| ຮອຍຍ່າງຂອງທະຫານອາສາສະໝັກຫວຽດນາມ ບົນແຜ່ນດິນລາວ: ຄວາມຮັກແພງມິດຕະພາບທີ່ເຂັ້ມຂຸ້ນໄປດ້ວຍເລືອດເນື້ອ ແລະ ດອກໄມ້ | |
| ງານຕະຫຼາດນັດການຄ້າການທ່ອງທ່ຽວ ຫວຽດນາມ - ລາວ ໃນປີ 2024 |
ລາວ ແລະຫວຽດນາມ ແມ່ນສອງປະເທດບ້ານໃກ້ເຮືອນຄຽງທີ່ມີປະຫວັດສາດອັນຍາວນານທີ່ມີສາຍພູສາຍນ້ຳຕິດຈອດກັນ. ນັບແຕ່ກາງສັດຕະວັດທີ 20, ໂດຍພາຍໃຕ້ການນຳພາຂອງສອງພັກຄອມມູນິດອິນດູຈີນ ອັນມີປະທານ ໂຮ່ຈິມິນ, ປະທານ ໄກສອນ ພົມວິຫານ ແລະປະທານ ສຸພານຸວົງ ເປັນຜູ້ນຳພາ ແລະໄດ້ຮັບການເພີ່ມພູນຄູນສ້າງຂອງການນຳລຸ້ນຕ່າງໆ ແລະ ປະຊາຊົນສອງປະເທດເຮັດໃຫ້ການພົວພັນລະຫວ່າງສອງປະເທດ ລາວ-ຫວຽດນາມ ໄດ້ພັດທະນາຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ. ຄວາມສາມັກຄີພິເສດ, ການຮ່ວມມືຮອບດ້ານແມ່ນຊັບສົມບັດອັນລ້ຳຄ່າຂອງປະຊາຊົນສອງປະເທດ, ແມ່ນປັດໄຈປະກອບສ່ວນເຂົ້າໃນໄຊຊະນະຂອງການປະຕິວັດຂອງແຕ່ລະປະເທດ. ນ້ຳໃຈສາມັກຄີ, ສູ້ຮົບລະຫວ່າງ ລາວ-ຫວຽດນາມ ໃນການຕໍ່ສູ້ກັບສັດຕູແມ່ນສະແດງໃຫ້ເຫັນຢ່າງຈະແຈ້ງ ແລະສະແດງໃຫ້ເຫັນຄຸນຄ່າຂອງການພົວພັນແບບພິເສດ ແລະບໍ່ມີສິ່ງໃດປຽບທຽບໄດ້.
ຊາຕາກຳນຳສອງຊາດຫຍັບມໍ່ໃກ້ກັນ
ໃນປີ 1945, ລາວ ແລະ ຫວຽດນາມ ຫາກໍໄດ້ຮັບເອກະລາດ ແລະສືບຕໍ່ຕ້ອງປະເຊີນກັບສົງຄາມການຮຸກຮານຂອງພວກລ່າເມືອງຂຶ້ນຝຣັ່ງ. ສະນັ້ນ ເພື່ອສູ້ຮົບສັດຕູຮ່ວມ ແລະປົກປັກຮັກສາບັນດາໝາກຜົນແຫ່ງການປະຕິວັດ, ລັດຖະບານລາວ ແລະ ຫວຽດນາມ ໄດ້ລົງນາມໃນສົນທິສັນຍາຊ່ວຍເຫຼືອເຊິ່ງກັນ ແລະກັນ ລາວ - ຫວຽດນາມ (16 ຕຸລາ 1945) ແລະສັນຍາວ່າດ້ວຍການຈັດຕັ້ງກຳລັງປະສົມ ລາວ - ຫວຽດນາມ (30 ຕຸລາ 1945).
