ຕອນເຊົ້າວັນທີ 21 ສິງຫາ, ທີ່ຫໍພິພິທະພັນກອງພົນໃຫຍ່ 4, ສະຖາບັນປະຫວັດສາດການທະຫານຫວຽດນາມ ສົມທົບກັບກອງບັນຊາການກອງພົນໃຫຍ່ 4 ເປີດຊຸດຝຶກອົບຮົມວິຊາການປະຫວັດສາດການທະຫານໃຫ້ແກ່ພະນັກງານຂອງກອງທັບລາດຊະວົງ ກໍາປູເຈຍ 30 ຄົນ.

ໃນໄລຍະ 1 ເດືອນ, ບັນດາຄູອາຈານທີ່ມີປະສົບການຫຼາຍຢ່າງ ແລະ ພະນັກງານຂອງສະຖາບັນປະຫວັດສາດການທະຫານຫວຽດນາມ ຈະແບ່ງປັນ 14 ຫົວເລື່ອງສະເພາະກ່ຽວກັບປະຫວັດສາດ, ປະຫວັດສາດການທະຫານ ໃຫ້ແກ່ນັກສໍາມະນາກອນກອງທັບລາດຊະວົງ ກໍາປູເຈຍ. ເນື້ອໃນຈະສຸມໃສ່ເຂົ້າບັນດາບັນຫາທິດສະດີ ແລະວິທີການຄົ້ນຄວ້າວິຊາການປະຫວັດສາດ; ປະຫວັດສາດການທະຫານ, ສະຫຼຸບສົງຄາມ, ບັນດາບົດຮຽນທີ່ຖອດຖອນມາໄດ້ຜ່ານພຶດຕິກໍາແຫ່ງການຄົ້ນຄວ້າກິດຈະກໍາ ແລະຈັດຕັ້ງກອງປະຊຸມ, ກອງປະຊຸມສໍາມະນາ, ການພິມຈໍາໜ່າຍ...

ການນໍາສະຖາບັນປະຫວັດສາດການທະຫານຫວຽດນາມ ແລະ ບັນດານັກສໍາມະນາກອນທີ່ພິທີເປີດ. (ພາບ: qdnd.vn)

ຊຸດຝຶກອົບຮົມຄັ້ງນີ້ເພື່ອແນໃສ່ບໍາລຸງ, ຍົກສູງຄວາມຮູ້, ຄວາມສາມາດ, ວິທີການ ແລະ ບົດຮຽນຄົ້ນຄວ້າປະຫວັດສາດການທະຫານ, ວຽກງານຄຸ້ມຄອງວິທະຍາສາດໃຫ້ແກ່ພະນັກງານກອງທັບລາດຊະວົງ ກໍາປູເຈຍ. ຜ່ານຊຸດຝຶກອົບຮົມຄັ້ງນີ້ຈະຊ່ວຍໃຫ້ພະນັກງານປະເທດເພື່ອນປະຕິບັດໜ້າທີ່ຄົ້ນຄວ້າວິທະຍາສາດຂະແໜງປະຫວັດສາດການທະຫານຢູ່ກົມກອງ, ທ້ອງຖິ່ນທີ່ຕົນເອງປະຕິບັດງານເປັນຢ່າງດີ.

ຕອນບ່າຍມື້ດຽວກັນ, ທີ່ກອງ 871 (ກົມໃຫຍ່ການເມືອງ), ສະຖາບັນຍຸດທະສາດປ້ອງກັນຊາດ ໄດ້ຈັດພິທີເປີດຊຸດຝຶກອົບຮົມຄົ້ນຄວ້າຍຸດທະສາດການທະຫານໃຫ້ແກ່ກອງທັບລາດຊະວົງ ກໍາປູເຈຍ ຊຸດທີ 8. ຊຸດຝຶກອົບຮົມຄັ້ງນີ້ ຈະແກ່ຍາວມາເປັນເວລາ 1 ເດືອນເພື່ອແນໃສ່ບໍາລຸງສ້າງ, ຍົກສູງລະດັບຄວາມຮູ້, ຄວາມສາມາດ ແລະວິທີການຄົ້ນຄວ້າຍຸດທະສາດການທະຫານໃຫ້ແກ່ພະນັກງານສູນຄົ້ນຄວ້າຍຸດທະສາດການທະຫານກອງທັບລາດຊະວົງ ກໍາປູເຈຍ. ຕາມທ່ານພັນເອກພິເສດ ຫງວຽນວັນເທີນ, ຮອງຫົວໜ້າສະຖາບັນຍຸດທະສາດປ້ອງກັນຊາດ ວ່າ, ໂດຍໄດ້ຊາບຊຶມ ແລະປະຕິບັດຕາມແນວທາງ, ນະໂຍບາຍການຕ່າງປະເທດຂອງພັກ ແລະລັດຫວຽດນາມ, ສະຖາບັນຍຸດທະສາດປ້ອງກັນຊາດ ໄດ້ກໍານົດວຽກງານກໍ່ສ້າງ, ບໍາລຸງໃຫ້ແກ່ພະນັກງານກອງທັບລາດຊະວົງ ກໍາປູເຈຍ ເວົ້າລວມ ແລະໃຫ້ແກ່ສູນຄົ້ນຄວ້າຍຸດທະສາດການທະຫານກອງທັບລາດຊະວົງ ກໍາປູເຈຍ ເວົ້າສະເພາະແມ່ນໜຶ່ງໃນບັນດາໜ້າທີ່ການເມືອງສໍາຄັນພິເສດຂອງສະຖາບັນ.

ພິທີເປີດຊຸດຝຶກອົບຮົມ ໃຫ້ແກ່ກອງທັບລາດຊະວົງ ກໍາປູເຈຍ. (ພາບ: qdnd.vn)

ທ່ານພັນເອກພິເສດ ຫງວຽນວັນເທີນ ປາດຖະໜາວ່າ ພະນັກງານສູນຄົ້ນຄວ້າຍຸດທະສາດການທະຫານກອງທັບລາດຊະວົງກໍາປູເຈຍ ເຂົ້າຮ່ວມຊຸດຝຶກອົບຮົມຈະແກ້ໄຂທຸກຄວາມຫຍຸ້ງຍາກ, ສຸມໃສ່ມານະພະຍາຍາມປະຕິບັດໜ້າທີ່ຮໍ່າຮຽນ, ແລກປ່ຽນບົດຮຽນໃນວຽກງານນໍາພາ, ບັນຊາ, ຄຸ້ມຄອງ, ຄົ້ນຄວ້າ ແລະບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ ກັບຖັນແຖວຄູອາຈານ - ພະນັກງານຄົ້ນຄວ້າຂອງສະຖາບັນຍຸດທະສາດປ້ອງກັນຊາດ, ຜ່ານນັ້ນປະກອບສ່ວນຍົກສູງຄວາມເຂົ້າໃຈ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນລະຫວ່າງກອງທັບ ແລະ ປະຊາຊົນສອງປະເທດເວົ້າລວມ ກໍ່ຄືລະຫວ່າງສະຖາບັນຍຸດທະສາດປ້ອງກັນຊາດຫວຽດນາມ ແລະ ສູນຄົ້ນຄວ້າຍຸດທະສາດການທະຫານກອງທັບລາດຊະວົງ ກໍາປູເຈຍ ເວົ້າສະເພາະ.

（ຄຳຮຸ່ງ）