ສ້າງເງື່ອນໄຂເພື່ອໃຫ້ພົນລະເມືອງລາວ ໄດ້ຖືສັນຊາດຫວຽດນາມ “ອຸ່ນອ່ຽນໃຈຫາເງິນລ້ຽງຊີບ”

	ກໍ່ສ້າງ ແລະພັດທະນາວັດທະນະທຳ ແລະຊາວຫວິງລອງ ເພື່ອຕອບສະໜອງຄວາມຮຽກຮ້ອງຕ້ອງການພັດທະນາ ແລະ ເຊື່ອມໂຍງ
	ແນວພັນດອກລິນລີ້ ຊະນິດໃໝ່ ສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ ແລະ ໂຮນລັງ

ໂດຍປະຕິບັດ “ຂໍ້ຕົກລົງກ່ຽວກັບການແກ້ໄຂບັນຫາອົບພະຍົບແບບເສລີ ແລະແຕ່ງງານບໍ່ຖືກກົດໝາຍຢູ່ເຂດຊາຍແດນ” ລະຫວ່າງລັດຖະບານສອງປະເທດຫວຽດນາມ ແລະລາວ, ໃນໄລຍະຜ່ານມາ, ອຳນາດການປົກຄອງທຸກຂັ້ນຢູ່ແຂວງເທື່ອທຽນເຫວ້ ໄດ້ມານະພະຍາຍາມສ້າງເງື່ອນໄຂໜູນຊ່ວຍ, ຊ່ວຍເຫຼືອເພື່ອໃຫ້ພົນລະເມືອງລາວ ໃຫ້ໄດ້ຖືສັນຊາດ ຫວຽດນາມ. ຈາກນັ້ນ ກໍ່ຊ່ວຍເຂົາເຈົ້າ “ອຸ່ນອ່ຽນໃຈຫາເງິນລ້ຽງຊີບ” ແລະເຮັດໃຫ້ຊີວິດການເປັນຢູ່ເປັນປົກກະຕິ.

ເດືອນພະຈິກ 2023, ເຖິງວ່າດິນຟ້າອາກາດຢູ່ເຂດພູດອຍອາເລື໊ອຍ, ແຂວງເທື່ອທຽນເຫວ້ ຈະມີຝົນຕົກໜັກກໍ່ຕາມ, ແຕ່ພະນັກງານຕາແສງກວ໋າງເຍິມ ຍັງພາພວກຂ້າພະເຈົ້າໄປຍັງບັນດາຄອບຄົວຊາວລາວ ທີ່ໄດ້ຮັບສັນຊາດຫວຽດນາມ ແລ້ວ ແລະປະຈຸບັນພວມອາໄສຢູ່ໃນບໍລິເວນຕາແສງ.

ພົນລະເມືອງລາວ ຮັບຂໍ້ຕົກລົງຈາກປະທານປະເທດ ແຫ່ງ ສສ ຫວຽດນາມ ໃຫ້ຖືສັນຊາດຫວຽດນາມ. ພາບ: cand.com.vn

