ຕອນເຊົ້າວັນທີ 24 ກໍລະກົດ, ທ່ານເລຂາຜູ້ທີໜຶ່ງຄະນະບໍລິຫານງານສູນກາງພັກກອມມູນິດ, ປະທານປະເທດ ກູບາ Miguel Díaz-Canel Bermúdez ນຳໜ້າຄະນະຜູ້ແທນຂັ້ນສູງ ກູບາ ມາໄຫວ້ອາໄລທ່ານເລຂາທິການໃຫຍ່ ຫງວຽນຟູ໋ຈ້ອງ ທີ່ສະຖານທູດ ຫວຽດນາມ ຢູ່ La Habana.
ທ່ານ Miguel Díaz-Canel ຢືນຢັນວ່າ ການເສຍຊີວິດຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ແມ່ນຄວາມສູນເສຍທີ່ບໍ່ສາມາດທົດແທນໄດ້ສຳລັບປະຊາຊົນ ກູບາ. ໃນບັນດາຖານະຕຳແໜ່ງທີ່ແຕກຕ່າງກັນ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຍາມໃດກໍ່ສຸດຈິດສຸດໃຈຊຸກຍູ້ການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນລະຫວ່າງປະຊາຊົນສອງປະເທດ ກູບາ ແລະ ຫວຽດນາມ.
 |
| ທ່ານປະທານປະເທດ ກູບາ Miguel Díaz-Canel Bermúdez (ທີສອງຈາກຊ້າຍ) ໄຫວ້ອາໄລທ່ານເລຂາທິການໃຫຍ່ ຫງວຽນຟູ໋ຈ້ອງ. |
ໃນປຶ້ມໄຫວ້ອາໄລ, ທ່ານປະທານປະເທດ ກູບາ ໄດ້ຂຽນວ່າ: “ໃນຊ່ວງເວລາທີ່ເສົ້າໂສກນີ້, ພວກຂ້າພະເຈົ້າເຊື່ອໝັ້ນວ່າ ການປະກອບສ່ວນຂອງສະຫາຍ ຫງວຽນຟູ໋ຈ້ອງ ຍັງຈະເປັນຂີດໝາຍໃນພາລະກິດຂອງພັກ ແລະ ປະຊາຊົນ ຫວຽດນາມ ຕະຫຼອດໄປ. ຈະລະນຶກເຖິງເພື່ອນມິດທີ່ຈິງໃຈ ຕະຫຼອດໄປ!”.
ຕາມທ່ານນາຍົກລັດຖະມົນຕີ ກູບາ Manuel Marrero ແລ້ວ, ໃນຊຸມມື້ນີ້, ທົ່ວປະເທດ ກູບາ ໄດ້ສະແດງຄວາມຮັກແພງສາມັກຄີກັບ ຫວຽດນາມ. ສະພາແຫ່ງຊາດໄດ້ຕາງໜ້າໃຫ້ປະຊາຊົນ ເພື່ອກົ້ມຫົວໄຫວ້ອາໄລຕໍ່ທ່ານເລຂາທິການໃຫຍ່ ຫງວຽນຟູ໋ຈ້ອງ, ແລະ ທົ່ວປະເທດ ກູບາ ໄດ້ໄວ້ອາໄລທ່ານ. ທັງໝົດຄວາມຮັກແພງນັ້ນລ້ວນແຕ່ແມ່ນຫຼັກຖານສະແດງໃຫ້ເຫັນຄວາມຮູ້ບຸນຄຸນຕໍ່ນ້ຳໃຈສາມັກຄີ ແລະ ມິດຕະພາບທີ່ຈິງໃຈທີ່ທ່ານເລຂາທິການໃຫຍ່ ຫງວຽນຟູ໋ຈ້ອງ ຍາມໃດກໍ່ເພິ່ມພູນຄູນສ້າງໃຫ້ແກ່ ຊາວຫວຽດນາມ ທຸກຄົນ.
ກູບາ ແມ່ນປະເທດທຳອິດທີ່ປະກາດຈະໄວ້ອາໄລ 3 ວັນເພື່ອລະນຶກເຖິງທ່ານເລຂາທິການໃຫຍ່ ຫງວຽນຟູ໋ຈ້ອງ. ໃນຊຸມມື້ນີ້, ສື່ມວນຊົນ ກູບາ ຈະສືບຕໍ່ລົງພິມບົດຂຽນຫຼາຍສະບັບກ່ຽວກັບການປະກອບສ່ວນຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ໃນພາລະກິດແຫ່ງການສ້າງສາ ແລະ ພັດທະນາປະເທດຊາດ, ກໍ່ຄືນ້ຳໃຈມິດຕະພາບ ຫວຽດນາມ - ກູບາ.
