ກ່າວຄຳເຫັນສະຫຼຸບກອງປະຊຸມ, ທ່ານ ເລກຸ໊ຍເວືອງ ຮອງລັດຖະມົນຕີກະຊວງຕຳຫຼວດຫວຽດນາມໃຫ້ຮູ້ວ່າ: ກອງປະຊຸມໄດ້ແບ່ງປັນຄວາມວິຕົກກັງວົນຕໍ່ສະພາບການຜະລິດ, ຄ້າຂາຍ, ຂົນສົ່ງຢາເສບຕິດຢ່າງຜິດກົດໝາຍ, ພິເສດແມ່ນຢາເສບຕິດປະເພດປະສົມແລະທາດກ່ອມປະສາດຊະນິດໃໝ່.
 |
ພິທີປິດກອງປະຊຸມຂັ້ນລັດຖະມົນຕີລະຫວ່າງກຳປູເຈຍ-ລາວ-ຫວຽດນາມກ່ຽວກັບການສະກັດກັ້ນ, ຕ້ານຢາເສບຕິດຄັ້ງທີ 18. (ພາບ: vov.vn)
ຕາມທ່ານຮອງລັດຖະມົນຕີເລກຸ໊ຍເວືອງແລ້ວ, ສະພາບການດັ່ງກ່າວຈຳເປັນຕ້ອງເພີ່ມທະວີການຮ່ວມມືແລະສຸມໃສ່ຊີ້ນຳຢ່າງແຮງ, ບັນດາເຈົ້າໜ້າທີ່ຂອງແຕ່ລະປະເທດ ຕ້ອງມີມາດຕະການແກ້ໄຂທີ່ສອດຄ່ອງ ແລະ ເໝາະສົມ, ຮັບມືກັບຜົນຮ້າຍຂອງອາດຊະຍາກຳຢາເສບຕິດຢູ່ແຕ່ລະປະເທດແລະໃນພາກພື້ນ, ທ່ານເລກຸ໊ຍເວືອງກ່າວວ່າ: ພວກເຮົາໄດ້ໃຫ້ບູລິມາສິດ, ສຸມໃສ່ຊີ້ນຳ: ເພີ່ມທະວີແບ່ງປັນຂໍ້ມູນຂ່າວສານ, ແລກປ່ຽນບົດຮຽນ; ຍົກສູງປະສິດທິຜົນບັນດາມາດຕະການຄວບຄຸມຊາຍແດນ; ປະຕິບັດການລາດຕະເວນ, ຄວບຄຸມກວດກາແລະສ້າງຄະນະຮັບຜິດຊອບສະເພາະຄະດີໃນການຕໍ່ສູ້ຮ່ວມກັນ; ສົມທົບກັນກວດກາແລະຈັບກຸມກຸ່ມທີ່ເປັນເປົ້າໝາຍ; ຍົກສູງປະສິດທິຜົນການເຄື່ອນໄຫວຂອງຫ້ອງການຕິດຕໍ່ຜ່ານຊາຍແດນ (BLO); ພິຈາລະນາສ້າງຕັ້ງຫ້ອງການຕິດຕໍ່ຫຼັງໃຫມ່ຢູ່ໃນບັນດາບໍລິເວນຊາຍແດນທີ່ມີຄວາມສ່ຽງສູງດ້ານອາດຊະຍາກຳ ແລະຄ້າຂາຍຢາເສບຕິດລະຫວ່າງບັນດາປະເທດ. ນີ້ກໍ່ແມ່ນການກຳນົດທິດແລະບູລິມະສິດການເຄື່ອນໄຫວທີ່ສຳຄັນເພື່ອແນໃສ່ເຮັດໃຫ້ການພົວພັນຮ່ວມມືລະຫວ່າງ 3 ປະເທດກ້າວເຂົ້າສູ່ລວງເລິກ, ມີປະສິດທິຜົນ, ຕອບສະໜອງໄດ້ຕາມຄວາມຮຽກຮ້ອງຕ້ອງການດ້ານພາວະວິໄສຂອງຂະບວນການຕໍ່ສູ້ຕ້ານຢາເສບຕິດໃນປັດຈຸບັນ.
ກ່ອນນັ້ນ, ໃນຕອນເຊົ້າວັນທີ 11 ກັນຍາ 2019, ທີ່ຮ່າໂນ້ຍ ສສ ຫວຽດນາມ ໄດ້ດຳເນີນກອງປະຊຸມ ສາມຝ່າຍ ແລະ ສອງຝ່າຍ ຂັ້ນລັດຖະມົນຕີລະຫວ່າງ 3 ປະເທດ ຫວຽດນາມ - ກຳປູເຈຍ - ລາວກ່ຽວກັບການຮ່ວມມືປາບປາມ, ຕ້ານຢາເສບຕິດຄັ້ງທີ 18. ກ່າວຄຳເຫັນໄຂກອງປະຊຸມ, ທ່ານໂຕເລິມ ລັດຖະມົນຕີກະຊວງຕຳຫຼວດຫວຽດນາມຊີ້ແຈ້ງວ່າ ນັບແຕ່ປີ 1998, ກົນໄກຮ່ວມມື 3 ຝ່າຍ ແລະ ສອງຝ່າຍກ່ຽວກັບການປາບປາມ, ຕ້ານຢາເສບຕິດລະຫວ່າງ ສາມປະເທດ ຫວຽດນາມ, ກຳປູເຈຍ ແລະ ລາວ ໄດ້ສ້າງຕັ້ງຂຶ້ນ ແລະ ພັດທະນາ. ສາມປະເທດໄດ້ເຫັນດີເປັນເອກະພາບປະຕິບັດເປົ້າໝາຍປ້ອງກັນ ອາຊຽນໃນການປາບປາມ, ຕ້ານຢາເສບຕິດທີ່ຜິດກົດໝາຍໃນໄລຍະ 2016 - 2025, ບໍ່ມີຄວາມຜ່ອນສັ້ນຜ່ອນຍາວກັບຢາເສບຕິດ, ຢຶດໝັ້ນ ການປະຕິບັດວິໄສທັດອາຊຽນພາຍຫຼັງປີ 2015 ແລະ ຖືນີ້ແມ່ນເປົ້າໝາຍຂອງທັງ ສາມ ປະເທດ ຫວຽດນາມ, ລາວ ແລະ ກຳປູເຈຍ.
（ຄຳຮຸ່ງ）
