ໃນວັນທີ 22 – 23 ມີນາ, ຄະນະປະຕິບັດງານສະຖານທູດ ຫວຽດນາມ ປະຈຳ ສ.ເຊັກໂກ ໂດຍທ່ານເອກອັກຄະລັດຖະທູດ ເຢື່ອງຫາຍນາມ ນຳໜ້າຄະນະ ໄປຢ້ຽມຢາມເຮັດວຽກຢູ່ແຂວງ Moravoslezsky, ໄດ້ພົບປະກັບປະຊາຄົມຊາວ ຫວຽດນາມ ແລະ ຜູ້ຕາງໜ້າວິສາຫະກິດ ຫວຽດນາມ ຢູ່ທ້ອງຖິ່ນທີ່ຕັ້ງຢູ່ທິດຕາເວັນອອກສຸດຂອງ ສ.ເຊັກໂກ.
ການພັດທະນາ ແລະ ເຊື່ອມໂຍງຂອງປະຊາຄົມຊາວ ຫວຽດນາມ, ໃນນັ້ນມີນັກທຸລະກິດ ຫວຽດນາມ ຢູ່ທີ່ນີ້, ໄດ້ປະກອບສ່ວນສຳຄັນເຂົ້າໃນການປັບປຸງ ແລະ ເພີ່ມທະວີທີ່ຕັ້ງຂອງຊາວ ຫວຽດນາມ ຢູ່ ສ.ເຊັກໂກ, ມີສວມບົດບາດທີ່ດີໃນການເປັນຂົວຕໍ່ຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານລະຫວ່າງສອງປະເທດກ່ວາອີກ.
ທີ່ການພົບປະ, ຄະນະບໍລິຫານງານສະມາຄົມຊາວ ຫວຽດນາມ ຢູ່ພາກເໜືອ Moravia ແລະ Ostrava, ໄດ້ແຈ້ງໃຫ້ຄະນະປະຕິບັດງານສະຖານທູດກ່ຽວກັບບັນດາຈຸດໝາຍຕົ້ນຕໍຂອງສະພາບການເສດຖະກິດ, ການເມືອງ, ວັດທະນະທຳທ້ອງຖິ່ນ, ພິເສດແມ່ນປະຊາຄົມຊາວ ຫວຽດນາມ ຢູ່ທີ່ນີ້.
 |
| ຮ້ານຂາຍເຄື່ອງຂອງຊາວ ຫວຽດນາມ ຢູ່ສາທາລະນະລັດ ເຊັກ. (ພາບປະກອບ: ຫງອກມາຍ/ຫວຽດນາມ+) |
ຕາມທ່ານ ຈິ້ງເຕີນ - ປະທານສະມາຄົມຊາວ ຫວຽດນາມ ຢູ່ພາກເໜືອ Moravia ແລະ Ostrava ແລ້ວ, ປະຊາຄົມຊາວ ຫວຽດນາມ ແມ່ນປະຊາຄົມຊົນເຜົ່າສ່ວນໜ້ອຍໃຫຍ່ອັນດັບ 3 ຢູ່ທ້ອງຖິ່ນ ດ້ວຍປະມານ 10.000 ຄົນ, ຖັດຈາກປະຊາຄົມ ໂປໂລຍ ແລະ Slovak.
ການນຳສະມາຄົມຕາງໜ້າໃຫ້ປະຊາຄົມຊາວ ຫວຽດນາມ ເຂົ້າຮ່ວມບັນດາກອງປະຊຸມຂອງອຳນາດການປົກຄອງຂັ້ນແຂວງ, ສົມທົບກັບອຳນາດການປົກຄອງທ້ອງຖິ່ນ ໄດ້ຈັດຕັ້ງບັນດາການເຄື່ອນໄຫວໂຄສະນາວັດທະນະທຳທີ່ເປັນມູນເຊື້ອ ຫວຽດນາມ, ເຂົ້າຮ່ວມບັນດາເຫດການວັດທະນະທຳບັນດາເຜົ່າ. ການເຂົ້າຮ່ວມຂອງຊຸມຊົນເຂົ້າໃນບັນດາການເຄື່ອນໄຫວລວມຂອງທ້ອງຖິ່ນ ແມ່ນໄດ້ຮັບການຮັບຮູ້ ແລະ ຕີລາຄາສູງຈາກອຳນາດການປົກຄອງທ້ອງຖິ່ນ.
