| ບັນດາການເຄື່ອນໄຫວຢູ່ນອກກອງປະຊຸມ AMM-56 | |
| ຫວຽດນາມ ຊຸກຍູ້ຄວາມສາມັກຄີ ແລະ ຄວາມເຫັນດີເຫັນພ້ອມໃນອາຊຽນ |
ຕອນເຊົ້າວັນທີ 11 ກໍລະກົດ, ທ່ານລັດຖະມົນຕີການຕ່າງປະເທດ ຫວຽດນາມ ບຸ່ຍແທງເຊີນ ໄດ້ມີການພົບປະກັບທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ລາວ ສະເຫຼີມໄຊ ກົມມະສິດ ເນື່ອງໃນໂອກາດເຂົ້າຮ່ວມກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 56 (AMM-56) ແລະ ບັນດາກອງປະຊຸມທີ່ກ່ຽວຂ້ອງຢູ່ນະຄອນຫຼວງ Jakarta (ອິນໂດເນເຊຍ).
ທີ່ການພົບປະ, ສອງຝ່າຍໄດ້ສະແດງຄວາມເພິ່ງພໍໃຈຕໍ່ການພັດທະນາອັນດີງາມຂອງການພົວພັນຫວຽດນາມ - ລາວ, ພິເສດແມ່ນການແລກປ່ຽນຄະນະຜູ້ແທນ ແລະ ການພົວພັນຂັ້ນສູງ, ຊຸກຍູ້ການຜັນຂະຫຍາຍບັນດາໂຄງການຮ່ວມມືສຳຄັນທີ່ສຸດໃນໄລຍະມໍ່ໆມານີ້ ແມ່ນການນຳສະໜາມບິນໜອງຄ້າງ (ຢູ່ແຂວງຫົວພັນ, ພາກຕາເວັນອອກສ່ຽງເໜືອຂອງລາວ) ເຂົ້າສູ່ການເຄື່ອນໄຫວ, ປະກອບສ່ວນຊຸກຍູ້ການຮ່ວມມືດ້ານການທ່ອງທ່ຽວ, ທັງເປັນການອໍານວຍຄວາມສະດວກໃຫ້ແກ່ການເດີນທາງຂອງປະຊາຊົນ.
 |
ລັດຖະມົນຕີທັງສອງທ່ານ ໄດ້ຕີລາຄາສູງການຮ່ວມມືລະຫວ່າງກະຊວງການຕ່າງປະເທດຫວຽດນາມ ແລະ ກະຊວງການຕ່າງປະເທດລາວ; ສະແດງຄວາມເພິ່ງພໍໃຈຕໍ່ໝາກຜົນອັນຕັ້ງໜ້າຂອງກອງປະຊຸມປຶກສາຫາລືດ້ານການເມືອງຂອງຮອງລັດຖະມົນຕີການຕ່າງປະເທດ ຄັ້ງທີ 8 (ເຊິ່ງໄດ້ດຳເນີນຢູ່ລາວ ໃນເດືອນມິຖຸນາ 2023); ຢືນຢັນຈະສົມທົບກັນຊຸກຍູ້ ແລະ ຈັດຕັ້ງປະຕິບັດບັນດາຂົງເຂດຮ່ວມມືຢ່າງມີປະສິດທິຜົນ, ພິເສດແມ່ນການທູດເສດຖະກິດ ໃນສະພາບການເສດຖະກິດພາກພື້ນ ແລະ ໂລກທີ່ພວມຜັນແປຫຼາຍຢ່າງ.
2 ຝ່າຍເຫັນດີເປັນເອກະພາບ ໃນການສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ, ພິເສດແມ່ນຢູ່ບັນດາກົນໄກຮ່ວມມື ອາຊຽນ ແລະ ອະນຸພາກພື້ນແມ່ນ້ຳຂອງ; ແລກປ່ຽນ ແລະ ປຶກສາຫາລືກ່ຽວກັບບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈຢ່າງເປັນປະຈຳ.
ຄຳຮຸ່ງ
