 |
ບັນຍາກາດກອງປະຊຸມ ແລກປ່ຽນລະຫວ່າງສອງແຂວງ.
ວັນທີ 05 ມີຖຸນາ 2019 ນີ້ ທີ່ຫ້ອງປະຊຸມຂອງຄະນະໂຄສະນາອົບຮົມແຂວງໄດ້ຈັດພິທີ ພົບປະແລກປ່ຽນບົດຮຽນ ລະຫວ່າງຄະນະໂຄສະນາອົບຮົມແຂວງຫຼວງພະບາງ ແລະ ຄະນະໂຄສະນາສຶກສາ ແຂວງດຽນບຽນ ສສ ຫວຽດນາມ ຂື້ນຢ່າງເປັນທາງການ ຕາງໜ້າຄະນະຜູ້ແທນຄະນະໂຄສະນາອົບຣົມແຂວງຫຼວງພະບາງ ນຳພາໂດຍ; ສະຫາຍ ຄຳຫຼ້າ ລຽນປະດິດ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ; ພ້ອມດ້ວຍຄະນະ. ຕ້ອນຮັບ ແລະ ພົບປະແລກປ່ຽນບົດຮຽນ ກັບ ຄະນະໂຄສະນາສຶກສາແຂວງດຽນບຽນ ສສ ຫວຽດນາມ ຕາງໜ້າຄະນະຜູ້ແທນ ຄະນະໂຄສະນາສຶສາແຂວງດຽນບຽນ ນຳພາໂດຍ; ສະຫາຍ ຫງວ້ຽນ ດຶກ ເວືອງ ກຳມະການປະຈຳພັກ ຫົວໜ້າຄະນະໂຄສະນາສຶກສາແຂວງດຽນບຽນ ພ້ອມດ້ວຍຄະນະ.
ໃນໂອກາດດັ່ງກ່າວ ສະຫາຍ ຄຳຫຼ້າ ລຽນປະດິດ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ; ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ການເດີນທາງມາຢ້ຽນຢາມ ແລະ ເຮັດວຽກຢູ່ ສປປ ລາວ; ກໍ່ຄື ແຂວງຫຼວງພະບາງ ຂອງສະຫາຍ ຫງວ້ຽນ ດຶກ ເວືອງ ກຳມະການປະຈຳພັກແຂວງ ຫົວໜ້າຄະນະໂຄສະນາສຶກສາແຂວງດຽນບຽນ ພ້ອມດ້ວຍຄະນະ. ການພົບປະທັງສອງຝ່າຍໃນຄັ້ງນີ້; ໄດ້ສະແດງໃຫ້ເຫັນເຖິງການຮັດແໜ້ນຄວາມສາມັກຄີທີ່ເປັນມູນເຊື້ອລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫຽວດນາມ; ເວົ້າລວມ, ເວົ້າສະເພາະກໍ່ແມ່ນການພົວພັນຮ່ວມມືລະຫວ່າງ; ຄະນະໂຄສະນາອົບຮົມແຂວງຫຼວງພະບາງ ກັບ ຄະນະໂຄສະນາສຶກສາແຂວງດຽນບຽນ ສສ ຫວຽດນາມ; ໃນໄລຍະຜ່ານມາກໍ່ຄືໃນຕໍ່ໜ້າ. ພ້ອມນັ້ນ ທັງສອງຝ່າຍ; ໄດ້ລາຍງານສະພາບການທີ່ພົ້ນເດັ່ນ ແລະ ຜົນງານການເຄື່ອນໄຫວໃນການຈັດຕັ້ງປະຕິບັດໜ້າທີ່ວຽກງານຂອງຕົນໃຫ້ອີກຝ່າຍຮັບຮູ້; ພ້ອມທັງເຮັດບົດບັນທຶກຊ່ວຍຈຳເພື່ອເປັນບ່ອນອີງໃນການສືບຕໍ່ພົວພັນແລກປ່ຽນ ບົດຮຽນເຊິ່ງກັນ ແລະ ກັນໃນຕໍ່ໜ້າ.
（ແຫຼ່ງຂໍ້ມູນ： ສີປະເສີດ ພົມມະຈັນ/ຫຼວງພະບາງໃໝ່）
