| ຟົດຟື້ນການແຂ່ງຂັນກິລາມິດຕະພາບ ຫວຽດນາມ - ລາວ - ກຳປູເຈຍ ປີ 2023 | |
| ເປີດສະໄໝສັບປະດາມະຫາສາມັກຄີບັນດາຊົນເຜົ່າ ແລະ ມໍລະດົກວັດທະນະທຳ ຫວຽດນາມ ປີ 2023 |
ເຫດການ ໂດຍຄະນະກຳມະການປະຊາຊົນນະຄອນ ຮ່າໂນ້ຍ ຊີ້ນຳພະແນກຖະແຫຼງຂ່າວ ແລະ ສື່ສານ ແລະ ສະມາຄົມຊອບແວ ແລະ ບໍລິການເຕັກໂນໂລຊີຂໍ້ມູນຂ່າວສານ ຫວຽດນາມ (VINASA) ສົມທົບກັນຈັດຕັ້ງ ດ້ວຍຫົວຂໍ້ ຂຸດຄົ້ນຂໍ້ມູນ - ກໍ່ສ້າງນະຄອນອັດສະລິຍະ, ພັດທະນາແບບຍືນຍົງ. ນີ້ແມ່ນປີທີ 7 ທີ່ໂຄງການໄດ້ຈັດຂຶ້ນ.
 |
| ທ່ານເຈືອງຢາບິ່ງ, ປະທານສະພາກໍ່ຕັ້ງ VINASA ກ່າວຄຳປາໄສທີ່ກອງປະຊຸມ |
Vietnam - Asia Smart City Summit 2023 ດ້ວຍວາລະປະຊຸມພິທີເປີດ ແລະ 9 ວາລະປະຊຸມຫົວຂໍ້ສະເພາະ ແບ່ງອອກເປັນ 3 ສາຍ:
ທີໜຶ່ງ, ອຳນາດການປົກຄອງ, ປະຊາຊົນ ແລະ ທຸລະກິດ - ມຸ່ງໄປສູ່ການແລກປ່ຽນຄວາມຄິດເຫັນ ແລະ ປະສົບການໃນການສ້າງກົນໄກ ແລະ ພັດທະນາຕົວເມືອງອັດສະລິຍະ ເພື່ອສ້າງສະພາບແວດລ້ອມແຫ່ງການດຳລົງຊີວິດທີ່ສະຫຼາດກວ່າ, ມີປະສິດທິພາບ ແລະ ສະດວກກວ່າໃຫ້ແກ່ປະຊາຊົນ, ທຸລະກິດ, ບໍ່ແມ່ນເພື່ອສ້າງຕົວເມືອງດິຈິຕອລປ່ຽນແທນຕົວເມືອງຕົວຈິງ;
ທີສອງ: ເຕັກໂນໂລຊີ, ຂໍ້ມູນ ແລະ ການເຊື່ອມຕໍ່ - ມຸ່ງໄປສູ່ການແນະນໍາ, ປຶກສາຫາລືກ່ຽວກັບເຕັກໂນໂລຊີ, ໂປຼແກຼມເຕັກໂນໂລຊີດິຈິຕອນ, ຊ່ວຍສ້າງ, ເຊື່ອມຕໍ່, ວິເຄາະແກ້ໄຂ ແລະ ຂຸດຄົ້ນຂໍ້ມູນດິຈິຕອນ;
ທີສາມ: ການຮ່ວມມື ແລະ ພັດທະນາ - ມຸ່ງໄປສູ່ການຊຸກຍູ້ການຮ່ວມມື ແລະ ພັດທະນາທາງດ້ານເຕັກໂນໂລຊີ, ພັດທະນາບັນດາມາດຕະການຊ່ວຍແກ້ໄຂບັນຫາລະອຽດ ແລະ ຈຳເປັນຮີບດ່ວນຂອງບັນດາຕົວເມືອງ.
ກອງປະຊຸມໄດ້ມີການເຂົ້າຮ່ວມຂອງບັນດານັກຂ່າວ, ນັກຊ່ຽວຊານ 80 ກວ່າທ່ານ ແລະ ຜູ້ແທນ 1.000 ກວ່າທ່ານທີ່ເປັນການນຳ ແລະ ຜູ້ຄຸ້ມຄອງທີ່ມາຈາກ 11 ພື້ນຖານເສດຖະກິດ, ກະຊວງ ແລະ ອົງການທຽບເທົ່າກະຊວງ; 15 ພະແນກ, ຄະນະ, ຂະແໜງການຂອງ 18 ແຂວງ, ນະຄອນໃນທົ່ວປະເທດ, ແລະ ບັນດາວິສາຫະກິດເຕັກໂນໂລຊີ, ວິສາຫະກິດໂປຼແກຼມ, ຜູ້ຊ່ຽວຊານ, ສະຖາບັນຄົ້ນຄ້ວາ ...
