ໂດຍເລື່ອງເລົ່າສືບທອດກັນມາວ່າ ໃນສະຕະວັດທີ XV, ພາຍໃຕ້ລາຊະວົງຂອງເຈົ້າຊີວິດ ເລແທງຕົງ, ປະເທດ ດ້າຍຫວຽດ ຕ້ອງປະເຊີນໜ້າກັບໄພອັນຕະລາຍຈາກສັດຕູຜູ້ຮຸກຮານພາຍນອກ. ເພື່ອສະແດງໃຫ້ເຫັນຄວາມສາມັກຄີ, ເຈົ້າຊີວິດປະເທດ ອ່າຍລາວ (ປະເທດ ລາວ ໃນປະຈຸບັນ) ໄດ້ສັ່ງໃຫ້ລູກສາວຂອງຕົນ ເຊິ່ງແມ່ນເທບທິດາ ໂຢ່ຍຮວ່າ ຮັບໜ້າທີ່ສຳຄັນໃນການຝຶກຊ້ອມຝູງຊ້າງເສິກ ເພື່ອຊ່ວຍດ້າຍຫວຽດ ຂັບໄລ່ສັດຕູຈາກພາຍນອກ.
ພາຍຫຼັງຫຼາຍວັນທີ່ໄປຜ່ານສາຍນ້ຳ, ປ່າໄມ້, ສິ່ງທ້າທາຍນັບພັນຢ່າງ, ເທບທິດາ ໂຢ່ຍຮວ່າ ໄດ້ມອບຝູງທະຫານຊ້າງ ແລະ ວິທີການບັນຊາຊ້າງເສິກໃຫ້ແກ່ບັນດານາຍທະຫານ ດ້າຍຫວຽດ ຢ່າງທັນການ... ໃນສົງຄາມນັ້ນ, ສະຫງ່າອົງອາດ, ເຂັ້ມແຂງແຮງກ້າຂອງກອງທະຫານຊ້າງ ລາວ ກໍໄດ້ຊ່ວຍໃຫ້ ດ້າຍຫວຽດ ໄດ້ຮັບໄຊຊະນະອັນສະຫງ່າລາສີ...
 |
| ທ່ານນາງ ຄຳເພົາເອີນທະວັນ, ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມບັນດາຜູ້ແທນໄປຖະຫວາຍທູບທຽນຢູ່ຫໍເທບທິດາ ໂຢ່ຍຮວ່າ. (ພາບ: TL) |
ຕາມເສັ້ນທາງກັບຄືນ ລາຊະອານາຈັກ ອ່າຍລາວ, ເມື່ອມາຮອດບໍລິເວນຂຶ້ນກັບແຂວງ ນິງບິ່ງ ໃນປະຈຸບັນ, ເທບທິດາຖືກເຈັບປ່ວຍ, ເສຍຊີວິດ. ເພື່ອຫວນຄືນຄຸນງາມຄວາມດີ, ບຸນຄຸນ ແລະ ຄວາມຜູກພັນຮັກໄຄ່ ຫວຽດນາມ - ລາວ, ເຈົ້າຊີວິດ ເລແທງຕົງ ໄດ້ສັ່ງໃຫ້ເສນາອາໝາດ ຈັດຕັ້ງພິທີງານສົບ, ສ້າງຫໍ, ກໍ່ສ້າງສຸສານໃຫ້ເທບທິດາ ຢູ່ຊື່ເຂດດິນທີ່ເທບທິດາເສຍຊີວິດ.
ຕາມເອກະສານສະບັບໜຶ່ງ, ປີ 1882, ຊື່ເຂດດິນແຫ່ງນີ້ຂຶ້ນກັບຕາແສງ ໂດກຈ່າງ, ສະຫະຕາແສງ ເລຊາ, ເມືອງ ຢ່າວ້ຽນ, ແຂວງ ນິງບິ່ງ. ເອກະສານອີກສະບັບໜຶ່ງໃຫ້ຮູ້ວ່າ ປີ 1919 ຊື່ເຂດດິນແຫ່ງນີ້ຂຶ້ນກັບຕາແສງ ໂດກຈ່າງ, ສະຫະຕາແສງ ເລຊາ, ເມືອງ ຢ່າວ້ຽນ, ນະຄອນ ຍໍ່ກວານ, ແຂວງ ນິງບິ່ງ. ປະຈຸບັນ, ຮ່ອງຮອຍຫໍບູຊາ ເທືອງໄທເຊີນ ຂຶ້ນກັບບໍລິເວນບ້ານ ໄທເຊີນ, ຕາແສງ ເຊີນລາຍ, ເມືອງ ຍໍ່ກວານ, ແຂວງ ນິງບິ່ງ.
ຫໍເທບທິດາ ໂຢ່ຍຮວ່າ ແມ່ນຮ່ອງຮອຍວັດທະນະທຳ, ຈິດໃຈຂອງປະຊາຊົນໃນເຂດ ແລະ ໄດ້ຮັບການຮັບຮອງແມ່ນຮ່ອງຮອຍປະຫວັດສາດ - ວັດທະນະທຳ ລະດັບແຂວງໃນປີ 2007. ແຕ່ລະປີ, ປະຊາຊົນໃນເຂດ ກໍໄດ້ຈັດຕັ້ງງານບຸນທີ່ເປັນປະເພນີໃນວັນທີ 3 ມີນາ ຕາມປະຕິທີນຈັນທະຄະຕິ ດ້ວຍບັນດາການເຄື່ອນໄຫວວັດທະນະທຳສິລະປະທີ່ເປັນມູນເຊື້ອຂອງສອງປະເທດ ຫວຽດນາມ - ລາວ.
