 |
| ທ່ານເອກອັກຄະລັດຖະທູດ ດັງມິ່ງຄອຍ ແລະ ບັນດາຜູ້ແທນໄດ້ຖ່າຍຮູບທີ່ລະນຶກກັບບັນດານັກຮົບເກົ່າລັດເຊຍ. (ພາບ: XUAN HUNG) |
ນີ້ແມ່ນກອງປະຊຸມພົບປະປະຈຳປີ ຈັດຂື້ນໂດຍສະຖານທູດຫວຽດນາມ ປະຈຳສະຫະພັນລັດເຊຍ ສົມທົບກັບສະມາຄົມນັກຮົບເກົ່າລັດເຊຍ ທີ່ເຄີຍເຮັດວຽກຢູ່ຫວຽດນາມ ດ້ວຍການຊ່ວຍເຫຼືອຂອງກອງທຶນຊຸກຍູ້ການຮ່ວມມືລັດເຊຍ - ຫວຽດນາມ “ມູນເຊື້ອ ແລະ ມິດຕະພາບ”.
ການເຄື່ອນໄຫວນີ້ຈັດຂື້ນແມ່ນແນໃສ່ເພື່ອສະແດງຄວາມຮູ້ບຸນຄຸນຕໍ່ບັນດານັກຊ່ຽວຊານ, ນາຍທະຫານກອງທັບສະຫະພາບ ໂຊວຽດ (ລັດເຊຍປະຈຸບັນ) ທີ່ໄດ້ເຂົ້າຮ່ວມໂດຍກົງໃນການຊ່ວຍເຫຼືອປະຊາຊົນຫວຽດນາມ ໃນຊຸມປີສົງຄາມ, ປະກອບສ່ວນຮັດແໜ້ນ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ ແລະ ສະຫະພັນລັດເຊຍ.
 |
| ທ່ານເອກອັກຄະລັດຖະທູດ ດັງມິ່ງຄອຍ ກ່າວຄຳເຫັນທີ່ພິທີ. (ພາບ: XUAN HUNG) |
ກ່າວຄຳເຫັນໃນພິທີ, ຕາງໜ້າໃຫ້ພັກ, ລັດຖະບານ ແລະ ປະຊາຊົນຫວຽດນາມ, ທ່ານເອກອັກຄະລັດຖະທູດ ດັງມິ່ງຄອຍ ໄດ້ສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ບັນດາເພື່ອນລັດເຊຍ ທີ່ໄດ້ຊ່ວຍເຫຼືອ ແລະ ປະກອບສ່ວນສຳຄັນເຂົ້າໃນພາລະກິດປົດປ່ອຍ ແລະ ເອກະພາບປະເທດຊາດຫວຽດນາມ.
ທ່ານເອກອັກຄະລັດຖະທູດ ດັງມິ່ງຄອຍ ໄດ້ຕີລາຄາສູງບັນດາໄລຍະປະຫວັດສາດອັນສະຫງ່າລາສີຂອງປະເທດຊາດ, ສະແດງຄວາມພາກພູມໃຈໃນການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືລະຫວ່າງປະຊາຊົນສອງປະເທດ ຫວຽດນາມ ແລະ ສະຫະພັນລັດເຊຍ.
 |
| ບັນດາຜູ້ຊ່ຽວຊານການທະຫານລັດເຊຍທີ່ເຄີຍເຮັດວຽກຢູ່ຫວຽດນາມ ໄດ້ເຂົ້າຮ່ວມກອງປະຊຸມພົບປະມູນເຊື້ອເປັນຈໍານວນຫຼວງຫຼາຍ. (ພາບ: XUAN HUNG) |
ທ່ານເອກອັກຄະລັດຖະທູດຢືນຢັນວ່າ: ໂດຍບໍ່ສົນໃຈເຖິງໄລຍະຂຶ້ນລົງຂອງປະຫວັດສາດ ແຕ່ການພົວພັນມິດຕະພາບທີ່ເປັນມູນເຊື້ອ ແລະ ຄວາມໄວ້ເນື້ອເຊື່ອໃຈດ້ານການເມືອງລະຫວ່າງ ສອງປະເທດຍັງໄດ້ຮັບການຮັກສາ ແລະ ພັດທະນາຢ່າງເຂັ້ມແຂງ.
ການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ ແລະ ສະຫະພັນລັດເຊຍ ໄດ້ມີພັດທະນາຢ່າງຕັ້ງໜ້າໃນທຸກຂົງເຂດ. ການຮ່ວມມືດ້ານເສດຖະກິດການຄ້າສອງປະເທດໄດ້ຮັບການຮັດແໜ້ນ ແລະ ເປີດກວ້າງ, ການແລກປ່ຽນປະຊາຊົນນັບມື້ນັບເລິກເຊິ່ງ ແລະ ໃກ້ຊິດກວ່າເກົ່າ.