ສະມາຄົມກໍ່ແມ່ນສະຖານທີ່ເຕົ້າໂຮມບັນດາສະມາຄົມສະມາຊິກຄື ສະມາຄົມແມ່ຍິງ, ສະມາຄົມພຸດທະສາສະໜາ... ໄດ້ຈັດຕັ້ງບັນດາການເຄື່ອນໄຫວກິລາ, ວັດທະນະທຳ, ຮຽນພາສາຫວຽດນາມ ຢູ່ຊຸມຊົນ, ບັນດາການເຄື່ອນໄຫວມຸ່ງໄປເຖິງບ້ານເກີດເມືອງນອນຢ່າງເປັນປະຈຳ .
ທ່ານ ຈິ້ງເຕີນ ຕາງໜ້າໃຫ້ປະຊາຄົມຊາວ ຫວຽດນາມ ໂດຍຕັ້ງຢູ່ບັນດາທ້ອງຖິ່ນຫ່າງໄກສອກຫຼີກທີ່ສຸດຂອງ ສ.ເຊັກໂກ, ໄດ້ສະແດງຄວາມຕື້ນຕັນໃຈເມື່ອໄດ້ຮັບຄວາມເອົາໃຈໃສ່, ໜູນຊ່ວຍຂອງສະຖານທູດ, ການນຳສະມາຄົມຊາວ ຫວຽດນາມ ປະຈຳ ສ.ເຊັກໂກ.
ຕາງໜ້າໃຫ້ຄະນະປະຕິບັດງານ, ທ່ານເອກອັກຄະລັດຖະທູດ ເຢື່ອງຫາຍນາມ ໄດ້ຕີລາຄາສູງບັນດາຄວາມມານະພະຍາຍາມຂອງສະມາຄົມ ຫວຽດນາມ ຢູ່ພາກເໜືອ Moravia ແລະ Ostrava ໃນການເຕົ້າໂຮມ, ສາມັກຄີປະຊາຄົມ, ຈັດຕັ້ງບັນດາການເຄື່ອນໄຫວທີ່ຫຼາກຫຼາຍ, ຜ່ານນັ້ນ ກໍ່ຮັກສາ ແລະ ແຜ່ກະຈາຍວັດທະນະທຳ ຫວຽດນາມ, ໄດ້ສະແດງໃຫ້ເຫັນທີ່ຕັ້ງອັນພົ້ນເດັ່ນຂອງປະຊາຄົມຊາວ ຫວຽດນາມ ຢູ່ທ້ອງຖິ່ນ.
ທ່ານເອກອັກຄະລັດຖະທູດ ຫວຽດນາມ ຢືນຢັນວ່າ ສະຖານທູດ ຫວຽດນາມ ຍາມໃດກໍ່ພ້ອມແລ້ວທີ່ຈະສ້າງເງື່ອນໄຂສະດວກທີ່ສຸດເພື່ອໜູນຊ່ວຍບັນດາສະມາຄົມຊາວ ຫວຽດນາມ ຢູ່ ສ.ເຊັກໂກ, ໃນນັ້ນ ມີບັນດາສະມາຄົມຊາວ ຫວຽດນາມ ຂັ້ນແຂວງ.
ທີ່ການພົບປະ, ທ່ານເອກອັກຄະລັດຖະທູດ ເຢື່ອງຫາຍນາມ ໄດ້ຕອບຄຳຊັກຖາມຂອງຜູ້ແທນຊຸມຊົນກ່ຽວກັບບັນດາບັນຫາທີ່ກຳນົດຂອງກົດໝາຍ ຫວຽດນາມ ກ່ຽວກັບສັນຊາດ, ສຳມະໂນຄົວ. ຄະນະປະຕິບັດງານ ກໍ່ໄດ້ມອບໃບຍ້ອງຍໍຂອງທ່ານເອກອັກຄະລັດຖະທູດໃຫ້ແກ່ບັນດາກົມກອງລວມໝູ່, ບຸກຄົນຂອງສະມາຄົມຫວຽດນາມ ຢູ່ພາກເໜືອ Moravia ແລະ Ostrava ພ້ອມກັບບັນດານັກຮຽນທີ່ແມ່ນລູກຫຼານຂອງປະຊາຄົມຢູ່ທ້ອງຖິ່ນທີ່ມີຜົນງານດີເດັ່ນໃນການສຶກສາ.
