| ເພີ່ມທະວີການຮ່ວມມືດ້ານປ້ອງກັນຊາດ ຫວຽດນາມ-ລາວ ເພື່ອຜົນສໍາເລັດຂອງປີ ອາຊຽນ 2024 | |
| ສະມັດຊາໃຫຍ່ສະຫະປະຊາຊາດເລືອກຕັ້ງສະພາສິດທິມະນຸດວາລະ 2024 - 2026 |
ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ ໃນວັນທີ 17 ຕຸລາ 2023 ນີ້, ທ່ານ ນາງ ປານີ ຢາທໍ່ຕູ້ ຮອງປະທານປະເທດ ພ້ອມດ້ວຍການນໍາຈາກສູນກາງ ກໍໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງ ໂດຍມີ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ມີຫົວໜ້າພະແນກການ ກ່ຽວຂ້ອງຂອງແຂວງ ເຂົ້າຮ່ວມ. ໂດຍທ່ານຮອງປະທານປະເທດໄດ້ເນັ້ນໃຫ້ແຂວງຈໍາປາສັກ ເອົາໃຈໃສ່ບາງບັນຫາ ເພື່ອກະກຽມຕ້ອນຮັບ ປີທ່ອງທ່ຽວລາວ 2024 ທີ່ຈະມາເຖິງ.
 |
| ທ່ານ ນາງ ປານີ ຢາທໍ່ຕູ້ ຮອງປະທານປະເທດ ພາບ : ຂປລ |
ໂອກາດນີ້, ທ່ານ ນາງ ປານີ ຢາທໍ່ຕູ້ ກໍເນັ້ນໃຫ້ການການນໍາແຂວງ ເປັນເຈົ້າການໃນການຄົ້ນຄວ້າ ແກ້ໄຂບັນຫາທີ່ສ້າງຄວາມຫຍຸ້ງຍາກ ໃຫ້ແກ່ນັກທ່ອງທ່ຽວ ໂດຍສະເພາະແມ່ນ ແກ້ໄຂບັນຫາການເກັບຄ່າ ທໍານຽມທາງ ແລະ ຄ່າບໍລິການດ້ານຕ່າງໆ ຈາກນັກທ່ອງທ່ຽວ; ໃຫ້ປະສານສົມທົບ - ຮ່ວມແຮງຮ່ວມໃຈ ກັບຜູ້ປະກອບການ ແລະ ປະຊາຊົນ ໃນການພັດທະນາການທ່ອງທ່ຽວ ໃຫ້ກາຍເປັນອຸດສະຫະກໍາການທ່ອງທ່ຽວ ທີ່ທັນສະໄໝ ເພາະວຽກງານການທ່ອງທ່ຽວ ເປັນວຽກໜຶ່ງທີ່ສໍາຄັນໃນການສ້າງລາຍໄດ້ ເພື່ອແກ້ໄຂຊີວິດການເປັນຢູ່ ຂອງປະຊາຊົນ ຍ້ອນແນວນັ້ນ ວຽກງານທີ່ຕິດພັນກັບ ການທ່ອງທ່ຽວ ຕ້ອງຫັນເປັນວິຊາຊີບຮອບດ້ານ ແລະ ຫັນເປັນທັນສະໄໝ ດ້ວຍຮູບການຕ່າງໆ ລວມທັງການຄຸ້ມຄອງ, ການໂຄສະນາການທ່ອງທ່ຽວ ກໍໃຫ້ທັນສະໄໝ, ວ່ອງໄວ ແລະ ຂະຫຍາຍໄປທົ່ວໂລກ.