ຢູ່ໃນເຮືອນທີ່ຫາກໍ່ປຸກສ້າງໃໝ່, ເອື້ອຍ ໂຮ່ທິເຮືອງ (ເກີດປີ 1985) ໃຫ້ຮູ້ວ່າ ກ່ອນນີ້ຄອບຄົວຂອງເອື້ອຍດຳລົງຊີວິດຢູ່ເຂດຕິດກັບຊາຍແດນ ຫວຽດນາມ-ລາວ. ປີ 2010, ເອື້ອຍເຮືອງ ອົບພະຍົບແບບເສລີຈາກລາວ ຂ້າມຊາຍແດນມາຫວຽດນາມ ແລະອາໄສຢູ່ໃນຕາແສງກວ໋າງເຍິມ ເພື່ອຄ້າຂາຍຫາເງິນລ້ຽງຊີບ. ຢູ່ທີ່ນີ້, ເອື້ອຍເຮືອງ ໄດ້ພົບກັບອ້າຍ ເລວັນເຕີ໊ຍ (ເກີດປີ 1982) ແມ່ນຊາວທ້ອງຖິ່ນ, ຫຼັງຈາກນັ້ນສອງຄົນໄດ້ກາຍເປັນຜົວເມຍ. ໂດຍເຂົ້າໃຈໄດ້ເຖິງຄວາມຫຍຸ້ງຍາກຂອງຜົວເມຍເອື້ອຍເຮືອງ, ປະຕິບັດ “ຂໍ້ຕົກລົງກ່ຽວກັບການແກ້ໄຂບັນຫາອົບພະຍົບແບບເສລີ ແລະແຕ່ງງານບໍ່ຖືກກົດໝາຍໃນເຂດຊາຍແດນ” ລະຫວ່າງລັດຖະບານສອງປະເທດຫວຽດນາມ ແລະລາວ, ຄະນະກໍາມະການປະຊາຊົນຕາແສງກວ໋າງເຍິມ ໄດ້ລາຍງານຕໍ່ທຸກຂັ້ນເພື່ອສ້າງເງື່ອນໄຂຊ່ວຍເຫຼືອໃຫ້ຄອບຄົວເອື້ອຍເຮືອງ. ຮອດປີ 2019, ເອື້ອຍເຮືອງ ໄດ້ຮັບສັນຊາດຫວຽດນາມ ແລະອຳນາດການປົກຄອງທ້ອງຖິ່ນ ກໍ່ໄດ້ສ້າງເງື່ອນໄຂໜູນຊ່ວຍເງິນເພື່ອກໍ່ສ້າງເຮືອນຢູ່, ມອບງົວພັນເພື່ອພັດທະນາເສດຖະກິດ.

ເອື້ອຍ ໂຮ່ທິເຮືອງ ແບ່ງປັນຕື່ມອີກວ່າ: “ພາຍຫຼັງຖືສັນຊາດຫວຽດນາມ, ຊີວິດຂອງຂ້າພະເຈົ້າ ແລະຄອບຄົວໄດ້ກ້າວເຂົ້າສູ່ໜ້າໃໝ່ເມື່ອຄະນະ, ຂະແໜງການທຸກຂັ້ນໄດ້ເອົາໃຈໃສ່, ສ້າງເງື່ອນໄຂຊ່ວຍເຫຼືອຊີວິດການເປັນຢູ່ທຸກດ້ານ, ຂ້າພະເຈົ້າໄດ້ມານະພະຍາຍາມຮຽນພາສາຫວຽດ, ຊອກຮູ້ ແລະກໍາແໜ້ນຮີດຄອງປະເພນີຢູ່ທ້ອງຖິ່ນເພື່ອດຳລົງຊີວິດຢ່າງກົມກຽວ ແລະສາມັກຄີກັບທຸກຄົນໃນບ້ານ. ຂ້າພະເຈົ້າຍາມໃດກໍ່ຈົດຈໍາວ່າຕົນເອງຕ້ອງດຳລົງຊີວິດ ແລະເຮັດວຽກຕາມບັນດາຂໍ້ກຳນົດກົດໝາຍທີ່ລັດຫວຽດນາມ ໄດ້ກຳນົດໄວ້”.

ຜ່ານການຊອກຮູ້ຂອງນັກຂ່າວໜັງສືພິມຕໍາຫຼວດປະຊາຊົນແລ້ວ, ຍ້ອນມີຫຼາຍເຫດຜົນທີ່ແຕກຕ່າງກັນໃນຊຸມປີຜ່ານມາ, ປະຊາຊົນຢູ່ແຂວງສາລະວັນ ແລະແຂວງເຊກອງ (ລາວ) ຫຼາຍຄົນ ໄດ້ອົບພະຍົບມາດໍາລົງຊີວິດຢູ່ຕາແສງຊາຍແດນແຂວງເທື່ອທຽນເຫວ້. ເຂົາເຈົ້າບໍ່ມີສັນຊາດ, ບໍ່ມີບັດປະຈໍາຕົວ.

