 |
| ພາບປະກອບ: TTXVN |
ວັນທີ 10 ພຶດສະພາ, ໜັງສືພິມ Vientiane Times ໄດ້ລົງຂ່າວວ່າ ລາວໄດ້ຮຽກຮ້ອງໃຫ້ບັນດາປະເທດອາຊຽນ ແລະ ບັນດາຝ່າຍທີ່ກ່ຽວຂ້ອງໃນພາກພື້ນເພີ່ມທະວີການຮ່ວມມືເພື່ອລົບລ້າງຄວາມອຶດຫິວຫຼຸດຜ່ອນຄວາມທຸກຍາກ ແລະ ຄ້ຳປະກັນຄວາມໝັ້ນຄົງດ້ານສະບຽງອາຫານ.
ບົດຂຽນໃຫ້ຮູ້ວ່າ ເມື່ອກ່າວຄຳເຫັນທີ່ກອງປະຊຸມາະພາປະຊາຄົມວັດທະນະທຳ - ສັງຄົມ ອາຊຽນ (ASCC) ຄັ້ງທີ 29 ທີ່ໄດ້ຈັດຂຶ້ນຢູ່ Bali ປະເທດ ອິນໂດເນເຊຍ ເມື່ອຫວ່າງມໍ່ໆມານີ້, ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ການທ່ອງທ່ຽວລາວ ໃຫ້ຮູ້ວ່າ ການແກ້ໄຂຊ່ອງຫວ່າງ ແລະ ຊອກຫາວິທີການລົບລ້າງຄວາມອຶດຫິວຫຼຸດຜ່ອນຄວາມທຸກຍາກໃຫ້ແກ່ຄົນທຸກຍາກ ບໍ່ແມ່ນໜ້າທີ່ງ່າຍດາຍ ສຳລັບອົງການໃດໜຶ່ງ. ທ່ານນາງ ສວນສະຫວັນ ວິຍະເກດ ຮຽກຮ້ອງໃຫ້ບັນດາອົງການຈັດຕັ້ງສາກົນ ກໍ່ຄືພາກພື້ນ ແລະ ບັນດາຝ່າຍທີ່ກ່ຽວຂ້ອງ ຊຸກຍູ້ຄວາມມານະພະຍາຍາມທີ່ມີຢູ່ແລ້ວ ແລະ ເພີ່ມທະວີການລົງທຶນກ່ຽວກັບແຫຼ່ງທຶນ ກໍ່ຄືແຫຼ່ງຊັບພະຍາກອນມະນຸດ, ທ່ານນາງ ກໍ່ຢັ້ງຢືນວ່າ ສິ່ງນີ້ຈະສ້າງເງື່ອນໄຂໃນການລົບລ້າງຄວາມອຶດຫິວຫຼຸດຜ່ອນຄວາມທຸກຍາກ ແລະ ຮັບປະກັນຄວາມໝັ້ນຄົງດ້ານສະບຽງອາຫານໃນພາກພື້ນ.
ທ່ານນາງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ການທ່ອງທ່ຽວ ລາວ ໃຫ້ຮູ້ວ່າ ປະເທດນີ້ພ້ອມແລ້ວທີ່ຈະຮ່ວມມືຢ່າງແໜ້ນແຟ້ນກັບ ອິນໂດເນເຊຍ ແລະ ບັນດາປະເທດສະມາຊິກ ເພື່ອປະຕິບັດບັນດາບຸລິມະສິດຂອງ ອາຊຽນ ແລະ ຮັບປະກັນຜົນສຳເລັດຂອງ ອາຊຽນ ໃນປີ 2023. ທ່ານນາງຖືວ່າ ສິ່ງນີ້ຈະນຳມາເຊິ່ງຜົນປະໂຫຍດໃຫ້ແກ່ພາກພື້ນ ແລະ ແມ່ນພື້ນຖານໃຫ້ແກ່ບົດບາດເປັນປະທານອາຊຽນ ຂອງລາວ ໃນປີ 2024.
ບຸນຄົງ
