄປ ຂອງປະຫວັດສາດໃນຍຸກໃໝ່ທີ່ຕ້ອງ ປະສານສົມທົບລະຫວ່າງ ການຕໍ່ສູ້ ປົດປ່ອຍຊາດກັບການ ປະຕິວັດຕາມເສັ້ນທາງ ສັງຄົມນິຍົມຂອງລັດທິມາກ-ເລນິນ. ພັກເຮົານັບແຕ່ມື້ກໍາເນີດ ກໍ່ຜະເຊີນໜ້າໂດຍກົງກັບ ອິດທິກໍາລັງຮຸກຮານ ທີ່ເຂັ້ມແຂງທີ່ສຸດ, ແຕ່ຍ້ອນສາມາດສົມທົບ ລະຫວ່າງໜ້າທີ່ ປົດປ່ອຍຊາດກັບໜ້າທີ່ ປົດປ່ອຍສັງຄົມ, ເອົາຂະບວນການຕໍ່ສູ້ ຂອງປະຊາຊົນບັນດາເຜົ່າ ຕ້ານການຮຸກຮານຕິດພັນ ກັບກະແສຟອງຂອງ ຂະບວນການປະຕິວັດ ທາງຊົນຊັ້ນຂອງຊົນຊັ້ນ ກໍາມະກອນຢູ່ໃນອິນດູຈີນ ແລະ ໃນໂລກ ຈຶ່ງເຮັດໃຫ້ພັກເຮົາໄດ້ຮັບ ການສະໜັບສະໜູນ ທັງຈາກປະຊາຊົນພາຍໃນປະເທດ ທັງຈາກທຸກກໍາລັງປະຕິວັດ ແລະ ກ້າວໜ້າບົນເວທີສາກົນ ຊຶ່ງເປັນປັດໄຈຄໍ້າປະກັນ ການເຕີບໃຫຍ່ເຂັ້ມແຂງ ຂອງພັກເຮົາຕະຫລອດມາທັງເປັນສິ່ງ ຄໍ້າປະກັນໄຊຊະນະຂອງພາ ລະກິດປະຕິວັດ ພາຍໃຕ້ການ ນໍາພາຂອງພັກ. ການນໍາພາຂອງພັກ ເຖິງຈະຜ່ານເສັ້ນທາງອັນລະອິດລະອ້ຽວ, ຍືດເຍື້ອຍາວນານ, ບາງໄລຍະກໍ່ຕົກຢູ່ໃນ ສະພາບທີ່ແສນອັດຕະຄັດ ຄືຈະກ້າວຜ່ານບໍ່ໄດ້, ແຕ່ໃນທີ່ສຸດກໍ່ສາມາດ ຜ່ານຜ່າໄດ້ທັງສາມາດ ຍາດໄຊຊະນະຈາກໄຊຊະນະນີ້ ສູ່ໄຊຊະນະໃໝ່ ທີ່ໃຫຍ່ຫລວງກວ່າເກົ່າ, ສາມາດນໍາພາປະຊາຊົນ ຂັບໄລ່ຜູ້ຮຸກຮານ, ໂຄ່ນລົ້ມອໍານາດການປົກຄອງ ແບບຂຸນເສິກ-ສັກດິນາ ກາຍເປັນພັກກໍາອໍານາດ ແລະ ນໍາພາປະຊາຊົນກ້າວສູ່ໄລຍະ ຂອງການປະຕິບັດ ສອງໜ້າທີ່ຍຸດທະສາດ: ປົກປັກຮັກສາ ແລະ ສ້າງສາປະເທດຊາດ, ສ້າງ ແລະ ຂະຫຍາຍລະບອບ ປະຊາທິປະໄຕປະຊາຊົນກ້າວ ຂຶ້ນສູ່ຈຸດໝາຍສັງຄົມນິຍົມ. ປັດຈຸບັນນີ້, ປະເທດຊາດຂອງພວກເຮົາ ມີສະຖຽນລະພາບທາງການເມືອງ, ເສດຖະກິດ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງ, ຖານະບົດບາດ ຊື່ສຽງຂອງ ສປປ ລາວ ນັບມື້ນັບໄດ້ພົ້ນເດັ່ນຂຶ້ນ ໃນພາກພື້ນ ແລະ ສາກົນ.
