ເນື່ອງໃນໂອກາດປີໃໝ່ 2024, ທ່ານເອກອັກຄະລັດຖະທູດ ການາດາ ປະຈຳ ຫວຽດນາມ Shawn Steil ໄດ້ຕອບສຳພາດສຳນັກຂ່າວສານ ຫວຽດນາມ ກ່ຽວກັບບັນດາຜົນສຳເລັດໃນການພົວພັນສອງຝ່າຍ ກໍ່ຄືແງ່ຫວັງການຮ່ວມມືລະຫວ່າງ 2 ປະເທດໃນໄລຍະຈະມາເຖິງ.
ຕາມທ່ານເອກອັກຄະລັດຖະທູດ Shawn Steil ແລ້ວ, ນັບແຕ່ສ້າງຕັ້ງການພົວພັນທາງການທູດ, 2 ປະເທດ ໄດ້ເຫັນປະຈັກຕາການຮ່ວມມືຢ່າງເລິກເຊິ່ງກວ້າງຂວາງໃນທຸກດ້ານ. ການາດາ ພາກພູມໃຈທີ່ສຸດໃນການປະກອບສ່ວນ ແລະ ໜູນຊ່ວຍຂອງຕົນໃຫ້ແກ່ການພັດທະນາອັນກະໂດດຂັ້ນຂອງ ຫວຽດນາມ ໃນ 50 ປີທີ່ຜ່ານມາ.
“ໃນຕົວຈິງແລ້ວ, ປີ 2017, ການນຳຂອງສອງປະເທດ ໄດ້ຕັດສິນໃຈສ້າງຕັ້ງການພົວພັນຄູ່ຮ່ວມມືຮອບດ້ານ, ກຳນົດຢ່າງຄົບຖ້ວນບັນດາຂົງເຂດທີ່ພວກເຮົາຄວນຮ່ວມມືຕື່ມອີກ. ສະນັ້ນ, ເມື່ອເບິ່ງຄືນໄລຍະແຕ່ປີ 2017 ຮອດປະຈຸບັນ, ສາມາດເຫັນໃດ້ວ່າ 2 ປະເທດ ໄດ້ເພີ່ມທະວີການຮ່ວມມືໃນທຸກຂົງເຂດຕາມທິດທາງເປີດກ້ວາງ ແລະ ຮອບດ້ານຢ່າງແທ້ຈິງ, ລະອຽດແມ່ນກ່ຽວກັບການຄ້າ, ການເມືອງ, ການປ້ອງກັນຄວາມສະຫງົບ, ວິທະຍາສາດ ແລະ ການປະດິດສ້າງ, ການສຶກສາ ແລະ ການແລກປ່ຽນປະຊາຊົນ”, ທ່ານເອກອັກຄະລັດຖະທູດ Shawn Steil ກ່າວ.
 |
ທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ການາດາ ປະຈຳ ຫວຽດນາມ Shawn Steil |
ທ່ານເອກອັກຄະລັດຖະທູດ Shawn Steil ໃຫ້ຮູ້ວ່າ ເຖິງວ່າໂລກລະບາດໂຄວິດ-19 ໄດ້ສົ່ງຜົນສະທ້ອນເຖິງທຸກປະເທດນັບແຕ່ປີ 2020 ໃນທຸກຂົງເຂດກໍ່ຕາມ, ແຕ່ສອງປະເທດຍັງໄດ້ພິສູດໃຫ້ເຫັນການພັດທະນາໃນການພົວພັນຫຼາຍສົມຄວນ.
“ບົນພື້ນຖານນັ້ນ, ຂ້າພະເຈົ້າຄິດວ່າ ເຖິງເວລາແລ້ວທີ່ພວກເຮົາຈະເລີ່ມຕົ້ນພິຈາລະນາວ່າ ຈະເຮັດແນວໃດເພື່ອໃຫ້ການພົວພັນສອງຝ່າຍໝັ້ນຄົງເຂັ້ມແຂງລະຫວ່າງ ການາດາ ແລະ ຫວຽດນາມ ສາມາດກາຍເປັນກຳລັງຜັກດັນທີ່ຕັ້ງໜ້າໃຫ້ແກ່ການປ່ຽນແປງໃນໂລກ”, ທ່ານເອກອັກຄະລັດຖະທູດ Shawn Steil ໃຫ້ຄຳເຫັນ.
