 |
ຫວຽດນາມ - ລາວ ປະສານສົມທົບໃນການປາບປາມອາດຊະຍາກໍາຢາເສບຕິດທີ່ເຂດຊາຍແດນຂອງສອງປະເທດ
ວັນທີ 3 ມີນາ, ທີ່ແຂວງເຫງ້ອານ, ສສ ຫວຽດນາມ, ກະຊວງຕໍາຫຼວດຫວຽດນາມ ແລະ ກະຊວງປ້ອງກັນຄວາມສະຫງົບລາວໄດ້ຕົກລົງເຫັນດີໃນການເປີດບັ້ນຈຸດສູງໃນການປາບປາມອາດຊະຍາກໍາຢາເສບຕິດທີ່ເຂດຊາຍແດນຂອງສອງປະເທດ.
ໃນໄລຍະຜ່ານມາ, ກໍາລັງຕໍາຫຼວດຕໍ່ສູ້ກັບອາດຊະຍາກໍາຢາເສບຕິດຂອງກະຊວງຕໍາຫຼວດ, ກໍາລັງສະກັດກັ້ນ ແລະ ຕ້ານອາດຊະຍາກໍາຢາເສບຕິດຂຶ້ນກັບບັນຊາການທະຫານຊາຍແດນຫວຽດນາມທີ່ໄດ້ປະສານສົມທົບກັບບັນດາກໍາລັງສະກັດກັ້ນ ແລະ ຕ້ານອາດຊະຍາກໍາຢາເສບຕິດຂອງລາວແຕ່ສູນກາງລົງຮອດທ້ອງຖິ່ນເພື່ອກໍ້າສະພາບການ ແລະ ປະຕິບັດບັນດາມາດຕະການໃນການຕໍ່ສູ້ກັບອາດຊະຍາກໍາຢາເສບຕິດຢູ່ແຕ່ລະປະເທດ.
ກະຊວງຕໍາຫຼວດຫວຽດນາມ ແລະ ກະຊວງປ້ອງກັນຄວາມສະຫງົບລາວ ໄດ້ຕົກລົງເຫັນດີປະສານສົມທົບໃນການປາບປາມອາດຊະຍາກໍາຢາເສບຕິດທີ່ເຂດຊາຍແດນຂອງສອງປະເທດເລີ່ມແຕ່ວັນທີ 15 ເມສາ ຫາ ວັນທີ 15 ກໍລະກົດ 2019.
ບັນດາອົງການ, ກົມກອງທີ່ກ່ຽວຂ້ອງຂອງສອງຝ່າຍຈະລາຍງານຕໍ່ພາກສ່ວນທີ່ກ່ຽວຂ້ອງເພື່ອປະກອບຄໍາຄິດເຫັນໃນການສ້າງ, ປັບປຸງ, ເພີ່ມເຕີມບັນດາສັນຍາ, ບົດບັນທຶກຄວາມເຂົ້າໃຈ, ນິຕິກໍາດ້ານກົດໝາຍຕ່າງໆໃຫ້ແກ່ວຽກງານແລກປ່ຽນຂໍ້ມູນຂ່າວສານ, ປະສານສົມທົບໃນການສືບສວນ, ຈັບກຸມ... ແລະ ບັນດາເອກະສານທີ່ກ່ຽວຂ້ອງ.
ໂດຍສະເພາະສອງຝ່າຍຈະເພີ່ມທະວີການລາດຕະເວນຮ່ວມ, ແລກປ່ຽນ ແລະ ສະໜອງຂໍ້ມູນຂ່າວສານເຊິ່ງກັນ ແລະ ກັນ ຢ່າງເປັນປົກກະຕິເພື່ອຄວບຄຸມສະພາບອັນສະຫຼັບສັບຊ້ອນກ່ຽວກັບບັນຫາຢາເສບຕິດ ແລະ ອາດຊະຍາກໍາຢາເສບຕິດຕາມເຂດຊາຍແດນຂອງສອງປະເທດ.
（ໄຊພອນ）
