 | ເພີ່ມທະວີການປ້ອງກັນ, ຕ້ານອາດຊະຍາກຳຢາເສບຕິດ ຢູ່ອະນຸພາກພື້ນແມ່ນ້ຳຂອງ ເປີດກ້ວາງ. |
| ເພີ່ມທະວີການຮ່ວມມືສາກົນໃນການຕ້ານອາດຊະຍາກຳຂ້າມຊາດ |
ໄຊຊະນະຂອງຄວາມສາມັກຄີ
ໃນກາງເດືອນກໍລະກົດ ປີ 2024, ຢູ່ດ່ານຊາຍແດນສາກົນ ເກົາແຈ່ວ (ເມືອງ ເຮຶອງເຊີນ, ແຂວງ ຮ່າຕິ້ງ), ຕຳຫຼວດນະຄອນຫຼວງ ວຽງຈັນ (ລາວ) ໄດ້ສົ່ງຜູ້ຖືກເຄາະຮ້າຍ ຊາວຫວຽດນາມ ຈາກສາຍການຄ້າມະນຸດ ຊາວຫວຽດນາມ ໄປ ລາວ 7 ຄົນ. ຜູ້ເຄາະຮ້າຍທີ່ໄດ້ຮັບການກອບກູ້ລວມມີຜູ້ຊາຍ 5 ຄົນ, ຢູ່ເມືອງ ກ່ອນກ່ວງ, ແຂວງ ເງ້ອານ ແລະ ຍິງ 2 ຄົນຈາກເມືອງ ເຕື່ອງເຢືອງ, ແຂວງ ເງ້ອານ.
 |
| ຕຳຫຼວດ ລາວ ແລະ ຫວຽດນາມ ຈັດພິທີມອບ-ຮັບ ແລະ ສົ່ງຜູ້ຖືກເຄາະຮ້າຍຈາກການຄ້າມະນຸດກັບຄືນ ຫວຽດນາມ. |
ໂດຍຜ່ານການສືບສວນ-ສອບສວນ, ໃນຕົ້ນເດືອນມີນາ ປີ 2024, ບັນດາຜູ້ເຄາະຮ້າຍໄດ້ຮູ້ຈັກກັບຜູ້ຍິງຄົນໜຶ່ງຜ່ານເຄືອຂ່າຍສັງຄົມຢູ່ ລາວ. ຜູ້ນີ້ຊັກຈູງຜູ້ເຄາະຮ້າຍ 7 ຄົນໃຫ້ໄປເຮັດໜັງສືຜ່ານແດນ ເພື່ອໄປຂາຍຫວຍຢູ່ ໄທ, ໄດ້ເງິນເດືອນ 17 ຫາ 20 ລ້ານດົ່ງ. ແຕ່ເມື່ອມາຮອດ ລາວ ແລ້ວ, ພວກມັນພາບັນດາຜູ້ເຄາະຮ້າຍໄປເຂດເສດຖະກິດພິເສດ ບໍ່ແກ້ວ ເພື່ອເຮັດວຽກດ້ວຍຮູບການສ້າງບັນຊີ Zalo, App Walmark ແລະ Facebook ເພື່ອກະທຳການສໍ້ໂກງທາງອິນເຕີເນັດເພື່ອຢຶດເອົາຊັບສິນ. ທຸກໆມື້ພວກມັນບັງຄັບໃຫ້ຜູ້ເຄາະຮ້າຍເຮັດວຽກແຕ່ 13 ຫາ 18 ຊົ່ວໂມງ. ໂດຍຮັບຮູ້ວ່ານີ້ແມ່ນການກະທຳທີ່ຜິດ ແລະ ລະເມີດກົດໝາຍ, ຜູ້ເຄາະຮ້າຍໄດ້ພະຍາຍາມຕິດຕໍ່ກັບຄອບຄົວ ແລະ ເຮັດໜັງສືຮ້ອງຂໍຄວາມຊ່ວຍເຫຼືອເຖິງທະຫານປ້ອງກັນຊາຍແດນເພື່ອໄດ້ຮັບການກອບກູ້.
