ຫວຽດນາມ-ອຽກລັງ ເຮັດໃຫ້ການພົວພັນຮ່ວມມືມິດຕະພາບ, ການຮ່ວມມືຫຼາຍດ້ານເລິກເຊິ່ງກວ່າອີກ

	ອຽກລັງ ຊ່ວຍເຫຼືອປະຊາຊົນເຜົ່າສ່ວນໜ້ອຍ ແລະເຂດພູດອຍ ທີ່ປະສົບກັບຄວາມຫຍຸ້ງຍາກເພື່ອປັບປຸງຊີວິດການເປັນຢູ່
	ຫວຽດນາມ - ອຽກລັງ ເພີ່ມທະວີການສົມທົບ, ໜູນຊ່ວຍກັນໃນວຽກງານປົກ ປ້ອງພົນລະເມືອງ ໄລຍະຫຼັງ Covid – 19

ການຢ້ຽມຢາມ ອຽກລັງ ຂອງທ່ານ ບຸ່ຍແທັງເຊີນ ລັດຖະມົນຕີກະຊວງການຕ່າງປະເທດ ໄດ້ປະກອບສ່ວນຍູ້ແຮງຄວາມໄວ້ເນື້ອເຊື່ອໃຈດ້ານການເມືອງ ແລະຊຸກຍູ້ການແລກປ່ຽນຄະນະຜູ້ແທນຂັ້ນສູງສອງປະເທດ; ເຮັດໃຫ້ການພົວພັນຮ່ວມມືຫຼາຍຂົງເຂດລະຫວ່າງສອງຝ່າຍເລິກເຊິ່ງກວ່າອີກ.

ການຢ້ຽມຢາມ ສ. ອຽກລັງ ຢ່າງເປັນທາງການຂອງທ່ານ ບຸ່ຍແທັງເຊີນ ລັດຖະມົນຕີກະຊວງຕ່າງປະເທດຫວຽດນາມ ໃນລະຫວ່າງ ວັນທີ 28-29 ກຸມພາ ເປັນຂີດໝາຍແຫ່ງໄລຍະພັດທະນາໃໝ່ໃນການພົວພັນລະຫວ່າງສອງປະເທດ, ນຳການພົວພັນສອງຝ່າຍເຂົ້າສູ່ລວງເລິກ, ມີປະສິດທິຜົນ ແລະຍືນຍົງກວ່າ, ພິເສດແມ່ນໃນຂົງເຂດການເມືອງ-ການຕ່າງປະເທດ, ເສດຖະກິດ, ການຄ້າ, ການລົງທຶນ, ການປ່ຽນແປງຂອງດິນຟ້າອາກາດ ແລະການເຕີບໂຕສີຂຽວ, ການສຶກສາບຳລຸງສ້າງ ແລະການພົບປະແລກປ່ຽນປະຊາຊົນ.

ທ່ານ ບຸ່ຍແທັງເຊີນ ລັດຖະມົນຕີກະຊວງການຕ່າງປະເທດຫວຽດນາມ ຕ້ອນຮັບທ່ານ John McCullagh ເອກອັກຄະລັດຖະທູດອຽກລັງ ປະຈໍາຫວຽດນາມ, ໃນວັນທີ 3 ກໍລະກົດ 2023. ພາບ: baoquocte.vn

ນີ້ແມ່ນການຕີລາຄາຂອງທ່ານເອກອັກຄະລັດຖະທູດຫວຽດນາມ ປະຈຳ ລາຊະອານາຈັກອັງກິດ ທັງຮັບຜິດຊອບ ສ. ອຽກລັງ ຫງວຽນຮວ່າງລອງ ເມື່ອແລກປ່ຽນກັບນັກຂ່າວສຳນັກຂ່າວສານຫວຽດນາມ ປະຈຳ ອັງກິດ.