ຄຽງຂ້າງບັນດາການໂອ້ລົມສົນທະນາ, ໃນຂອບເຂດຂອງງານຍັງມີການວາງສະແດງເກືອບ 30 ຮ້ານ, ແນະນຳບັນດາການບໍລິການ, ເຕັກໂນໂລຊີທີ່ດີເລີດເພື່ອຮັບໃຊ້ການພັດທະນານະຄອນອັດສະລິຍະຢູ່ ຫວຽດນາມ ແລະ ພາກພື້ນ.
ພາຍຫຼັງ 5 ປີແຫ່ງການຜັນຂະຫຍາຍຂໍ້ຕົກລົງເລກທີ 950/QD-TTg ຂອງນາຍົກລັດຖະມົນຕີ ກ່ຽວກັບການພັດທະນານະຄອນອັດສະລິຍະແບບຍືນຍົງຂອງ ຫວຽດນາມ ໄລຍະ 2018 – 2025 ແລະ ທິດທາງຮອດປີ 2030, ຫວຽດນາມ ມີ 48/63 ແຂວງ, ນະຄອນປະຕິບັດໂຄງການພັດທະນານະຄອນອັດສະລິຍະ, ຫຼາຍກວ່າ 40 ທ້ອງຖິ່ນໄດ້ຜັນຂະຫຍາຍສູນບໍລິຫານອັດສະລິຍະ (IOC) ຢູ່ຂັ້ນແຂວງ ແລະ ເກືອບ 100 IOC ຢູ່ຂັ້ນເມືອງ.
ໃນປະຈຸບັນ, ເຂດຕົວເມືອງພວມຜັນຂະຫຍາຍການພັດທະນາລະບົບ IOC ແລະ ສິ່ງອຳນວຍຄວາມສະດວກໃນຕົວເມືອງອັດສະລິຍະ, ການບໍລິການອັດສະລິຍະ, ໂດຍສຸມໃສ່ຕົ້ນຕໍໃນຂົງເຂດຄົມມະນາຄົມ (ຕິດຕາມກວດກາຄວາມເປັນລະບຽບຮຽບຮ້ອຍ, ຄວາມປອດໄພທາງຄົມມະນາຄົມ), ສາທາລະນະສຸກອັດສະລິຍະ, ການສຶກສາອັດສະລິຍະ, ການພັດທະນາໂປຼແກຼມເຕືອນໄພ.
ກ່າວຄຳປາໄສທີ່ກອງປະຊຸມ, ທ່ານ ເຈືອງຢາບິ່ງ ປະທານສະພາກໍ່ຕັ້ງ VINASA ໃຫ້ຮູ້ວ່າ : “ບັນດາວິສາຫະກິດອຸດສາຫະກຳກໍ່ມານະພະຍາຍາມຈົນສຸດຄວາມສາມາດຂອງຕົນເພື່ອພ້ອມກັບບັນດາແຂວງ, ນະຄອນໃນການກຳນົດທິດ, ວາງແຜນຜັງ ແລະ ກໍ່ສ້າງນະຄອນອັດສະລິຍະ”. ບັນດາວິສາຫະກິດຄື Viettel ແລະ VNPT ໄດ້ຮ່ວມມືກັບ 45 ແຂວງ, ກໍ່ສ້າງ IOC 36 ແຂວງ ແລະ 45 IOC ຂັ້ນເມືອງ. Viettel ໄດ້ເປີດສະຫຼອງນຳໃຊ້ IOC ໃຫ້ແກ່ 30 ກວ່າທ້ອງຖິ່ນ.