ໂດຍຕີລາຄາກ່ຽວກັບການພົວພັນດ້ານການຄ້າລະຫວ່າງສອງປະເທດ, ທ່ານເອກອັກຄະລັດຖະທູດ Shawn Steil ໃຫ້ຮູ້ວ່າ ປະຈຸບັນ ການາດາ ແມ່ນໜຶ່ງໃນ 10 ປະເທດທີ່ນຳເຂົ້າຜະລິດຕະພັນຂອງ ຫວຽດນາມ ຫຼາຍທີ່ສຸດໃນທົ່ວໂລກ. ຍ້ອນສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ (CPTPP) ການຄ້າລະຫວ່າງ ຫວຽດນາມ ແລະ ການາດາ ໄດ້ມີການເຕີບໂຕທີ່ໜ້າປະທັບໃຈ ແລະ ສິນຄ້າສ່ວນຫຼາຍແມ່ນຂອງ ຫວຽດນາມ ສົ່ງອອກໄປ ການາດາ.
“ປະຈຸບັນ, ສະບຽງອາຫານຄຸນນະພາບສູງຫຼາຍຢ່າງຂອງ ການາດາ ໄດ້ຖືກສົ່ງອອກໄປຍັງ ຫວຽດນາມ ຍ້ອນຜູ້ບໍລິໂພກ ຫວຽດນາມ ຊອກຫາບັນດາສະບຽງອາຫານທີ່ມີຄຸນນະພາບສູງ, ປອດໄພ ແລະ ມີໂພຊະນາການ. ການາດາ ພວມສະໜອງສະບຽງອາຫານເຫຼົ່ານັ້ນ, ສະນັ້ນ ການສົ່ງອອກຂອງການາດາໄປ ຫວຽດນາມ ກໍ່ນັບມື້ນັບເພີ່ມຂຶ້ນ. ພວກເຮົາຕ້ອງສືບຕໍ່ຊຸກຍູ້ ແລະ ສົ່ງເສີມການສົ່ງອອກຈາກ ການາດາ ມາຍັງ ຫວຽດນາມ ໃຫ້ທັນກັບການພັດທະນາຂອງພື້ນຖານເສດຖະກິດຫວຽດນາມ”, ທ່ານເອກອັກຄະລັດຖະທູດ Shawn Steil ໃຫ້ຮູ້.
ຕາມທ່ານເອກອັກຄະລັດຖະທູດ Shawn Steil ແລ້ວ, ການລົງທຶນ ແມ່ນອີກຂົງເຂດທີ່ມີທ່າແຮງລະຫວ່າງ 2 ປະເທດ. ການາດາ ແມ່ນນັກລົງທຶນໃຫຍ່ອັນດັບ 14 ຂອງ ຫວຽດນາມ, ແຕ່ໄດ້ຮັກສາຄວາມໝັ້ນຄົງທີ່ເປັນປົກກະຕິໃນເວລາຍາວນານ.
“ພວກເຮົາຕ້ອງມີຄວາມບຸກທະລຸຕື່ມອີກກ່ຽວກັບກາລະໂອກາດເພື່ອສ້າງບັນດາລະບົບສະໜອງ, ບັນດາລະບົບມູນຄ່າ, ບໍ່ພຽງແຕ່ການແລກປ່ຽນສິນຄ້າເທົ່ານັ້ນ, ແຕ່ກາຍເປັນຄູ່ຮ່ວມມືທີ່ສະເໝີພາບໃນການສະໜອງຜະລິດຕະພັນເຕັກໂນໂລຢີ ແລະ ການບໍລິການອື່ນໆໃນທົ່ວໂລກຢ່າງປທ້ຈິງ. ພວກເຮົາຕ້ອງຮ່ວມມືກັນຢ່າງແໜ້ນແຟ້ນກວ່າອີກໂດຍຜ່ານການລົງທຶນ'', ທ່ານເອກອັກຄະລັດຖະທູດ Shawn Steil ກ່າວ.