 |
ພົນເອກ ຫວໍງວຽນຢາບ ແລະສະເດັດເຈົ້າ ສຸພານຸວົງ ປຶກສາຫາລືແຜນການປະສານສົມທົບເປີດບັ້ນຮົບພາກເໜືອລາວ, ປີ 1953. ພາບ: ເອກະສານ |
ບົນພື້ນຖານດັ່ງກ່າວນັ້ນ, ຫວຽດນາມ ໄດ້ສົ່ງກຳລັງທະຫານໄປຊ່ວຍເຫຼືອການປະຕິວັດລາວ. ນັບແຕ່ປີ 1949 ເປັນຕົ້ນມາ, ບັນດາຄະນະບໍລິຫານງານພັກທີ່ຮັບຜິດຊອບການຊ່ວຍເຫຼືອການປະຕິວັດລາວ ໄດ້ຮັບການສ້າງຕັ້ງຂຶ້ນຢູ່ແຕ່ລະພາກຂອງປະເທດລາວ; ບັນດາກອງກຳລັງກອງທັບຫວຽດນາມ ທີ່ຕໍ່ສູ້ຊ່ວຍເຫຼືອລາວໄດ້ຈັດຕັ້ງຕາມລະບົບຂອງຕົນຕ່າງຫາກ, ຊຶ່ງໃສ່ຊື່ວ່າກອງທັບອາສາສະໝັກ. ນັບແຕ່ປີ 1950 ເປັນຕົ້ນມາ, ກອງທັບອາສາສະໝັກຫວຽດນາມ ຢູ່ລາວ ໄດ້ຄ່ອຍໆຈັດຕັ້ງເປັນກຸ່ມ (ທຽບເທົ່າກັບກອງພັນໃຫຍ່), ພາຍໃຕ້ການຮ່ວມມືສູງສຸດຂອງລັດຖະບານລາວ ຕໍ່ຕ້ານ ຫຼື ລັດຖະບານແນວລາວອິດສະລະ, ປະຕິບັດຕາມແນວທາງການເມືອງ ແລະການທະຫານຂອງການປະຕິວັດລາວ ແຕ່ “ພາຍໃຕ້ອຳນາດໂດຍກົງຂອງກອງບັນຊາການທະຫານຫວຽດນາມ ໃນທຸກຂົງເຂດວຽກງານ, ການສູ້ຮົບ, ການຄຸ້ມຄອງ, ການຝຶກອົບຮົມ, ການຍ້ອງຍໍ ແລະອື່ນໆ. ກອງກຳລັງດັ່ງກ່າວໄດ້ມີຢູ່ພາກກາງຂອງລາວ ມີຄະນະ 280; ຢູ່ພາກເໜືອລາວມີບັນດາຄະນະ 80, 81, 82, 83.
ໃນໄລຍະສົງຄາມຕໍ່ຕ້ານຈັກກະພັດອາເມລິກາ, ຕາມການຮຽກຮ້ອງຂອງປະເທດລາວ ແລະແທດເໝາະກັບສະພາບການໃໝ່, ວິທີການຮ່ວມມື ແລະການຊ່ວຍເຫຼືອຂອງ ຫວຽດນາມ ຕໍ່ການປະຕິວັດລາວ ໄດ້ປ່ຽນຈາກລະບົບທີ່ປຶກສາດ້ານການທະຫານມາເປັນລະບົບຊ່ຽວຊານການທະຫານ ແລະເພື່ອທະຫານອາສາສະໝັກ. ຈາກນັ້ນ, ແຕ່ປີ 1954 - 1958, ຫວຽດນາມ ໄດ້ສົ່ງຄະນະປຶກສາການທະຫານ 100 ຄົນ ເພື່ອຊ່ວຍປະຕິວັດລາວ ໄປກໍ່ສ້າງ ແລະປົກປັກຮັກສາຖານທີ່ໝັ້ນການປະຕິວັດຂອງລາວ ແລະພັດທະນາກຳລັງປະກອບອາວຸດ; ນັບແຕ່ປີ 1959 ເປັນຕົ້ນມາ, ຫວຽດນາມໄດ້ສົ່ງຄະນະຊ່ຽວຊານການທະຫານ 959, 463, 565 ແລະກອງທະຫານອາສາສະໝັກ 335, 316, 763, 766, 866, 968 ໄປຊ່ວຍເຫຼືອລາວ ເພື່ອສ້າງກຳລັງ; ຕໍ່ສູ້ປົກປັກຮັກສາເຂດຖານທີ່ໝັ້ນ ແລະຂະຫຍາຍເປີດກວ້າງເຂດປົດປ່ອຍ. ໃນໄລຍະຕໍ່ສູ້ ແລະປະຕິບັດວຽກງານ, ບັນດາໜ່ວຍງານດັ່ງກ່າວໄດ້ມີການປັບປຸງການຈັດຕັ້ງ ແລະບັນຈຸຊັບຊ້ອນພະນັກງານຫຼາຍຄັ້ງ ເພື່ອຮັບປະກັນການຄຸ້ມຄອງ, ການຈັດຕັ້ງ, ບັນຊາ, ນຳໃຊ້ກອງກຳລັງໃຫ້ມີປະສິດທິຜົນ ແລະຕອບສະໜອງແທດເໝາະກັບຄວາມຕ້ອງການຕົວຈິງ.
