ຕອນເຊົ້າວັນທີ 22 ພະຈິກ, ທ່ານ ບຸ່ຍແທງເຊີນ, ລັດຖະມົນຕີກະຊວງການຕ່າງປະເທດ ແລະ ທ່ານ ສະເຫຼີມໄຊ ກົມມະສິດ, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດລາວ ໄດ້ດຳເນີນການປຶກສາຫາລືດ້ານການເມືອງດ້ວຍການເຂົ້າຮ່ວມຂອງບັນດາການນຳບັນດາຫົວໜ່ວຍວິຊາສະເພາະຂອງກະຊວງການຕ່າງປະເທດ 2 ປະເທດ.
ທີ່ການປຶກສາຫາລື, ໃນບັນຍາກາດແຫ່ງຄວາມຈິງໃຈ, ກົງໄປກົງມາ ແລະ ຄວາມໄວ້ເນື້ອເຊື່ອໃຈ, ສອງລັດຖະມົນຕີໄດ້ມີການແລກປ່ຽນຢ່າງກວ້າງຂວາງ ແລະ ແທດຈິງ, ສຸມໃສ່ກວດກາຄືນບັນດາເນື້ອໃນການຮ່ວມມື 2 ຝ່າຍໃນໄລຍະມໍ່ໆມານີ້ ແລະ ກະກຽມໃຫ້ແກ່ການເຄື່ອນໄຫວວຽກງານການຕ່າງປະເທດຂັ້ນສູງລະຫວ່າງ. ສອງປະເທດໃນໄລຍະຈະມາເຖິງ, ພ້ອມທັງປຶກສາຫາລືບັນດາມາດຕະການເພື່ອສືບຕໍ່ຊຸກຍູ້ການຮ່ວມມືລະຫວ່າງສອງກະຊວງການຕ່າງປະເທດ.
 |
ທ່ານ ບຸ່ຍແທງເຊີນ, ລັດຖະມົນຕີກະຊວງການຕ່າງປະເທດ ແລະ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ລາວ. |
ສອງຝ່າຍສະແດງຄວາມປິຕິຊົມຊື່ນຕໍ່ຄວາມຄືບໜ້າຢ່າງຕັ້ງໜ້າ ແລະ ມີປະສິດທິຜົນໃນທຸກຂົງເຂດລະຫວ່າງ ຫວຽດນາມ ແລະ ລາວ ໃນໄລຍະມໍ່ໆມານີ້. ຄວາມໄວ້ເນື້ອເຊື່ອໃຈທາງດ້ານການເມືອງສືບຕໍ່ໄດ້ຮັບການເພີ່ມທະວີການແລກປ່ຽນຄະນະຜູ້ແທນຫຼາຍຄະນະ ແລະ ການພົວພັນຮ່ວມມືຂັ້ນສູງຢູ່ຂັ້ນຕ່າງໆ, ສ້າງພື້ນຖານ ແລະ ທິດທາງໃຫ້ແກ່ການພົວພັນລະຫວ່າງສອງປະເທດຢ່າງໝັ້ນຄົງ. ການຮ່ວມມືດ້ານປ້ອງກັນຄວາມສະຫງົບ ແລະ ການປ້ອງກັນປະເທດສືບຕໍ່ເອົາໃຈໃສ່ເພີ່ມທະວີ, ປະກອບສ່ວນຮັກສາຄວາມໝັ້ນຄົງ ແລະ ສະຖຽນລະພາບຂອງແຕ່ລະປະເທດ.
ການຮ່ວມມືດ້ານເສດຖະກິດໄດ້ເຫັນການປ່ຽນແປງໃນທາງບວກ, ແທດຈິງ ແລະ ມີປະສິດທິຜົນ; 10 ເດືອນຕົ້ນປີ 2023, ວົງເງິນການຄ້າສອງຝ່າຍບັນລຸກວ່າ 1,3 ຕື້ USD; ບັນດາໂຄງການສຳຄັນສືບຕໍ່ໄດ້ຮັບຄວາມເອົາໃຈໃສ່ ແລະ ຊຸກຍູ້, ໃນນັ້ນມີຫຼາຍໂຄງການໄດ້ຮັບການມອບຮັບ ແລະ ນຳເຂົ້າປະຕິບັດ; ຄວາມຫຍຸ້ງຍາກແລະອຸປະສັກຫຼາຍໄດ້ຮັບການແກ້ໄຂ.
2 ຝ່າຍສືບຕໍ່ຍົກສູງຄຸນນະພາບ ແລະ ປະສິດທິຜົນການຮ່ວມມືດ້ານການສຶກສາ - ບຳລຸງສ້າງ, ບຳລຸງສ້າງແຫຼ່ງຊັບພະຍາກອນມະນຸດ, ເພີ່ມທະວີການໂຄສະນາເຜີຍແຜ່ບັນດາລຸ້ນໜຸ່ມຂອງສອງປະເທດກ່ຽວກັບການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ.