ກ່ຽວກັບແງ່ຫວັງການຮ່ວມມືລະຫວ່າງສອງປະເທດໃນການສ້າງອະນາຄົດສີຂຽວຕາມຍຸດທະສາດ ມະຫາສະໝຸດອິນເດຍ - ປາຊີຟິກ ທີ່ ການາດາ ພວມເດີນຕາມ, ທ່ານເອກອັກຄະລັດຖະທູດ Shawn Steil ຖືວ່າ ນີ້ແມ່ນຈຸດເວລາຍຸດທະສາດເພື່ອໃຫ້ ຫວຽດນາມ ລົງທຶນເຂົ້າບັນດາແຫຼ່ງພະລັງງານສະອາດ ແລະ ພະລັງງານທົດແທນ. ແຕ່ສິ່ງນີ້ໄດ້ຮຽກຮ້ອງໃຫ້ມີການລົງທຶນທີ່ດີສົມຄວນ, ກໍຄືສິ່ງແວດລ້ອມນິຕິກຳ ແລະ ເຕັກໂນໂລຢີ.
ການທີ່ ການາດາ ໄດ້ໃຫ້ຄວາມສຳຄັນເຂົ້າໃນອະນາຄົດສີຂຽວ ແລະ ຍືນຍົງໃນພາກພື້ນ ມະຫາສະໝຸດ ອິນເດຍ - ປາຊີຟິກ ແມ່ນການຍອມຮັບວ່າ ລະດັບຄວາມໄວການເຕີບໂຕທີ່ສູງຢູ່ໃນພາກພື້ນນີ້ໃນໂລກ ກໍ່ຍັງມາພ້ອມກັບຄວາມສ່ຽງຫຼາຍຢ່າງ. ຄວາມສ່ຽງເຫຼົ່ານັ້ນ ແມ່ນກ່ຽວຂ້ອງກັບການຮັບປະກັນວ່າ ທຸກຄົນທີ່ໄດ້ຮັບຜົນປະໂຫຍດຈາກການເຕີບໂຕຂອງເສດຖະກິດ ແລະ ສິ່ງແວດລ້ອມ ຈະບໍ່ຖືກຜົນເສຍຫາຍ.
ການາດາມີປະສົບການໃນທຸກຂົງເຂດເຫຼົ່ານີ້. ສະນັ້ນ, ພວກເຮົາພວມເຮັດວຽກຜ່ານການໜູນຊ່ວຍພັດທະນາ ແລະ ໃຫ້ຄຳປຶກສາເພື່ອຮັບປະກັນໃຫ້ ຫວຽດນາມ ມີໂອກາດເຂົ້າເຖິງເຕັກໂນໂລຢີແຖວໜ້າຂອງໂລກ - ທ່ານເອກອັກຄະລັດຖະທູດ Shawn Steil ໃຫ້ຮູ້.
ຕາມທ່ານ Shawn Steil ແລ້ວ, ປີ 2023 ແມ່ນປີທີ່ພິເສດຂອງ ຫວຽດນາມ ແລະ ການທີ່ ຫວຽດນາມ ເປັນປະເທດດຽວໃນໂລກທີ່ໄດ້ຕ້ອນຮັບປະມຸກຂອງ 2 ປະເທດໃຫຍ່ ນັ້ນແມ່ນ ອາເມລິກາ ແລະ ຈີນ ໃນປີນີ້ ແມ່ນຂີດໝາຍໃຫ້ເຫັນວ່າ ຫວຽດນາມ ໄດ້ດຶງດູດຄວາມສົນໃຈຈາກທົ່ວໂລກ.