ນີ້ແມ່ນໜຶ່ງໃນບັນດາກໍລະນີກອບກູ້ຜູ້ຖືກເຄາະຮ້າຍຈາກການຄ້າມະນຸດທີ່ໄດ້ສົມທົບກັນປະຕິບັດໂດຍອົງການຮັບຜິດຊອບສອງປະເທດ ຫວຽດນາມ - ລາວ. ໃນເດືອນ ມິຖຸນາ ແລະ ເດືອນ ສິງຫາ ປີ 2024, ຫ້ອງການຕຳຫຼວດອາຍາ ແຂວງ ຮ່າຕິ້ງ, ທະຫານປ້ອງກັນຊາຍແດນແຂວງ ຮ່າຕິ້ງ ສົມທົບກັບກົມຕຳຫຼວດສະກັດກັ້ນອາດຊະຍາກຳການຄ້າມະນຸດ - ກະຊວງປ້ອງກັນຄວາມສະຫງົບ ລາວ ໄດ້ຕໍ່ສູ້ ແລະ ທຳລາຍລ້າງອົງກອນອາດຊະຍາກຳທີ່ເຄື່ອນໄຫວການຄ້າມະນຸດ ແລະ ການສໍ້ໂກງທາງອອນໄລດ້ວຍຂອບຂະໜາດໃຫຍ່ໃນເຂດພິເສດສາມຫຼ່ຽມທອງຄຳ (ລາວ) ຢ່າງສຳເລັດຜົນ.
ທ່ານ ພັນເອກ ຟ້າມແທ່ງເຟືອງ, ຮອງຜູ້ອຳນວຍການຕຳຫຼວດ ແຂວງ ຮ່າຕິ້ງ ໃຫ້ຮູ້ວ່າ: ການມ້າງບັນດາຄະດີສະເພາະເຫຼົ່ານີ້ຢ່າງສຳເລັດຜົນ ແມ່ນໄຊຊະນະອັນພົ້ນເດັ່ນຂອງຕຳຫຼວດ ຫວຽດນາມ ແລະ ຕຳຫຼວດ ລາວ ໃນພາລະກິດແຫ່ງການຕໍ່ສູ້ຕ້ານອາດຊະຍາກຳສໍ້ໂກງຜ່ານທາງອິນເຕີເນັດຂ້າມຊາດທີ່ກຳລັງລ່ວງລ້ຳ. ຜົນສຳເລັດຂອງຄະດີສະເພາະນີ້ ແມ່ນໝາກຜົນແຫ່ງການສົມທົບກັນຢ່າງແໜ້ນແຟ້ນລະຫວ່າງບັນດາຫົວໜ່ວຍວິຊາສະເພາະ ຫວຽດນາມ - ລາວ, ປະກອບສ່ວນຮັກສາສະຖຽນລະພາບທາງການເມືອງ, ຄວາມເປັນລະບຽບຮຽບຮ້ອຍທາງສັງຄົມຂອງສອງປະເທດ ຫວຽດນາມ - ລາວ.