FPT ກໍ່ພະຍາຍາມແນະນໍາໃຫ້ບັນດານະຄອນ ນຳຄວາມອັດສະລິຍະ ແລະ ນິວເຄຼຍປັນຍາປະດິດ (AI) ເຂົ້າໃນການວາງແຜນຜັງ ແລະ ການພັດທະນາຕົວເມືອງ. ບັນດາທຸລະກິດດ້ານເຕັກໂນໂລຊີອື່ນໆ ໄດ້ ແລະ ພວມສ້າງ, ນຳເອົາມາດຕະການແກ້ໄຂທີ່ກ້າວໜ້າ ແລະ ມີປະສິດທິພາບທີ່ສຸດ ເຊັ່ນ AI, internet ສັບພະສິ່ງ (IoT), ແຜນທີ່ດິຈິຕອນ 3D ... ເພື່ອຊ່ວຍປັບປຸງການຄຸ້ມຄອງ ແລະ ບໍລິຫານຂອງບັນດາພະແນກ, ຂະແໜງການ, ບັນດາເຂດຕົວເມືອງ ແລະ ເຂດອຸດສາຫະກຳໃນທົ່ວປະເທດ ແລະ ພວມມຸ່ງໄປສູ່ບັນຫາການຄຸ້ມຄອງ ແລະ ການຂຸດຄົ້ນຂໍ້ມູນດີຈີຕອນ.
ເຖິງຢ່າງໃດກໍຕາມ, ການກໍ່ສ້າງຕົວເມືອງອັດສະລິຍະ ຢູ່ຫວຽດນາມ ຍັງປະສົບກັບສິ່ງທ້າທາຍຫຼາຍຢ່າງ. ສິ່ງທ້າທາຍໃຫຍ່ທີ່ສຸດແມ່ນແລວທາງດ້ານກົດໝາຍຍັງບໍ່ຈະແຈ້ງ, ບໍ່ເອື້ອອຳນວຍໃຫ້ແກ່ການຮ່ວມມືລະຫວ່າງພາກລັດ ແລະ ເອກະຊົນ, ໂດຍສະເພາະແມ່ນຂັ້ນຕອນການລົງທືນ, ການປະມູນ, ການບໍລິການດ້ານເຕັກໂນໂລຊີຂໍ້ມູນຂ່າວສານ (IT). ນອກນີ້, ເຂດຕົວເມືອງຍັງບໍ່ໄດ້ເອົາໃຈໃສ່ເຖິງການວາງແຜນທີ່ເປັນອັດສະລິຍະ, ຫັນບັນດາການສ້າງພື້ນຖານໂຄງລ່າງທີ່ຈຳເປັນອັດສະລິຍະ”.
ບັນດາພື້ນຖານ, ມາດຕະການແກ້ໄຂທີ່ອັດສະລິຍະຫຼາຍຢ່າງ ໄດ້ນຳສະເໜີໂດຍຜູ້ຊ່ຽວຊານ ແລະ ຜູ້ນຳພາພາຍໃນ ແລະ ຕ່າງປະເທດ ແນະນຳໃນກອງປະຊຸມເຊັ່ນ: ພື້ນຖານ Cloud, ໂຊລູຊັ່ນ 5G, ຜະລິດຕະພັນ AIoT, ຜູ້ຊ່ວຍສະເໝືອນ, AI ໃນດ້ານສາທາລະນະສຸກ, ການຄົມມະນາຄົມ, ການເຄື່ອນຍ້າຍທີ່ເປັນອັດສະລິຍະ.
ຈາກວິທີການສຳຜັດດັ່ງກ່າວ, ອີງຕາມພື້ນຖານໂຄງລ່າງທີ່ມີຢູ່ແລ້ວ ກໍ່ຄືລັກສະນະສະເພາະຂອງແຕ່ລະຕົວເມືອງຂອງ ຫວຽດນາມ, ບັນດານັກຊ່ຽວຊານຖືວ່າ ຕ້ອງມີແຜນຜັງທີ່ອັດສະລິຍະ ແລະ ພັດທະນາຕົວເມືອງແບບຍືນຍົງ, ມີຄວາມຕ້ານທານສູງ, ຕິດພັນການຄຸ້ມຄອງ ແລະ ບໍລິຫານກັບການກໍ່ສ້າງໂຄງສ້າງພື້ນຖານຂໍ້ມູນສໍາລັບການເຊື່ອມຕໍ່ກັນ ແລະ ການຂຸດຄົ້ນທີ່ມີປະສິດທິຜົນ.
