 |
ບັນຍາກາດທີ່ການຕ້ອນຮັບ. (ພາບ:qdnd.vn)
ທີ່ການຕ້ອນຮັບ, ທ່ານນາງ ຫງວຽນ ທິ້ ກິມ ເງິນ ປະທານສະພາແຫ່ງຊາດຫວຽດນາມ ຕີລາຄາສູງຜົນການຮ່ວມມືດ້ານເສດຖະກິດລະຫວ່າງແຂວງຈ່ຽງຊູ ແລະຫວຽດນາມ; ພ້ອມທັງເນັ້ນໜັກວ່າ: ສປ ຈີນ ເປັນຄູ່ຮ່ວມມືດ້ານການຄ້າໃຫຍ່ທີ່ສຸດຂອງຫວຽດນາມໃນປັດຈຸບັນ ແລະ ຫວຽດນາມ ເປັນຄູ່ຮ່ວມມືດ້ານການຄ້າໃຫຍ່ທີ່ສຸດຂອງຈີນຢູ່ອາຊຽນ; ສປ ຈີນ ເປັນຄູ່ຮ່ວມມືສໍາຄັນແຖວໜ້າດ້ວຍການພົວພັນຮ່ວມມືໃນຂົງເຂດການເມືອງ, ການທູດ, ເສດຖະກິດ, ວິທະຍາສາດເຕັກໂນໂລຢີ ແລະ ການພົບປະແລກປ່ຽນປະຊາຊົນ; ສອງຝ່າຍຈະສືບຕໍ່ຮັກສາສາຍພົວພັນຮ່ວມມືຢ່າງມີປະສິດທິຜົນ ແລະ ດີງາມ ລະຫວ່າງສອງປະເທດ ກໍ່ຄືລະຫວ່າງບັນດາທ້ອງຖິ່ນຂອງສອງປະເທດ.
ທີ່ການຕ້ອນຮັບ, ທ່ານ Lou Qinjian ໄດ້ຢັ້ງຢືນວ່າ: ການພົວພັນດ້ານການຄ້າລະຫວ່າງແຂວງຈ່ຽງຊູ ສປ ຈີນ ແລະ ຫວຽດນາມ ສືບຕໍ່ໄດ້ຮັກສາໄວ້; ມີຫຼາຍວິສາຫະກິດຢູ່ແຂວງຈ່ຽງຊູ ປາດຖະໜາຢາກລົງທຶນເຂົ້າຫວຽດນາມ ແລະ ສືບຕໍ່ຊຸກຍູ້ການຮ່ວມມືກັບຫວຽດນາມ ໃນການພັດທະນາເສດຖະກິດ, ພັດທະນາເຂດອຸດສາຫະກໍາ, ການພົບປະແລກປ່ຽນປະຊາຊົນ, ວັດທະນະທໍາ ແລະ ການທ່ອງທ່ຽວ.
ໃນຂອບເຂດການຢ້ຽມຢາມ, ທ່ານນາງປະທານສະພາແຫ່ງຊາດຫວຽດນາມ ຫງວຽນ ທິ້ ກິມ ເງິນ ຈະປຶກສາຫາລືກັບການນໍາຂັ້ນສູງ ຈີນ ກ່ຽວກັບບັນດາມາດຕະການ ເພື່ອແນໃສ່ເພີ່ມທະວີການຮ່ວມມືຮອບດ້ານລະຫວ່າງສອງປະເທດໃນບັນດາຂົງເຂດການເມືອງ, ເສດຖະກິດ, ການປ້ອງກັນຊາດ, ປ້ອງກັນຄວາມສະຫງົບ, ການສຶກສາ, ແລກປ່ຽນປະຊາຊົນ, ການຮ່ວມມືລະຫວ່າງທ້ອງຖິ່ນສອງປະເທດ, ການຮ່ວມມືໃນບັນດາເວທີປາໄສຫຼາຍຝ່າຍ ແລະ ແລກປ່ຽນກ່ຽວກັບບັນດາບັນຫາສາກົນ ເຊິ່ງຕ່າງຝ່າຍຕ່າງມີຄວາມສົນໃຈ.
ທ່ານນາງປະທານສະພາແຫ່ງຊາດຫວຽດນາມ ຫງວຽນ ທິ້ ກິມ ເງິນ ຍັງຈະເຂົ້າຮ່ວມການເຄື່ອນໄຫວ “ສັບປະດາວັດທະນະທໍາຫວຽດນາມ ຢູ່ ຈີນ ເພື່ອໂຄສະນາເຜີຍແຜ່ກ່ຽວກັບພື້ນຖານວັດທະນະທໍາທີ່ເຂັ້ມຂຸ້ນໄປດ້ວຍສີສັນຂອງຫວຽດນາມ ແລະ ໄມຕີຈິດມິດຕະພາບ ຫວຽດນາມ - ຈີນ; ຊຸກຍູ້ການຮ່ວມມືທາງດ້ານວັດທະນະທໍາ ແລະ ການພົວພັນແລກປ່ຽນປະຊາຊົນ.
（ໄຊພອນ）
