ຫວຽດນາມ ສະໜັບສະໜູນການອະນຸລັກຮັກສາ ແລະ ນຳໃຊ້ທະເລ ແລະ ມະຫາສະໝຸດຢ່າງຍືນຍົງ

ວັນ​ທີ 21 ມິຖຸນາ​ນີ້, ຢູ່​ສຳນັກງານອົງການການ​ສຶກສາ, ວິທະຍາສາດ ​ແລະ ວັດທະນະທຳ​ຂອງສະຫະ​ປະຊາ​ຊາດ (UNESCO), ທີ່ປາຣີ, ຄະນະ​ຜູ້​ແທນ​ຫວຽດນາມ ​ໄດ້​ເຂົ້າ​ຮ່ວມ​ກອງ​ປະຊຸມ​ ​ຄັ້ງ​ທີ 32 ຂອງ​ ສະມັດຊາໃຫຍ່ຄະນະກຳມະການມະຫາສະໝຸດວິທະຍາລະຫວ່າງລັດຖະບານ (ioc) ຢູ່ນະຄອນຫລວງປາຣີ.

ຄະນະ​ຫວຽດນາມ ທີ່​ກອງ​ປະຊຸມ​ຄັ້ງ​ທີ 32 ຂອງ​ຄະນະ​ກຳມະການ​ມະຫາ​ສະໝຸດ​ສະຫະ​ປະຊາ​ຊາດ.

ກ່າວຄຳປາໄສທີ່​ກອງປະຊຸມ ຄົບຄະນະ, ຫົວໜ້າ​ຄະນະ, ທ່ານຮອງ​ສາດສະດາຈານ, ປາລິນຍາເອກ ນາງ ດາວຫວຽດຮ່າ ຕີລາຄາສູງສຸດບົດບາດຂອງ IOC ດ້ວຍຖານະທີ່ເປັນອົງການປະສານງານຫຼັກຂອງສະຫະປະຊາຊາດກ່ຽວກັບບັນຫາມະຫາສະໝຸດວິທະຍາ. ທ່ານນາງ​ ດາວຫວຽດຮ່າ ຢືນຢັນ​ວ່າ ຫວຽດນາມ ຍາມ​ໃດ​ກໍ່​ສະໜັບສະໜູນ IOC ປັບປຸງບົດບາດ​ຂອງ​ຕົນ​ໃນ​ການ​ຊຸກຍູ້​ການ​ຮ່ວມ​ມື​ສາກົນ​ເພື່ອ​ອະນຸລັກ​ ​ແລະ ນຳ​ໃຊ້​ທະ​ເລ ແລະ ມະຫາ​ສະໝຸດຢ່າງຍືນຍົງ​. ​ໃນ​ຖານະ​ທີ່​ເປັນ​ສະມາຊິກ​ສະພາ​ປະຕິບັດ UNESCO, ຫວຽດນາມ ​ໄດ້​ຮ່ວມ​ອຸປະຖຳຮ່າງມະຕິຂອງ UNESCO ກ່ຽວ​ກັບການເພີ່ມທະວີແຫຼ່ງກຳລັງທີ່ຍືນຍົງກວ່າ​​ໃຫ້​ແກ່​ການ​ເຄື່ອນ​ໄຫວ​ຂອງ IOC.

