ເຂົ້າຮ່ວມພິທີມີ ສະຫາຍ ບຸນຄົງ ຫຼ້າຈຽມພອນ ເລຂາຄະນະພັກແຂວງ, ເຈົ້າແຂວງ ອຸດົມໄຊ; ທ່ານເອກອັກຄະລັດຖະທູດ ຫວຽດນາມ ປະຈຳລາວ ຫງວຽນບ໋າຮູ່ງ; ການນຳແຂວງ ແລະ ຜູ້ຕາງໜ້າບັນດາພະແນກ, ຄະນະ ແລະ ຂະແໜງການທີ່ກ່ຽວຂ້ອງຂອງແຂວງອຸດົມໄຊ; ຜູ້ຕາງໜ້າຄະນະປະຕິບັດງານພິເສດ ແລະ ບໍລິສັດຮ່ວມມືສາກົນ 705, ທະຫານເຂດ 2, ກະຊວງປ້ອງກັນປະເທດຫວຽດນາມ; ຜູ້ຕາງໜ້າສະມາຄົມຊາວຫວຽດນາມຢູ່ລາວ, ບັນດາວິສາຫະກິດຫວຽດນາມ ຢູ່ລາວ ກັບປະຊາຄົມຊາວຫວຽດນາມ ອາໄສຢູ່ແຂວງ ອຸດົມໄຊ ຈຳນວນໜຶ່ງ.
 |
ພິທີວາງສີລາລຶກຈັດຂຶ້ນຢູ່ ແຂວງອຸດົມໄຊ. (ພາບ: ຫາຍຕຽນ) |
ກ່າວຄຳເຫັນທີ່ພິທີ, ທ່ານເອກອັກຄະລັດຖະທູດ ຫວຽດນາມ ປະຈຳລາວ ຫງວຽນບ໋າຮູ່ງ, ເນັ້ນໜັກວ່າ: ໂຄງການກໍ່ສ້າງໂຮງຮຽນສອງພາສາ ລາວ - ຫວຽດນາມ ແຂວງ ອຸດົມໄຊ ແມ່ນກິດຈະກຳທີ່ມີຄວາມໝາຍ, ທັງສະແດງການຮັກສາຈຸດຄວາມງາມດ້ານວັດທະນະທຳຂອງຊາວ ຫວຽດນາມ ຢູ່ເຂດດິນແດນຂອງລາວ, ທັງປະກອບສ່ວນຖ່າຍທອດຄວາມຮູ້ດ້ານວັດທະນະທຳ, ດ້ານພາສາຫວຽດ ໃຫ້ແກ່ລູກຫຼານຊາວຫວຽດນາມ ໃນບໍລິເວນແຂວງ, ກໍ່ຄືຊາວລາວ ທີ່ຕ້ອງການຮຽນພາສາຫວຽດ, ພ້ອມທັງສະແດງນ້ຳໃຈມິດຕະພາບແບບພິເສດ, ບໍລິສຸດຜຸດຜ່ອງລະຫວ່າງສອງປະເທດ ຫວຽດນາມ - ລາວ.
ສ່ວນຝ່າຍລາວ, ທ່ານ ບຸນຄົງ ຫຼ້າຈຽມພອນ, ເລຂາຄະນະພັກແຂວງ, ເຈົ້າແຂວງ ອຸດົມໄຊ ໃຫ້ຮູ້ວ່າ: ໂຄງການກໍ່ສ້າງໂຮງຮຽນສອງພາສາ ລາວ - ຫວຽດນາມ ແຂວງ ອຸດົມໄຊ ແມ່ນສັນຍາລັກແຫ່ງການຮ່ວມມືລະຫວ່າງແຂວງ ອຸດົມໄຊ ກັບ ຫວຽດນາມ ເວົ້າລວມ ແລະ ກັບສະມາຄົມຊາວ ຫວຽດນາມ ຢູ່ແຂວງ ເວົ້າສະເພາະ. ເມື່ອນຳເຂົ້າເຄື່ອນໄຫວ, ໂຮງຮຽນບໍ່ພຽງແຕ່ແມ່ນບ່ອນບຳລຸງສ້າງໃຫ້ລູກຫຼານຊາວຫວຽດນາມ ແລະ ຊາວລາວ ຢູ່ແຂວງເທົ່ານັ້ນ, ຫາກຍັງແມ່ນບ່ອນເພື່ອໃຫ້ປະຊາຊົນທ້ອງຖິ່ນຢູ່ພາກເໜືອຂອງລາວ ທີ່ມີຄວາມຕ້ອງການຮຽນພາສາຫວຽດ ຫຼື ກຽມພາສາເພື່ອໄປຮຽນຢູ່ ຫວຽດນາມ ອີກດ້ວຍ.
ສະຫາຍເລຂາຄະນະພັກແຂວງ, ເຈົ້າແຂວງ ອຸດົມໄຊ ຮຽກຮ້ອງການນຳບັນດາພະແນກ, ຄະນະ, ຂະແໜງການທີ່ກ່ຽວຂ້ອງຂອງແຂວງອຸດົມໄຊ ສືບຕໍ່ໜູນຊ່ວຍສະມາຄົມຊາວຫວຽດນາມ ຢູ່ແຂວງອຸດົມໄຊ ສຳເລັດການກໍ່ສ້າງໂຮງຮຽນຕາມຄາດໝາຍໂດຍໄວ.
ໂຄງການໂຮງຮຽນສອງພາສາລາວ-ຫວຽດນາມ ຢູ່ແຂວງອຸດົມໄຊ ມີຍອດມູນຄ່າປະມານ 30 ຕື້ດົ່ງ. ໂດຍສະເພາະ ໄລຍະທີ 1 ຈະສຳເລັດການກໍ່ສ້າງໂຄງຮ່າງຫໍພັກຄູສອນ ແລະ ນັກຮຽນ, ມີຄວາມຍາວ 46,8 ແມັດ, ກວ້າງ 9,7 ແມັດ. ອາຄານມີໂຄງສ້າງ 3 ຊັ້ນ, ລວມທັງເຮືອນຄົວ, ຫ້ອງນ້ຳ ແລະ ຫ້ອງພັກ.
ເມື່ອສ້າງສຳເລັດແລ້ວ, ໂຮງຮຽນສອງພາສາລາວ-ຫວຽດນາມ ແຂວງອຸດົມໄຊ ຈະເປັນໂຮງຮຽນສອງພາສາລາວ-ຫວຽດນາມ ແຫ່ງທີສອງຢູ່ລາວ, ພ້ອມກັບໂຮງຮຽນສອງພາສາລາວ-ຫວຽດນາມ ຫງວຽນຢູ ຢູ່ນະຄອນຫຼວງວຽງຈັນ.
ດີງເລື້ອງ
