| ບັນດາທູດແຫ່ງນ້ຳໃຈມິດຕະພາບອັນຍິ່ງໃຫຍ່ຫວຽດນາມ-ລາວ | |
| ການພົວພັນສາມັກຄີແບບພິເສດລະຫວ່າງ ຫວຽດນາມ - ລາວ ນັບມື້ນັບພັດທະນາ |
ທີ່ການພົບປະ, ທ່ານ ຟານແອງເຊີນ ໄດ້ຊົມເຊີຍທ່ານນາງ ຄຳປາວ ເອີນທະວັນ ທີ່ໄດ້ຮັບການແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ຫວຽດນາມ. ທ່ານ ຟານແອງເຊີນ ເຊື່ອໝັ້ນວ່າ ດ້ວຍປະສົບການ ແລະ ຄວາມສາມາດບົ່ມຊ້ອນອັນກວ້າງຂວາງ, ທ່ານເອກອັກຄະລັດຖະທູດຈະປະຕິບັດສຳເລັດໜ້າທີ່, ປະກອບສ່ວນຢ່າງຕັ້ງໜ້າເຂົ້າໃນການຮັດແໜ້ນ ແລະ ພັດທະນາສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ - ລາວ.
ແນະນຳໂຄງປະກອບການຈັດຕັ້ງ, ໜ້າທີ່, ວຽກງານ ແລະ ການເຄື່ອນໄຫວຂອງ VUFO, ທ່ານ ຟານແອງເຊີນ ໃຫ້ຮູ້ວ່າ, VUFO ແມ່ນອົງການການເມືອງສັງຄົມພິເສດໃນການທູດປະຊາຊົນໃນຂົງເຂດສັນຕິພາບ, ຄວາມສາມັກຄີ, ມິດຕະພາບ ແລະ ການຮ່ວມມືລະຫວ່າງປະຊາຊົນກັບປະຊາຊົນ. VUFO ມີບົດບາດຫຼັກໃນວຽກງານການທູດປະຊາຊົນ ແລະ ວຽກງານຕ່າງປະເທດທີ່ບໍ່ຂຶ້ນກັບລັດຖະບານ; ແມ່ນອົງການຈັດຕັ້ງປະຕິບັດວຽກງານການເມືອງການຕ່າງປະເທດ ແລະ ແມ່ນພາກສ່ວນໜຶ່ງຂອງກຳລັງການຕ່າງປະເທດ ທີ່ຮັບຜິດຊອບໂດຍສະເພາະຂອງຫວຽດນາມ.
 |
ທ່ານປະທານສະຫະພັນບັນດາອົງການມິດຕະພາບຫວຽດນາມ ຟານແອງເຊີນ (ຂວາ) ແລະ ທ່ານເອກອັກຄະລັດຖະທູດ ລາວ ທ່ານ ຄຳປາວ ເອີນທະວັນ. |
ທ່ານ ຟານແອງເຊີນ ໃຫ້ຮູ້ວ່າ: “ໃນໄລຍະມໍ່ໆມານີ້, VUFO ຍາມໃດກໍ່ສົມທົບກັນຢ່າງຕັ້ງໜ້າກັບບັນດາຄູ່ຮ່ວມມືຂອງລາວ ໃນການຮ່ວມມື 2 ຝ່າຍໃນບັນດາເວທີປາໄສ ແລະ ກົນໄກຫຼາຍຝ່າຍ”.
ຕາມທ່ານ ຟານແອງເຊີນ ແລ້ວ, ໃນໄລຍະຈະມາເຖິງ, 2 ຝ່າຍຕ້ອງມີການແລກປ່ຽນ ແລະ ສົມທົບກັນ ເພື່ອຊຸກຍູ້ການຮ່ວມມືລະຫວ່າງ ຫວຽດນາມ - ລາວ ໃຫ້ພັດທະນາຢ່າງແທດຈິ ແລະ ມີປະສິດທິຜົນ.
ກ່າວຄຳເຫັນທີ່ການພົບປະ, ທ່ານເອກອັກຄະລັດຖະທູດ ຄຳປາວ ເອີນທະວັນ ໄດ້ຂອບໃຈບັນດາການຊ່ວຍເຫຼືອອັນລ້ຳຄ່າເຊິ່ງພັກ, ລັດ ແລະ ປະຊາຊົນ ຫວຽດນາມ ໄດ້ມອບໃຫ້ພັກ, ລັດ ແລະ ປະຊາຊົນລາວ ໃນໄລຍະຜ່ານມາ. ທ່ານນາງ ຄຳປາວ ເອີນທະວັນ ໄດ້ຢືນຢັນວ່າ, ໃນຖານະເປັນເອກອັກຄະລັດຖະທູດ ລາວ ປະຈຳ ຫວຽດນາມ, ຈະເຮັດຈົນສຸດຄວາມສາມາດຂອງຕົນ ເພື່ອປະຕິບັດໜ້າທີ່ທີ່ພັກ, ລັດ ແລະ ປະຊາຊົນລາວມອບໃຫ້.
ທ່ານເອກອັກຄະລັດຖະທູດຄຳປາວ ເອີນທະວັນ ກໍ່ປາດຖະໜາວ່າ VUFO ແບ່ງປັນປະສົບການໃນການຈັດຕັ້ງ, ພັດທະນາ ແລະ ຄົ້ນຄ້ວາວຽກງານການທູດລະຫວ່າງປະຊາຊົນກັບປະຊາຊົນ.
ຄຳຮຸ່ງ