ກ່າວຄຳປາໄສທີ່ພິທີ, ທ່ານເອກອັກຄະລັດຖະທູດ ໃຫ້ຮູ້ວ່າ ເລື່ອງເກົ່າຄວາມຫຼັງໄດ້ສະແດງໃຫ້ເຫັນວ່າ ຄວາມເປັນມິດຕະພາບ, , ຄວາມສາມັກຄີ, ຄວາມຜູກພັນລະຫວ່າງປະຊາຊົນສອງປະເທດ ຫວຽດນາມ - ລາວ ໄດ້ຮັບການສ້າງມາເປັນເວລາຫຼາຍສັດຕະວັດ.
ທ່ານເອກອັກຄະລັດຖະທູດ ຫວັງວ່າ ໃນໄລຍະຈະມາເຖິງ, ບັນດາອົງການ, ນັກປະຫວັດສາດ ຈະມີຄວາມສົນໃຈ, ຄົ້ນຄ້ວາກ່ຽວກັບປະຫວັດສາດຂອງຫໍເທບທິດາ ໂຢ່ຍຮວ່າ; ພັດທະນາສະຖານທີ່ແຫ່ງນີ້ໃຫ້ກາຍເປັນເຂດທ່ອງທ່ຽວວັດທະນະທຳ, ປະຫວັດສາດທີ່ມີຊື່ສຽງ, ດຶງດູດນັກທ່ອງທ່ຽວ ຫວຽດນາມ, ລາວ ກໍຄືນັກທ່ອງທ່ຽວສາກົນມາຢ້ຽມຢາມ, ຊອກຮູ້ວັດທະນະທຳ. ຜ່ານນັ້ນ ກໍ່ສ້າງຫໍໃຫ້ກາຍເປັນສັນຍາລັກແຫ່ງຮີດຄອງປະເພນີ, ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນ ຫວຽດນາມ - ລາວ.
ກໍ່ໃນວັນດຽວກັນ, ທີ່ການພົບປະເຮັດວຽກກັບທ່ານນາງ ຄຳເພົາ ເອີນທະວັນ, ທ່ານ ດວານມິງຕ໋ວນ, ກຳມະການສູນກາງພັກ, ເລຂາຄະນະພັກແຂວງ ນິງບິ່ງ ໃຫ້ຮູ້ວ່າ ແຂວງ ນິງບິ່ງ ພວມສ້າງເອກະສານ ເພື່ອຍື່ນສະເໜີໃຫ້ບັນດາຂັ້ນທີ່ມີສິດອຳນາດ ເພື່ອຮັບຮອງຫໍເທບທິດາ ໂຢ່ຍຮວ່າ ເປັນຮ່ອງຮອຍປະຫວັດສາດລະດັບຊາດ. ໃນໄລຍະຈະມາເຖິງ, ແຂວງ ນິງບິ່ງ ຫວັງວ່າ ຈະໄດ້ຮັບການເອົາໃຈໃສ່, ໜູນຊ່ວຍຈາກ ລາວ ໃນການສະໜອງຂໍ້ມູນຂອງບຸລຸດຜູ້ມີຊື່ສຽງ, ບັບປຸງເອກະສານ ເພື່ອຍື່ນສະເໜີໃຫ້ບັນດາຂັ້ນທີ່ມີສິດອຳນາດຢູ່ ຫວຽດນາມ ເພື່ອໄດ້ຮັບການຮັບຮອງເປັນຮ່ອງຮອຍປະຫວັດສາດລະດັບຊາດ; ປະກອບສ່ວນປົກປັກຮັກສາຮ່ອງຮອຍ - ສັນຍາລັກວັດທະນະທຳອັນດີງາມຂອງນ້ຳໃຈມິດຕະພາບ ຫວຽດນາມ - ລາວ ທີ່ບໍລິສຸດ, ສັດຊື່ໃນຕະຫຼອດປະຫວັດສາດ.
ໂດຍສະແດງຄວາມຊົມເຊີຍເລື່ອງ ນິງບິ່ງ ສ້າງເອກະສານຍື່ນສະເໜີໃຫ້ອຳນາດການປົກຄອງຮັບຮູ້ຫໍເທບທິດາ ໂຢ່ຍຮວ່າ ເປັນຮ່ອງຮອຍປະຫວັດສາດລະດັບຊາດນັ້ນ, ທ່ານ ນາງ ຄຳເພົາ ເອີນທະວັນ ໃຫ້ຮູ້ວ່າ ໃນໄລຍະຈະມາເຖິງ, ຝ່າຍລາວ ຈະສົ່ງຄະນະປະຕິບັດງານ ເພື່ອໜຸນຊ່ວຍ, ຮ່ວມເດີນທາງກັບແຂວງ ນິງບິ່ງ ໃນຂະບວນການຂອງການສໍາເລັດເອກະສານ. ຜ່ານນັ້ນ ກໍ່ປະກອບສ່ວນອະນຸລັກຮັກສາ ແລະ ເສີມຂະຫຍາຍບັນດາຄຸນຄ່າຂອງເຂດຮ່ອງຮອຍປະຫວັດສາດ, ນຳເອົາເຂດຮ່ອງຮອຍປະຫວັດສາດນີ້ ກາຍເປັນແຫຼ່ງທ່ອງທ່ຽວທີ່ດຶງດູດນັກທ່ອງທ່ຽວ ລາວ ແລະ ສາກົນ ເມື່ອມາທ່ອງທ່ຽວ ນິງບິ່ງ.
ມິງດຶກ
