ພິທີມອບຫຼຽນກາມິດຕະພາບ ໂດຍລັດຖະບານ ແຫ່ງ ສປປ ລາວ ໃຫ້ແກ່ອົງການກາແດງແຂວງ ແທງຮວາ ແລະ ກອນຕູມ (ຫວຽດນາມ)
	ລັດຖະມົນຕີກະຊວງປ້ອງກັນປະເທດຫວຽດນາມ ຕ້ອນຮັບເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າ ອີຢູ ປະຈໍາ ຫວຽດນາມ

ເນື່ອງໃນໂອກາດສະເຫຼີມສະຫຼອງ 48 ປີແຫ່ງວັນຊາດ ສປປ ລາວ (2/12/1975 – 2/12/2023), ໃນລະຫວ່າງວັນທີ 21-29 ພະຈິກ, ຄະນະປະຕິບັດງານກົງສູນໃຫຍ່ ສສ ຫວຽດນາມ ປະຈໍາ ນະຄອນປາກເຊ ນຳໂດຍສະຫາຍ ຫງວຽນວັນຈູງ ຫົວໜ້າກົງສູນໃຫຍ່ ໄດ້ໄປຢ້ຽມຢາມ ແລະອວຍພອນອົງຄະນະພັກ, ອໍານາດການປົກຄອງ ແລະປະຊາຊົນ 4 ແຂວງພາກໃຕ້ຂອງລາວ (ຈໍາປາສັກ, ອັດຕະປື, ເຊກອງ, ສາລະວັນ).

ສະຫາຍຫົວໜ້າກົງສູນໃຫຍ່ ຫງວຽນວັນຈູງ ອວຍພອນການນໍາແຂວງເຊກອງ ເນື່ອງໃນໂອກາດສະເຫຼີມສະຫຼອງ 48 ປີແຫ່ງວັນຊາດ. ພາບ: vov.vn

ທີ່ການພົບປະຄັ້ງຕ່າງໆ, ສະຫາຍຫົວໜ້າກົງສູນໃຫຍ່ ຫງວຽນວັນຈູງ ໄດ້ຫວນຄືນໝາກຜົນພົ້ນເດັ່ນທີ່ກົງສູນໃຫຍ່ ແລະອຳນາດການປົກຄອງ 4 ແຂວງພາກໃຕ້ລາວ ຍາດມາໄດ້ໃນປີ 2023 ດ້ວຍການເຄື່ອນໄຫວຫຼາກຫຼາຍຮູບແບບ, ສະແດງໃຫ້ເຫັນສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ - ລາວ, ໄດ້ສ້າງຄວາມປະທັບໃຈ, ປະກອບສ່ວນເຂົ້າໃນການປັບປຸງ ແລະພັດທະນາສາຍພົວພັນອັນດີງາມທີ່ມີຢູ່ແລ້ວລະຫວ່າງສອງປະເທດ.

ຄະນະປະຕິບັດງານກົງສູນໃຫຍ່ ສສ ຫວຽດນາມ ປະຈໍາ ນະຄອນປາກເຊ ໄປອວຍພອນເນື່ອງໃນໂອກາດສະເຫຼີມສະຫຼອງ 48 ປີແຫ່ງວັນຊາດ ສປປ ລາວ ຢູ່ແຂວງອັດຕະປື. ພາບ: vov.vn

ເນື່ອງໃນໂອກາດນີ້, ສະຫາຍຫົວໜ້າກົງສູນໃຫຍ່ ຫງວຽນວັນຈູງ ໄດ້ສົ່ງສານເຖິງການນຳ 4 ແຂວງພາກໃຕ້ຂອງລາວ ເນື່ອງໃນໂອກາດສະເຫຼີມສະຫຼອງ 48 ປີແຫ່ງວັນຊາດ ສປປ ລາວ, ພັກ, ລັດ, ລັດຖະບານ ແລະປະຊາຊົນຫວຽດນາມ ຍາມໃດກໍ່ແບ່ງປັນນ້ຳໃຈ, ອາລົມຈິດຄວາມຮັກແພງເປັນພິເສດ ແລະໃຫ້ບຸລິມະສິດສູງສຸດແກ່ປະເທດລາວ, ເຮັດຈົນສຸດຄວາມສາມາດຂອງຕົນ, ເພີ່ມພູນຄູນສ້າງປັບປຸງ, ເພີ່ມທະວີນໍ້າໃຈມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ - ລາວ.

ການນຳ 4 ແຂວງພາກໃຕ້ຂອງລາວ ລ້ວນແຕ່ສະແດງຄວາມຂອບໃຈຢ່າງເລິກເຊິ່ງມາຍັງພັກ, ລັດ ແລະປະຊາຊົນຫວຽດນາມ ທີ່ຍາມໃດກໍ່ມີຄວາມສະເໝີຕົ້ນສະເໝີປາຍໃຫ້ການຊ່ວຍເຫຼືອແກ່ລັດ ແລະປະຊາຊົນລາວ, ທັງໃນໄລຍະຕໍ່ສູ້ກູ້ຊາດ ກໍ່ຄືໃນໄລຍະປົກປັກຮັກສາ, ສ້າງສາ ແລະພັດທະນາປະເທດຊາດໃນປະຈຸບັນ; ຢືນຢັນວ່າຈະສືບຕໍ່ສົມທົບກັນຢ່າງແໜ້ນແຟ້ນກັບກົງສູນໃຫຍ່ຫວຽດນາມ ປະຈຳ ນະຄອນປາກເຊ ເພື່ອຜັນຂະຫຍາຍບັນດາເນື້ອໃນວຽກງານໃນໄລຍະຈະມາເຖິງ, ຜ່ານນັ້ນປະກອບສ່ວນເພີ່ມທະວີສາຍພົວພັນມິດຕະພາບແບບພິເສດລະຫວ່າງ ລາວ - ຫວຽດນາມ ກວ່າອີກ.