| ປີທ່ອງທ່ຽວແຫ່ງຊາດ 2023 - ມຸ່ງສູ່ການທ່ອງທ່ຽວສີຂຽວ | |
| ພິທີໄຂປີທ່ອງທ່ຽວແຫ່ງຊາດ-ກວາງນາມ 2022 |
ແຂວງໄຊສົມບູນ ພາກເໜືອຂອງລາວ ໄດ້ອອກໃບອະນຸຍາດໃຫ້ບໍລິສັດທ້ອງຖິ່ນ ຜັນຂະຫຍາຍການສ້າງພື້ນຖານໂຄງລ່າງຮັບໃຊ້ໃຫ້ແກ່ນັກທ່ອງທ່ຽວ, ເຊັ່ນ: ໂຮງແຮມ, ຮ້ານອາຫານ, ສະປາ ແລະ ການບໍລິການທີ່ສະດວກອື່ນໆຈໍານວນຫຼາຍ. ເຈົ້າໜ້າທີ່ແຂວງດັ່ງກ່າວ ໃຫ້ຮູ້ວ່າ: ເປົ້າໝາຍຂອງໂຄງການແມ່ນຍົກລະດັບພື້ນຖານໂຄງລ່າງ, ຮັບປະກັນຄຸນນະພາບຂອງລະບົບການບໍລິການເພື່ອຮັບໃຊ້ນັກທ່ອງທ່ຽວທີ່ເຂົ້າມາແຂວງ; ພ້ອມກັນນັ້ນ ກໍ່ສ້າງວຽກເຮັດງານທຳ, ເພີ່ມລາຍຮັບ ແລະ ຍົກລະດັບຊີວິດການເປັນຢູ່ຂອງປະຊາຊົນທ້ອງຖິ່ນ. ສິ່ງອໍານວຍຄວາມສະດວກໃຫມ່ຈະເປັນມິດກັບສິ່ງແວດລ້ອມ ແລະ ຈະບໍ່ສົ່ງຜົນກະທົບຕໍ່ຄວາມງາມຂອງທໍາມະຊາດ.
 |
ໃນຂະນະດຽວກັນ, ແຂວງຫຼວງພະບາງ ກໍ່ແມ່ນສະຖານທີ່ທີ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເປັນຈຳນວນຫຼວງຫຼາຍ ດ້ວຍບັນດາມໍລະດົກວັດທະນະທຳ, ປະຫວັດສາດ, ຖ້ຳຫີນທີ່ອຸດົມສົມບູນ, ກໍ່ໄດ້ຕັ້ງໜ້າຜັນຂະຫຍາຍແຜນການຕ້ອນຮັບປີທ່ອງທ່ຽວລາວ 2024.
ທ່ານນາງ ສຸດາພອນ ຄົມທະວົງ - ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງຫຼວງພະບາງ ໃຫ້ຮູ້ວ່າ: ແຂວງ ຖືວ່າການທ່ອງທ່ຽວເປັນເສົາຄ້ຳຂອງການພັດທະນາເສດຖະກິດ-ສັງຄົມຂອງເຂດ. ໃນ 5 ເດືອນຕົ້ນປີ 2023, ແຂວງ ໄດ້ຕ້ອນຮັບນັກທ່ອງທ່ຽວສາກົນ 437.374 ເທື່ອຄົນມາຢ້ຽມຢາມ, ໃນນັ້ນນັກທ່ອງທ່ຽວຕົ້ນຕໍແມ່ນມາຈາກໄທ, ຈີນ, ຫວຽດນາມ, ອາເມລິກາ ແລະ ບັນດາປະເທດເອີລົບ.
ປະຈຸບັນ, ແຂວງຫຼວງພະບາງ ພວມປັບປຸງຄຸນນະພາບ, ກໍ່ສ້າງ ແລະ ຂະຫຍາຍສະຖານທີ່ທ່ອງທ່ຽວຂະໜາດນ້ອຍ ແລະ ກາງ ໃຫ້ມີພື້ນຖານໂຄງລ່າງທີ່ທັນສະໄໝ ເພື່ອຮັບໃຊ້ນັກທ່ອງທ່ຽວ. ນອກຈາກນັ້ນ, ແຂວງຫຼວງພະບາງ ຍັງຈະຈັດຕັ້ງກິດຈະກໍາສົ່ງເສີມການທ່ອງທ່ຽວ, ຈັດງານບຸນຕ່າງໆ ແລະ ແນະນຳວັດທະນະທໍາ ແລະ ອາຫານການກິນຂອງແຂວງ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ຫຼາຍຂຶ້ນ.
ຄຳຮຸ່ງ
