ຕອນເຊົ້າວັນທີ 12 ສິງຫາ (ຕາມເວລາ ມົດສະກູ), ທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດ ໄດ້ນໍາໜ້າຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ເຂົ້າຮ່ວມພິທີເປີດນໍາໃຊ້ອະນຸສາວະລີບັນດານັກຮົບອາສາສະໝັກສາກົນຫວຽດນາມ ທີ່ເຂົ້າຮ່ວມການສູ້ຮົບ ເພື່ອປົກປ້ອງນະຄອນຫຼວງມົດສະກູ ໃນສົງຄາມປົກປັກຮັກສາປະເທດຊາດອັນຍິ່ງໃຫຍ່ (1941-1945) (ເອີ້ນຫຍໍ້ວ່າອະນຸສາວະລີ). ທ່ານພົນໂທ Viktor Petrovich Goremykin, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງການທະຫານບັນດາກໍາລັງປະກອບອາວຸດ ສະຫະພັນລັດເຊຍ ເປັນປະທານພິທີດັ່ງກ່າວ.
ໃນໄລຍະຜ່ານມາ, ໂດຍປະຕິບັດຄຳເຫັນຊີ້ນຳຂອງການນໍາກະຊວງປ້ອງກັນປະເທດ ກ່ຽວກັບເລື່ອງຝ່າຍລັດເຊຍ ສະເໜີປະກອບຄໍາເຫັນຕໍ່ການວາດພາບອະນຸສາວະລີ, ກົມໃຫຍ່ການເມືອງກອງທັບປະຊາຊົນຫວຽດນາມ ໄດ້ຊີ້ນຳກົມໂຄສະນາອົບຮົມ ເປັນເຈົ້າພາບຄົ້ນຄວ້າ, ສະເໜີ, ຈາກນັ້ນລາຍງານ ແລະສະເໜີໃຫ້ການນໍາກະຊວງປ້ອງກັນປະເທດ ເຫັນດີຕໍ່ການວາດພາບອະນຸສາວະລີ ໂດຍຝ່າຍລັດເຊຍ ກະກຽມ. ມາຮອດປະຈຸບັນ, ກິດຈະກຳອະນຸສາວະລີ ໄດ້ຮັບການກໍ່ສ້າງສຳເລັດຕາມແຜນການທີ່ມີຊື່ວ່າ “ພວກເພື່ອນພັນທະມິດ-ນັກຮົບຫວຽດນາມ” ແລະຕັ້ງຢູ່ສວນສາທາລະນະ Patriot, ເຊິ່ງລວມມີ 3 ຮູບປັ້ນທອງທີ່ວາດພາບຮູບພາບບັນດານັກຮົບອາສາສະໝັກສາກົນຫວຽດນາມ ທີ່ພວມຕັ້ງໝັ້ນປ້ອງກັນ ແລະສູ້ຮົບຈົນລົມຫາຍໃຈສຸດທ້າຍໃນບັ້ນຮົບປົກປ້ອງມົດສະກູ.
 |
| ອະນຸສາວະລີບັນດານັກຮົບອາສາສະໝັກສາກົນຫວຽດນາມ. ພາບ: baonhandan.vn |
ກ່າວຄຳເຫັນທີ່ພິທີ, ທ່ານພົນເອກ ຟານວັນຢາງ ເນັ້ນໜັກວ່າ, ກະຊວງປ້ອງກັນປະເທດ, ກອງທັບປະຊາຊົນຫວຽດນາມ ຕີລາຄາສູງ ແລະຂອບໃຈກະຊວງປ້ອງກັນປະເທດ ແລະບັນດາກໍາລັງປະກອບອາວຸດສະຫະພັນລັດເຊຍ ທີ່ໄດ້ກໍ່ສ້າງອະນຸສາວະລີຢູ່ມົດສະກູ. ທ່ານພົນເອກ ຟານວັນຢາງ ຊີ້ແຈ້ງວ່າ: ອະນຸສາວະລີບັນດານັກຮົບອາສາສະໝັກສາກົນຫວຽດນາມ ໄດ້ຮັບການເປີດນໍາໃຊ້ ຢູູ່ມົດສະກູ ພ້ອມກັບອະນຸສາວະລີບັນດານັກຮົບໂຊວຽດ/ສະຫະພັນລັດເຊຍ - ນັກຮົບຫວຽດນາມ ທີ່ເສຍສະຫຼະຊີວິດເພື່ອສັນຕິພາບ, ສະຖຽນລະພາບຢູ່ແຂວງແຄ໋ງຮ່ວາ ທັງແມ່ນພະຍານຫຼັກຖານຂອງມູນເຊື້ອປະຫວັດສາດ ທັງແມ່ນສັນຍາລັກແຫ່ງຄວາມມານະພະຍາຍາມປັບປຸງ ແລະເຮັດໃຫ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ ເລິກເຊິ່ງກວ່າອີກ.
