| ກອງຊ່າງແສງຫວຽດນາມ ໄດ້ນຳມາເຊິ່ງກຳລັງໜູນ ແລະຄວາມເຊື່ອໝັ້ນໃຫ້ແກ່ປະຊາຊົນ Abyei | |
| ສະມາຊິກ 156 ຄົນ ຂອງກອງທະຫານຊ່າງແສງ ເລກ 1 ໄດ້ອອກເດີນທາງໄປປະຕິບັດໜ້າທີ່ຢູ່ Abyei |
ກຳລັງຮັກສາສັນຕິພາບ ສະຫະປະຊາຊາດຂອງຫວຽດນາມ ທີ່ຄະນະປະຕິບັດງານປ້ອງກັນຄວາມສະຫງົບຊົ່ວຄາວ ຂອງສະຫະປະຊາຊາດຢູ່ເຂດ Abyei (UNISFA) ຫາກໍ່ສົມທົບກັບກົມກອງຮັບປະກັນກອງບັນຊາການຄະນະປະຕິບັດງານຂອງ ເນປານ ຈັດຕັ້ງການກວດພະຍາດ, ແຈກຢາຍຢາໂດຍບໍ່ເສຍຄ່າ, ມອບຂອງຂວັນໃຫ້ບັນດາຄູອາຈານຢູ່ເຂດໃຈກາງ Abyei ເພື່ອແນໃສ່ສ້າງການພົວພັນອັນດີງາມ, ຊ່ວຍເຫຼືອເຊິ່ງກັນແລະກັນລະຫວ່າງກອງທັບປະຊາຊົນຫວຽດນາມ ແລະປະຊາຄົມທ້ອງຖິ່ນຢູ່ເຂດ Abyei.
 |
| ບັນຍາກາດທີ່ຫ້ອງກວດພະຍາດ. ພາບ: qdnd.vn |
ເພື່ອຈັດຕັ້ງການກວດພະຍາດໃຫ້ປະສົບຜົນສໍາເລັດ, ກໍາລັງຫວຽດນາມ ປະຈຳ ຄະນະປະຕິບັດງານ UNISFA ໄດ້ສົມທົບກັບກົມກອງ ເນປານ ໄປສຳຫຼວດເຂດທີ່ຈະກວດ, ປິ່ນປົວພະຍາດ ເພື່ອແນໃສ່ຮັບປະກັນເງື່ອນໄຂດີທີ່ສຸດໃຫ້ແກ່ການກວດພະຍາດໃນຄັ້ງນີ້.
ກໍາລັງຫວຽດນາມ ໄດ້ຈັດສົ່ງແພດໝໍຈາກໂຮງໝໍສະໜາມຂັ້ນ 1 ຂຶ້ນກັບກອງຊ່າງແສງ ພ້ອມດ້ວຍພະນັກງານແພດຈາກກົມກອງ ເນປານ ເຂົ້າຮ່ວມໂຄງການ. ສິ່ງທີ່ເປັນໜ້າເອົາໃຈໃສ່ ນັ້ນແມ່ນມີທ່ານໝໍຄົນໜຶ່ງມາຈາກກອງພັນທະຫານບົກ ປາກິດສະຖານ ໄດ້ສະໝັກເຂົ້າຮ່ວມການໜູນຊ່ວຍພາຍຫຼັງທີ່ໄດ້ຮັບຂ່າວກ່ຽວກັບໂຄງການທີ່ມີຄວາມໝາຍນີ້ຂອງກົມກອງຫວຽດນາມ ແລະ ເນປານ.
ພິເສດ, ທ່ານລັດຖະມົນຕີກະຊວງສຶກສາເຂດ Abyei ໄດ້ໄປຢ້ຽມຢາມ, ທີມງານແພດໝໍຂອງຫວຽດນາມ ໄດ້ກວດສຸຂະພາບໂດຍກົງໃຫ້. ທ່ານລັດຖະມົນຕີກະຊວງສຶກສາ Abyei ສະແດງຄວາມປິຕິຊົມຊື່ນ ແລະຫວັງວ່າ ໂຄງການນີ້ຈະໄດ້ຮັບການຜັນຂະຫຍາຍເພື່ອຍົກສູງຄຸນນະພາບດ້ານສຸຂະພາບຂອງຖັນແຖວຄູອາຈານຢູ່ເຂດ Abyei. ພາຍຫຼັງການກວດພະຍາດ, ບັນດາຄູອາຈານໄດ້ຮັບຢາຕາມອາການຂອງພະຍາດ ແລະໄດ້ຮັບປື້ມບັນທຶກ ແລະປາກກາເປັນທີ່ລະນຶກຈາກກອງຊ່າງແສງຫວຽດນາມ.
ບູນມີ