ສ້າງຊາຍແດນທີ່ມີຄວາມຜາສຸກ
ເຂດຊາຍແດນ ຫວຽດນາມ - ລາວ ມີພູມີປະເທດທີ່ທຸລະກັນດານ. ໂດຍສວຍໂອກາດນີ້, ບັນດາອາດຊະຍາກຳການຄ້າມະນຸດໄດ້ໃຊ້ເລ່ລ່ຽມຫຼາຍຢ່າງເພື່ອດຳເນີນການເຄື່ອນໄຫວ. ເພາະສະນັ້ນ, ນັບແຕ່ ປີ 2010 ເປັນຕົ້ນມາ, ກະຊວງຕຳຫຼວດ ຫວຽດນາມ ແລະ ກະຊວງປ້ອງກັນຄວາມສະຫງົບ ລາວ ໄດ້ຈັດພິທີເຊັນສັນຍາຮ່ວມມືສອງຝ່າຍ ຫວຽດນາມ - ລາວ ກ່ຽວກັບການສະກັດກັ້ນການຄ້າມະນຸດ ແລະ ປົກປ້ອງຜູ້ຖືກເຄາະຮ້າຍຈາກການຄ້າມະນຸດ. ສັນຍາດັ່ງກ່າວແມ່ນມາດຕະການທີ່ມີປະສິດທິຜົນໃນການຕ້ານອາດຊະຍາກຳການຄ້າມະນຸດ, ປະກອບສ່ວນເພີ່ມທະວີການຮ່ວມມືບົນພື້ນຖານການເຄົາລົບເອກະລາດ, ອະທິປະໄຕ, ຄວາມສະເໝີພາບ ແລະ ຜົນປະໂຫຍດຮ່ວມກັນຂອງສອງປະເທດ ຫວຽດນາມ - ລາວ.
ໄລຍະທີ່ຜ່ານມາ, 2 ຝ່າຍໄດ້ເປັນເຈົ້າການສະກັດກັ້ນ ແລະ ຕ້ານສະພາບການເຄື່ອນໄຫວອາດຊະຍາກຳການຄ້າມະນຸດຢູ່ເຂດຊາຍແດນ ຫວຽດນາມ - ລາວ, ປະກອບສ່ວນຮັບປະກັນຄວາມສະຫງົບປອດໄພດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຢູ່ເຂດຊາຍແດນ, ຮັບໃຊ້ການພັດທະນາເສດຖະກິດ - ສັງຄົມ, ເພີ່ມທະວີການຮ່ວມມືມິດຕະພາບ, ຄວາມສາມັກຄີ, ຄວາມສະໜິດຕິດພັນທີ່ໜຽວແໜ້ນ ແລະ ດົນນານລະຫວ່າງສອງປະເທດ.
ລະອຽດ, ອົງການຮັບຜິດຊອບ 2 ປະເທດຮັກສາຊ່ອງທາງຂໍ້ມູນຂ່າວສານຢ່າງເປັນປົກກະຕິເພື່ອອັບເດດ, ແລກປ່ຽນສະພາບການທີ່ກ່ຽວຂ້ອງ, ຮັກສາການປະສານຂ່າວແຕ່ລະປີ, ພົບປະແລກປ່ຽນຄະນະຜູ້ແທນທຸກຂັ້ນ, ໂດຍສະເພາະກັບບັນດາທ້ອງຖິ່ນຢ່າງເປັນປະຈຳ. ຕັ້ງໜ້າຊຸກຍູ້ວຽກງານສື່ສານມວນຊົນລວມ, ໂດຍສະເພາະແມ່ນຢູ່ເຂດຊາຍແດນຂອງແຕ່ລະປະເທດ ເພື່ອຍົກສູງສະຕິປະຊາຊົນກ່ຽວກັບການສະກັດກັ້ນ ແລະ ຕ້ານການຄ້າມະນຸດ, ການອອກເມືອງຜິດກົດໝາຍ, ອອກແຮງງານ ແລະ ການຍົກຍ້າຍຖິ່ນຖານເສລີຜິດກົດໝາຍ. ສືບຕໍ່ສົມທົບກັນຢ່າງແໜ້ນແຟ້ນໃນການຊອກຄົ້ນ, ກວດສອບ, ດຳເນີນຄະດີ ແລະ ສືບສວນບັນດາກໍລະນີ ແລະ ບັນດາສັນຍານອາດຊະຍາກຳການຄ້າມະນຸດທີ່ເຄື່ອນໄຫວຢູ່ເຂດດິນແດນຂອງ 2 ປະເທດ.