ຜ່ານໄລຍະເວລາ 65 ປີ, ພັກເຮົາມີບົດບາດຕັດສິນ ຂະບວນວິວັດການຕໍ່ສູ້ປົດປ່ອຍຊາດ, ເປີດສັງກາດໃໝ່ໃຫ້ແກ່ ການສ້າງສາພັດທະນາປະເທດຊາດ ອັນແສນຮັກຂອງພວກເຮົາ. ພັກສາມາດປະຕິບັດບົດບາດ ທາງປະຫວັດສາດ ອັນສະຫງ່າອົງອາດ ດັ່ງກ່າວກໍ່ຍ້ອນວ່າ:
ໜຶ່ງ: ພັກຖືການປົດປ່ອຍຊາດ, ນໍາເອົາເອກະລາດ, ອິດສະລະພາບຂອງຊາດ ກໍ່ຄືຄວາມສະເໝີພາບ, ເປັນເຈົ້າຕົນເອງ ແລະ ຄວາມສົມບູນພູນສຸກ ຂອງປະຊາຊົນເປັນກົກ, ມີຄວາມເອກະພາບ ລະຫວ່າງ ອຸດົມການຂອງຊົນ ຊັ້ນກໍາມະກອນ ກັບແນວທາງ ແລະ ເປົ້າໝາຍພັດທະນາ ປະເທດຊາດ, ພັກບໍ່ມີຜົນປະໂຫຍດອື່ນໃດ ນອກຈາກນໍາເອົາຄວາມ ສົມບູນພູນສຸກຂອງປະຊາຊົນ ແລະ ຄວາມຈະເລີນວັດ ທະນາຂອງປະເທດຊາດ, ຕາມເສັ້ນທາງສັງຄົມນິຍົມ ສະເໝີຕົ້ນສະເໝີປາຍ.
ສອງ: ພັກເຮົາຍາມໃດກໍຢຶດໝັ້ນ ບັນດາຫລັກການແຫ່ງການ ກໍ່ສ້າງພັກແບບໃໝ່ຕາມ ລັດທິມາກ-ເລນິນ, ເດັດດ່ຽວປະຕິບັດຫລັກ ການລວມສູນປະຊາທິປະໄຕ, ສົ່ງເສີມການຕິຊົມຕົນເອງ ແລະ ຕິຊົມກັນພາຍໃນພັກ, ຕ້ານລັດທິເອກະຊົນ, ສວຍໂອກາດ ທຸກຮູບແບບ, ເຮັດໃຫ້ພັກປອດໃສ, ເຂັ້ມແຂງ, ໜັກແໜ້ນ.
ສາມ:ໃນອົງການນໍາພາ ສູງສຸດຂອງພັກເຮົາ ຍາມໃດກໍ່ມີຄວາມສາມັກຄີ ເປັນເອກະພາບຢ່າງໜັກແໜ້ນ ທັງໃນໄລຍະທີ່ມີຄວາມຫຍຸ້ງຍາກ, ຂັບຂັນ, ຫົວລ້ຽວຫົວຕໍ່ຊຶ່ງອັນນັ້ນ ແມ່ນມູນເຊື້ອສຸດທີ່ປະເສີດ ຂອງພັກເຮົາທີ່ພວກເຮົາມີ ຄວາມຮັບຜິດຊອບ ໃນການປົກປ້ອງ, ເສີມຂະຫຍາຍຕໍ່ໄປ.
ສີ່: ພັກເຮົາ ຍາມໃດກໍ່ສະໜິດຕິດແໜ້ນກັບປະຊາຊົນ, ຈົງຮັກພັກດີ, ຊື່ສັດບໍລິສຸດຕໍ່ປະຊາຊົນ, ເດີນຕາມແນວທາງມະຫາຊົນ, ຖືປະຊາຊົນເປັນກົກ, ຮັກສາ ແລະ ເສີມຂະຫຍາຍທາດແທ້ ແລະ ມູນເຊື້ອປະຕິວັດ ທີ່ມາຈາກປະຊາຊົນ, ໂດຍປະຊາຊົນ, ເພື່ອປະຊາຊົນຢ່າງແທ້ຈິງ, ເຮັດໃຫ້ພັກເຕີບໃຫຍ່ ຂະຫຍາຍຕົວຂຶ້ນຢ່າງບໍ່ຢຸດຢັ້ງ.
