| ຫວຽດນາມ - ໄທ ພະຍາຍາມບັນລຸວົງເງິນການຄ້າ 25 ຕື້ USD ໂດຍໄວ | |
| ເພີ່ມພູນຄູນສ້າງ ນໍ້າໃຈມິດຕະພາບ ຫວຽດນາມ - ລາວ ໃນຂົງເຂດສາທາລະນະສຸກ |
ກ່າວຄຳປາໄສທີ່ພິທີຕ້ອນຮັບ, ທ່ານຮອງລັດຖະມົນຕີ, ຫົວໜ້າຄະນະກຳມະການແຫ່ງລັດ ກ່ຽວກັບຊາວຫວຽດນາມ ອາໄສຢູ່ຕ່າງປະເທດ ນາງ ເລທິທູຮັ່ງ ຖືວ່າ ລະບົບວັດ ແລະ ພຸດທະສາສະໜາ ຫວຽດນາມ ນິກາຍ (Annamnikai) ໄດ້ກາຍເປັນພາກສ່ວນສຳຄັນຂອງສາສະໜາພຸດ ໄທ, ມີປະກອບສ່ວນຫຼາຍຢ່າງໃຫ້ແກ່ພື້ນຖານພຸດທະສາສະໜາໄທ. ປະຈຸບັນຢູ່ ໄທ ມີວັດຫວຽດນາມປະມານ 25 ວັດ, ໃນນັ້ນມີ 8 ວັດໄດ້ຕິດປ້າຍຊື່ດ້ວຍພາສາຫວຽດນາມ.
 |
ບັນຍາກາດທີ່ພິທີຕ້ອນຮັບ |
ຕາມທ່ານນາງ ເລທິທູຮັ່ງ ແລ້ວ, ບັນດາວັດ ຫວຽດນາມ ຢູ່ ໄທ ກໍແມ່ນທັງສະຖານທີ່ເຄື່ອນໄຫວວັດທະນະທຳ, ຄວາມເຊື່ອຖືຂອງປະຊາຄົມພຸດທະສາສະໜານິກະຊົນຄົນຫວຽດ. ນີ້ກໍ່ແມ່ນສະຖານທີ່ພໍ່ແມ່ປະຊາຊົນສະແດງຄວາມຮັກແພງຕໍ່ບ້ານເກີດເມືອງນອນ ຫວຽດນາມ, ຮັກສາຮີດຄອງປະເພນີທີ່ມີມາແຕ່ດົນນານຂອງຊາວ ຫວຽດນາມ, ຊ່ວຍເຊື່ອມໂຍງເຂົ້າກັບປະຊາຄົມ ແລະ ສຶກສາຮຸ່ນໜຸ່ມຊາວ ຫວຽດນາມ ຢູ່ຕ່າງປະເທດກ່ຽວກັບກົກເຫງົ້າເຄົ້າກໍ ແລະ ຄວາມງາມດ້ານວັດທະນະທຳຂອງປະເທດຊາດ. ທ່ານນາງ ມີຄວາມຕື້ນຕັນໃຈເມື່ອຮູ້ວ່າບັນດາເຈົ້າອາວາດວັດຂອງບັນດາວັດຫວຽດນາມ ລ້ວນແຕ່ແມ່ນຊາວ ໄທ ແຕ່ຍັງຮັກສາການທ່ອງຈຳບົດສວດໃນແບບອະນຳນິກາຍ, ປະສົມກັບພາສາສັນສະກິດ ແລະ ພາສາ ຫວຽດນາມ, ຊ່ວຍໃຫ້ຍາດຕິພີ່ນ້ອງຮູ້ສຶກໃກ້ຊິດ, ມີຄວາມຮັກແພງ, ສະຫງົບຈິດໃຈໃນທຸກຄັ້ງໄປວັດ ຫວຽດນາມ ຢູ່ ໄທ.
