ຫວ່າງແລ້ວນີ້, ຢູ່ຮ່າໂນ້ຍ, ກະຊວງອຸດສາຫະກຳ ແລະ ການຄ້າ ໄດ້ຈັດຕັ້ງເວທີປາໄສການຄ້າເອເລັກໂຕນິກ ແລະ ເສດຖະກິດດິຈິຕອນສຳລັບຂະແໜງການອຸດສາຫະກຳ ແລະ ການຄ້າໃນປີ 2023.
 |
ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ຫງວຽນຊິງເຫຍີດເຕິ່ນ ທີ່ກ່າວຄຳປາໃສທີ່ເວທີປາໄສ |
ກ່າວຄຳປາໄສທີ່ເວທີປາໄສ, ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ຫງວຽນຊິງເຫຍີດເຕິ່ນ ໃຫ້ຮູ້ວ່າ: ການເຕີບໂຕຂອງເສດຖະກິດທົ່ວໂລກພວມຢູ່ໃນໄລຍະຊຸດໂຊມຢ່າງແຮງຍ້ອນນະໂຍບາຍເງິນຕາເຄັ່ງຕຶງ, ສົງຄາມຢູ່ ອູແກຣນ ສືບຕໍ່ເປັນບັນຫາໜັກໜ່ວງໃຫ້ແກ່ບັນດາການເຄື່ອນໄຫວດ້ານເສດຖະກິດ, ສົ່ງຜົນສະທ້ອນເຖິງທຸກດ້ານເສດຖະກິດ ແລະ ດ້ານສັງຄົມ. ການຄ້າທົ່ວໂລກເລີ່ມຫຼຸດລົງຈາກໄຕມາດທີ 4 ຂອງປີ 2022 ເຮັດໃຫ້ການຄ້າທົ່ວໂລກໃນປີ 2022 ເພີ່ມຂຶ້ນພຽງແຕ່ 2,7%.
ໃນສະພາບເສດຖະກິດໂລກທີ່ມີຄວາມບໍ່ແນ່ນອນດ້ານການເມືອງຫຼາຍຢ່າງ, ອັດຕາເງິນເຟີ້ສູງຕໍ່ເນື່ອງ, ນະໂຍບາຍເງິນຕາທີ່ເຄັ່ງຕຶງ ແລະ ຕະຫຼາດການເງິນທີ່ບໍ່ໝັ້ນຄົງ, ອົງການການຄ້າໂລກ ຄາດຄະເນວ່າ ການຄ້າໂລກໃນປີ 2023 ຈະເພີ່ມຂຶ້ນ 1,7%, 1% ຕ່ຳກວ່າປີກ່ອນ. ຂະແໜງການ ແລະ ການບໍລິການຈໍານວນຫຼາຍທີ່ກວມເອົາອັດຕາສ່ວນສູງຂອງ GDP ໄດ້ຢັ້ງຢືນລະດັບການເຕີບໂຕທາງລົບໃນຊຸມປີມໍ່ໆມານີ້ ເຊິ່ງໄດ້ແກ່ຍາວລະດັບການເຕີບໂຕຂອງຫຼາຍຂະແໜງການ ແລະ ການບໍລິການໄປສູ່ລະດັບຕໍ່າ. ໃນຂະນະດຽວກັນ, ພື້ນຖານເສດຖະກິດ ຫວຽດນາມ ໄດ້ປະສົບກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງຄື: ໃບສັ່ງຊື້ຫຼຸດລົງ, ຕະຫຼາດການບໍລິໂພກຜະລິດຕະພັນຂາດເຂີນ, ທຶນຮອນໝົດກ້ຽງ.
ໃນສະພາບການນັ້ນ, ການຄ້າເອເລັກໂຕນິກ ແລະ ເສດຖະກິດດິຈິຕອນຂອງ ຫວຽດນາມ ສືບຕໍ່ແມ່ນໜຶ່ງໃນບັນດາຈຸດພົ້ນເດັ່ນໃນການພັດທະນາເສດຖະກິດ - ສັງຄົມ. ອີງຕາມບົດລາຍງານຂອງ Google, Temasek ແລະ Bain & Company ທີ່ປະກາດໃນວັນທີ 1 ພະຈິກ, ຫວຽດນາມ ສືບຕໍ່ເປັນປະເທດທີ່ມີອັດຕາການເຕີບໂຕທາງດ້ານເສດຖະກິດດິຈິຕອນໄວທີ່ສຸດໃນອາຊີຕາເວັນອອກສ່ຽງໃຕ້ 2 ປີຕິດຕໍ່ກັນ (2022 ແລະ 2023) ແລະ ຄາດຄະເນວ່າ ຈະສືບຕໍ່ທີ່ຕັ້ງນີ້ໃນປີ 2025 (ຕິດກັບ ຟີລິບປິນ). ມູນຄ່າສິນຄ້າທັງໝົດຂອງຫວຽດນາມ (GMV) ຄາດວ່າ ຈະບັນລຸອັດຕາການເຕີບໂຕປະຈໍາປີ (CAGR) 20%, ຈາກ 30 ຕື້ USD ໃນປີ 2023 ເປັນເກືອບ 45 ຕື້ USD ໃນປີ 2025. ພິເສດ, ການເຕີບໂຕຂອງ GMV ໃນ 2 ປີຂ້າງຫນ້າຂອງເສດຖະກິດດິຈິຕອນ ຫວຽດນາມ ຈະໄດ້ຮັບການຳພາດ້ວຍຂົງເຂດການຄ້າເອເລັກໂຕນິກ.