ຫ້າ: ພັກເຮົາໄດ້ສົມທົບຢ່າງແໜ້ນແຟ້ນ ລະຫວ່າງລັດທິຮັກຊາດອັນແທ້ຈິງ ກັບລັດທິສາກົນອັນຜ່ອງໃສ.ໝາກຜົນທີ່ພັກເຮົາຍາດມາໄດ້ໃນ 65 ປີ ແມ່ນໃຫຍ່ຫລວງ ແລະ ພວກເຮົາສົມແລ້ວທີ່ ຈະເອກອ້າງພາກພູມໃຈ ແລະ ສ້າງຄວາມເຊື່ອໝັ້ນ ຕໍ່ອະນາຄົດຂອງຊາດ ແລະ ຂອງການປະຕິວັດ, ແຕ່ພວກເຮົາກໍ່ຕ້ອງຮັບ ຮູ້ໃຫ້ຈະແຈ້ງວ່າບົນເສັ້ນທາງ ແຫ່ງການກ້າວຂຶ້ນນັ້ນ ໂດຍສະເພາະ ກ້າວເຂົ້າສູ່ທົດສະວັດໃໝ່ ທີ່ມີການປ່ຽນແປງໄວວາ ແລະ ເຕັມໄປດ້ວຍສິ່ງທ້າທາຍ ນານາປະການ. ສະນັ້ນ ຍິ່ງກວ່າເວລາໃດໝົດມູນເຊື້ອ, ບົດຮຽນ ແລະ ຜົນສໍາເລັດໃນການນໍາພາ ຂອງພັກເຮົາຕະຫລອດ ໄລຍະທີ່ຜ່ານມາຕ້ອງໄດ້ຮັບການ ເສີມຂະຫຍາຍຢ່າງແຂງແຮງ, ທົ່ວພັກ, ທົ່ວລັດ, ທົ່ວປວງຊົນເຮົາ ຕ້ອງເພີ່ມທະວີຄວາມສາມັກ ຄີເປັນປຶກແຜ່ນແໜ້ນໜາ, ເສີມຂະຫຍາຍຈິດໃຈຮັກຊາດ, ຕິດພັນກັບຮັກລະບອບໃໝ່, ເຊີດຊູຈິດໃຈເອກະລາດ, ເປັນເຈົ້າຕົນເອງສ້າງຄວາມເຂັ້ມ ແຂງດ້ວຍຕົນເອງ, ສືບຕໍ່ກ້າວຂຶ້ນຕາມເສັ້ນທາງ ທີ່ພັກວາງອອກຢ່າງໜັກແໜ້ນ.
ໃນໂອກາດອັນມີຄວາມສໍາຄັນນີ້ ແລະ ຢືນຢູ່ຕໍ່ໜ້າການເລັ່ງທວງ ຂອງສະພາບການໃນໄລຍະໃໝ່, ຂ້າພະເຈົ້າ ຂໍຮຽກຮ້ອງທົ່ວພັກ, ທົ່ວປວງຊົນຈົ່ງສູ້ຊົນ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ X ໃຫ້ບັນລຸຕາມຄາດໝາຍ ທີ່ພັກວາງອອກ ພ້ອມທັງກະກຽມ ແລະ ດໍາເນີນກອງປະຊຸມໃຫຍ່ ແຕ່ລະຂັ້ນກ້າວເຖິງດໍາ ເນີນກອງປະຊຸມໃຫຍ່ ຄັ້ງທີ XI ຂອງພັກ, ສ້າງພື້ນຖານອັນໜັກແໜ້ນ ໃຫ້ແກ່ການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນຊຸມປີຕໍ່ໜ້າໂດຍສຸມໃສ່ບາງ ເນື້ອໃນຕົ້ນຕໍ ດັ່ງນີ້:
ໜຶ່ງ.ປັບປຸງໂຄງສ້າງ ເສດຖະກິດຢ່າງເປັນລະບົບ, ຮອບດ້ານ ແລະ ເລິກເຊິ່ງ ຮັບປະກັນການພັດທະນາ ເສດຖະກິດແຫ່ງຊາດເຂັ້ມແຂງ ແລະ ຍືນຍົງ; ເສີມຂະຫຍາຍທ່າແຮງບົ່ມຊ້ອນ ຂອງຊາດຕິດພັນ ກັບການພັດທະນາ ບັນດາຂະແໜງເສດຖະກິດປາຍແຫລມ ແລະ ການພັດທະນາເຂດແຄວ້ນຢ່າງ ມີຈຸດສຸມ; ບູລະນະກົນໄກເສດຖະກິດຕະຫລາດ ພາຍໃຕ້ການນໍາພາຂອງພັກ, ກໍານົດແຈ້ງແຜນຍຸດທະສາດ ແລະ ແຜນພັດທະນາ ເສດຖະກິດ-ສັງຄົມ ພາຍໃຕ້ການຄົ້ນຄວ້າ ທີ່ມີພື້ນຖານວິທະຍາສາດ ເພື່ອວາງຍຸດທະສາດ ແລະ ນິຕິກໍາທີ່ເປັນລະບົບ ຊຶ່ງຕ້ອງເລີ່ມຈາກຕະຫລາດ, ທຶນ ແລະ ເຕັກໂນໂລຊີແນໃສ່ ຮັບປະກັນທິດຍືນຍົງ ແລະ ສີຂຽວ; ສ້າງຄວາມສົມດູນ ລະຫວ່າງລົງທຶນດ້ານພື້ນຖານ ເສດຖະກິດ-ເຕັກນິກ ແລະ ການພັດທະນາສັງຄົມ ໂດຍຖືການພັດທະນາຄົນ ເປັນໃຈກາງ; ການພັດທະນາໃນຊຸມປີຕໍ່ໜ້າ ຕ້ອງຫັນປ່ຽນການພັດທະນາ ທີ່ເນັ້ນການນໍາໃຊ້ ຊັບພະຍາກອນທໍາມະຊາດ ເພື່ອສ້າງພື້ນຖານເສດຖະກິດ ເປັນຫລັກມາເປັນ ການພັດນາທີ່ສຸມໃສ່ “ຄົນ” ເປັນໃຈກາງ ຫລື ເປັນເປົ້າໝາຍສຸດທ້າຍ ຂອງການພັດທະນາ ພ້ອມທັງປັບປຸງປ່ຽນແປງ ຮູບແບບການວາງແຜນ, ການຊຸກຍູ້ຕິດຕາມ ແລະ ປະເມີນຜົນການຈັດຕັ້ງປະຕິບັດ ແຜນແບບກວມລວມ ທີ່ມີຄວາມເຊື່ອມໂຍງ, ປະສານສົມທົບແໜ້ນ ລະຫວ່າງ ຂະແໜງການ ແລະ ທ້ອງຖິ່ນໃຫ້ຫລາຍຂຶ້ນ; ປັບປ່ຽນວິທີການພັດທະນາ ໂດຍສຸມໃສ່ການພັດທະນາ ທີ່ເພີ່ມປະສິດທິພາບຂອງບຸກຄົນ ໃຫ້ສູງຂຶ້ນທາງຮ່າງກາຍ, ຈິດໃຈ ແລະ ສະຕິປັນຍາເພື່ອໃຫ້ກາຍເປັນ ທຶນມະນຸດທີ່ມີຄຸນນະພາບ, ສາມາດປັບໂຕ ໃຫ້ເຂົ້າກັບສະພາບ ການຜັນແປຕ່າງໆ ໄດ້ຢ່າງຮອບດ້ານ.
ສອງ. ປົກປັກຮັກສາສະພາບ ແວດລ້ອມຢ່າງເຂັ້ມແຂງ ແລະຈິງຈັງ; ຕ້ອງບຸກທະລຸຈິນຕະນາ ການດ້ານສິ່ງແວດລ້ອມ, ຕ້ອງເດັດດ່ຽວຕ້ານກັບ ການຝືນກົດເກນທໍາມະຊາດ, ຄົນກັບສິ່ງແວດລ້ອມ ຕ້ອງເປັນມິດຕໍ່ກັນ, ໃນນັ້ນກະສິກໍາ-ປ່າໄມ້ ແລະ ຊົນນະບົດ ແມ່ນສິ່ງທີ່ຕັດແຍກ ອອກຈາກກັນບໍ່ໄດ້ (ຊຸມຊົນ, ປ່າໄມ້, ແຫລ່ງນໍ້າ, ບ່ອນທໍາການຜະລິດ-ທໍາມາຫາກິນ)....ອັນຮີບດ່ວນໃນຊຸມປີຕໍ່ໜ້ານີ້ ຕ້ອງໄດ້ດໍາເນີນການຈັດສັນປ່າໄມ້, ບ່ອນທໍາການຜະລິດ ແລະ ບ່ອນຢູ່ອາໄສໃຫ້ເໝາະສົມ ແລະ ມີຄວາມກົມກຽວ... ນີ້ແມ່ນການກໍານົດ ແລະ ຜັນຂະຫຍາຍຢ່າງແຂງແຮງ ການອະນຸລັກ ແລະ ຟື້ນຟູປ່າໄມ້, ປົກປັກຮັກສາແຫລ່ງນໍ້າ ແລະ ຄວາມສົມດູນຂອງ ລະບົບນິເວດຄືນໃໝ່ ໃຫ້ກັບຄືນມາມີຊີວິດຊີວາຕື່ມອີກ.
