ວັນທີ 24 ຕຸລາ, ສະຫາຍ ເຢືອງວັນຈາງ, ເລຂາພັກແຂວງ, ປະທານສະພາປະຊາຊົນແຂວງກອນຕຸມ ໄດ້ລົງກວດກາຄວາມຄືບໜ້າໃນການກໍ່ສ້າງຫໍວັດທະນະທຳມິດຕະພາບ ຫວຽດນາມ-ລາວ-ກໍາປູເຈຍ ຢູ່ບ້ານຕາກາ, ຕາແສງເບີ່ອີ, ເມືອງງອກໂຮ່ຍ.
 |
| ກິດຈະກໍາຫໍວັດທະນະທຳມິດຕະພາບໄດ້ຮັບການກໍ່ສ້າງຢ່າງຮີບດ່ວນ. ພາບ: dangcongsan.vn |
ກິດຈະກໍາຫໍວັດທະນະທຳມິດຕະພາບ ຫວຽດນາມ-ລາວ-ກຳປູເຈຍ ໄດ້ຮັບການກໍ່ສ້າງດ້ວຍແຫຼ່ງທຶນຈາກກະຊວງປ້ອງກັນປະເທດ, ການກໍ່ສ້າງໄດ້ຜັນຂະຫຍາຍຢ່າງຮີບດ່ວນເພື່ອໃຫ້ສຳເລັດຖືກຕາມເວລາກຳນົດກ່ອນທີ່ຈະດໍາເນີນງານພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ຫວຽດນາມ-ລາວ-ກຳປູເຈຍ (ຄາດວ່າ ຈະດຳເນີນໃນເດືອນພະຈິກ 2023).
ສະຫາຍພັນເອກພິເສດ ເລກວກວຽດ, ຫົວໜ້າກອງບັນຊາການທະຫານຊາຍແດນແຂວງກອນຕຸມ ໃຫ້ຮູ້ວ່າ: ງານພົບປະແລກປ່ຽນມິດຕະພາບດ້ານປ້ອງກັນຊາດເຂດຊາຍແດນ ຫວຽດນາມ-ລາວ-ກໍາປູເຈຍ ຄັ້ງທີ 1 ທີ່ຈະດໍາເນີນຢູ່ເຂດສາມແຍກອິນດູຈີນ ແມ່ນໜຶ່ງໃນບັນດາເຫດການສຳຄັນທີ່ສຸດຂອງແຂວງກອນຕຸມ ໃນປີ 2023. ຍ້ອນເຫດນັ້ນ, ກອງບັນຊາການທະຫານຊາຍແດນແຂວງກອນຕຸມ ແລະບັນດາກົມກອງ, ຫົວໜ່ວຍກໍ່ສ້າງໂຄງການໄດ້ມານະພະຍາຍາມຜ່ານຜ່າຄວາມຫຍຸ້ງຍາກ ແລະສຳເລັດວຽກງານກະກຽມທຸກດ້ານ, ໃນນັ້ນມີກິດຈະກໍາທີ່ຮັບໃຊ້ການເຄື່ອນໄຫວຕ່າງໆໃນຂອບເຂດງານພົບປະແລກປ່ຽນຂອງການນຳກະຊວງປ້ອງກັນປະເທດ 3 ປະເທດ. ໄລ່ມາຮອດປະຈຸບັນ, ບັນດາລາຍການ ແລະເນື້ອໃນວຽກງານຮັບໃຊ້ງານພົບປະແລກປ່ຽນໄດ້ສຳເລັດໂດຍພື້ນຖານຕາມກຳນົດເວລາ.
ກ່າວຄຳເຫັນທີ່ການຢ້ຽມຢາມ, ທ່ານເລຂາພັກແຂວງກອນຕຸມ ໄດ້ຮຽກຮ້ອງໃຫ້ການນຳທ້ອງຖິ່ນທຸກຂັ້ນ ແລະບັນດາອົງການ, ກົມກອງທີ່ກ່ຽວຂ້ອງ ຄວນຍູ້ໄວຄວາມຄືບໜ້າໃນການກໍ່ສ້າງ ກໍ່ຄືສຳເລັດບັນດາເນື້ອໃນວຽກງານທີ່ໄດ້ຮັບມອບໝາຍ. ຜົນສຳເລັດຂອງງານພົບປະແລກປ່ຽນເປັນຂີດໝາຍສຳຄັນເພື່ອຍົກສາຍພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ-ລາວ-ກຳປູເຈຍ ຂຶ້ນສູ່ລະດັບສູງໃໝ່, ປະກອບສ່ວນກໍ່ສ້າງຊາຍຄາລວມອິນດູຈີນ ໃຫ້ມີສະຖຽນລະພາບ, ສາມັກຄີ ແລະພັດທະນາແບບຍືນຍົງ.
ບູນມີ