ພ້ອມນີ້, ການຈັດຕັ້ງປະຕິບັດວຽກງານ ການພັດທະນາແຫລ່ງທ່ອງທ່ຽວ ຕ້ອງມີຈຸດສຸມ ແລະ ກໍານົດເປັນແຜນພັດທະນາ ໃນແຕ່ລະໄລຍະ ເຮັດໃຫ້ແຫລ່ງ ທ່ອງທ່ຽວ ມີຄຸນນະພາບ ແລະ ປະສິດທິຜົນ, ຄ່າບໍລິການກໍ່ສົມເຫດສົມຜົນ, ທຸກຄົນຍອມຮັບໄດ້; ເອົາໃຈໃສ່ຊຸກຍູ້ ການພັດທະນາແຫລ່ງທ່ອງທ່ຽວ ໃຫ້ສາມາດແຂ່ງຂັນກັບ ແຫລ່ງທ່ອງທ່ຽວ ຂອງປະເທດຕ່າງໆ ໃນອະນຸພາກພື້ນ ແລະ ໃນໂລກ.
ການພັດທະນາ ການທ່ອງທ່ຽວ ຕ້ອງໃຫ້ມີຄວາມຍືນຍົງ ຕິດພັນກັບການອະນຸລັກ ປົກປັກຮັກສາ ວັດທະນະທໍາ - ຮີດຄອງປະເພນີ ອັນດີງາມ ຂອງຊາດ, ຂອງທ້ອງຖິ່ນ ແລະ ຕິດພັນກັບການອະນຸລັກຮັກສາ ດ້ານສະພາບແວດລ້ອມ ທີ່ເອື້ອອໍານວຍໃຫ້ນັກທ່ອງທ່ຽວ ທັງມີຄວາມສະຫງົບ; ການພັດທະນາແຫລ່ງທ່ອງທ່ຽວ ໃຫ້ກາຍເປັນ ຂອງທົ່ວປວງຊົນ; ສືບຕໍ່ເສີມຂະຫຍາຍທ່າແຮງ ດ້ານການທ່ອງທ່ຽວທີ່ແຂວງມີ, ປັບປຸງ ແລະ ສົ່ງເສີມໃຫ້ດີຂຶ້ນ; ເອົາໃຈໃສ່ສ້າງສິ່ງດຶງດູດ ເພື່ອເຮັດໃຫ້ນັກທ່ອງທ່ຽວ ເຂົ້າມາທ່ຽວຊົມ ນັບມື້ ຫລາຍຂຶ້ນ; ໜ້າວຽກຕ່າງໆ ຕ້ອງກໍານົດເປົ້າໝາຍພັດທະນາ ລວມທັງການກໍານົດຜະລິດຕະພັນ ການທ່ອງທ່ຽວໃນແຕ່ລະເຂດ ໃຫ້ລະອຽດຈະແຈ້ງ.
ເອົາໃຈໃສ່ພັດທະນາ ບຸກຄະລາກອນ ທີ່ຮັບໃຊ້ໃນ ວຽກງານ ການບໍລິການດ້ານການທ່ອງທ່ຽວ, ພາກລັດຕ້ອງເປັນເຈົ້່າການ ແລະ ອໍານວຍຄວາມສະດວກ ໃນການຄຸ້ມຄອງ ໂດຍສະເພາະ ດ້ານລາຄາໂຮງແຮມ, ອາຫານ ແລະ ເຄື່ອງດື່ມ ຕ້ອງມີນິຕິກໍາຮອງຮັບຄັກແນ່. ນອກນີ້, ກໍໃຫ້ມີສະຖາບັນ ສໍາລັບຝຶກອົບຮົມບຸກຄະລາກອນ ດ້ານການທ່ອງທ່ຽວ, ພະນັກງານນໍາທ່ຽວ ເພື່ອໃຫ້ເຂົາເຈົ້າມີຄວາມຮູ້ຮອບດ້ານ, ມີຫລັກໝັ້ນ ການເມືອງ, ສາມາດກໍາແໜ້ນແນວທາງ ນະໂຍບາຍຂອງພັກ, ລະບຽບກົດໝາຍ ແລະ ແຜນພັດທະນາ ເສດຖະກິດ - ສັງຄົມຂອງລັດ ທີ່ກໍານົດອອກໃນແຕ່ລະໄລຍະ, ສ້າງພະນັກງານນໍາທ່ຽວ ໃຫ້ເປັນທັງໂຄສະນາເຜີຍແຜ່ ແນວທາງນະໂຍບາຍຂອງພັກ - ລັດ ປະກອບສ່ວນເຂົ້າໃນ ການປົກປັກຮັກສາ ແລະ ສ້າງສາ ພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງຂຶ້ນໄປເລື້ອຍໆ.
