ໂດຍໄດ້ຮັບຄໍາເຊີນຂອງກົມໃຫຍ່ເສນາທິການກອງທັບປະຊາຊົນຫວຽດນາມ, ທ່ານພົນເອກ Ponpipaat Benyasri ຜູ້ບັນຊາການກໍາລັງປ້ອງກັນຊາດກອງທັບລາດຊະວົງໄທ ມາຢ້ຽມຢາມຫວຽດນາມ ຢ່າງເປັນທາງການໃນລະຫວ່າງວັນທີ 19-21 ທັນວາ.
ຕອນບ່າຍວັນທີ 20 ທັນວາ, ທີ່ສໍານັກງານກະຊວງປ້ອງກັນປະເທດ, ທ່ານພົນໂທ ຟານວັນຢາງ ຮອງລັດຖະມົນຕີກະຊວງປ້ອງກັນປະເທດຫວຽດນາມ ໄດ້ເປັນປະທານພິທີຕ້ອນຮັບທ່ານພົນເອກ Ponpipaat Benyasri. ພາຍຫຼັງພິທີຕ້ອນຮັບ, ທ່ານພົນໂທ ຟານວັນຢາງ ໄດ້ພົບປະເຈລະຈາກັບທ່ານພົນເອກ Ponpipaat Benyasri.
 |
ທ່ານພົນໂທ ຟານວັນຢາງ ຕ້ອນຮັບທ່ານພົນເອກ Ponpipaat Benyasri. (ພາບ: qdnd.vn)
ທີ່ການຕ້ອນຮັບ, ທ່ານພົນໂທ ຟານວັນຢາງ ເນັ້ນໜັກວ່າ ການພົວພັນຄູ່ຮ່ວມມືຍຸດທະສາດ ຫວຽດນາມ-ໄທ ໃນໄລຍະຜ່ານມານັບມື້ນັບເຂົ້າສູ່ປົກກະຕິ, ພັດທະນາທັງລວງກວ້າງ ແລະລວງເລິກໃນທຸກຂົງເຂດການເມືອງ, ຄວາມໝັ້ນຄົງ, ເສດຖະກິດ, ວັດທະນະທໍາ, ສັງຄົມ; ໃນນັ້ນການຮ່ວມມືດ້ານປ້ອງກັນຊາດເປັນໜຶ່ງໃນບັນດາເສົາຄໍ້າສໍາຄັນໃນການຊຸກຍູ້ການພົວພັນສອງປະເທດ.
ສອງຝ່າຍຢັ້ງຢືນວ່າ ໃນໄລຍະຜ່ານມາ, ການພົວພັນຮ່ວມມືດ້ານປ້ອງກັນຊາດ-ການທະຫານລະຫວ່າງສອງປະເທດສືບຕໍ່ໄດ້ຮັບການຜັນຂະຫຍາຍຢ່າງມີປະສິດທິຜົນ, ເປັນຕົ້ນແມ່ນກ່ຽວກັບການແລກປ່ຽນຄະນະຜູ້ແທນ, ພົບປະແລກປ່ຽນນາຍທະຫານ, ກໍ່ສ້າງດ້ານພາສາ, ແບ່ງປັນຂໍ້ມູນຂ່າວສານ, ຮ່ວມມືລະຫວ່າງທະຫານອາກາດ, ທະຫານເຮືອ. ບັນດາກົນໄກເຈລະຈາ, ການຮ່ວມມືລະຫວ່າງສອງຝ່າຍມີລັກສະນະປະສິດທິຜົນ, ຄວາມແທດຈິງສູງ, ຈາກຂັ້ນຍຸດທະສາດຮອດຂັ້ນຜັນຂະຫຍາຍ. ຜ່ານການເຈລະຈາ, ສອງຝ່າຍຕີລາຄາໝາກຜົນການຮ່ວມມືໃນແຕ່ລະຂົງເຂດ, ລາຍງານການນໍາກະຊວງປ້ອງກັນປະເທດສອງປະເທດຊີ້ນໍາບັນດາບັນຫາເກີດຂຶ້ນ ແລະສະເໜີບັນດາການເຄື່ອນໄຫວໃໝ່ໃຫ້ທັນການ.
 |
ທັດສະນີຍະພາບພິທີພົບປະເຈລະຈາ (ພາບ: qdnd.vn)
ກ່ຽວກັບທິດທາງໃນໄລຍະຈະມາເຖິງ, ສອງຝ່າຍເຫັນດີເປັນເອກະພາບຮັກສາບັນດາການເຄື່ອນໄຫວ, ການແລກປ່ຽນຄະນະຜູ້ແທນ, ເປັນຕົ້ນແມ່ນຄະນະຜູ້ແທນຂັ້ນສູງ, ພົບປະແລກປ່ຽນນາຍທະຫານໜຸ່ມ. ໃນຕໍ່ໜ້າ, ສອງຝ່າຍສາມາດຄົ້ນຄວ້າຈັດຕັ້ງການພົບປະແລກປ່ຽນ, ການຮ່ວມມືລະຫວ່າງບັນດາທະຫານເຂດ, ກອງພົນໃຫຍ່, ເຫຼົ່າຮົບ; ແລກປ່ຽນບົດຮຽນໃນການຊ່ວຍເຫຼືອປະຊາຊົນລົບລ້າງຄວາມອຶດຫິວຫຼຸດຜ່ອນຄວາມທຸກຍາກ... ສອງຝ່າຍກໍ່ຈະສືບຕໍ່ຊອກຮູ້, ແລກປ່ຽນກ່ຽວກັບຄວາມສາມາດຮ່ວມມືໃນບັນດາຂົງເຂດ, ຄື: ພະລາທິການ, ອຸດສາຫະກໍາ, ປ້ອງກັນຊາດ...
（ແຫຼ່ງຂໍ້ມູນ： la.qdnd.vn）