ເພິ່ມທະວີວຽກງານຄຸ້ມຄອງວິຊາສະເພາະກ່ຽວກັບເປົ້າໝາຍເຄີຍຖືກຄະດີມາກ່ອນ, ມີໂທດເກົ່າ ແລະ ມີປະກົດການທີ່ສົງໄສວ່າມີການສົມຮູ້ຮ່ວມຄິດກັນເພື່ອປະກອບເປັນສາຍ ແລະ ກຸ່ມແກັ້ງ. ສົມທົບກັນຈັດຕັ້ງປະຕິບັດການບຸກໂຈມຕີຢ່າງມີປະສິດທິຜົນ ເພື່ອສະກັດກັ້ນ ແລະ ປາບປາມອາດຊະຍາກຳການຄ້າມະນຸດຢູ່ຊາຍແດນ ຫວຽດນາມ - ລາວ. ຄົ້ນຄວ້າ, ກວດກາຄືນ, ສະເໜີປັບປຸງ ແລະ ເພີ່ມເຕີມລະບຽບການມາດຕະຖານໃຫ້ສອດຄ່ອງກັບສະພາບການເຄື່ອນໄຫວຂອງອາດຊະຍາກຳການຄ້າມະນຸດ ແລະ ກົດໝາຍຂອງແຕ່ລະປະເທດ.
 |
| ກົມສະກັດກັ້ນ - ຕ້ານຢາເສບຕິດ ແລະ ອາດຊະຍາກຳທະຫານປ້ອງກັນຊາຍແດນ ຫວຽດນາມ ແລະ ກົມຕຳຫຼວດສະກັດກັ້ນ - ຕ້ານການຄ້າມະນຸດ, ກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບ (ລາວ) ໄດ້ລົງນາມໃນບົດບັນທຶກຊ່ວຍຈຳວ່າດ້ວຍການຮ່ວມມືສະກັດກັ້ນ ແລະ ຕ້ານການຄ້າມະນຸດ. |
ຫວ່າງມໍ່ໆມານີ້, ກົມສະກັດກັ້ນ - ຕ້ານຢາເສບຕິດ ແລະ ອາດຊະຍາກຳທະຫານປ້ອງກັນຊາຍແດນ ຫວຽດນາມ ແລະ ກົມຕຳຫຼວດສະກັດກັ້ນ - ຕ້ານການຄ້າມະນຸດ, ກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບ (ລາວ) ໄດ້ຈັດຕັ້ງກອງປະຊຸມລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືສະກັດກັ້ນ - ຕ້ານການຄ້າມະນຸດ.
ບົດບັນທຶກຊ່ວຍຈຳທີ່ໄດ້ຮັບການລົງນາມຈະແມ່ນເອກະສານນິຕິກຳສຳຄັນ ເພື່ອໃຫ້ບັນດາຫົວໜ່ວຍປະຕິບັດໜ້າທີ່ ຫວຽດນາມ - ລາວ ປະຕິບັດບັນດາການເຄື່ອນໄຫວທີ່ລະອຽດ ເພື່ອແນໃສ່ຍົກສູງປະສິດທິຜົນການປ້ອງກັນ, ຕ້ານອາດຊະຍາກຳການຄ້າມະນຸດ; ການກອບກູ້, ໜູນຊ່ວຍ, ປົກປ້ອງຜູ້ຖືກເຄາະຮ້າຍຈາກການຄ້າມະນຸດ; ປະກອບສ່ວນຢືນຢັນຄວາມມານະພະຍາຍາມ ແລະ ຄວາມຕັດສິນໃຈທາງການເມືອງຂອງສອງລັດຖະບານໃນການສະກັດກັ້ນ ແລະ ຕ້ານການຄ້າມະນຸດກັບປະຊາຄົມສາກົນ.