ສາມ. ພັດທະນາຄົນລາວທຸກດ້ານ ແລະ ສ້າງສັງຄົມ ທີ່ປະຊາຊົນເປັນເຈົ້າ, ສະເໝີພາບ, ຍຸຕິທໍາ ແລະ ສີວິໄລ; ຈຸດໝາຍລວມ ຕ້ອງນຳພາພັດທະນາຄົນລາວ ໃຫ້ມີຄວາມພ້ອມທຸກດ້ານ ເປັນບັນຫາໃຈກາງໃນການສ້າງ ກຳລັງຊຸກຍູ້ໃນເງື່ອນໄຂໃໝ່ ແລະ ເຮັດໃຫ້ການພັດທະນາ ເສດຖະກິດ ສົມຄູ່ກັບການພັດທະນາສັງຄົມ; ການສ້າງຄວາມຈະເລີນ ແລະ ຄວາມຢູ່ດີກິນດີທາງວັດຖຸ ກັບການສ້າງຄວາມສີ ວິໄລທາງຈິດໃຈ ແລະ ການປົກປັກຮັກສາສິ່ງແວດລ້ອມ, ເອົາໃຈໃສ່ປັບປຸງຊີວິດ ການເປັນຢູ່ຂອງປະຊາຊົນ, ຮັບປະກັນໃຫ້ປະຊາຊົນລາວບັນດາເຜົ່າ ສາມາດຊົມໃຊ້ໝາກຜົນ ຂອງການປ່ຽນແປງໃໝ່ ກໍ່ຄືການພັດທະນາ ຮ່ວມກັນຢ່າງຍຸຕິທຳ; ປັບປຸງກໍ່ສ້າງລະບຽບການ, ກົນໄກໃຫ້ແກ່ການແກ້ໄຂ ຂໍ້ຂັດແຍ່ງຕ່າງໆໃນສັງຄົມ ຢ່າງເໝາະສົມ; ສົ່ງເສີມຄ່ານິຍົມ ທີ່ກ້າວໜ້າຂອງສັງຄົມ ໃຫ້ໄປຕາມທິດທາງການ ພັດທະນາແບບຍືນຍົງ ກໍຄືຈຸດໝາຍສັງຄົມນິຍົມ.
ສີ່.ເພີ່ມທະວີການຍົກລະດັບ ຄວາມສາມາດການປົກປ້ອງອະທິປະໄຕ, ຮັກສາສະຖຽນລະພາບ ດ້ານການເມືອງ ແລະ ຄວາມສະຫງົບສຸກຂອງສັງຄົມ ໃຫ້ໜັກແໜ້ນ; ສືບຕໍ່ບູລະນະອໍານາດລັດ ໃຫ້ເຂັ້ມແຂງ ແລະ ມີປະສິດທິພາບ; ຮັບປະກັນໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍລັດຖະທໍາມະນູນ ແລະ ກົດໝາຍ ນັບມື້ມີປະສິດທິຜົນ, ສັກສິດ ແລະ ເຂັ້ມງວດ; ສ້າງລັດປະຊາທິປະໄຕປະຊາຊົນ ເປັນລັດແຫ່ງການບໍລິການ, ຮັບໃຊ້ ແລະ ຕອບສະໜອງ ຄວາມຮຽກຮ້ອງ ຕ້ອງການດ້ານສິດ, ຜົນປະໂຫຍດອັນຊອບທໍາ ກໍ່ຄືດ້ານຄວາມໝັ້ນຄົງ, ປອດໄພໃນຊີວິດ ແລະ ຊັບສິນຂອງປະຊາຊົນ.
ຫ້າ.ເພີ່ມທະວີການເປັນຄັນທຸງ ເຕົ້າໂຮມຄວາມສາມັກຄີປອງດອງ ທົ່ວປວງຊົນລາວທັງຊາດລວມ ທັງພີ່ນ້ອງຄົນເຊື້ອຊາດລາວ ຢູ່ຕ່າງປະເທດ; ສືບທອດ ແລະ ເສີມຂະຫຍາຍມູນເຊື້ອ ອັນມີກຽດສະຫງ່າ ຂອງແນວລາວອິດສະຫລະ, ແນວລາວຮັກຊາດ ໃນເມື່ອກ່ອນ; ປຸກລະດົມກໍາລັງແຮງ ທົ່ວສັງຄົມປະຕິບັດແນວທາງ ນະໂຍບາຍຂອງພັກ ແລະ ແຜນພັດທະນາ ເສດຖະກິດ-ສັງຄົມແຫ່ງຊາດ ໃຫ້ປາກົດຜົນເປັນຈິງ, ເຂົ້າຮ່ວມພາລະກິດປົກປັກຮັກສາ ແລະ ພັດທະນາສ້າງສາປະເທດຊາດ; ຍູ້ຂະບວນການ ແຂ່ງຂັນຮັກຊາດ ແລະ ພັດທະນາ ຕິດພັນກັບການແກ້ໄຂ ຄວາມທຸກຍາກ ແລະ ສ້າງຄວາມຮັ່ງມີເຂັ້ມແຂງ ໃຫ້ແກ່ປະຊາຊົນລາວບັນດາເຜົ່າ.
