ລັດ ຂະຫຍາຍການນໍາໃຊ້ລະບົບເອເລັກໂຕຣນິກ ຢູ່ດ່ານສາກົນ ຄຸ້ມຄອງລາຍຮັບ

13:18 | 04/02/2020

ກະຊວງການເງິນ ໄດ້ເປີດການນໍາໃຊ້ລະບົບເອເລັກໂຕຣນິກ ບໍ53 ເຂົ້າໃນຈັດເກັບຄ່າທຳນຽມ ແລະ ຄ່າບໍລິການ (Easy Pass), ນັບທັງລະບົບຄຸ້ມຄອງ ພາຫະນະທ່ອງທ່ຽວ ຢ້ຽມຢາມ ແລະ ພາຫະນະຂົນສົ່ງສິນຄ້າ ຜ່ານລະບົບທະນາຄານພັດທະນາລາວ (ທພລ) ຢູ່ດ່ານພາສີສາກົນບໍ່ເຕ່ນ ແຂວງຫລວງນໍ້າທາ ໃນວັນທີ 30 ມັງກອນ 2020 ຫລັງຈາກກ່ອນນໜ້ານີ້ ໄດ້ເປີດນຳໃຊ້ລະບົບດັ່ງກ່າວ ຢູ່ ດ່ານສາກົນ ຂົວມິດຕະພາບ ລາວໄທ ແຫ່ງທີ 1 ວຽງຈັນ-ໜອງຄາຍ.

ທັງນີ້, ເປັນການຫັນ ທັນສະໄໝ ເຂົ້າໃນວຽກງານຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ຂອງລັດຖະບານ ເພື່ອຍົກລະ ດັບການບໍລິການພາກລັດ ແລະ ອໍານວຍຄວາມສະດວກ ໃຫ້ແກ່ຜູ້ໃຊ້ບໍລິການ, ນັກທ່ອງທ່ຽວ ແລະ ປະຊາຊົນໃນການຊໍາລະຄ່າທຳນຽມ-ຄ່າບໍລິການ ຜ່ານຊ່ອງທາງເຄື່ອງມືທີ່ທັນສະໄໝ ຜ່ານລະບົບທະນາຄານ.

ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ ກ່າວວ່າ: ເລີ່ມແຕ່ປີ 2018 ເປັນຕົ້ນມາ ໄດ້ພັດ ທະນາລະບົບຄຸ້ມຄອງ ຂໍ້ມູນຂ່າວສານລາຍຮັບສ່ວຍສາອາກອນ (TAXRIS) ແລະ ເຊື່ອມຕໍ່ກັບບັນດາທະນາຄານ ທຸລະກິດ ທີ່ອໍານວຍຄວາມສະດວກແກ່ ການຊໍາລະພາສີ-ອາກອນ ຜ່ານທະນາຄານ (Easy Tax ແລະ Smart Tax) ແລະ ປັດຈຸບັນການເຊື່ອມຕໍ່ລະບົບດັ່ງກ່າວ ໄດ້ຍົກລະດັບຂຶ້ນເທື່ອລະກ້າວ ເພ່ືອຮັບຮອງການເຊື່ອມຕໍ່ຫາ 5 ທະນາຄານທຸລະກິດ ແລະ ເພີ່ມຊ່ອງທາງ ການຊໍາລະ ສໍາລັບຄ່າທຳນຽມທາງ-ອາກອນທີ່ດິນ ແລະ ໃນແຜນ ປີ 2020 ຈະໄດ້ເຊື່ອມຕໍ່ຫາລະບົບຊໍາລະສະສາງທຸລະກໍາຍ່ອຍ (ACH) ຂອງທະນາຄານແຫ່ງ ສປປ ລາວ ເພື່ອລວມສູນການເຊື່ອມຕໍ່ ຊໍາລະສະສາງທະນາຄານທຸລະກິດທັງໝົດ ໃນຂອບເຂດທົ່ວປະເທດ. ການຄຸ້ມຄອງວຽກງານການເງິນແຫ່ງລັດ ແມ່ນການຫັນໃຫ້ ໄປສູ່ທັນສະໄໝ ເປັນຍຸດທະສາດໜຶ່ງທີ່ສຳຄັນ ຂອງລັດຖະບານ ແລະ ໄດ້ຮັບການເອົາໃຈໃສ່ຊີ້ນໍາຢ່າງໃກ້ຊິດ ຈາກຄະນະນໍາກະຊວງການເງິນ ຊຶ່ງສະ ແດງອອກໃນການ ຮັບຮອງ ແຜນພັດທະນາວຽກງານການເງິນ ໃຫ້ເປັນທັນສະໄໝ ຂອງແຜນຍຸດທະສາດທີ 7 ວິໄສທັດຮອດປີ 2030 ເພື່ອເຮັດໃຫ້ການຄຸ້ມຄອງ ງົບປະມານແຫ່ງລັດ (ລາຍຮັບ-ລາຍຈ່າຍ) ມີຄວາມທັນສະໄໝ, ວ່ອງໄວ, ໂປ່ງໃສ ແລະ ກວດສອບໄດ້.