ສ່ວນທ່ານພົນໂທ Viktor Petrovich Goremykin ເນັ້ນໜັກວ່າ, ຕໍ່ໜ້າການບຸກໂຈມຕີຢ່າງດຸເດືອດຂອງຟາດຊິດເຢຍລະມັນ, ບັນດານັກຮົບຫວຽດນາມ ໄດ້ອາສາສະໝັກເຂົ້າຮ່ວມການສູ້ຮົບເພື່ອປົກປ້ອງມົດສະກູ. ເຂົາເຈົ້າໄດ້ສະແດງໃຫ້ເຫັນຄວາມກ້າຫານ ແລະອົງອາດກ້າແກ່ນ, ຄຽງບ່າຄຽງໄຫຼ່ພ້ອມກັບນັກຮົບກອງທັບແດງ ໂຊວຽດ ໃນສະໜາມຮົບເພື່ອຕ້ານສັດຕູຜູ້ຮຸກຮານ. ການປະກອບສ່ວນອັນໃຫຍ່ຫຼວງຂອງເຂົາເຈົ້າ ໄດ້ປະກອບສ່ວນຍາດເອົາໄຊຊະນະໃນສົງຄາມປົກປັກຮັກສາປະເທດຊາດອັນຍິ່ງໃຫຍ່.
ທີ່ພິທີ, ທ່ານພົນເອກ ຟານວັນຢາງ ໄດ້ຢ້ຽມຢາມຖາມຂ່າວ ແລະລະດົມກຳລັງໃຈທ່ານນາງ ເລທິເຟື້ອງ, ລູກສາວຂອງນັກຮົບ ລີ໋ຝູຊານ (ເລຟານຈັນ), ປະຈຸບັນພວມດຳລົງຊີວິດຢູ່ນະຄອນຫຼວງ ມົດສະກູ. ທ່ານພົນເອກ ຟານວັນຢາງ ຢືນຢັນວ່າ, ພັກ ແລະລັດຫວຽດນາມ ຍາມໃດກໍ່ເອົາໃຈໃສ່ເປັນພິເສດ, ເບິ່ງແຍງດູແລ ແລະມີແຜນນະໂຍບາຍ, ນະໂຍບາຍຫຼາຍຢ່າງ ສໍາລັບທະຫານເສຍອົງຄະ, ທະຫານເຈັບເປັນ, ຍາດຕິພີ່ນ້ອງຂອງນັກຮົບເສຍສະຫຼະຊີວິດເພື່ອຊາດ, ຄອບຄົວນະໂຍບາຍ, ຜູ້ທີ່ມີຄຸນງາມຄວາມດີຕໍ່ການປະຕິວັດ, ຖືນີ້ແມ່ນໜ້າທີ່ການເມືອງສຳຄັນ ແລະເປັນປະຈຳ. ໂອກາດນີ້, ທ່ານພົນເອກ ຟານວັນຢາງ ໄດ້ມອບທຸງຊາດໃຫ້ທ່ານນາງ ເລທິເຟື້ອງ ດ້ວຍຄວາມປາດຖະໜາວ່າຄອບຄົວທ່ານນາງ ຍາມໃດກໍ່ມຸ່ງຫາບ້ານເກີດເມືອງນອນ, ປະເທດຊາດ ແລະຫວັງວ່າຖ້າມີໂອກາດ, ທ່ານນາງພ້ອມດ້ວຍຄອບຄົວຈະກັບເມືອຢ້ຽມຢາມຫວຽດນາມ.
ຕໍ່ຈາກນັ້ນ, ຕອນເຊົ້າຂອງວັນດຽວກັນ, ທ່ານພົນເອກ ຟານວັນຢາງ ພ້ອມດ້ວຍຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ໄດ້ເຂົ້າຮ່ວມພິທີເປີດເວທີປາໄສເຕັກນິກການທະຫານສາກົນ ARMY-2024 ທີ່ດໍາເນີນໃນລະຫວ່າງວັນທີ 12-14 ຢູ່ນະຄອນຫຼວງ ມົດສະກູ.
ພາຍຫຼັງພິທີເປີດ, ທ່ານພົນເອກ ຟານວັນຢາງ ພ້ອມດ້ວຍຄະນະ ໄດ້ໄປຢ້ຽມຊົມບັນດາຮ້ານວາງສະແດງ. ທ່ານພົນເອກ ຟານວັນຢາງ ແລະຄະນະຜູ້ແທນ ໄດ້ໃຊ້ເວລາເພື່ອຊອກຮູ້ບັນດາຜະລິດຕະພັນທີ່ວາງສະແດງໃນແຕ່ລະຮ້ານ, ແລກປ່ຽນຂໍ້ມູນຂ່າວສານທີ່ກ່ຽວຂ້ອງ, ພ້ອມທັງຊົມເຊີຍ ແລະຕີລາຄາສູງບັນດາກົມກອງ, ວິສາຫະກິດທີ່ເຂົ້າຮ່ວມເຫດການດັ່ງກ່າວ.