ທ່ານເອກອັກຄະລັດຖະທູດ ດັງມິ່ງຄອຍ ເຊື່ອໝັ້ນວ່າ ປະຊາຊົນສອງປະເທດສາມາດສ້າງອະນາຄົດທີ່ຈະເລີນຮຸ່ງເຮືອງກວ່າໃຫ້ປະຊາຊົນຂອງຕົນ, ປະກອບສ່ວນສຳຄັນເຂົ້າໃນການຮັກສາສະຖຽນລະພາບ ແລະ ວັດທະນາຖາວອນຢູ່ພາກພື້ນ ອາຊີ - ປາຊີຟິກ ເວົ້າສະເພາະ ແລະ ໃນໂລກ ເວົ້າລວມ.
 |
| ທ່ານປະທານສະມາຄົມນັກຮົບເກົ່າລັດເຊຍ ທີ່ເຄີຍເຮັດວຽກຢູ່ຫວຽດນາມ Nikolai Kolesnik ໄດ້ສະແເດງຄວາມຮູ້ສຶກໃນພິທີພົບປະ (ພາບ: XUAN HUNG) |
ທົບທວນຄືນບັນດາຄວາມຊົງຈຳໃນຊຸມປີ “ຢືນຄຽງບ່າຄຽງໄຫລ່” ກັບບັນດາສະຫາຍຫວຽດນາມ ໃນສະໄໝຕໍ່ສູ້, ທ່ານ Nikolai Kolesnik, ປະທານສະມາຄົມນັກຮົບເກົ່າ ລັດເຊຍ ທີ່ເຄີຍເຮັດວຽກຢູ່ຫວຽດນາມ ໄດ້ສະແດງຄວາມຮູ້ສຶກຕື້ນຕັນໃຈຫລາຍໃນທຸກໆປີທີ່ໄດ້ມີໂອກາດໄດ້ພົບປະໝູ່ເພື່ອນຂອງຂ້າພະເຈົ້າ ແລະ ເພື່ອນຮ່ວມງານທີ່ໄດ້ຮ່ວມກັນໃນອະດີດ.
ເວລາຜ່ານໄປຢ່າງໄວວາ, ມີໝູ່ເພື່ອນສະຫາຍຂອງທ່ານ ບາງຄົນກໍ່ໄດ້ລ່ວງລັບໄປຈາກໂລກນີ້. ມື້ນີ້ເຖິງວ່າການພົບປະຂອງເຂົາເຈົ້າບໍ່ຄົບໜ້າຄົບຕາ ຄືການພົບປະຄັ້ງກ່ອນ, ແຕ່ຄວາມຊົງຈຳຂອງບັນດາສະຫາຍ ໃນໄລຍະປະຫວັດສາດຫຼາຍປີ, ການຮ່ວມແສງໄຟອັນດຽວກັນ ຢູ່ຮ່ວມກັນໃນ “ແຜ່ນດິນຮູບຕົວອັກສອນ S” ຍັງຄົງຄືເກົ່າ ຄືວ່າແມ່ນມື້ວານນີ້.
 |
| ບັນດານັກຮົບເກົ່າລັດເຊຍ ໄດ້ພ້ອມກັນຟັງເພງຍ້ອງຍໍບັນດາໄຊຊະນະອັນພິລະອາດຫານຂອງຊາວຫວຽດນາມ ໃນໄລຍະຕໍ່ຕ້ານ. (ພາບ: XUAN HUNG) |
ໃນທ່າມບັນຍາກາດແຫ່ງມິດຕະພາບອັນເລິກເຊິ່ງ, ບັນດານັກຮົບຊາວລັດເຊຍ ອວຍພອນກັນຈົ່ງມີສຸຂະພາບເຂັ້ມແຂງ, ພ້ອມກັນຮັບຟັງບົດເພງໃນສະໄໝໂຊວຽດ, ຍ້ອງຍໍບັນດາວິລະກຳຕໍ່ສູ້ທີ່ພິລະອາດຫານໃນສົງຄາມຕໍ່ຕ້ານຂອງປະຊາຊົນຫວຽດນາມ, ຫວນຄືນບັນດາຄວາມຊົງຈຳທີ່ໄດ້ເຂົ້າສູ່ປະຫວັດສາດຂອງຊາວຫວຽດນາມ.
ຄວາມຮູ້ສຶກຂອງນັກຮົບເກົ່າລັດເຊຍທີ່ມີຕໍ່ຫວຽດນາມ, ບ່ອນທີ່ເຂົາເຈົ້າເຄີຍສະໜິດຕິດພັນໃນປາງສົງຄາມ ດຽວນີ້ຍັງບໍ່ມີຫຍັງປ່ຽນແປງ. ມີຜູ້ຄົນທີ່ເຖິງວ່າມີອາຍຸສູງ ແລະ ສຸຂະພາບບໍ່ດີປານໃດກໍ່ຕາມ, ແຕ່ຍັງມີຄວາມຫວັງຍັງຢູ່ໃນສາຍຕາຂອງຕົນ ຫວັງວ່າມີມື້ໜຶ່ງ ຈະໄດ້ກັບຄືນເມືອຫວຽດນາມ ແລະ ໄປຢ້ຽມຢາມສະຖານທີ່ທີ່ເຂົາເຈົ້າເຄີຍຕິດພັນໃນໄວໜຸ່ມທີ່ຟົດຟື້ນ.
 | ຜູ້ຊົມລັດເຊຍ ໄດ້ຕົບມືຊົມເຊີຍບັນດານັກສິລະປິນຫວຽດນາມ ຢ່າງບໍ່ຢຸດຢັ້ງ |
| ເຜີຍແຜ່ບັນດາຄຸນຄ່າວັດທະນະທຳ, ສິລະປະຫວຽດນາມ ຢູ່ ເຊນປີເຕີເບີກ (ສະຫະພັນລັດເຊຍ) |
ອ.ສະຫວັດ