ທ່ານເອກອັກຄະລັດຖະທູດ ຫງວຽນຮວ່າງລອງ ເນັ້ນໜັກວ່າ ການຢ້ຽມຢາມ ສ. ອຽກລັງ ຢ່າງເປັນທາງການຂອງທ່ານລັດຖະມົນຕີການຕ່າງປະເທດ ບຸ່ຍແທັງເຊີນ, ຕາມຄໍາເຊີນຂອງທ່ານ Micheal Martin ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດອຽກລັງ ໄດ້ດຳເນີນພາຍຫຼັງປີໃໝ່ປະຈຳຊາດ ປີມະໂລງ 2024, ແມ່ນການຢ້ຽມຢາມສໍາຄັນ, ມີຄວາມໝາຍທີ່ສຸດໃນການຊຸກຍູ້ການພົວພັນ ຫວຽດນາມ-ອຽກລັງ.

ທ່ານເອກອັກຄະລັດຖະທູດຫວຽດນາມ ປະຈຳ ລາຊະອານາຈັກອັງກິດ ທັງຮັບຜິດຊອບ ສ. ອຽກລັງ ຫງວຽນຮວ່າງລອງ. ພາບ: ສະຖານທູດຫວຽດນາມ ປະຈຳ ລາຊະອານາຈັກອັງກິດ

ນີ້ແມ່ນການຢ້ຽມຢາມ ອຽກລັງ ຄັ້ງທຳອິດຂອງທ່ານລັດຖະມົນຕີການຕ່າງປະເທດ ຫວຽດນາມ ພາຍຫຼັງ 20 ປີ ນັບແຕ່ການຢ້ຽມຢາມຂອງທ່ານລັດຖະມົນຕີ ຫງວຽນຢີນຽນ.

ທ່ານ ບຸ່ຍແທັງເຊີນ ລັດຖະມົນຕີການຕ່າງປະເທດຫວຽດນາມ ຢ້ຽມຢາມ ສ. ອຽກລັງ ຢ່າງເປັນທາງການໃນລະຫວ່າງວັນທີ 28-29 ກຸມພາ. ພາບ: ສໍານັກຂ່າວສານຫວຽດນາມ.

ກ່ຽວກັບການເຄື່ອນໄຫວຕົ້ນຕໍໃນການຢ້ຽມຢາມ, ທ່ານເອກອັກຄະລັດຖະທູດ ຫງວຽນຮວ່າງລອງ ໃຫ້ຮູ້ວ່າ ທ່ານລັດຖະມົນຕີການຕ່າງປະເທດ ບຸ່ຍແທັງເຊີນ ມີການພົບປະເຈລະຈາສຳຄັນກັບທ່ານຮອງນາຍົກລັດຖະມົນຕີທັງເປັນລັດຖະມົນຕີການຕ່າງປະເທດ ແລະທ່ານ Micheál Martin ລັດຖະມົນຕີກະຊວງປ້ອງກັນປະເທດອຽກລັງ; ເຂົ້າຢ້ຽມຂ່ຳນັບ ປະທານາທິບໍດີ Michael D. Higgins ແລະທ່ານ Seán Ó Fearghaíl ປະທານສະພາຕໍ່າອຽກລັງ.

ຄາດວ່າ ສອງຝ່າຍຈະແລກປ່ຽນຫຼາຍບັນຫາສຳຄັນໃນການພົວພັນສອງຝ່າຍ ກໍ່ຄືບັນດາບັນຫາພົ້ນເດັ່ນໃນພາກພື້ນ ແລະສາກົນ, ໃນນັ້ນມີບັນຫາທະເລຕາເວັນອອກ.