ພາຍຫຼັງປີ 1975, ຕາມການສະເໜີຂອງພັກ, ລັດຖະບານ ແລະປະຊາຊົນລາວ, ຫວຽດນາມ ສືບຕໍ່ສົ່ງຊ່ຽວຊານການທະຫານ, ທະຫານອາສາສະໝັກມາຊ່ວຍເຫຼືອກໍ່ສ້າງ ແລະປົກປັກຮັກສາລະບອບປະຊາທິປະໄຕປະຊາຊົນທີ່ຍັງອ່ອນນ້ອຍ. ຄະນະ 576 ຊ່ຽວຊານການທະຫານ ແລະບັນດາກອງພົນ (324, 968, 379), ກອງພັນໃຫຍ່ (19, 101, 335) ແລະບັນດາເຫຼົ່າຮົບ, ເຕັກນິກຈຳນວນໜຶ່ງໄດ້ຖືກສົ່ງມາລາວ ເພື່ອປະສານງານວຽກງານການສູ້ຮົບ. ແຕ່ເດືອນມີຖຸນາ 1978 ເປັນຕົ້ນມາ, ບັນດາກຳລັງດັ່ງກ່າວພາຍໃຕ້ການບັນຊາເອກກະພາບຂອງແມ່ທັບນ້ອຍ 678. ຮອດປີ 1983 ແມ່ທັບນ້ອຍ 678 ໄດ້ຍຸບເລີກ; ບັນດາກອງອາສາສະໝັກໄດ້ຍົກຍ້າຍໄປຂຶ້ນກັບທະຫານເຂດ 4 ແລະທະຫານເຂດ 2; ຄະນະ 576 ຂຶ້ນກັບກະຊວງປ້ອງກັນປະເທດຫວຽດນາມໂດຍກົງ. ປີ 1989, ຕາມການຕົກລົງເອກະພາບລະຫວ່າງສອງພັກ ແລະສອງລັດ, ບັນດາກຳລັງຊ່ຽວຊານການທະຫານ ແລະ ທະຫານອາສາສະໝັກຫວຽດນາມ ໄດ້ຖອນກຳລັງກັບຄືນປະເທດ.