ຕອນເຊົ້າວັນທີ 24 ກໍລະກົດ, ໃນບັນຍາກາດອັນເຄັ່ງຂຶມ ແລະ ໂສກເສົ້າເສຍໃຈ, ພະນັກງານ, ລັດຖະກອນຂອງສະຖານທູດ ແລະ ບັນດາອົງການຜູ້ຕາງໜ້າ ຫວຽດນາມ ປະຈຳ Algeria ທັງໝົດ ໄດ້ໃຊ້ເວລາໜຶ່ງນາທີ ເພື່ອກົ້ມຫົວໄຫວ້ອາໄລ, ລະນຶກ ແລະ ສັ່ງລາທ່ານເລຂາທິການໃຫຍ່ ຫງວຽນຟູ໋ຈ້ອງ.
 |
| ຕອນເຊົ້າວັນທີ 24 ກໍລະກົດ, ຢູ່ສໍານັກງານສະຖານທູດ ຫວຽດນາມ ປະຈໍາ Algeria ໄດ້ຈັດພິທີໄຫວ້ອາໄລທ່ານເລຂາທິການໃຫຍ່ພັກກອມມູນິດ ຫວຽດນາມ ຫງວຽນຟູ໋ຈ້ອງ. |
ທ່ານປະທານສະພາສູງ Algeria Salah Goudjil ໄດ້ມາໄຫວ້ອາໄລ ແລະ ສະແດງຄວາມເສຍໃຈຢ່າງສຸດຊຶ້ງຕໍ່ການສູນເສຍອັນໃຫຍ່ຫຼວງຂອງພັກ, ລັດ, ລັດຖະບານ ແລະ ປະຊາຊົນ ຫວຽດນາມ. ໃນປຶ້ມໄຫວ້ອາໄລ, ທ່ານປະທານສະພາສູງ Salah Goudjil ເນັ້ນໜັກວ່າ: ການເສຍຊີວິດຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ເຮັດໃຫ້ ຫວຽດນາມ ເສຍນັກຮົບຄົນໜຶ່ງທີ່ຈົງຮັກພັກດີ ແລະ ສະຫຼາດສ່ອງໃສ, ເປັນຜູ້ນຳທີ່ດີເລີດ ເຊິ່ງປະຫວັດສາດໄດ້ພິສູດໃຫ້ເຫັນເຖິງການປະກອບສ່ວນອັນໃຫຍ່ຫຼວງຂອງທ່ານໃນການພັດທະນາຂອງປະເທດໃນທຸກຂົງເຂດ ການເມືອງ, ການທູດ, ເສດຖະກິດ ຕະຫຼອດເຖິງວັດທະນະທໍາ. ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ຝາກບັນດາຂີດໝາຍອັນສຳຄັນໃນວິວັດການສ້າງສາປະເທດ ຫວຽດນາມ ໃຫ້ທັນສະໄໝ ແລະ ວັດທະນາຖາວອນໄວ້.
ບົດຂຽນໃນປຶ້ມໄຫວ້ອາໄລຂອງທ່ານ Salah Goudjil ມີຕອນຂຽນວ່າ: “ໃນເວລາທີ່ເສົ້າໂສກຂອງປະຊາຊົນ ຫວຽດນາມ, ໃນນາມທ່ານປະທານາທິບໍດີ Abdelmadjid Tebboune, ລັດຖະບານ ແລະ ປະຊາຊົນ Algeria, ຂ້າພະເຈົ້າຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງ ແລະ ຄວາມຮັກແພງທີ່ຈິງໃຈຕໍ່ພັກ, ລັດ ແລະ ປະຊາຊົນ ຫວຽດນາມ. ອີກເທື່ອໜຶ່ງ, ຂ້າພະເຈົ້າຂໍຢືນຢັນວ່າ Algeria ຍາມໃດກໍ່ສາມັກຄີກັບ ຫວຽດນາມ ແລະ ເຊື່ອໝັ້ນວ່າ ປະຊາຊົນ ຫວຽດນາມ ຈະຜ່ານຜ່າໄລຍະຫຍຸ້ງຍາກນີ້ໄປໄດ້”.
 |
| ປະທານສະພາສູງ Algerian Salah Goudjil ໄດ້ຂຽນໃນປື້ມໄຫວ້ອາໄລ. |
ໃນວັນດຽວກັນ, ທ່ານເລຂາທິການໃຫຍ່ພັກແນວໂຮມປົດປ່ອຍຊາດ Algeria (FLN) Abdelkrim Benmbarek, ສະມາຊິກຄະນະບໍລິຫານງານສູນກາງຮັບຜິດຊອບການພົວພັນຕ່າງປະເທດຂອງພັກ FLN ທ່ານ Mourad Lamoudi, ລັດຖະມົນຕີກະຊວງນັກຮົບເກົ່າ ແລະ ຜູ້ມີຄຸນງາມຄວາມດີAlgeria ທ່ານ Laïd Rebiga... ພ້ອມກັບ ຊາວຫວຽດນາມ ອາໄສຢູ່ Algeria, ຊາວ Algeria ທີ່ຮັກແພງ ຫວຽດນາມ ຫຼາຍຄົນ ໄດ້ມາໄຫວ້ອາໄລທ່ານເລຂາທິການໃຫຍ່ ຫງວຽນຟູ໋ຈ້ອງ.