ການຢ້ຽມຢາມຂອງທ່ານລັດຖະມົນຕີ ບຸ່ຍແທັງເຊີນ ໄດ້ປະກອບສ່ວນຍູ້ແຮງຄວາມໄວ້ເນື້ອເຊື່ອໃຈດ້ານການເມືອງ ແລະຊຸກຍູ້ການແລກປ່ຽນຄະນະຜູ້ແທນຂັ້ນສູງສອງປະເທດ, ໃນສະເພາະໜ້າແມ່ນກະກຽມໃຫ້ການຢ້ຽມຢາມທາງລັດຖະກິດ ອຽກລັງ ຂອງທ່ານ ຫວໍວັນເຖືອງ ປະທານປະເທດຫວຽດນາມ; ເຮັດໃຫ້ການຮ່ວມມືເສດຖະກິດການຄ້າເລິກເຊິ່ງກວ່າອີກ, ຂົນຂວາຍອຽກລັງ ໃຫ້ສັດຕະຍາບັນສັນຍາອາລັກຂາການລົງທຶນຫວຽດນາມ-ສະຫະພາບເອີລົບ (EVIPA) ແລະສະໜັບສະໜູນຄະນະກຳມະການເອີລົບ (EC) ຍົກເລີກບັດເຫຼືອງ IUU (ຕ້ານການຂຸດຄົ້ນສິນໃນນ້ຳຢ່າງຜິດກົດໝາຍ, ບໍ່ລາຍງານ ແລະບໍ່ປະຕິບັດຕາມຂໍ້ກຳນົດ) ໃຫ້ຫວຽດນາມ ໂດຍໄວ; ດຶງດູດການລົງທຶນທີ່ມີຄຸນນະພາບສູງຈາກອຽກລັງ; ເພີ່ມທະວີການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ, ວິທະຍາສາດ-ເຕັກໂນໂລຢີ, ການສຶກສາ-ບຳລຸງສ້າງ ແລະກະສິກຳ.

ນອກຈາກນັ້ນ, ສອງຝ່າຍຈະແລກປ່ຽນກ່ຽວກັບການເພີ່ມທະວີການຮ່ວມມືທີ່ບັນດາເວທີປາໄສຫຼາຍຝ່າຍ, ສົມທົບກັນຢ່າງແໜ້ນແຟ້ນໃນການແກ້ໄຂບັນດາບັນຫາພາກພື້ນ ແລະທົ່ວໂລກ.

ປະຈຸບັນ, ຫວຽດນາມ ແມ່ນປະເທດໜຶ່ງດຽວໃນພາກພື້ນທີ່ອຽກລັງ ນຳເຂົ້າໃນລາຍການຮ່ວມມືພັດທະນາສາກົນ Irish Aid ເພື່ອແນໃສ່ຍູ້ແຮງການຮ່ວມມືລະຫວ່າງສອງປະເທດໃນບັນດາຂົງເຂດ, ຄື: ການກະທຳເພື່ອດິນຟ້າອາກາດ, ຄວາມສະເໝີພາບລະຫວ່າງຍິງ-ຊາຍ, ການແກ້ໄຂຜົນຮ້າຍຢ້ອນຫຼັງຈາກລະເບີດທີ່ບໍ່ທັນແຕກທີ່ຍັງຕົກຄ້າງຫຼັງສົງຄາມ, ປະຊາຄົມຊາວເຜົ່າສ່ວນໜ້ອຍ, ການສຶກສາ, ການພົບປະແລກປ່ຽນປະຊາຊົນ...

ການຢ້ຽມຢາມກໍ່ປະກອບສ່ວນຊຸກຍູ້ບົດບາດເປັນຂົວເຊື່ອມຕໍ່ຂອງຫວຽດນາມ ແລະອຽກລັງ ຢູ່ສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ແລະສະຫະພາບເອີລົບ (ອີຢູ). ຄຽງຂ້າງກັນນັ້ນ, ທ່ານ ບຸ່ຍແທັງເຊີນ ກໍ່ມີການພົບປະກັບຜູ້ຕາງໜ້າພໍ່ແມ່ປະຊາຊົນ, ນັກສຶກສາ ແລະປັນຍາຊົນ ຫວຽດນາມ ຢູ່ອຽກລັງ.