ຕາມການສຳຫຼວດສະຖິຕິຂອງກະຊວງອຸດສາຫະກຳ ແລະ ການຄ້າ, ການຄ້າເອເລັກໂຕນິກຂອງ ຫວຽດນາມ ຍັງຄົງຮັກສາລະດັບການເຕີບໂຕ 20% ໃນປີ 2022. ອາດເຫັນໄດ້ວ່າ ໃນຕະຫຼອດຊຸມປີຜ່ານມາ, ການຄ້າເອເລັກໂຕນິກຂອງ ຫວຽດນາມ ຍາມໃດກໍ່ຮັກສາລະດັບການເຕີບໂຕຢ່າງສະເໝີຕົ້ນສະເໝີປາຍຈາກ 16-30%, ຄາດວ່າຈະບັນລຸ 20,5 ຕື້ໂດລາສະຫະລັດໃນປີນີ້.
ໃນປີ 2023 ແລະ ຊຸມປີຕໍ່ໄປ, ດ້ວຍຈັງຫວະການເຕີບໂຕທີ່ເຂັ້ມແຂງນັ້ນ, ທ້ອງຕະຫຼາດການຄ້າເອເລັກໂຕນິກ ແລະ ເສດຖະກິດດິຈິຕອນຂອງ ຫວຽດນາມ ຈະເຕີບໂຕຢ່າງແຮງກວ່າອີກ ແລະ ສ້າງກຳລັງແຮງໃຫ້ແກ່ການພັດທະນາເສດຖະກິດ. ນີ້ກໍແມ່ນຈຸດເວລາທີ່ ຫວຽດນາມ ສ້າງຮູບແບບ ແລະ ຍຸດທະສາດໃໝ່. ຈາກນັ້ນ ກໍ່ຈະຊ່ວຍໃຫ້ທຸລະກິດຟື້ນຟູແລະ ຂະຫຍາຍທ້ອງຕະຫຼາດຫຼັງຈາກສະຖານະການທີ່ຫຍຸ້ງຍາກຜ່ານໄປ.
ທ່ານຮອງລັດຖະມົນຕີ ຫງວຽນຊິງເຫຍີດເຕິ່ນ ໃຫ້ຮູ້ວ່າ: ໃນຊຸມປີມໍ່ໆມານີ້, ກະຊວງອຸດສາຫະກຳ ແລະ ການຄ້າໄດ້ປະກາດໃຊ້ເອກະສານ, ນະໂຍບາຍ, ຍຸດທະສາດຫຼາຍສະບັບເພື່ອຊຸກຍູ້ການຫັນເປັນດິຈິຕອນຂອງຂະແໜງອຸດສາຫະກຳ ແລະ ການຄ້າ, ໂດຍສຸມໃສ່: ເພີ່ມທະວີການກໍ່ສ້າງລັດຖະບານເອເລັກໂຕນິກ ກະຊວງອຸດສາຫະກຳ ແລະ ການຄ້າ; ຊຸກຍູ້ການພັດທະນາເສດຖະກິດດິຈິຕອນໃນຂະແໜງອຸດສາຫະກຳ ແລະ ການຄ້າ; ແລະ ພັດທະນາການຄ້າເອເລັກໂຕນິກໃນຂອບເຂດທົ່ວປະເທດ.