ຊ່ວຍປະເທດເພື່ອນກໍ່ຄືເຮົາຊ່ວຍເຮົາເອງ
ການເຊື່ອມຊຶມກັບຄຳສອນຂອງປະທານ ໂຮ່ຈີມິນ "ຊ່ວຍປະຊາຊົນຂອງປະເທດເພື່ອນກໍ່ຄືເຮົາຊ່ວຍເຮົາເອງ ໄດ້ຝັງແໜ້ນຢ່າງເລິກເຊິ່ງຢູ່ໃນດວງໃຈຂອງທຸກໆຄົນ, ຊຶ່ງໄດ້ເຮັດໃຫ້ບັນດາທະຫານອາສາສະໝັກ ແລະຊ່ຽວຊານການທະຫານຫວຽດນາມ ບໍ່ໄດ້ຫວັ່ນໄຫວຕໍ່ອຸປະສັກ, ຍອມເສຍສະຫຼະ ແລະຊ່ວຍເຫຼືອກອງທັບ ແລະປະຊາຊົນລາວ ບົນຈິດໃຈສາມັກຄີສາກົນອັນສູງສົ່ງ, ບໍລິສຸດ, ເຄົາລົບເອກະລາດ, ອະທິປະໄຕ, ເຄົາລົບຮີດຄອງປະເພນີຂອງປະຊາຊົນ. ທະຫານອາສາສະໝັກ ແລະຊ່ຽວຊານທະຫານຫວຽດນາມ ບໍ່ພຽງແຕ່ສົມທົບໂດຍກົງໃນການຕໍ່ສູ້ ເພື່ອຊ່ວຍປະຕິວັດລາວຂັບໄລ່ ແລະທຳລາຍພວກລູກແຫຼ້ງຕີນມືຂາຍຊາດຂອງພວກສັດຕູແຕ່ກໍ່ຍັງໄດ້ປະກອບສ່ວນໂດຍກົງໃນການສ້າງສາ ແລະພັດທະນາສາມຢ່າງໃນເຫຼົ່າທັບ: ກໍ່ສ້າງ, ປັບປຸງອຳນາດການປົກຄອງປະຊາຊົນ, ພັດທະນາເສດຖະກິດ, ວັດທະນະທໍາ..., ກໍ່ຕັ້ງ ແລະເປີດກ້ວາງເຂດທີ່ໝັ້ນການຕໍ່ສູ້ໃນທົ່ວປະເທດລາວ.
ຍ້ອນແນວນັ້ນ, ການປະຕິວັດລາວນັບມື້ນັບພັດທະນາ, ເຂັ້ມແຂງ ແລະໜັກແໜ້ນ, ສຳເລັດພາລະກິດປົດປ່ອຍຊາດໃນປີ 1975. ແຕ່ປີ 1976 – 1989, ຈາກການກໍ່ຄວາມວຸ້ນວາຍທຳລາຍມ້າງເພຂອງກຳລັງສັດຕູ, ປະຕິບັດຕາມສັນຍາ ແລະສົນທິສັນຍາລະຫວ່າງລັດຖະບານ ແລະສອງກະຊວງປ້ອງກັນປະເທດ. ກ່ຽວກັບການຮ່ວມມືດ້ານການທະຫານ ແລະປ້ອງກັນປະເທດ, ຫວຽດນາມ ສືບຕໍ່ສົ່ງຊ່ຽວຊານການທະຫານ ແລະທະຫານອາສາສະໝັກມາຊ່ວຍລາວ ກໍ່ສ້າງ ແລະພັດທະນາກຳລັງ, ເພີ່ມທະວີທ່າສະໜາມປ້ອງກັນຊາດທົ່ວປວງຊົນ, ພ້ອມກັນນັ້ນກໍ່ສົມທົບກັບກຳລັງຂອງລາວ ເພື່ອສະກັດກັ້ນຕໍ່ສູ້ຕ້ານເລ່ກົນ, ການກໍ່ຄວາມວຸ້ນວາຍ, ການໂຄ່ນລົ້ມຂອງບັນດາກໍາລັງຕ້ານການປະຕິວັດ, ປົກປັກຮັກສາອຳນາດການປົກຄອງປະຊາຊົນ ແລະລະບອບປະຊາທິປະໄຕ, ປະຊາຊົນລາວ ໄວ້ໃຫ້ໄດ້ຍືນຍົງເທົ່າທຸກວັນນີ້.