ເມື່ອຕີລາຄາກ່ຽວກັບການພົວພັນຮ່ວມມືໃນໄລຍະປະຈຸບັນລະຫວ່າງຫວຽດນາມ ແລະ ອຽກລັງ, ທ່ານເອກອັກຄະລັດຖະທູດ ຫງວຽນຮວ່າງລອງ ໃຫ້ຮູ້ວ່າ ການຮ່ວມມືດ້ານເສດຖະກິດ-ການຄ້າ-ການລົງທຶນລະຫວ່າງຫວຽດນາມ ແລະອຽກລັງ ໃນໄລຍະຜ່ານມາ ບັນລຸໄດ້ໝາກຜົນຕັ້ງໜ້າຫຼາຍຢ່າງ.

ໃນໄລຍະຈະມາເຖິງ, ອຽກລັງ ຈະສືບຕໍ່ເພີ່ມທະວີການສົ່ງເສີມບັນດາໂຄງການລົງທຶນເຂົ້າຫວຽດນາມ, ພິເສດແມ່ນໃນຂົງເຂດເຊິ່ງອຽກລັງ ມີທ່າແຮງ ແລະຫວຽດນາມ ມີຄວາມສາມາດບົ່ມຊ້ອນ, ຄື: ເຕັກໂນໂລຢີສີຂຽວ, ພະລັງງານທົດແທນ, ການຄົ້ນຄວ້າ ແລະພັດທະນາ, ການປ່ຽນແປງໃໝ່ປະດິດສ້າງ, ກະສິກຳເຕັກໂນໂລຢີສູງ; ເພີ່ມທະວີການແລກປ່ຽນວິຊາການກ່ຽວກັບການດຶງດູດ FDI, ການໝູນໃຊ້ອັດຕາພາສີຕ່ຳສຸດໃນທົ່ວໂລກຂອງອົງການຈັດຕັ້ງການຮ່ວມມື ແລະພັດທະນາເສດຖະກິດ (OECD); ບັນດາຂົງເຂດຈຸດສຸມຢູ່ສູນນະວັດຕະກຳແຫ່ງຊາດ...

ຕາມທ່ານເອກອັກຄະລັດຖະທູດ ຫງວຽນຮວ່າງລອງ ແລ້ວ, ການສຶກສາ-ບຳລຸງສ້າງ ມີທີ່ຕັ້ງສຳຄັນ, ແມ່ນຈຸດພົ້ນເດັ່ນໃນການພົວພັນສອງຝ່າຍ. ອຽກລັງ ມີພື້ນຖານການສຶກສາທີ່ກ້າວໜ້າດ້ວຍບັນດາມະຫາວິທະຍາໄລຂະໜາດໃຫຍ່ ແລະມີອິດທິພົນຊື່ສຽງໃນໂລກ.

ການຮ່ວມມືໃນບັນດາຂົງເຂດສາທາລະນະສຸກ, ກະສິກຳ, ການຢາ, ການພັດທະນາແບບຍືນຍົງ ແລະເຕັກໂນໂລຢີຂໍ້ມູນຂ່າວສານ ກໍ່ແມ່ນບັນດາທ່າແຮງທີ່ສອງປະເທດໄດ້ຕັ້ງໜ້າຂຸດຄົ້ນ, ພິເສດແມ່ນກະສິກຳ ແລະການປຸງແຕ່ງອາຫານ, ບັນດາຂົງເຂດນອນໃນຂອບເຂດການຮ່ວມມືລາຍການແບ່ງປັນບົດຮຽນພັດທະນາ ອຽກລັງ ລະຫວ່າງບັນດາອົງການຂອງຫວຽດນາມ ແລະບັນດາຄູ່ຮ່ວມມືອຽກລັງ.