ໃນຂອບເຂດການຢ້ຽມຢາມເຮັດວຽກ, ຄະນະປະຕິບັດງານສະຖານທູດ ຫວຽດນາມ ໄດ້ໄປຢ້ຽມຢາມໂຮງງານຜະລິດຂອງກຸ່ມບໍລິສັດ Elmich ທີ່ຕັ້ງຢູ່ Ostrava. ນີ້ແມ່ນກຸ່ມບໍລິສັດຜະລິດ ແລະ ດຳເນີນທຸລະກິດເຄື່ອງໃຊ້ໃນຄົວເຮືອນແຖວໜ້າຢູ່ພາກກາງ ແລະ ຕາເວັນອອກ ເອີລົບ ໂດຍທ່ານ ໂດ້ແທງຈຸ່ງ- ໜຶ່ງໃນບັນດາສະມາຊິກຂອງປະຊາຄົມຊາວ ຫວຽດນາມ ຢູ່ Moravoslezsky ເປັນປະທານ.
ທ່ານ ຈຸ່ງ ຢືນຢັນວ່າ ດ້ວຍການລົງທຶນຂອງກຸ່ມບໍລິສັດ, ການໜູນຊ່ວຍຈາກລັດ ສ.ເຊັກໂກ ແລະ ເຕັກໂນໂລຢີທີ່ທັນສະໄໝ, ຫັນເປັນອັດຕະໂນມັດເກືອບທັງໝົດນັ້ນ, ໂຮງງານຂອງ Elmich ຢູ່ Ostrava ແມ່ນຮາກຖານທີ່ນຳໜ້າໃນຂົງເຂດຜະລິດເຄື່ອງໃຊ້ໃນຄົວເຮືອນຢູ່ ເອີລົບຕາເວັນອອກ.
ນັບແຕ່ປີ 2011, Elmich ໄດ້ລົງທຶນກໍ່ສ້າງໂຮງງານຢູ່ ຫວຽດນາມ, ໃນນັ້ນ, ຜະລິດຕະພັນສ່ວນໃຫຍ່ທີ່ຜະລິດຢູ່ ຫວຽດນາມ ແມ່ນສົ່ງອອກໄປທົ່ວໂລກ ດ້ວຍບັນດາທ້ອງຕະຫຼາດສຳຄັນຢູ່ ອາເມລິກາເໜືອ ແລະ ກາງ.
ໃນຊຸມປີມໍ່ໆມານີ້, ລວມທັງໃນໄລຍະລະບາດຂອງພະຍາດ COVID-19 ແລະ ວິກິດການເສດຖະກິດ, ກຸ່ມບໍລິສັດ Elmich ຍາມໃດກໍຮັກສາການເຕີບໂຕຢ່າງໝັ້ນຄົງ. ທ່ານ ຈຸ່ງ ໄດ້ສະແດງຄວາມປາດຖະໜາຢາກຮັບຄົນງານ ຫວຽດນາມ ໄປເຮັດວຽກຢູ່ບັນດາໂຮງງານຂອງ Elmich ແລະ ຫວັງວ່າການຮ່ວມມືດ້ານແຮງງານ ຫວຽດນາມ - ສ.ເຊັກໂກ ຈະມີບັນດາບາດກ້າວໃນໄລຍະຈະມາເຖິງ, ສ້າງເງື່ອນໄຂເພື່ອນຳຄົນງານຈາກພາຍໃນປະເທດມາຍັງ ສ.ເຊັກໂກ ເປັນຈຳນວນຫຼວງຫຼາຍ.
ນອກນັ້ນ, ທ່ານປະທານ Elmich ກໍ່ເນັ້ນໜັກວ່າ ຍາມໃດທ່ານກໍ່ຖືວ່າຕົນແມ່ນສະມາຊິກຂອງປະຊາຄົມຊາວ ຫວຽດນາມ ຢູ່ ສ.ເຊັກໂກ, ປາດຖະໜາຢາກປະກອບສ່ວນໃຫ້ການພັດທະນາຂອງປະຊາຄົມ, ເພີ່ມທະວີການພົວພັນລະຫວ່າງ ຫວຽດນາມ ແລະ ສ. ເຊັກໂກ, ປະກອບສ່ວນພັດທະນາການພົວພັນຮ່ວມມືສອງຝ່າຍກ່ວາອີກ.