ຄຽງບ່າຄຽງໄລ່ຕໍ່ສູ້ສັດຕູໂຕດຽວກັນ
ໃນໄລຍະ 30 ປີ ແຫ່ງສົງຄາມປະຕິວັດ (1945 - 1975) ແລະກວ່າໄລຍະ 10 ປີແຫ່ງການສ້າງສາ ແລະປົກປັກຮັກສາລະບອບປະຊາທິປະໄຕ ປະຊາຊົນລາວ (1976 - 1989), ກອງທັບປະຊາຊົນຫວຽດນາມ ໄດ້ຕໍ່ສູ້ຄຽງບ່າຄຽງໄລ່, ຮ່ວມຂຸມຄອງດຽວ “ເຂົ້າເມັດຫັກຜັກເສັ້ນໜຶ່ງກໍ່ບິແບ່ງກັນກິນ” ຈາກບັ້ນຮົບນີ້ສູ່ບັ້ນຮົບໃໝ່ຮ່ວມກັບກອງທັບ ແລະປະຊາຊົນລາວ ຍາດໄດ້ໄຊຊະນະອັນໃຫຍ່ຫຼວງຫຼາຍຢ່າງໃນສະໜາມຮົບ, ສ້າງຄວາມປະລາໄຊຕໍ່ບັນດາເລ່ກົນອຸບາຍຂອງສົງຄາມ, ຕ້ານ ແລະທຳລາຍການປົກຄອງຂອງສັດຕູເທື່ອລະກ້າວ, ກ້າວໄປເຖິງໄຊຊະນະຢ່າງສົມບູນ.
ໃນໄລຍະສົງຄາມຕໍ່ຕ້ານພວກລ່າເມືອງຂຶ້ນຝຣັ່ງ, ການເຄື່ອນໄຫວທາງການທະຫານຢ່າງຕໍ່ເນື່ອງ ແລະກວ້າງຂວາງຂອງກອງທັບປະສົມ ລາວ-ຫວຽດນາມ ໄດ້ປະກອບສ່ວນຂະຫຍາຍເຂດປົດປ່ອຍ ແລະຄ່ອຍໆຍູ້ກອງທັບຝຣັ່ງ ຕົກຢູ່ໃນທ່າຮັບໃນສະໜາມຮົບອິນດູຈີນ. ພິເສດແມ່ນບັນດາໄຊຊະນະຂອງກອງທັບປະສົມ ລາວ - ຫວຽດນາມ ໃນບັນດາສະໜາມຮົບຢູ່ພາກເໜືອ, ພາກກາງ ແລະພາກໃຕ້ຂອງລາວໃນຊຸມປີ 1953 – 1954 ອັນໄດ້ສ້າງເງື່ອນໄຂສະດວກໃຫ້ກອງທັບ ແລະປະຊາຊົນ ຫວຽດນາມ ຍາດໄດ້ໄຊຊະນະຢ່າງມະຫັດສະຈັນຢູ່ ດ້ຽນບຽນຝູ ໃນວັນທີ 7 ພຶດສະພາ 1954, ບັງຄັບໃຫ້ພວກລ່າເມືອງຂຶ້ນຝຣັ່ງ ລົງນາມໃນສັນຍາເຊີແນວ (1954), ຮັບຮູ້ເອກະລາດ, ອໍານາດອະທິປະໄຕ ແລະຜືນແຜ່ນດິນອັນຄົບຖ້ວນຂອງສາມປະເທດອິນດູຈີນ.
ໃນໄລຍະສົງຄາມຕໍ່ຕ້ານຈັກກະພັດອາເມລິກາ, ກອງທັບປະສົມ ລາວ-ຫວຽດນາມ ໄດ້ປະສານສົມທົບກັນເປີດບັ້ນຮົບນັບເປັນສິບໆຄັ້ງ, ເອົາຊະນະຍຸດທະສາດ "ສົງຄາມພິເສດ" ແລະ "ສົງຄາມພິເສດເພີ່ມທະວີ" ຂອງອາເມລິກາ ເປັນພື້ນຖານສ້າງເງື່ອນໄຂອຳນວຍຄວາມສະດວກໃຫ້ແກ່ກອງທັບ ແລະປະຊາຊົນລາວ ກ້າວໄປສູ່ຍາດໄຊຊະນະຢ່າງຈົບງາມໃນປີ 1975.
