ຕອນເຊົ້າວັນທີ 11 ພະຈິກ, ຢູ່ແຂວງເທື່ອທຽນເຫວ້, ກະຊວງຖະແຫຼງຂ່າວ ແລະສື່ສານຫວຽດນາມ ໄດ້ສົມທົບກັບຄະນະກຳມະການປະຊາຊົນແຂວງເທື່ອທຽນເຫວ້ ຈັດພິທີເປີດ “ວັນບຸນໄມຕີຈິດມິດຕະພາບພິເສດ ຫວຽດນາມ-ລາວ” ປີ 2023 ດ້ວຍຫົວຂໍ້: “ຖະແຫຼງຂ່າວ ແລະການສື່ສານ, ຈຸດພົ້ນເດັ່ນໃນການພົວພັນຮ່ວມມື ຫວຽດນາມ-ລາວ”.
ວັນບຸນປີນີ້ລວມມີບັນດາເຫດການ, ຄື: ງານວາງສະແດງຮູບພາບ, ງານຕະຫຼາດນັດ-ງານວາງສະແດງ, ການໂອ້ລົມສົນທະນາວິທະຍາສາດ ແລະຄໍ່າຄືນພົບປະແລກປ່ຽນສິລະປະຫວຽດນາມ-ລາວ.
 |
| ບັນດາຜູ້ແທນຕັດແຖບຜ້າເປີດ “ວັນບຸນໄມຕີຈິດມິດຕະພາບພິເສດຫວຽດນາມ-ລາວ” ປີ 2023. ພາບ: TTXVN |
ທ່ານ ຫງວຽນແທັງເລິມ ຮອງລັດຖະມົນຕີກະຊວງຖະແຫຼງຂ່າວ ແລະສື່ສານຫວຽດນາມ ໃຫ້ຮູ້ວ່າ: “ວັນບຸນໄມຕີຈິດມິດຕະພາບພິເສດ ຫວຽດນາມ-ລາວ” ປີ 2023 ແມ່ນເຫດການທີ່ມີຄວາມໝາຍອັນໃຫຍ່ຫຼວງ, ປະກອບສ່ວນຊຸກຍູ້ການຮ່ວມມືໃນຂົງເຂດຖະແຫຼງຂ່າວ ແລະສື່ສານ, ໃນຂອບເຂດສັນຍາລະຫວ່າງລັດຖະບານກ່ຽວກັບຄູ່ຮ່ວມມືດີຈີຕອນ, ຫັນສື່ມວນຊົນເປັນດີຈີຕອນ, ລົບລ້າງຂ່າວປອມ, ຍົກສູງທັກສະດີຈີຕອນໃຫ້ປະຊາຊົນ, ມຸ່ງໄປເຖິງສະພາບແວດລ້ອມດີຈີຕອນທີ່ປອດໄພ, ປອດໃສ, ຫັນປ່ຽນຂໍ້ມູນຂ່າວສານໄປເຖິງພູມປັນຍາ. ນີ້ແມ່ນບັນດາເນື້ອໃນທີ່ໄດ້ເຫັນດີເປັນເອກະພາບທີ່ກອງປະຊຸມລັດຖະມົນຕີຖະແຫຼງຂ່າວອາຊຽນ ຄັ້ງທີ 16 (AMRI-16) ຢູ່ນະຄອນດ່ານັງ ໃນເດືອນກັນຍາຜ່ານມາ.
 |
| ລາຍການສະແດງສິລະປະ. ພາບ: TTXVN |
ຕາມທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວລາວ ແລ້ວ, ການຖະແຫຼງຂ່າວ ແລະການສື່ສານ ຍາມໃດກໍ່ຖືວ່າແມ່ນຂົງເຂດທີ່ພົ້ນເດັ່ນໃນສາຍພົວພັນລະຫວ່າງສອງປະເທດລາວ-ຫວຽດນາມ ດ້ວຍຫຼາຍໂຄງການຮ່ວມມື. ພ້ອມທັງປາດຖະໜາວ່າ ວັນບຸນຈະກາຍເປັນການເຄື່ອນໄຫວຈັດຕັ້ງປະຈຳປີ, ປະກອບສ່ວນຊຸກຍູ້ການແລກປ່ຽນ ແລະເປີດກາລະໂອກາດຮ່ວມມືໃໝ່ລະຫວ່າງສອງປະເທດໃນຂົງເຂດນີ້.
ບູນມີ