ຕາມທ່ານຮອງລັດຖະມົນຕີກະຊວງຖະແຫຼງຂ່າວ ແລະ ສື່ສານ ຫວຽດນາມ ຫງວຽນຮຸຍຢຸງ ແລ້ວ, ການພັດທະນານະຄອນອັດສະລິຍະ ແມ່ນປະຕິບັດການຫັນເປັນດີຈີຕອນໃນຂອບເຂດ ແລະ ຂອບຂະໜາດຂອງຕົວເມືອງ ແຕ່ສຸມໃສ່ແກ້ໄຂບັນດາບັນຫາມຫຍ່ຂອງຕົວເມືອງ ລວມມີ ການຄົມມະນາຄົມ, ສິ່ງແວດລ້ອມ, ພະລັງງານ, ການບຳບັດສິ່ງເສດເຫຼືອ, ຮັບປະກັນຄວາມປອດໄພ, ຄວາມເປັນລະບຽບຮຽບຮ້ອຍຂອງຕົວເມືອງ... ແລະ ເພື່ອບັນລຸເນື້ອໃນດັ່ງກ່າວຢ່າງເປັນລະບົບນັ້ນ ບັນດາປັດໄຈທີ່ອັດສະລິຍະຕ້ອງໄດ້ຮັບການກຳນົດ, ຄິດໄລ່ ແລະ ນຳເຂົ້ສນັບແຕ່ເມື່ອເລີ່ມການວາງແຜນຜັງຕົວເມືອງ.
ທ່ານຮອງລັດຖະມົນຕີ ຫງວຽນຮຸຍຢຸງ ຢືນຢັນວ່າ: “ການພັດທະນາຕົວເມືອງອັດສະລິຍະ ແມ່ນການກໍ່ສ້າງແບບວິທີພັດທະນາ ແລະ ບໍລິຫານນຳໃຊ້ຕົວເມືອງທີ່ທັນສະໄໝ, ມີປະສິດທິຜົນໂດຍອີງໃສ່ການນຳໃຊ້ເຕັກໂນໂລຊີທີ່ມີຫົວຄິດປະດິດສ້າງ, ບໍ່ແມ່ນການເຕົ້າໂຮມບັນດາລະບົບ ແລະ ໂປຼແກຼມຂອງບັນດາອົງການວິຊາສະເພາະ ຍ້ອນບັັນດາບັນຫາໃນຕົວເມືອງ ມີການພົວພັນທີ່ສະໜິດແໜ້ນນຳກັນ. ບັນດາທ້ອງຖິ່ນຕ້ອງຮັບປະກັນການເຊື່ອມຕໍ່ຢ່າງແໜ້ນແຟ້ນກັບຂະບວນການຫັນເປັນດິຈິຕອນຂອງທ້ອງຖິ່ນ, ໂດຍບໍ່ມີການແຍກຕົວຫຼືຊ້ໍາຊ້ອນ, ທັງຫມົດແມ່ນແນໃສ່ປະຊາຊົນເປັນໃຈກາງ.
ປະຊາຊົນແມ່ນທັງແມ່ນເປົ້າໝາຍຮບໃຊ້ ແລະ ທັງແມ່ນເຈົ້າກຳທີ່ເຂົ້າຮ່ວມ ໂດຍຜ່ານຮູບແບບການລົງທຶນຂອງສັງຄົມ. ບັ ນດາຫົວໜ່ວຍທີ່ກ່ຽວຂ້ອງຕ້ອງພິຈາລະນາບັນດາພື້ນຖານໂຄງລ່າງຂໍ້ມູນຂ່າວສານຕົວເມືອງ, ພື້ນຖານໂຄງລ່າງດີຈີຕອນ ແລະ ໂດຍສະເພາະແມ່ນພື້ນຖານໂຄງລ່າງຕົວເມືອງທີ່ຈຳເປັນ, ແມ່ນພື້ນຖານເພື່ອຫັນບັນດາໂຄງລ່າງດ້ານເຕັກນິກ ແລະ ໂຄ່ງລ່າງເສດຖະກິດ-ສັງຄົມ ເປັນອັດສະລິຍະ”.
ທ່ານ ເຈີ່ນຊີແທັງ, ປະທານຄະນະກຳມະການປະຊາຊົນນະຄອນ ຮ່າໂນ້ຍ ຫວັງວ່າ: ສຳລັບ ຮ່າໂນ້ຍ, ນະຄອນຈະເລືອກເຟັ້ນສິທີການສຳຜັດ “ການສ້າງນະຄອນອັດສະລິຍະ” ແບບຍືນຍົງ, ມີການຫະທຳທີ່ແທ້ຈິງເພື່ອຜົນປະໂຫຍດລວມໃນເບື້ອງຕົ້ນ ແລະ ເພື່ອຄວາມຮັບຜິດຊອບນຳເອົາການຄັດເລືອກທີ່ດີທີ່ສຸດໃຫ້ສຳລັບອະນາຄົດ. ລັກສະນະພິເສດ "ຍືນຍົງ" ຂອງຕົວເມືອງຈະສະແດງໃຫ້ເຫັນໂດຍຜ່ານການຄັດເລືອກ "ອັດສະລິຍະ” , ມາດຕະການແກ້ໄຂ "ອັດສະລິຍະ" ແລະ ເຕັກໂນໂລຢີ "ອັດສະລິຍະ".