ທ່ານຮອງ​ສາດສະດາຈານ, ປາຮິນຍາເອກ ນາງ ດ່າວ​ຫວຽດ​ຮ່າ ​ເນັ້ນ​ໜັກ​ວ່າ ຫວຽດນາມ ຖື​ເປັນ​ສຳຄັນ​ການ​ພັດທະນາ ​ແລະ ​ຮ່ວມ​ມື​ສາກົນ​ໃນດ້ານ​ວິທະຍາສາດ ​ແລະ ​ເຕັກ​ໂນ​ໂລ​ຊີ​ທະ​ເລ; ຖືນັ້ນ​​ແມ່ນ​ໜຶ່ງ​ໃນ​ບັນດາ​ວິທີການແກ້ໄຂ​ທີ່​ສຳຄັນ​ເພື່ອ​ປະຕິບັດ​ຍຸດ​ທະ​ສາດ​ພັດທະນາ​​ຂອງ​ເສດຖະກິດ​ທະ​ເລ ​ຫວຽດນາມ ຮອດ​ປີ 2030, ວິ​ໄສ​ທັດ​ຮອດ​ປີ 2045. ພ້ອມ​ທັງ​ແບ່ງປັນ​ຄວາມ​ມານະ​ພະຍາຍາມ​ຂອງ​ຫວຽດນາມ ​ໃນ​ການ​ພັດທະນາ​ເສດຖະກິດ​ມະຫາ​ສະໝຸດ​ທີ່ຍືນຍົງ ​ແລະ ຮັບມືກັບບັນດາສິ່ງ​ທ້າ​ທາຍ​ທີ່​ກ່ຽວຂ້ອງ​ເຖິງ​ມະຫາ​ສະໝຸດ; ທ່ານ ນາງ​ ດາວຫວຽດຮ່າ ​ໄດ້​ແຈ້ງ​ໃຫ້​ຊາບ​ກ່ຽວ​ກັບ​ບັນດາ​ໂຄງການ​ຮ່ວມ​ມື​ໃນ​ຂອບ​ເຂດ​ອະນຸ​ກຳມະການ IOC ພາກພື້ນປາຊີ​ຟິກຕາ​ເວັນ​ຕົກ - IOC/WESTPAC ຢູ່ ຫວຽດນາມ. ຫົວໜ້າ​ຄະນະ​ ​ຫວຽດນາມ ຮຽກຮ້ອງ​ບັນດາ​ປະ​ເທດ​ເພີ່ມ​ທະວີ​ການ​ຮ່ວມ​ມື​ສາກົນ​ທຸກ​ຂັ້ນ, ​ເອົາ​ໃຈ​ໃສ່​ເຖິງ​ຄວາມຕ້ອງການ​ຂອງ​ບັນດາ​ປະ​ເທດ​ພວມ​ພັດທະນາ, ພິ​ເສດ​ແມ່ນ​ບັນດາ​ປະ​ເທດ​ແຄມ​ທະ​ເລ ​ທີມີຄວາມສ່ຽງງ່າຍ​.

ກອງປະຊຸມໄດ້ດຳເນີນໃນສະພາບການທີ່ປະຊາຄົມໂລກທີ່ນັບມື້ນັບມີຄວາມສົນໃຈໃນການຊຸກຍູ້ຮ່ວມມືສາກົນທາງທະເລທີ່ຫຼາກຫຼາຍ ແລະ ແທດຈິງ, ມີຄວາມພະຍາຍາເພື່ອບັນລຸເປົ້າໝາຍແບບຍືນຍົງຂອງສະຫະປະຊາຊາດ ສະ​ຫະ​ປະ​ຊາ​ຊາດ,ໃນນັ້ນມີເປົ້າໝາຍຂໍ້ 14 ທີ່ກ່ຽວກັບການອະນຸລັກຮັກສາ ແລະ ການນຳໃຊ້ທະເລ ແລະ ມະຫາສະໝຸດແບບຍືນຍົງ. ບັນດາຄວາມຄືບໜ້າໃໝ່ຫວ່າງມໍ່ໆມານີ້ ອາດເວົ້າເຖິງການຮັບຮອງເອົາເອກະສານສຳຄັນກ່ຽວກັບການອະນຸລັກ ແລະ ການນຳໃຊ້ຊີວະນາໆພັນນອກຂອບເຂດສິດອຳນາດສານແຫ່ງຊາດ ແບບຍືນຍົງ, ຂະບວນການເຈລະຈາຂໍ້ຕົກລົງທົ່ວໂລກກ່ຽວກັບມົນລະພິດປຼາສຕິກ ລວມທັງບັນຫາຂີ້ເຫຍື້ອປຼາສຕິກໃນມະຫາສະໝຸດ...

ຄາດວ່າ, ໃນການປະຊຸມ, ບັນດາແຂກເຂົ້າຮ່ວມ ຈະສືບຕໍ່ປືກສາຫາລືກ່ຽວກັບການຈັດຕັ້ງປະຕິບັດບັນດາໂຄງການ ແລະ ຂໍ້ລິເລີ່ມໃຫຍ່ໃນໄລຍະທີ່ຈະມາເຖິງນີ້ເຊັ່ນ: ທົດສະວັດວິທະຍາສາດມະຫາສະໝຸດເພື່ອການພັດທະນາແບບຍືນຍົງ 2021-2030, ບົດລາຍງານສະພາບການມະຫາສະໝຸດ, ລະບົບການສັງເກດມະຫາສະໝຸດທົ່ວໂລກ, ຍຸດທະສາດການສ້າງກຳລັງແຮງ, ການປະກອບສ່ວນຂອງ (ioc) ເຂົ້າໃນການປົກຄອງມະຫາສະໝຸດຂອງສະຫະປະຊາຊາດ... ກອງປະຊຸມຈະດຳເນີນການເລືອກຕັ້ງປະທານ, ຮອງປະທານ ແລະ ສະມາຊິກສະພາບໍລິຫານ IOC ໃນວັນທີ 28 ມີຖຸນາ ທີ່ຈະມາເຖິງນີ້.