ໃນໄລຍະ 2023-2027, ອຽກລັງ ຈະສືບຕໍ່ໃຫ້ບຸລິມະສິດແກ່ການອຸປະຖໍາບັນດາຂົງເຂດກະສິກຳ, ສະບຽງອາຫານ, ການຢາ, ການສຶກສາ, ເອົາໃຈໃສ່ຊຸກຍູ້ການຄ້າສອງຝ່າຍບົນພື້ນຖານການໝູນໃຊ້ກາລະໂອກາດຈາກສັນຍາການຄ້າເສລີຫວຽດນາມ-ອີຢູ (EVFTA).

ໃນໄລຍະຈະມາເຖິງ, ເພື່ອຍູ້ແຮງການຮ່ວມມືກວ່າອີກ, ພິເສດແມ່ນບັນດາຂົງເຂດທີ່ມີຄວາມສາມາດບົ່ມຊ້ອນ, ສອງປະເທດຄວນເພີ່ມທະວີການແລກປ່ຽນຄະນະ, ພິເສດແມ່ນຄະນະຜູ້ແທນຂັ້ນສູງ; ຕັ້ງໜ້າໝູນໃຊ້ບັນດາຂອບເຂດການຮ່ວມມືທີ່ມີຢູ່ແລ້ວທັງສອງຝ່າຍ ແລະຫຼາຍຝ່າຍ (ດ້ວຍຖານະແມ່ນສະມາຊິກອີຢູ, ອາຊຽນ ແລະບັນດາອົງການຈັດຕັ້ງສາກົນອື່ນໆ); ຮ່ວມມືແກ້ໄຂບາງບັນຫາທີ່ຍັງຄົງຄ້າງ, ຄື: ເລື່ອງ ອຽກລັງ ໃຫ້ສັດຕະຍາບັນ EVIPA ແລະຂົນຂວາຍ ອີຢູ ຍົກເລີກ “ບັດເຫຼືອງ” IUU.

ຄຽງຂ້າງນັ້ນ, ການສ້າງຕັ້ງສະຖານທູດຫວຽດນາມ ປະຈຳ ອຽກລັງ ກໍ່ໄດ້ນຳເຂົ້າແຜນການປຶກສາຫາລື ແລະຜັນຂະຫຍາຍໃນໄລຍະຈະມາເຖິງ.

ເມື່ອຕີລາຄາກ່ຽວກັບການພັດທະນາຂອງປະຊາຄົມຊາວຫວຽດນາມ ອາໄສຢູ່ອຽກລັງ ແລະການປະກອບສ່ວນຂອງປະຊາຄົມໃຫ້ປະເທດປະຈຳຖິ່ນ ແລະປະເທດຫວຽດນາມ, ທ່ານເອກອັກຄະລັດຖະທູດ ຫງວຽນຮວ່າງລອງ ໃຫ້ຮູ້ວ່າ: ປະຈຸບັນປະຊາຄົມຊາວຫວຽດນາມ ອາໄສຢູ່ອຽກລັງ ມີບັນດາບາດກ້າວພັດທະນາຢ່າງແຮງພ້ອມກັບການປະກອບສ່ວນ ແລະຜົນສຳເລັດຢູ່ປະເທດປະຈຳຖິ່ນ.

ສິ່ງເຫຼົ່ານີ້ສະແດງໃຫ້ເຫັນວ່າປະຊາຄົມຊາວຫວຽດນາມ ອາໄສຢູ່ ອຽກລັງ ນັບມື້ນັບມີອິດທິພົນຊື່ສຽງຕໍ່ກັບອຳນາດການປົກຄອງ ແລະປະຊາຊົນປະເທດປະຈຳຖິ່ນ, ແມ່ນຂົວຕໍ່ສຳຄັນ, ປະກອບສ່ວນຢ່າງແທດຈິງເຂົ້າໃນການພົວພັນອັນດີງາມລະຫວ່າງສອງປະເທດ.