 |
ພິທີມອບ-ຮັບ ແລະ ຈັດສົ່ງອັດຖິ ທະຫານອາສາສະມັກ ແລະ ຊ່ຽວຊານຫວຽດນາມ ທີ່ເສຍສະຫລະຊີວິດ ໃນປາງສົງຄາມ ຈຳນວນ 11 ອັດຖິ
ວັນທີ 7 ພຶດສະພາ 2018 ແຂວງສາລະວັນ ໄດ້ຈັດພິທີມອບ-ຮັບ ແລະ ຈັດສົ່ງອັດຖິ ທະຫານອາສາສະມັກ ແລະ ຊ່ຽວຊານຫວຽດນາມ ທີ່ເສຍສະຫລະຊີວິດ ໃນປາງສົງຄາມ ຢູ່ແຂວງສາລະວັນ ຈຳນວນ 11 ອັດຖິຢ່າງສົມກຽດ ໂດຍມີທ່ານ ບົວທອງ ຄຸນຍອດປັນຍາ ຮອງເຈົ້າແຂວງໆ ສາລະວັນ, ທ່ານ ພົນຈັດຕະວາ ພູວຽງ ຫລຽມມະວົງສາ ຫົວໜ້າກອງບັນຊາການ ທະຫານແຂວງສາລະວັນ, ທ່ານ ພົນຈັດຕະວາ ສົມທອງ ດອນກະນ້ອຍ ຄະນະປະຈຳພັກແຂວງ ຫົວໜ້າກອງບັນຊາການ ທະຫານແຂວງເຊກອງ, ທ່ານ ພັອ ເລງງ໋ອກແທງ ຫົວໜ້າ ການເມືອງທະຫານ ແຂວງເທື່ອທຽນເຫວ້, ມີຄະນະປະຈຳພັກແຂວງ ສາລະວັນ, ກຳມະການພັກແຂວງ, ພ້ອມດ້ວຍນາຍຕ່ຳຫລວດ ແລະ ນາຍທະຫານ ທັງສອງປະເທດ ເຂົ້າຮ່ວມ.
ທ່ານ ພັອ ພູວັນ ພິມມະຈັນ ຮອງ ເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງ, ປະທານ ປະຕິບັດງານພິເສດແຂວງ ສາລະວັນ ໄດ້ກ່າວໃນພິທີວ່າ: ໃນທ່າມກາງບັນຍາກາດ ທີ່ໂສກເສົ້າເສຍດາຍ, ອາໄລ, ອາວອນ, ພະນັກງານການນຳພັກ-ລັດແຂວງສາລະວັນ, ພ້ອມດ້ວຍທະຫານ-ຕ່ຳຫລວດ, ນັກຮຽນຮູ້, ນັກສຶກສາ, ປັນຍາຊົນໄດ້ເຕົ້າໂຮມກັນ ເພື່ອໄຫວອາໄລເຖິງດວງວິຍານ ພະນັກງານ-ນັກຮົບທະຫານອາສາສະໜັກ ແລະ ຊ່ຽວຊານຫວຽດ ນາມທີ່ເສຍສະຫລະເລືອດເນື້ອ ແລະ ຊີວິດ ຕໍ່ສູ້ກູ້ຊາດຕ້ານການຮຸກຮານ ຂອງພວກລ່າເມືອງຂຶ້ນ ໃນປາງສົງຄາມຢູ່ດິນແດນ ຂອງແຂວງສາລະວັນ ເພື່ອແລກເອົາເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນ ຂອງ 2 ຊາດລາວ-ຫວຽດນາມ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງ 2 ປະເທດ, ຜ່ານມາ ໄດ້ພິສຸດໃຫ້ພວກເຮົາຮູ້ດີວ່າ: ຫວຽດນາມ ແມ່ນເພື່ອນມິດສະໜິດແໜ້ນ ຮ່ວມເປັນ, ຮ່ວມຕາຍສູ້ຮົບຄຽງບ່າ, ຄຽງໄຫລ່ຕີສັດຕູໂຕດຽວ, ໃນຂຸມຄອງດຽວກັນ, ຄວາມສາມັກຄີພິເສດສອງຊາດ ໄດ້ທົດສອບຫລໍ່ຫລອມ ຂະບວນວິວັດຂອງການປະຕິວັດຢ່າງພິລະອາດຫານ ຢູ່ສະໝານຮົບອັນດຸເດືອດຂ້ຽວຂາດ ເພື່ອແລກເອົາຄວາມເປັນເອກະລາດ, ຄວາມສະຫງົບມາສູ້ປະຊາຊົນບັນດາເຜົ່າ.
 |
ພິທີມອບ-ຮັບ ແລະ ຈັດສົ່ງອັດຖິ ທະຫານອາສາສະມັກ ແລະ ຊ່ຽວຊານຫວຽດນາມ ທີ່ເສຍສະຫລະຊີວິດ ໃນປາງສົງຄາມ ຈຳນວນ 11 ອັດຖິ
ພ້ອມນີ້ ກໍໄດ້ມີການ ວາງພວງມະລາ ເພື່ອລະນຶກເຖິງຄຸນງາມຄວາມດີ ທີ່ເສຍສະຫລະເລືອດເນື້ອ ຊີວິດຕໍ່ສູ້ກູ້ຊາດ ຍາດເອົາເອກະລາດ ຈົນໄດ້ຮັບການປົກປ່ອຍ ເຊິ່ງມີກຸ່ມການນຳຂອງແຂວງ, ກຸ່ມພັກພະນັກງານ, ກຸ່ມທະຫານ-ຕຳຫລວດ, ກຸ່ມເສດຖະກິດ ແລະ ກຸ່ມອື່ນໆ.
（ແຫຼ່ງຂໍ້ມູນ： ຂປທ）
