ການຊ່ວຍເຫຼືອຄັ້ງນີ້ປະກອບມີ ນ້ຳມັນພືດ 36 ໂຕນ ແລະ ປາກະປ໋ອງ 110 ໂຕນ ເພື່ອໃຫ້ອົງການດັ່ງກ່າວ ນຳໄປຈັດຕັ້ງປະຕິບັດເຂົ້າໃນວຽກງານສ້າງຄວາມເຂັ້ມແຂງໃຫ້ແກ່ຊຸມຊົນ ແລະ ຮັບມືກັບການປ່ຽນແປງຂອງດິນຟ້າອາກາດ ແລະ ການຕອບສະໜອງທາງດ້ານສະບຽງອາຫານໃນລາວ ໃຫ້ມີຄວາມໝັ້ນຄົງ ໂດຍສະເພາະການຊ່ວຍເຫຼືອຜູ້ທີ່ໄດ້ຮັບຜົນກະທົບໃນບັນດາແຂວງພາກເໜືອຂອງລາວ ໄດ້ຢ່າງທົ່ວເຖິງ.
 |
ທ່ານ ຢານ ເດວບາເຣີ ມອບຂອງຂວັນ ໃຫ້ຜູ້ທີ່ໄດ້ຮັບຜົນກະທົບໃນບັນດາແຂວງພາກເໜືອຂອງລາວ. (ພາບ: vientinemai)
ທ່ານ ເອກອັກຄະຣາຊະທູດ ວາລາດີເມຍ ການີລິນ ກ່າວວ່າ: ການສະໜັບສະໜູນຂອງຣັດເຊຍແມ່ນສ່ວນໜຶ່ງ ຂອງການຂະຫຍາຍການພົວພັນລະຫວ່າງ ສປປ ລາວ ແລະ ຣັດເຊຍ ພ້ອມນັ້ນ ຣັດເຊຍ ຍັງໃຫ້ຄວາມສຳຄັນສູງໃນການໃຫ້ການຊ່ວຍເຫຼືອດ້ານມະນຸດສະທຳ ແລະ ໄພພິບັດໃຫ້ແກ່ບັນດາເຂດທີ່ປະສົບໄພພິບັດໃນໂລກ ໂດຍສະເພາະໃນປີ 2018 ໄດ້ສະໜອງເຄື່ອງຊ່ວຍເຫຼືອ ກໍຄື ປະເພດອາຫານພື້ນຖານຫຼາຍກວ່າ 36 ໂຕນ ໃຫ້ແກ່ປະຊາຊົນລາວທີ່ໄດ້ຮັບຜົນກະທົບຈາກໄພນ້ຳຖ້ວມທີ່ຮ້າຍແຮງຢູ່ແຂວງ ອັດຕະປື ແລະ ອື່ນໆ.
ທ່ານ ຢານ ເດວບາເຣີ ກ່າວຕື່ມວ່າ: ຣັດເຊຍ ໄດ້ໃຫ້ການຊ່ວຍເຫຼືອຜ່ານອົງການອາຫານໂລກ ຫຼາຍກວ່າ 1 ລ້ານໂດລາສະຫະລັດ ໃນນັ້ນ ອົງການອາຫານໂລກໄດ້ນຳໃຊ້ການຊ່ວຍເຫຼືອດັ່ງກ່າວຈັດຊື້ນ້ຳມັນພືດ ປາກະປ໋ອງ ແລະ ວັດສະດຸກໍ່ສ້າງ ເຊິ່ງເຄື່ອງຊ່ວຍເຫຼືອເຫຼົ່ານີ້ແມ່ນໄດ້ເປັນປະໂຫຍດໃຫ້ແກ່ປະຊາຊົນລາວຫຼາຍກວ່າ 27.500 ຄົນ ໃນບັນດາບ້ານເປົ້າໝາຍທີ່ໄດ້ຮັບຜົນກະທົບຈາກໄພນ້ຳຖ້ວມ ໄພແຫ້ງແລ້ງ ແລະ ການລະບາດຂອງສັດຕູພືດໃນສອງປີທີ່ຜ່ານມາອີກດ້ວຍ.
（ແຫຼ່ງຂໍ້ມູນ： vientinemai）