ທ່ານນາງ ເລທິທູຮັ່ງ ເນັ້ນໜັກວ່າ ການຢ້ຽມຢາມຂອງຄະນະຜູ້ແທນຄະນະສົງ ອະນຳນິກາຍ ແຫ່ງປະເທດໄທ ມາຍັງ ຫວຽດນາມ ແມ່ນໂອກາດເພື່ອໃຫ້ເຈົ້າອາວາດ, ພະສົງ, ພະມະຫາອາຈານ ແລະ ຊາວ ຫວຽດນາມ ຢູ່ຕ່າງປະເທດ ໄດ້ມີຄວາມເຂົ້າໃຈຢ່າງເລິກເຊິ່ງກວ່າກ່ຽວກັບວັດທະນະທໍາ, ພຸດທະສາສະໜາ ຫວຽດນາມ. ຫຼັງຈາກກັບຄືນປະເທດໄທ, ບັນດາພະມະຫາອາຈານ, ພະສົງ ຈະຖ່າຍທອດສົ່ງໃຫ້ພຸດທະສາສະນິກະຊົນຢູ່ ໄທ ກ່ຽວກັບຄວາມສວຍງາມຂອງພຸດທະສາສະຫນາ ຫວຽດນາມ, ປະເທດຊາດ ແລະ ປະຊາຊົນ ຫວຽດນາມ. ການຢ້ຽມຢາມຄັ້ງນີ້ ກໍຈະປະກອບສ່ວນເພີ່ມທະວີການພົວພັນຮ່ວມມື, ພົບປະແລກປ່ຽນຮອບດ້ານລະຫວ່າງສອງປະເທດ, ສືບຕໍ່ຊຸກຍູ້ການພົວພັນມິດຕະພາບທີ່ເປັນມູນເຊື້ອລະຫວ່າງອົງການພຸດທະສາສະໜາ ຫວຽດນາມ ແລະ ພຸດທະສາສະໜາ ໄທ. ພ້ອມກັນນັ້ນ ກໍ່ສະແດງຄວາມຮູ້ບຸນຄຸນບັນດາພະມະຫາອາຈານທີ່ຄຸ້ມຄອງວັດວັດຫວຽດນາມ ຢູ່ ໄທ ທີ່ໄດ້ປະກອບສ່ວນເບິ່ງແຍງຊີວິດທາງດ້ານຈິດວິນຍານ, ການເຫຼື້ອມໃສສາສະໜາຂອງຊຸມຊົນ ຫວຽດນາມ ຢູ່ ໄທ, ປະກອບສ່ວນປະຕິບັດ, ປົກປັກຮັກສາ ແລະ ເຜີຍແຜ່ພຸດທະສາສະໜາ ອະນຳນິກາຍ ແຫ່ງປະເທດໄທ.
ທ່ານນາງ ເລທິທູຮັ່ງ ກ່າວວ່າ: “ຂ້າພະເຈົ້າເຊື່ອໝັ້ນວ່າໃນໄລຍະຈະມາເຖິງ, ພຸດທະສາສະໜາ ເວົ້າລວມ ແລະ ນິກາຍ ຫວຽດນາມ ຢູ່ ໄທ ຈະສືບຕໍ່ເສີມຂະຫຍາຍບົດບາດເປັນຂົວຕໍ່, ຊຸກຍູ້ການພົວພັນທີ່ສະໜິດສະໜົມລະຫວ່າງປະຊາຄົມຊາວ ຫວຽດນາມ ແລະ ປະຊາຊົນ ໄທ. ຂ້າພະເຈົ້າຫວັງວ່າບັນດາວັດ ຫວຽດນາມ ຢູ່ ໄທ ຈະມີປ້າຍຊື່ເປັນພາສາຫວຽດນາມ, ປະຊາຄົມຊາວ ຫວຽດນາມ ຢູ່ ໄທ ຈະສືບຕໍ່ເສີມຂະຫຍາຍຈິດໃຈຮັກແພງ, ມີຄວາມສາມັກຄີ, ຕິດພັນກັນ, ຊ່ວຍເຫຼືອເຊິ່ງກັນ ແລະ ກັນ ເພື່ອຮັບປະກັນຊີວິດການເປັນຢູ່, ພັດທະນາເສດຖະກິດ, ປົກປັກຮັກສາ ແລະ ເສີມຂະຫຍາຍລັກສະນະຈຳເພາະວັດທະນະທຳແຫ່ງຊາດ, ເພີ່ມທະວີການຮ່ວມມື ແລະ ມິດຕະພາບກັບປະຊາຊົນ ໄທ ແລະ ສືບຕໍ່ມຸ່ງໄປເຖິງບ້ານເກີດເມືອງນອນ, ຮ່ວມກັບປະຊາຊົນໃນທົ່ວປະເທດປົກປັກຮັກສາ, ສ້າງສາ ແລະ ພັດທະນາປະເທດຊາດໃຫ້ນັບມື້ນັບຮັ່ງມີ ແລະ ສວຍງາມນັບ”.