ໃນໄລຍະຕໍ່ມາ, ກະຊວງ ການເງິນ ໄດ້ຜັນຂະຫຍາຍການຄຸ້ມຄອງ ການເກັບລາຍຮັບພາສີ-ອາກອນ ແລະ ຄຸ້ມຄອງງົບປະມານແຫ່ງລັດ ແບບທັນສະໄໝ ໂດຍຮ່ວມມືກັບ ທພລ ພັດທະນາລະບົບ EasyPass ແລະ ບໍລິສັດ ຄໍາປະເສີດຄອມພິວເຕີ ຈໍາກັດ ຜູ້ດຽວ ພັດທະນາລະບົບຄຸ້ມຄອງ ພາຫະນະທ່ອງທ່ຽວຢ້ຽມຢາມ ແລະ ພາຫະນະຂົນສົ່ງສິນຄ້າ ດ້ວຍລະບົບອີເລັກໂຕຣນິກ ບໍ53 ຊຶ່ງເປັນຈຸດເລີ່ມຕົ້ນ ໃນການນໍາໃຊ້ເຄື່ອງມືທີ່ທັນສະໄໝ ເຂົ້າໃນການລວມສູນການເກັບຄ່າທຳນຽມ, ຄ່າບໍລິການທາງ ດ້ານວິຊາການ ແລະ ກອງທຶນຂອງລັດ ໃນຂອບເຂດທົ່ວປະເທດ ແລະທັງອຳນວຍຄວາມສະດວກໃຫ້ແກ່ຜູ້ໃຊ້ບໍລິການ, ນັກທ່ອງທ່ຽວເດີນທາງເຂົ້າ-ອອກ ສປປ ລາວ ໃນການຊໍາລະຜ່ານຊ່ອງທາງ ເຄື່ອງມືທີ່ທັນສະໄໝ ຜ່ານລະບົບທະນາຄານ.

ທ່ານ ອາຄົມ ປຣະເສີດ ຜູ້ອຳນວຍການໃຫຍ່ ທພລ ໄດ້ໃຫ້ເຫດຜົນວ່າ: ການເລີ່ມຕົ້ນສຳຫລວດຂໍ້ມູນ ດ້ວຍການຄົ້ນຄ້ວາ ແລະ ພັດທະນາລະບົບຕາມວັດຖຸປະສົງ ຂອງກະຊວງການເງິນ ມີເປົ້າໝາຍພັດທະນາ ໃຫ້ສາມາດລວມສູນຄ່າທຳນຽມ ແລະ ຄ່າບໍລິການ ຢູ່ດ່ານສາກົນ ທີ່ສາມາດຕິດຕາມລາຍຮັບ ງົບປະມານໄດ້ຕະຫລອດ 24 ຊົ່ວໂມງ ຜ່ານຄອມພີວເຕີ ແລະ ໂທລະສັບມືຖື. ຜ່ານການທົດລອງ 7 ເດືອນຜ່ານມາ ມີຫລາຍອັນພົ້ນເດັ່ນ ໃນການເກັບລາຍຮັບ ເຂົ້າງົບປະມານສູນກາງ ມີລັກສະນະເພີ່ມຂຶ້ນ ໃນແຕ່ລະເດືອນ ແລະ ຈຸດເດັ່ນທີ່ສຳຄັນ ໃນການພັດທະນາລະບົບ Easy Pass ກໍແມ່ນສປປ ລາວ ເປັນປະເທດໃນແຖວໜ້າຂອງໂລກ ທີ່ສາມາດຊຳລະ ຄ່າທຳນຽມວິຊາກັບດ່ານ ແບບບໍ່ໃຊ້ເງິນສົດດ້ວຍລະບົບ ແອັບ AliPay ຊຶ່ງເປັນ Application ຍອດນິຍົມທີ່ສຸດຂອງປະຊາຊົນຈີນ.

ເພື່ອສະໜອງແຜນຍຸດທະຍາດ ຫັນເປັນທັນສະໄໝ ໃນການເກັບຄ່າທຳນຽມ ແລະ ຄ່າບໍລິການຢູ່ດ່ານສາກົນ Easy Pass, ທພລ ມີແຜນພັດທະນາລະບົບ ໃນໄລຍະທີ 2 ໂດຍຈະສູ້ຊົນ ໃຫ້ສຳເລັດພາຍໃນເດືອນເມສາ ປີ 2020 ແລະ ອຳນວຍຄວາມສະດວກ ໃຫ້ແກ່ການເດີນທາງດ້ວຍ ການນຳໃຊ້ຕູ້ KIOSK ເພື່ອຮອງຮັບ ການຮັບຊຳລະຄ່າທຳນຽມ ແລະ ຄ່າບໍລິການໃຫ້ຫລາຍຊ່ອງທາງ ເພື່ອຫລຸດຜ່ອນການນຳໃຊ້ເງິນສົດ ໂດຍການຊຳລະຜ່ານ LDB Trust, LDB Wallet ແລະ ການຮັບຊຳລະດ້ວຍບັດສາກົນ ມີບັດ VISA, MASTER ແລະ ອື່ນໆ.

（ແຫຼ່ງຂໍ້ມູນ： ຂປລ）