ໃນໂອກາດດຽວກັນ, ທ່ານ ວັນນະໄຊ ຊາດຕະກຸນ ຫົວໜ້າພະແນກ ຖວທ ແຂວງຈໍາປາສັກ ໄດ້ລາຍງານຫຍໍ້ກ່ຽວການພັດທະ ນາວຽກງານການທ່ອງທ່ຽວຂອງແຂວງ ໃນ 9 ເດືອນ ປີ 2023 ເຊິ່ງຍົກໃຫ້ເຫັນຜົນງານດ້ານດີ, ສະພາບບັນຫາ ແລະ ຂໍ້ຫຍຸ້ງຍາກ ທີ່ຕິດພັນກັບວຽກງານ ການທ່ອງທ່ຽວໃນໄລຍະຜ່ານມາ. ພ້ອມນີ້, ກໍໄດ້ລາຍງານແຜນວຽກຈຸດສຸມໃນ 3 ເດືອນທ້າຍປີ 2023 ແລະ ການກະກຽມຄວາມພ້ອມ ໃນການຈັດຕັ້ງປະຕິບັດກິດຈະກຳ ປີທ່ອງທ່ຽວລາວ 2024 ຢູ່ແຂວງຈຳປາສັກ ເປັນຕົ້ນ ແມ່ນການກະກຽມ ດ້ານນິຕິກໍາ, ການປັບປຸງສິ່ງອໍານວຍຄວາມສະດວກ ດ້ານການທ່ອງທ່ຽວ.
ພ້ອມນີ້, ການນໍາພະແນກການທີ່ກ່ຽວຂ້ອງຂອງແຂວງ ກໍໄດ້ລາຍງານເພີ່ມເຕີມກ່ຽວ ກັບການກະກຽມດ້ານພາຫະນະ ເພື່ອຮອງຮັບນັກທ່ອງທ່ຽວ ແລະ ການກໍ່ສ້າງເສັ້ນທາງ ເຂົ້າຫາ ແຫລ່ງ ທ່ອງທ່ຽວ, ການຊຸກຍູ້ການຜະລິດສິນຄ້າພາຍໃນ ເພື່ອທົດແທນການນໍາເຂົ້າ, ການຊຸກຍູ້ສົ່ງເສີມ ການຜະລິດສິນຄ້າໜຶ່ງເມືອງ ໜຶ່ງຜະລິດຕະພັນ ເພື່ອເປັນເຄື່ອງທີ່ລະນຶກຕ້ອນຮັບນັກ ທ່ອງທ່ຽວ, ການຄຸ້ມຄອງລາຄາສິນຄ້າ ແລະ ຄ່າບໍລິການພາຍໃນແຂວງ ເຊິ່ງໄດ້ມີການຕິດຕາມກວດກາ ຢ່າງເປັນປົກກະຕິ ແລະ ຕໍ່ເນື່ອງ, ການຈັດງານວາງສະແດງ-ຈໍາໜ່າຍ ແລະ ຊື້-ຂາຍສິນຄ້າ, ການເກັບຄ່າທໍານຽມ, ຄ່າວີຊາ ແລະ ຄ່າບໍລິການຕ່າງໆພາຍໃນດ່ານ, ການຍາດແຍ່ງການລົງທຶນ ແລະ ການຈັດສັນງົບປະມານ ເພື່ອຮັບໃຊ້ໃຫ້ແກ່ ການພັດທະນາວຽກງານ ການທ່ອງທ່ຽວ.
ດີງເລື້ອງ