ຫົກ. ເສີມຂະຫຍາຍມູນເຊື້ອ ຄວາມສາມັກຄີກັບພັກ ອ້າຍນ້ອງຍຸດທະສາດ ກໍ່ຄືບັນດາກໍາລັງການ ເມືອງຂອງຂະບວນການທີ່ກ້າວໜ້າ ໃນໂລກເພື່ອເສີມສ້າງ ຄວາມເຂົ້າອົກເຂົ້າໃຈ, ສົ່ງເສີມສັນຕິພາບ, ມິດຕະພາບ ແລະ ສະຖຽນລະພາບໃນພາກພື້ນ ແລະ ໃນໂລກ; ສືບຕໍ່ປະຕິບັດ ການຮ່ວມມືກັບສາກົນ, ຄູ່ຮ່ວມ ພັດທະນາຢ່າງເປັນເຈົ້າການ, ນໍາຜົນປະໂຫຍດຕົວຈິງມາ ໃຫ້ແກ່ປະເທດຊາດ.
ເຈັດ. ເອົາໃຈໃສ່ປັບປຸງການຈັດຕັ້ງ, ລະບຽບວິໄນ ແລະ ຮັບປະກັນບົດບາດ ນຳພາຕົວຈິງອັນເຂັ້ມແຂງ ຂອງພັກ; ຮັບປະກັນບົດບາດການນໍາພາ ທີ່ເຂັ້ມແຂງສົມເປັນກອງນໍາໜ້າ, ເປັນການຈັດຕັ້ງການເມືອງສູງສຸດ ຂອງຊົນຊັ້ນກໍາມະກອນລາວ, ເປັນຕົວແທນ ທີ່ຈົ່ງຮັກພັກດີຕໍ່ສິດ ແລະ ຜົນປະໂຫຍດຂອງຊົນຊັ້ນກໍາມະກອນ, ຊາວຜູ້ອອກແຮງງານ ແລະ ປະເທດຊາດລາວ. ໃນຊຸມປີຕໍ່ໜ້ານີ້ ຕ້ອງຖືເອົາໜ້າທີ່ ກໍ່ສ້າງພັກເຮົາເປັນໜ້າທີ່ແຖວໜ້າ, ເພີ່ມທະວີການກໍ່ສ້າງພັກປອດໃສ, ເຂັ້ມແຂງ ແລະ ໜັກແໜ້ນ, ຮັບປະກັນຄວາມສາມາດນໍາພາ ແລະ ກໍາອໍານາດຂອງພັກ; ສຸມໃສ່ປັບປຸງການ ຈັດຕັ້ງປອດໃສ, ໜັກແໜ້ນ, ມີລະບຽບວິໄນເຂັ້ມງວດ. ສືບຕໍ່ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານ ຊຶ່ງແມ່ນປັດໄຈ ຕັດສິນຜົນໄດ້ຜົນເສຍ ຂອງການປະຕິວັດ ທັງແມ່ນຂອດກຸນແຈສໍາຄັນ ຂອງວຽກງານກໍ່ສ້າງພັກ ແລະ ລະບົບການເມືອງ; ໃນສະພາບການໃໝ່ ທີ່ຜັນແປຢ່າງໄວວາ ແລະ ສັບສົນ ຊຶ່ງກະທົບຕໍ່ພະນັກງານ ແລະ ການກໍ່ສ້າງຖັນແຖວພະນັກງານ ຂອງພັກເຮົານັ້ນ, ຕ້ອງຖືເອົາ ການກໍ່ສ້າງພະນັກງານ ແລະ ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານ ເປັນໜ້າທີ່ແຖວໜ້າຂອງທົ່ວພັກ.