ຕອນບ່າຍວັນທີ 24 ກໍລະກົດ, ຢູ່ນະຄອນ Pretoria (ອາຟະລິກາໃຕ້), ທ່ານ Solly Mapaila, ເລຂາທິການໃຫຍ່ພັກກອມມູນິດ ອາຟະລິກາໃຕ້ ໄດ້ໄປສະຖານທູດ ຫວຽດນາມ ປະຈຳ Pretoria ເພື່ອໄຫວ້ອາໄລ ແລະ ຂຽນໃນປຶ້ມໄຫວ້ອາໄລເຖິງທ່ານເລຂາທິການໃຫຍ່ ຫງວຽນຟູ໋ຈ້ອງ.
 |
| ເລຂາທິການໃຫຍ່ພັກກອມມູນິດ ອາຟຣິກາໃຕ້ ທ່ານ Solly Mapaila ຂຽນໃນປຶ້ມໄຫວ້ອາໄລ. |
ຂຽນໃນປຶ້ມໄຫວ້ອາໄລ, ທ່ານເລຂາທິການໃຫຍ່ Mapaila ເນັ້ນໜັກວ່າ, ພັກກອມມູນິດ ອາຟຼິກາໃຕ້ ຍາມໃດກໍ່ຈົດຈຳບັນດາການປະກອບສ່ວນຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ໃນພາລະກິດແຫ່ງການສ້າງສັງຄົມນິຍົມຢູ່ ຫວຽດນາມ, ສືບທອດ ແລະ ສືບຕໍ່ມູນເຊື້ອປະຫວັດສາດແຫ່ງການຕໍ່ສູ້ຂອງປະຊາຊົນ ຫວຽດນາມ ຕ້ານລັດທິຈັກກະພັດ ພາຍໃຕ້ການນຳພາຂອງປະທານ ໂຮ່ຈີມິນ, ທ່ານພົນເອກ ຫວໍຫງວຽນຢາບ.
ພັກກອມມູນິດ ອາຟະລິກາໃຕ້ ມີຄວາມພາກພູມໃຈທີ່ຮັບຮູ້ການປະກອບສ່ວນຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ໃນການຕໍ່ສູ້ສາກົນຂອງຊົນຊັ້ນກຳມະກອນເພື່ອສັງຄົມນິຍົມ ແລະ ການນຳພາ ປະຊາຊົນ ຫວຽດນາມ ທີ່ວິລະຊົນໃນການກໍ່ສ້າງຄວາມເຂັ້ມແຂງຂອງສັງຄົມນິຍົມດ້ວຍຕົນເອງ ແລະ ຍືນຍົງ.
 | ທ່ານເລຂາທິການໃຫຍ່ ຫງວຽນຟູ໋ຈ້ອງ ໃນດວງໃຈຊາວ ຫວຽດນາມ ອາໄສຢູ່ຕ່າງປະເທດ ຍສໝ - ໄປໃສກໍຕ້ອງຄິດວ່າຕົນເອງເປັນ “ລູກຫຼານ ລາກຮົ່ງ”, ບໍ່ວ່າຈະເຮັດຫຍັງກໍຕ້ອງຄິດວ່າຕົນເອງເປັນຊາວ ຫວຽດນາມ; ຮັກສາສີສັນຂອງຊາດ, ຮັກສາພາສາ ຫວຽດນາມ, ໂຄສະນາພາບພົດຂອງ ຫວຽດນາມ ໄປສູ່ເພື່ອນມິດໃນທົ່ວໂລກ... ນັ້ນແມ່ນຄຳຕັກເຕືອນຂອງ ທ່ານເລຂາທິການໃຫຍ່ ຫງວຽນຟູ໋ຈ້ອງ ເຖິງຊາວ ຫວຽດນາມ ອາໄສຢູ່ຕ່າງປະເທດ. |
 | ສະຫາຍເລຂາທິການໃຫຍ່ ຫງວຽນຟູ໋ຈ້ອງ ແມ່ນນັກການເມືອງດີເດັ່ນ ແລະ ເປັນຜູ້ນຳທີ່ເປັນແບບຢ່າງ ຍສໝ - ທ່ານປະທານສູນກາງສະມາຄົມມິດຕະພາບ ລາວ - ຫວຽດນາມ, ທ່ານ ບັນດິດ ບໍ່ວຽງຄໍາ ວົງດາລາ ໃຫ້ຂໍ້ສັງເກດວ່າ: ສະຫາຍເລຂາທິການໃຫຍ່ ຫງວຽນຟູ໋ຈ້ອງ ເປັນນັກການເມືອງ, ນັກວິທະຍາສາດ, ສາດສະດາຈານ, ເປັນຜູ້ນໍາທີ່ເປັນແບບຢ່າງດີເດັ່ນ. |
ມິງດຶກ