ການປະຕິບັດ “ຂໍ້ຕົກລົງກ່ຽວກັບການແກ້ໄຂບັນຫາອົບພະຍົບແບບເສລີ ແລະແຕ່ງງານບໍ່ຖືກກົດໝາຍໃນເຂດຊາຍແດນ” ລະຫວ່າງລັດຖະບານສອງປະເທດຫວຽດນາມ ແລະລາວ, ໃນຫຼາຍປີຜ່ານມາ, ແຂວງເທື່ອທຽນເຫວ້ ໄດ້ສົມທົບກັບແຂວງສາລະວັນ ແລະແຂວງເຊກອງ ລາວ ດໍາເນີນການສຳຫຼວດສອງຝ່າຍເພື່ອໃຫ້ມີຂໍ້ມູນເປັນເອກະພາບກ່ຽວກັບກໍລະນີອົບພະຍົບແບບເສລີ ແລະແຕ່ງງານບໍ່ຖືກກົດໝາຍຈາກບັນດາແຂວງຂອງລາວ ທີ່ມາອາໄສຢູ່ເມືອງອາເລື໊ອຍ. ຈາກນັ້ນ ກໍ່ມີມາດຕະການໜູນຊ່ວຍ, ຊ່ວຍເຫຼືອເຂົາເຈົ້າໃຫ້ໄດ້ຮັບສັນຊາດຫວຽດນາມ.

ທ່ານ ຫງວຽນແມັ້ງຮຸ່ງ ປະທານຄະນະກຳມະການປະຊາຊົນເມືອງອາເລື໊ອຍ ໃຫ້ຮູ້ວ່າ: ກ່ອນນີ້, ເມື່ອບໍ່ທັນໄດ້ຖືສັນຊາດຫວຽດນາມ, ຊາວລາວ ຢູ່ເມືອງອາເລື໊ອຍ ເວົ້າສະເພາະ ແລະຊາວລາວ ທີ່ອົບພະຍົບມາດຳລົງຊີວິດຢ່າງເສລີຢູ່ລຽບຕາມຊາຍແດນຫວຽດນາມ ແມ່ນດ້ອຍໂອກາດ. ພາຍຫຼັງໄດ້ຖືສັນຊາດ, ເຂົາເຈົ້າ ມີສິດ ແລະພັນທະຄືກັນກັບພົນລະເມືອງຫວຽດນາມ, ທັງໄດ້ຊົມໃຊ້ລະບອບ, ນະໂຍບາຍບຸລິມະສິດໃຫ້ບັນດາຄອບຄົວທຸກຍາກ, ຄອບຄົວໃກ້ຂັ້ນທຸກຍາກ, ຊົນເຜົ່າສ່ວນໜ້ອຍຢູ່ເຂດປະສົບຄວາມຫຍຸ້ງຍາກ, ເຂດຊາຍແດນ.

ທ່ານ ຫງວຽນວັນຮືງ ຫົວໜ້າພະແນກຍຸຕິທຳແຂວງເທື່ອທຽນເຫວ້ ຢັ້ງຢືນວ່າ ການປະຕິບັດ “ຂໍ້ຕົກລົງກ່ຽວກັບການແກ້ໄຂບັນຫາອົບພະຍົບແບບເສລີ ແລະແຕ່ງງານບໍ່ຖືກກົດໝາຍໃນເຂດຊາຍແດນ” ລະຫວ່າງລັດຖະບານສອງປະເທດຫວຽດນາມ ແລະລາວ ຢູ່ເມືອງອາເລື໊ອຍ ໄດ້ຮັບການຄວບຄຸມໂດຍພື້ນຖານ. ຜ່ານນັ້ນ ກໍ່ຮັບປະກັນຄວາມໝັ້ນຄົງທາງດ້ານການເມືອງ ແລະຄວາມສະຫງົບ ຄວາມເປັນລະບຽບຮຽບຮ້ອຍຢູ່ເຂດຊາຍແດນລະຫວ່າງແຂວງເທື່ອທຽນເຫວ້ ກັບສອງແຂວງສາລະວັນ ແລະເຊກອງ.