ເພື່ອສືບຕໍ່ເສີມຂະຫຍາຍ ທາດແທ້ມູນເຊື້ອອັນດີງາມຂອງພັກ, ເຮັດລ້ອນພາລະກຳ ປະຫວັດສາດອັນຍິ່ງໃຫຍ່ ທີ່ປະຊາຊົນມອບໝາຍໃຫ້. ອີກເທື່ອໜຶ່ງ, ຂ້າພະເຈົ້າ ຕາງໜ້າໃຫ້ພັກ-ລັດ ຮຽກຮ້ອງມາຍັງພະນັກງານ, ສະມາຊິກພັກ, ນັກຮົບທຸກສະຫາຍ ຈົ່ງອອກແຮງທະນຸບຳລຸງ ແລະ ຮັກສາຄຸນສົມບັດສິນທຳປະຕິວັດ, ຄຸນທາດການເມືອງເພີ່ມທະວີ ຄວາມສາມັກຄີ ເປັນເອກະພາບພາຍໃນ, ຍົກລະດັບຄວາມຮູ້ ຄວາມສາມາດທຸກດ້ານ ໃຫ້ສູງຂຶ້ນຕື່ມອີກ, ໃກ້ຊິດຕິດແໜ້ນ ແລະ ຊ່ວຍເຫລືອ ປະຊາຊົນຢູ່ສະເໝີ; ພະຍາຍາມຮຽນຮູ້ໃນພຶດຕິກຳ, ປັບປຸງດັດແປງ ວິທີນຳພາໃຫ້ທັນການ, ຍົກສູງບົດບາດຄວາມສາມາດນຳພາ ແລະ ລັກສະນະນໍາໜ້າຂອງພັກ, ຂອງສະມາຊິກພັກ; ຍົກສູງຄວາມຮັບຜິດຊອບ, ເສີມຂະຫຍາຍມານະຈິດປະຕິວັດ, ບຸກບືນສູ້ຊົນເຮັດລ້ອນ ໜ້າທີ່ວຽກງານທີ່ພັກ ແລະ ລັດມອບໝາຍໃຫ້; ເຊີດຊູກຽດ ແລະ ອິດທິພົນຂອງພັກເຮົາຂຶ້ນຢ່າງບໍ່ຢຸດຢັ້ງ ເພື່ອໃຫ້ສົມກັບຄວາມໄວ້ເນື້ອເຊື່ອໃຈ ຂອງປະຊາຊົນບັນດາເຜົ່າ.
ບັນດາສະຫາຍພະນັກງານ ອາວຸໂສປະຕິວັດ, ຜູ້ທີ່ເຄີຍຊຸບຫລໍ່ໃນແປວໄຟແຫ່ງການ ຕໍ່ສູ້ກູ້ຊາດກໍ່ ຄືມີບົດຮຽນປະຕິວັດ ຈົ່ງຕັ້ງໜ້າເສີມຂະຫຍາຍ ມູນເຊື້ອເດັດດ່ຽວກ້າແກ່ນ, ຄວາມເດັດຂາດໜັກແໜ້ນຂອງຕົນ ປະກອບສ່ວນ ເຂົ້າໃນການສຶກສາ ອົບຮົມ ຈິດໃຈຮັກຊາດແພງເຊື້ອ, ທັດສະນະຫລັກໝັ້ນປະຕິວັດໃຫ້ ແກ່ຊາວໜຸ່ມເຍົາວະຊົນ, ເປັນຄັນທຸງເຕົ້າໂຮມຄວາມສາມັກຄີ ໃນໝູ່ພະນັກງານ ແລະ ປະຊາຊົນ, ເປັນແບບຢ່າງນຳໜ້າພາຮຸ້ນລູກຮູ້ນຫລານ ເຂົ້າຮ່ວມໃນພາລະກິດ ປົກປັກຮັກສາ ແລະ ສ້າງສາພັດທະນາ ບ້ານເມືອງຂອງຕົນ.
ຮຽກຮ້ອງມາຍັງ ຖັນແຖວພະນັກງານ, ສະມາຊິກພັກທີ່ໜຸ່ມແໜ້ນທຸກຖ້ວນໜ້າ ຈົ່ງເຊີດຊູມານະຈິດປະຕິວັດ, ຕັ້ງໜ້າຄົ້ນຄວ້າຮ່ຳຮຽນເອົາຄວາມຮູ້ທາງ ດ້ານວິທະຍາສາດ-ເຕັກນິກ, ຕະລຸມບອນເຂົ້າໃນສະໜາມຮົບ ຕໍ່ສູ້ຕ້ານຄວາມທຸກ ຍາກຫລ້າຫລັງ, ຄວາມຫຍໍ້ທໍ້ ແລະ ຄວາມອະຍຸຕິທໍາໃນສັງຄົມ ເຮັດໃຫ້ພັກເຮົາສືບຕໍ່ ເຂັ້ມແຂງເຕີບໃຫຍ່ຂຶ້ນ ເພື່ອນຳເອົາປະເທດຊາດ ອັນແສນຮັກຂອງພວກເຮົາ ກ້າວສູ່ຄວາມມັ່ງຄັ່ງເຂັ້ມແຂງ.