ໃນການຕໍ່ສູ້ປົກປັກຮັກສາລະບອບປະຊາທິປະໄຕຂອງປະຊາຊົນລາວ ໃນປີ 1976 - 1989, ກອງທັບປະສົມລາວ-ຫວຽດນາມ ເປັນຫຼັກໂດຍແມ່ນທະຫານອາສາສະໝັກຫວຽດນາມ ຍາດໄດ້ໄຊຊະນະອັນພົ້ນເດັ່ນຫຼາຍຢ່າງ, ເປັນຕົ້ນແມ່ນການທຳລາຍລ້າງພວກໂຈນປຸ້ນຈີ້ລັດຍິງ ແລະປົດປ່ອຍ ພູເບ້ຍ (1978), ບວມເລົາ. (ປີ 1985), ໄດ້ປະກອບສ່ວນໂດຍກົງເຂົ້າໃນການຮັກສາສະຖຽນລະພາບທາງດ້ານການເມືອງ, ປັບປຸງ ແລະເສີມຂະຫຍາຍທ່າປ້ອງກັນຕົວ ເພື່ອປົກປັກຮັກສາອະທິປະໄຕ ແລະລັດຖະບານຂອງປະຊາຊົນລາວຢ່າງໜັກແໜ້ນ.
ການຮ່ວມສຳພັນຕໍ່ສູ້ ລາວ-ຫວຽດນາມ ຕ້ານສັດຕູໂຕດຽວກັນແມ່ນສັນຍາລັກສະແດງໃຫ້ເຫັນຄວາມສາມັກຄີອັນບໍລິສຸດຜຸດຜ່ອງໃນການຮ່ວມມື ແລະການພົວພັນສາກົນ. ເປັນການຢັ້ງຢືນໄດ້ວ່າ ທະຫານອາສາສະໝັກ ແລະຊ່ຽວຊານການທະຫານຫວຽດນາມ ຢູ່ ລາວ ໄດ້ປະຕິບັດສຳເລັດໜ້າທີ່ອັນສູງສົ່ງໂດດເດັ່ນຊ່ວຍເຫຼືອການປະຕິວັດລາວ ໃນການຕໍ່ສູ້ຍາດເອົາເອກະລາດ, ກໍ່ສ້າງ ແລະປົກປັກຮັກສາລະບອບປະຊາທິປະໄຕປະຊາຊົນ, ປະກອບສ່ວນເຂົ້າໃນການຮັດແໜ້ນ ແລະເພີ່ມພູນຄູນສ້າງມິດຕະພາບອັນດີງາມ, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງປະເທດ ລາວ-ຫວຽດນາມ, ດັ່ງທີ່ການນຳພັກ, ລັດ ແລະປະຊາຊົນລາວ ໄດ້ຢືນຢັນວ່າ: “ຢູ່ລາວ, ບໍ່ມີບ່ອນໃດທີ່ບໍ່ມີຮອຍຕີນຂອງທະຫານອາສາສະໝັກຫວຽດນາມ, ບໍ່ມີໄຊຊະນະໃດທີ່ບໍ່ມີການເສຍສະຫຼະ ແລະການປະກອບສ່ວນຂອງທະຫານອາສາສະໝັກຫວຽດນາມ”. ຮັບຮູ້ບັນດາການປະກອບສ່ວນດັ່ງກ່າວ, ພັກ, ລັດ ແລະກອງທັບປະຊາຊົນລາວ ໄດ້ມອບນາມມະຍົດ ແລະການຍ້ອງຍໍອັນສະຫງ່າລາສີໃຫ້ບັນດາກົມກອງລວມໝູ່ ແລະບຸກຄົນຂອງບັນດານັກຮົບອາສາສະໝັກ ແລະຊ່ຽວຊານທະຫານຫວຽດນາມ ທີ່ເຄີຍຕໍ່ສູ້ ແລະປະຕິບັດໜ້າທີ່ຢູ່ລາວ. ປະຊາຊົນລາວທຸກເຜົ່າລ້ວນແຕ່ເຊື່ອໝັ້ນໃນຄວາມຮັກແພງ ແລະນັບຖືພະນັກງານ-ນັກຮົບ ທະຫານອາສາສະໝັກ ແລະຊ່ຽວຊານການທະຫານຫວຽດນາມ ເປັນຄືດັ່ງຍາດຕິພີ່ນ້ອງເກີດຮ່ວມອຸທອນໃນຄອບຄົວດຽວກັນ.