ທີ່ການພົບປະ, ພະມະຫາອາຈານ ທິກຢາກວາງ, ຮອງປະທານສະພາບໍລິຫານ, ຫົວໜ້າພະແນກຖະແຫຼງຂ່າວ ແລະ ການສື່ສານ ສະມາຄົມພຸດທະສາສະໜາ ຫວຽດນາມ ໃຫ້ຮູ້ວ່າ ການຢ້ຽມຢາມຂອງຄະນະຜູ້ແທນຄະນະສົງ ອະນຳນິກາຍ ແຫ່ງປະເທດໄທ ຄັ້ງທີ 3 ແມ່ນເພື່ອແນໃສ່ຮັດແໜ້ນມິດຕະພາບ ແລະ ການເຊື່ອມຕໍ່ລະຫວ່າງສອງປະເທດ ເວົ້າລວມ ແລະ ພຸດທະສາສະຫນາຂອງສອງປະເທດ ເວົ້າສະເພາະ. ພະມະຫາອາຈານປາດຖະໜາວ່າ ພຸດທະສາສະໜາຈະແມ່ນສາຍພົວພັນທາງດ້ານຈິດໃຈອັນແໜ້ນແຟ້ນ, ເປັນການເຊື່ອມຕໍ່ປະຊາຊົນສອງປະເທດ ຫວຽດນາມ ແລະ ໄທ ໂດຍທຳມະຊາດ.
ພະມະຫາອາຈານ ພຣະມະຫາທິລະຈັນ ສົມເດັດ, ຊະມາຊິກສະພາອົງການພຸດທະສາສະໜາ ປຫ່ງປະເທດໄທ ໄດ້ກ່າວວ່າ ເຖິງວ່າເຂົາເຈົ້າຢູ່ຕ່າງປະເທດ, ມີວັດທະນະທຳ ແລະ ພາສາທີ່ແຕກຕ່າງກັນ, ແຕ່ເຂົາເຈົ້າລ້ວນແຕ່ເປັນສາສະໜາພຸດ, ແບ່ງປັນຄຳສອນຂອງພຣະພຸດທະເຈົ້າຄືກັນ ແລະ ປະຕິບັດຕາມຄໍາສອນຂອງພຣະພຸດທະເຈົ້າເພື່ອສັນຕິພາບ ແລະ ຄວາມຜາສຸກໃນໂລກ.
ພະມະຫາອາຈານ ພຣະມະຫາທິລະຈັນ ສົມເດັດ ແບ່ງປັນວ່າ ການຢ້ຽມຢາມແມ່ນເພື່ອແນໃສ່ສ້າງຄວາມສາມັກຄີ ແລະ ມິດຕະພາບອັນດີງາມລະຫວ່າງ ຫວຽດນາມ ແລະ ໄທ. ພ້ອມກັນນັ້ນ, ກໍ່ສືບຕໍ່ເພີ່ມທະວີການຮ່ວມມື ແລະ ການຊ່ວຍເຫຼືອລະຫວ່າງອົງການພຸດທະສາສະໜາຫວຽດນາມ ແລະ ໄທ ໃນໄລຍະຈະມາເຖິງ ແລະ ນຳມາເຊິ່ງຄວາມຜາສຸກ ແລະ ຄວາມສະຫງົບສຸກໃຫ້ປະຊາຊົນສອງປະເທດ.
ມິງດຶກ