ຮຽກຮ້ອງມາຍັງປະຊາຊົນລາວບັນດາເຜົ່າ ຈົ່ງອອກແຮງເສີມຂະຫຍາຍ ມູນເຊື້ອຮັກຊາດ, ຮັກລະບອບໃໝ່, ມູນເຊື້ອສາມັກຄີປອງດອງ, ປະຕິບັດສິດເປັນເຈົ້າປະເທດຊາດ ຢ່າງແຂງແຮງ, ເປັນເຈົ້າການເຂົ້າຮ່ວມຕິດຕາມ, ກວດກາການ ເຄື່ອນໄຫວຂອງພັກ ແລະ ຂອງສະມາຊິກພັກຢ່າງເປັນປົກກະຕິ; ຊ່ວຍເຫລືອພັກ ແລະ ສະມາຊິກພັກ ເສີມຂະຫຍາຍຈຸດດີ, ດັດແປງ, ແກ້ໄຂຈຸດອ່ອນ ແລະ ຂໍ້ຂາດຕົກບົກພ່ອງ ໃຫ້ມີການຫັນປ່ຽນໃໝ່ທີ່ຈະແຈ້ງ.
ອີງຕາມການລະບາດ ຂອງພະຍາດໂຄວິດ 19 ທີ່ພວມແຜ່ຂະຫຍາຍ ໄປສູ່ຫລາຍປະເທດໃນໂລກ ເຮັດໃຫ້ມີຜູ້ຄົນເສຍຊີວິດຫລາຍພັນຄົນ ແລະ ມີຜູ້ຕິດເຊື້ອ 2 ແສນກວ່າຄົນ ຊຶ່ງເປັນໄພອັນຕະລາຍຮ້າຍແຮງຕໍ່ຊີວິດ ແລະ ຊັບສິນຂອງມວນມະນຸດ. ສຳລັບລາວເຮົາເຖິງວ່າຍັງບໍ່ມີ ການລາຍງານມີຜູ້ຕິດເຊື້ອ ແລະ ເສຍຊີວິດຈາກພະຍາດ ດັ່ງກ່າວກໍ່ຕາມ, ແຕ່ຢູ່ໃນສະພາບຄວາມສ່ຽງສູງນັ້ນ, ຂ້າພະເຈົ້າ ຂໍຮຽກຮ້ອງມາຍັງ ພົນລະເມືອງລາວທຸກຖ້ວນໜ້າ ຕະຫລອດຮອດຊາວຕ່າງປະເທດ ທີ່ດຳລົງຊີວິດຢູ່ ສປປ ລາວ ຈົ່ງມີສະຕິເປັນເຈົ້າຕົນເອງ ລະມັດລະວັງ ປ້້ອງກັນພະຍາດດັ່ງກ່າວ ຢ່າງມີຄວາມຮັບຜິດຊອບ, ເອົາໃຈໃສ່ຮ່ວມມື ແລະ ປະຕິບັດຕາມຢ່າງເຂັ້ມງວດ ມາດຕະການຕ່າງໆ ທີ່ຄະນະສະເພາະກິດປ້ອງກັນ ແລະ ແກ້ໄຂພະຍາດໂຄວິດ 19 ໄດ້ວາງອອກ. ທັງນີ້ກໍ່ເພື່ອພ້ອມກັນຜ່ານຜ່າວິກິດໂຄວິດ 19 ນີ້ ໃຫ້ໄດ້ດີທີ່ສຸດເທົ່າທີ່ຈະເຮັດໄດ້ ເພື່ອປະໂຫຍດສູງສຸດຂອງທຸກໆຄົນ.
ພວກເຮົາ ເຊື່ອໝັ້ນຢ່າງໜັກແໜ້ນວ່າ: ໜ້າປະຫວັດສາດຍຸກໃໝ່ ຂອງຊາດລາວ ທີ່ຖືກສ້າງຂຶ້ນດ້ວຍການເສຍ ສະລະອັນໃຫຍ່ຫລວງ ແລະ ເຕັມໄປດ້ວຍວິລະກໍາ ອັນອົງອາດກ້າແກ່ນ ຊຶ່ງປະຊາຊົນລາວທັງຊາດ ມີຄວາມເອກອ້າງ ທະນົງໃຈນັ້ນ ຈະໄດ້ຮັບການສືບຕໍ່ ເສີມຂະຫຍາຍ ແລະ ຍົກລະດັບດ້ວຍຄວາມຈົງຮັກພັກດີ ຂອງສະມາຊິກພັກ, ພະນັກງານ ແລະ ປວງຊົນລາວ ຮຸ່ນສືບທອດຕໍ່ໆໄປ.
ພັກປະຊາຊົນປະຕິວັດລາວ ທີ່ມີກຽດສະຫງ່າ ໝັ້ນຍືນ !
ຂໍຂອບໃຈ !
（ແຫຼ່ງຂໍ້ມູນ： ຂປລ）