ທ່ານ ເຈີ່ນຊີແທັງ ກ່າວວ່າ: “ຕໍ່ໜ້າການປັນແປທີ່ບໍ່ຢຸດຢັ້ງຂອງວິທະຍາສາດ, ເຕັກໂນໂລຊີ, ພິເສດແມ່ນການນຳໃຊ້ເຕັກໂນໂລຊີດີຈີຕອນ, ເຕັກໂນໂລຊີຂຸດຄົ້ນຂໍ້ມູນທີ່ນັບມື້ນັບເພີ່ມຂຶ້ນໃນທຸກດ້ານຂອງຊີວິດ, ຄວາມສາມາດໃນການວິເຄາະ ແລະ ຂຸດຄົ້ນຂໍ້ມູນນັບມື້ນັບສູງ, ພວກຂ້າພະເຈົ້າຫວັງວ່າ ເນື້ອໃນຂອງກອງປະຊຸມ ກັບວາລະເປີດກອງປະຊຸມດ້ວຍຫົວຂໍ້ວ່າ ການຂຸດຄົ້ນຂໍ້ມູນ - ກໍ່ສ້າງຕົວເມືອງອັດສະລິຍະ, ການພັດທະນາແບບຍືນຍົງ ຈະເປັນປະໂຫຍດທີ່ສຸດສໍາລັບຕົວເມືອງ. ຈາກນັ້ນ, ກໍ່ປະກອບສ່ວນເຂົ້າໃນການຊ່ວຍນະຄອນໃນການເລືອກ ແລະ ຍາດແຍ່ງກາລະໂອກາດເພື່ອບັນລຸເປົ້າໝາຍກໍ່ສ້າງນະຄອນຫຼວງສີຂຽວ, ປອດໄພ, ພັດທະນາໄວ, ເປັນເອກະພາບ ແລະ ຍືນຍົງ”.
ປະທານຄະນະກຳມະການປະຊາຊົນນະຄອນ ຮ່າໂນ້ຍ ກໍ່ຫວັງວ່າ ບັນດາແຂວງ, ນະຄອນ, ຜູ້ຄຸ້ມຄອງ, ນັກຊ່ຽວຊານ, ບັນດາວິສາຫະກິດທີ່ເຂົ້າຮ່ວມຈະມີມູມມອງໃໝ່ຕື່ມອີກໃນການກໍ່ສ້າງນະຄອນອັດສະລິຍະ.
ນອກກອງປະຊຸມນະຄອນອັດສະລິຍະ ຫວຽດນາມ - ອາຊີ 2023, ກໍ່ຍັງມີບັນດາສະຖານທີ່ ແລະ ການເຄື່ອນໄຫວທີ່ຟົດຟື້ນອື່ນໆຄື: ງານວາງສະແດງບັນດາຜົນງານ ແລະ ການຫັນເປັນດີຈີຕອນ, ການກໍ່ສ້າງນະຄອນອັດສະລິຍະ ຂອງບັນດາວິສາຫະກິດ, ອົງການ; ການເຄື່ອນໄຫວຮ່ວມມື ແລະ ການເຊື່ອມໂຍງ, ໃຫ້ຄຳປຶກສາກ່ຽວກັບການຈັດຕັ້ງຜັນຂະຫຍາຍນະຄອນອັດສະລິຍະ ...
ໃນ 2 ວັນຂອງກອງປະຊຸມ, ບັນດາທ່າອ່ຽງການພັດທະນາ Smart City ທີ່ໂດດເດັ່ນຢູ່ ຫວຽດນາມ ຈະໄດ້ຮັບການສະຫຼຸບ ແລະ ປະກາດໂດຍຄະນະຈັດຕັ້ງທີ່ກອງປະຊຸມ ແລະ ພິທີມອບລາງວັນນະຄອນປະກາດ ຫວຽດນາມ ປີ 2023.
ມິງດຶກ