ທ່ານລັດຖະມົນຕີ ບຸ່ຍແທງເຊີນ ສະເໜີໃຫ້ກະຊວງການຕ່າງປະເທດ 2 ປະເທດສືບຕໍ່ສົມທົບກັນຢ່າງແໜ້ນແຟ້ນກັບບັນດາກົມ, ກະຊວງ, ຂະແໜງການທີ່ກ່ຽວຂ້ອງ ເພື່ອຮັບໃຊ້ໃຫ້ແກ່ການຢ້ຽມຢາມ ແລະ ການພົວພັນລະຫວ່າງການນຳຂັ້ນສູງ 2 ປະເທດໃນໄລຍະຈະມາເຖິງ.
ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ 2 ທ່ານ ສະເຫຼີມໄຊ ກົມມະສິດ ໄດ້ເຫັນດີວ່າ, ສອງກະຊວງການຕ່າງປະເທດພ້ອມກັບບັນດາກົມ, ຂະແໜງການ, ທ້ອງຖິ່ນຂອງ 2 ປະເທດສືບຕໍ່ຜັນຂະຫຍາຍບັນດາຂໍ້ຕົກລົງຂັ້ນສູງ ແລະ ສືບຕໍ່ທົບທວນຄືນບັນດາກົນໄກຮ່ວມມືສອງປະເທດຫວຽດນາມ ແລະ ປະເທດລາວ.
ລັດຖະມົນຕີ 2 ທ່ານ ໄດ້ຕີລາຄາສູງການພົວພັນຮ່ວມມືລະຫວ່າງກະຊວງການຕ່າງປະເທດສອງປະເທດນັບມື້ນັບໄດ້ຮັບການຊຸກຍູ້ບົນພື້ນຖານສັນຍາຮ່ວມມືລະຫວ່າງກະຊວງການຕ່າງປະເທດ 2 ປະເທດໄລຍະ 2021 – 2025; ເຫັນດີສືບຕໍ່ຮັກສາ ແລະ ຊຸກຍູ້ບັນດາກົນໄກຮ່ວມມືແຕ່ລະໄລຍະລະຫວ່າງ 2 ກະຊວງຄື: ແຜນການເຄື່ອນໄຫວເພີ່ມທະວີການຮ່ວມມືທາງດ້ານການທູດ ແລະ ເສດຖະກິດໃນໄລຍະ 2020 – 2025; ໂຄງການຮ່ວມມືຝຶກອົບຮົມ ແລະ ຊຸກຍູ້ພະນັກງານທີ່ເຮັດວຽກງານການຕ່າງປະເທດ ແລະ ການເຊື່ອມໂຍງເຂົ້າກັບສາກົນໃຫ້ບັນດາກະຊວງ, ສາຂາ ແລະ ທ້ອງຖິ່ນຂອງລາວ; ການຄົ້ນຄວ້າຍຸດທະສາດ ...
2 ຝ່າຍໄດ້ແຈ້ງໃຫ້ກັນຊາບກ່ຽວກັບນະໂຍບາຍການຕ່າງປະເທດຂອງແຕ່ລະປະເທດ, ຢືນຢັນຈະສືບຕໍ່ຕັ້ງໜ້າແລກປ່ຽນຂໍ້ມູນຂ່າວສານ, ແລກປ່ຽນທັດສະນະ, ສົມທົບກັນຢ່າງແໜ້ນແຟ້ນໃນບັນດາບັນຫາພາກພື້ນ ແລະ ສາກົນ.
2 ຝ່າຍເຫັນດີເປັນເອກະສັນສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ, ພິເສດແມ່ນບັນດາກົນໄກຮ່ວມມືອາຊຽນ ແລະ ອະນຸພາກພື້ນແມ່ນ້ຳຂອງ; ສະໜັບສະໜູນຫຼັກໝັ້ນລວມຂອງອາຊຽນກ່ຽວກັບບັນດາບັນຫາຍຸດທະສາດໃນພາກພື້ນ, ໃນນັ້ນມີບັນຫາທະເລຕາເວັນອອກ.
ທ່ານລັດຖະມົນຕີ ບຸ່ຍແທງເຊີນ ໄດ້ຕີລາຄາສູງການກະກຽມຢ່າງຕັ້ງໜ້າຂອງລາວໃນການເປັນປະທານອາຊຽນ 2024 ແລະ ເນັ້ນໜັກວ່າ ຫວຽດນາມ ພ້ອມແລ້ວທີ່ຈະສືບຕໍ່ຮ່ວມມື ແລະ ໜູນຊ່ວຍ ລາວ ປະຕິບັດໜ້າທີ່ສຳຄັນນີ້ໃຫ້ສຳເລັດຜົນ.
ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ສະເຫຼີມໄຊ ກົມມະສິດ ໄດ້ເຊື້ອເຊີນທ່ານລັດຖະມົນຕີການຕ່າງປະເທດ ບຸ່ຍແທງເຊີນ ມາຢ້ຽມຢາມ ສປປ ລາວ ແລະ ເປັນປະທານຮ່ວມກອງປະຊຸມປຶກສາຫາລືລະດັບລັດຖະມົນຕີການຕ່າງປະເທດ ຫວຽດນາມ - ລາວ ຕາມເວລາທີ່ເໝາະສົມໃນປີ 2024.
ຄຳຮຸ່ງ