ທ່ານ Petr Vanecek, ຜູ້ອຳນວຍການບໍລິຫານຂອງບໍລິສັດ Remoska (ໜຶ່ງໃນ 14 ເຄື່ອງໝາຍການຄ້າທີ່ໄດ້ຮັບການອະນຸລັກຮັກສາຈາກສາທາລະນະລັດເຊັກ) ຂຶ້ນກັບກຸ່ມບໍລິສັດ Elmich, ໃຫ້ຮູ້ວ່າ ລາຍຮັບຂອງວິສາຫະກິດ Remoska ໄດ້ເຕີບໂຕ 300% ໃນໄລຍະ 5 ປີຜ່ານມາ ດ້ວຍການຮ່ວມມືກັບ Elmich ຫວຽດນາມ. ບໍລິສັດໄດ້ນຳເຂົ້າອຸປະກອນ, ວັດຖຸດິບສົ້ນເຂົ້າ ແລະ ຜະລິດຕະພັນເຄິ່ງສຳເລັດຮູບຈາກ ຫວຽດນາມ.
ທ່ານ Vanecek ໄດ້ຕີລາຄາວ່າ ຫວຽດນາມ ແມ່ນທ້ອງຕະຫຼາດທີ່ມີຄວາມສາມາດບົ່ມຊ້ອນອັນໃຫຍ່ຫຼວງ ແລະ ການນຳໃຊ້ການຫັນເຕັກໂນໂລຢີເປັນອັດຕະໂນມັດພວມຊ່ວຍນຳບັນດາຜະລິດຕະພັນໃນຄອບຄົວທີ່ມີຄຸນນະພາບສູງ ແລະ ມີລາຄາທີ່ເໝາະສົມມາໃຫ້ຜູ້ບໍລິໂພກ ຫວຽດນາມ.
ທ່ານເອກອັກຄະລັດຖະທູດ ເຢື່ອງຫາຍນາມ ໄດ້ສະແດງຄວາມປິຕິຊົມຊື່ນ ເມື່ອວິສາຫະກິດ ຫວຽດນາມ ພັດທະນາ ແລະ ເຕີບໃຫຍ່ຢູ່ ສ.ເຊັກໂກ. ທ່ານເອກອັກຄະລັດຖະທູດ ເຊື່ອໝັ້ນວ່າ ກຸ່ມບໍລິສັດ Elmich ຈະປະກອບສ່ວນຍົກສູງທີ່ຕັ້ງຂອງບັນດາວິສາຫະກິດ ແລະ ຊາວ ຫວຽດນາມ ຢູ່ ສ.ເຊັກໂກ ເວົ້າສະເພາະ, ກໍ່ຄືຢູ່ເອີລົບ ເວົ້າລວມ.
ຕາມທ່ານເອກອັກຄະລັດຖະທູດແລ້ວ, ຜົນສຳເລັດຂອງ Elmich ກໍ່ຊຸກຍູ້ບັນດາວິສາຫະກິດ ຫວຽດນາມ ຢູ່ພາຍໃນປະເທດໄປລົງທຶນ ແລະ ປະຊາຄົມຊາວ ຫວຽດນາມ ຢູ່ທີ່ນີ້ກໍ່ເປີດກວ້າງການເຄື່ອນໄຫວດຳເນີນທຸລະກິດ. ດ້ວຍທິດນຳການລົງທຶນກັບຄືນສູ່ ຫວຽດນາມ, Elmich ບໍ່ພຽງແຕ່ປະກອບສ່ວນໃຫ້ບ້ານເກີດເມືອງນອນຂອງຕົນເທົ່ານັ້ນ, ຫາກຍັງນຳຮູບພາບຂອງປະເທດຊາດ, ປະຊາຊົນ ຫວຽດນາມ ອອກໄປສູ່ໂລກອີກດ້ວຍ.
ມິງດຶກ