ເວທີປາໄສໄດ້ດຳເນີນໃນວັນທີ 21 ພະຈິກນີ້, ໃນນັ້ນມີ 01 ວາລະປະຊຸມຄົບຄະນະໃນຕອນເຊົ້າ ແລະ 02 ວາລະປະຊຸມສຳມະນາໃນຕອນບ່າຍ. ນີ້ແມ່ນເຫດການທີ່ສໍາຄັນ, ເປັນບ່ອນເຊື່ອມຕໍ່ບັນດາຫົວໜ່ວຍທີ່ສະໜອງວິທີການແກ້ໄຂການປ່ຽນແປງດິຈິຕອນທີ່ມີຊື່ສຽງ; ບັນດາພື້ນຖານການຄ້າເອເລັກໂຕນິກ, ບັນດາກົມກອງທີ່ສະໜອງວິທີການແກ້ໄຂພື້ນຖານໂຄງລ່າງການຫັນເປັນດິຈິຕອນ, ພື້ນຖານໂຄງລ່າງໜູນຊ່ວຍການຊຳລະເງິນເອເລັກໂຕນິກ, ການຂົນສົ່ງ ແລະ ພິເສດແມ່ນການຮ່ວມມືຂອງບັນດາອົງການສື່ມວນຊົນ.
ເພື່ອມີບັນດາຂໍ້ລິເລີ່ມ ແລະ ວິທີແກ້ໄຂສະເພາະເພື່ອພັດທະນາການຄ້າເອເລັກໂຕນິກ ແລະ ເສດຖະກິດດິຈິຕອນ, ເພີ່ມທະວີການປະກອບສ່ວນຂອງການຫັນເປັນດີຈີຕອນຕໍ່ກັບການພັດທະນາຂະແໜງອຸດສາຫະກຳ ແລະ ການຄ້າ ເວົ້າສະເພາະ ແລະ ພື້ນຖານເສດຖະກິດ ຫວຽດນາມ ເວົ້າລວມ ໃນສະພາບທີ່ຫຍຸ້ງຍາກຄືໃນປະຈຸບັນ, ທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຮຽກຮ້ອງໃຫ້ບັນດາຜູ້ແທນ ແລະ ນັກຊ່ຽວຊານ ສຸມໃສ່ປຶກສາຫາລື:
ທີໜຶ່ງ, ບັນດາທ່າອ່ຽງການນຳໃຊ້ເຕັກໂນໂລຊີໃນການຫັນເປັນດິຈິຕອນ ເວົ້າລວມ ແລະ ການຫັນເປັນດິຈິຕອນຂອງຂະແໜງອຸດສາຫະກຳ ແລະ ການຄ້າ ເວົ້າສະເພາະ; ວິທີແກ້ໄຂເພື່ອຍູ້ແຮງລັດຖະບານເອເລັກໂຕນິກ , ພັດທະນາເສດຖະກິດດິຈິຕອນຂອງຂະແໜງອຸດສາຫະກຳ ແລະ ການຄ້າໃນຂົງເຂດສຳຄັນເຊັ່ນ: ພະລັງງານ, ການຜະລິດອັດສະລິຍະ, ການຄ້າເອເລັກໂຕນິກ, ການຂົນສົ່ງ;
ທີສອງ, ບັນດາວິທີແກ້ໄຂເພື່ອສືບຕໍ່ສ້າງທ້ອງຕະຫຼາດການຄ້າເອເລັກໂຕນິກແບບຍືນຍົງ, ຮັດແຄບໄລຍະຫ່າງດິຈິຕອນ, ເພີ່ມທະວີການເຊື່ອມຕໍ່ພາກພື້ນ;
ທີສາມ, ບັນດາມາດຕະການແກ້ໄຂເພື່ອພັດທະນາການຄ້າເອເລັກໂຕນິກ ແລະ ເສດຖະກິດດີຈີຕອນໃນຂະແໜງອຸດສາຫະກຳ ແລະ ການຄ້າຢູ່ທ້ອງຖິ່ນ.
ເວທີປາໄສການຄ້າເອເລັກໂຕນິກ ແລະ ເສດຖະກິດດິຈິຕອນ ຕັ້ງຫວັງວ່າ ຈະເສີມຂະຫຍາຍບົດບາດຂອງການເຊື່ອມຕໍ່ບັນດາອົງການຄຸ້ມຄອງລັດ, ສະຫະສະມາຄົມ, ອົງການ ແລະ ທຸລະກິດໃນຂົງເຂດການຫັນເປັນດິຈິຕອນ ແລະ ການຄ້າເອເລັກໂຕນິກ ເພື່ອຍົກອອກບັນດາຂໍ້ສະເໜີນະໂຍບາຍ, ໃາດຕະການແກ້ໄຂຊຸກຍູ້ການພັດທະນາການຄ້າເອເລັກໂຕນິກ ແລະ ເສດຖະກິດດິຈິຕອນສຳລັບຂະແໜງການອຸດສາຫະກຳ ແລະ ການຄ້າຢ່າງມີປະສິດທິຜົນ, ຍືນຍົງ.
ມິງດຶກ