ປະຈຸບັນ, ສະພາບການຂອງໂລກ ແລະພາກພື້ນພວມມີການຜັນແປຢ່າງສັບສົນ ແລະຍາກທີ່ຈະຄາດຄະເນໄດ້. ບັນດາອິດທິກຳລັງປໍລະປັກສືບຕໍ່ຊຸກຍູ້ບັນດາການເຄື່ອນໄຫວທີ່ທຳລາຍມ້າງເພຂອງການປະຕິວັດລາວ ແລະຫວຽດນາມ ດ້ວຍຮູບການ “ຜັນແປໂດຍສັນຕິ”, ຊຸກຍູ້ “ການຜັນແປໄປເອງ” ຢູ່ພາຍໃນ; ພ້ອມກັນນັ້ນ, ກໍ່ຊອກຫາວິທີແບ່ງແຍກຄວາມສາມັກຄີແບບພິເສດ ລາວ-ຫວຽດນາມ, ບິດເບືອນໂຄສະນາທັບຖົມການຮ່ວມສຳພັນຕໍ່ສູ້ລະຫວ່າງ ລາວ-ຫວຽດນາມ ໃນການຕໍ່ສູ້ຕ້ານສັດຕູໂຕດຽວກັນ. ເພື່ອເອົາຊະນະບັນດາກົນອຸບາຍ, ເລ່ລ່ຽມຂອງບັນດາອິດທິກຳລັງປໍລະປັກ, ພ້ອມກັນນັ້ນ ເພື່ອປະກອບສ່ວນເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງ ລາວ - ຫວຽດນາມ. ພວກເຮົາຈຳເປັນຕ້ອງເອົາໃສ່ໃຈຢ່າງຕັ້ງໜ້າຖອດຖອນບົດຮຽນອັນລ້ຳຄ່າກ່ຽວກັບຄວາມສາມັກຄີ, ການຮ່ວມມື ແລະສົມທົບກັນຢ່າງແໜ້ນແຟ້ນ, ສົມທົບກັນປະຕິບັດບັນດາໜ້າທີ່, ເປົ້າໝາຍລວມໂດຍສະເພາະແມ່ນໜ້າທີ່ ແລະເປົ້າທີ່ໄດ້ຕົກລົງຮ່ວມມືກັນ ຂອງການນຳຂັ້ນສູງຂອງສອງພັກ, ສອງລັດ; ເພີ່ມທະວີໂຄສະນາເຜີຍແຜ່, ສຶກສາອົບຮົມມູນເຊື້ອສາຍພົວພັນທີ່ຍິ່ງໃຫ່ຍ, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງຊາດລາວ-ຫວຽດນາມ; ຫວຽດນາມ-ລາວ ໃຫ້ແກ່ຄົນລຸ້ນໃໝ່ທີ່ໄດ້ເກີດໃໝ່ໃຫຍ່ລຸ້ນໄດ້ຮັບຮູ້ ແລະເຂົ້າໃຈຢ່າງເລິກເຊິ່ງ; ສົ່ງເສີມການຄົ້ນຄວ້າ ແລະທ້ອນໂຮມເອົາຂໍ້ມູນປະຫວັດສາດຮ່ວມສຳພັນອັນດີງາມທີ່ມີໜຶ່ງບໍ່ມີສອງໃນໂລກນີ້ໄວ້ໃຫ້ໝັ້ນຄົງຕະຫຼອດໄປ.
ທ່ານນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ຫວຽດນາມ