ການລົງນາມຍັງຢືນຢັນວ່າ ຫວຽດນາມ ແລະ ລາວ ແມ່ນສະມາຊິກທີ່ຕັ້ງໜ້າໃນການປະຕິບັດສົນທິສັນຍາສະຫະປະຊາຊາດກ່ຽວກັບການປ້ອງກັນ ແລະ ຕ້ານອາດຊະຍາກຳທີ່ມີການຈັດຕັ້ງ, ຂ້າມຊາດ ແລະ ອະນຸສັນຍາ Palermo ກ່ຽວກັບການປ້ອງກັນ ແລະ ຕ້ານການຄ້າມະນຸດ.
| ແຕ່ຕົ້ນປີ 2024 ມາຮອດປະຈຸບັນ, ທະຫານປ້ອງກັນຊາຍແດນ ຫວຽດນາມ ໄດ້ສົມທົບກັບກຳລັງຄຸ້ມຄອງ ແລະ ປ້ອງກັນຊາຍແດນ ລາວ ເພື່ອຈັບກຸມ ແລະ ແກ້ໄຂ 41 ກໍລະນີ / 86 ເປົ້າໝາຍທີ່ລັກລອບເຂົ້າ-ອອກເມືອງຢ່າງຜິດກົດໝາຍ; ປະສານສົມທົບເພື່ອຮັບເອົາ ແລະ ກອບກູ້ ຊາວຫວຽດນາມ 90 ຄົນທີ່ຖືກເຄາະຮ້າຍຈາກອາດຊະຍາກຳຄ້າມະນຸດ. |
 | ແຂວງ ດ້ຽນບຽນ ແລະ ແຂວງຫຼວງພະບາງ ປະສານສົມທົບໃນການຕ້ານອາດຊະຍາກຳ ຍສໝ - ຕອນບ່າຍວັນທີ 16 ພະຈິກ, ຢູ່ນະຄອນ ດ້ຽນບຽນຝູ, ຄະນະຜູ້ແທນທະຫານປ້ອງກັນຊາຍແດນແຂວງ ດ້ຽນບຽນ ນຳໂດຍທ່ານພັນເອກ ຟານວັນຮ່ວາ, ຜູ້ບັນຊາການທະຫານປ້ອງກັນປະເທດຂອງແຂວງ ໄດ້ມີການພົບປະເຈລະຈາ ກັບຄະນະຜູ້ແທນພະແນກປ້ອງກັນຄວາມສະຫງົບແຂວງຫຼວງພະບາງ, ສປປ ລາວ ນຳໂດຍທ່ານພົນໂທ ໂຊງປັດໃຈ, ຫົວໜ້າກົມປ້ອງກັນຄວາມສະຫງົບແຂວງ. |
 | ຫວຽດນາມ - ລາວ ເພີ່ມທະວີການຮ່ວມມືຕໍ່ສູ້ຕ້ານອາດຊະຍາກຳ ຍສໝ - ການພົບປະເຈລະຈາໄດ້ຈັດຕັ້ງເພື່ອຕີລາຄາໝາກຜົນວຽກງານການສົມທົບກັນລະຫວ່າງກອງບັນຊາການທະຫານແຂວງຊຽງຂວາງ, ຫົວພັນ, ບໍລິຄຳໄຊ (ລາວ) ແລະ ກອງບັນຊາການທະຫານປ້ອງກັນຊາຍແດນ ແຂວງ ເຫງ້ອ່ານ (ຫວຽດນາມ) ໃນການຄຸ້ມຄອງ ແລະ ປົກປັກຮັກສາຊາຍແດນ, ຕໍ່ສູ້ຕ້ານອາດຊະຍາກຳໃນໄລຍະຜ່ານມາ; ເປັນເອກະພາບກ່ຽວກັບເນື້ອໃນການປະສານສົມທົບວຽກງານໃນຕໍ່ໜ້າ. |
ມິງດຶກ