“ຂ້າພະເຈົ້າຄິດວ່າພວກເຮົາກໍ່ໄດ້ເຫັນຜົນສໍາເລັດນັ້ນໂດຍຜ່ານການພັດທະນາເສດຖະກິດ ແລະ ການລົງທຶນ. ບັນດານັກລົງທຶນ ພວມຊອກມາ ຫວຽດນາມ ຄືແມ່ນສະຖານທີ່ລົງທຶນທີ່ປອດໄພໃນສະພາບການທີ່ໂລກເຕັມໄປດ້ວຍການຜັນແປທັງດ້ານເສດຖະກິດ ແລະ ຄວາມໝັ້ນຄົງ”, ທ່ານເອກອັກຄະລັດຖະທູດ Shawn Steil ໄດ້ໃຫ້ຄຳເຫັນ ແລະ ກ່າວຕື່ມອີກວ່າ “ຫວຽດນາມ ຖືເປັນຄູ່ຮ່ວມມືທີ່ໄວ້ເນື້ອເຊື່ອໃຈ” ແລະ ນັ້ນແມ່ນຊັບສິນອັນລ້ຳຄ່າທີ່ ຫວຽດນາມ ໄດ້ຮັບຜົນສໍາເລັດໃນການຂຸດຄົ້ນໃນຕະຫຼອດປີທີ່ຜ່ານມາ.
ທ່ານເອກອັກຄະລັດຖະທູດ Shawn Steil ເນັ້ນໜັກວ່າ ຫວຽດນາມ ໄດ້ເຊື່ອມໂຍງເຂົ້າກັບລະບົບສາກົນຢ່າງຄົບຖ້ວນ ແລະ ພວມເຫັນໄດ້ເຖິງຜົນປະໂຫຍດຂອງການເຊື່ອມໂຍງນັ້ນຕໍ່ກັບປະຊາຊົນ. ການາດາ ປາດຖະໜາຢາກຮ່ວມມືກັບຫວຽດນາມ ເພື່ອຮັບປະກັນໃຫ້ບັນດາຜົນປະໂຫຍດເຫຼົ່ານັ້ນຍືນຍົງໃນອະນາຄົດ.
ໂດຍແບ່ງປັນຄວາມຮູ້ສຶກຂອງຕົນເມື່ອຕ້ອນຮັບບູນເຕັດຢູ່ ຫວຽດນາມ, ທ່ານເອກອັກຄະລັດຖະທູດ Shawn Steil ໃຫ້ຮູ້ວ່າ ໂດຍສ່ວນຕົວແລ້ວ, ທ່ານກໍ່ມັກຢູ່ ຮ່າໂນ້ຍ ແລະ ຜ່ານພຶດຕິກຳຕົວຈິງຂອງບັນຍາກາດທີ່ຄຶກຄື້ນຢູ່ຕາມຖະໜົນຫົນທາງນະຄອນ ຮ່າໂນ້ຍ ເພາະວ່າ ບູນເຕັດແມ່ນໄລຍະເວລາທີ່ພິເສດ.
“ສິ່ງໜຶ່ງທີ່ຂ້າພະເຈົ້າມັກເຮັດໃນປີແມ່ນການຈັດງານລ້ຽງບູນເຕັດໃຫ້ແກ່ພະນັກງານສະຖານທູດ ແລະ ຄອບຄົວຂອງພວກເຂົາເຈົ້າທັງໝົດ,” ທ່ານ Shawn Steil ໄດ້ສະແດງຄວາມເຫັນຕື່ມວ່າ ທ່ານ“ຫວັງວ່າຈະໄດ້ມອບຂອງຂວັນບູນເຕັດໃຫ້ແກ່ເດັກນ້ອຍ ແລະ ເປັນພະຍານເຖິງຄວາມສຸກຂອງພວກເຂົາໃນຊ່ວງເວລາທີ່ມະຫັດສະຈັນນີ້ໃນປີ".
ມິງດຶກ
