ທ່ານພົນໂທ ໂຕເລິມ, ກຳມະການກົມການເມືອງ, ລັດຖະມົນຕີກະຊວງຕຳຫຼວດ ຫວຽດນາມ ໄດ້ເປັນປະທານການພົບປະ. ທ່ານລັດຖະມົນຕີການຕ່າງປະເທດ ຫວຽດນາມ ບຸຍແທັງເຊີນ; ບັນດາເອກອັກຄະລັດຖະທູດ, ຫົວໜ້າສະຖານກົງສຸນໃຫຍ່, ຫົວໜ້າຫ້ອງການຜູ້ຕາງໜ້າຫວຽດນາມ ປະຈຳຕ່າງປະເທດ… ໄດ້ເຂົ້າຮ່ວມ.
ໂດຍຕາງໜ້າໃຫ້ຄະນະພັກຕຳຫຼວດສູນກາງ, ການນຳກະຊວງຕຳຫຼວດ, ທ່ານລັດຖະມົນຕີ ໂຕເລິມ ໄດ້ສະແດງຄວາມຊົມເຊີຍບັນດາເອກອັກຄະລັດຖະທູດ, ຫົວໜ້າອົງການຜູ້ຕາງໜ້າຫວຽດນາມ ປະຈຳຕ່າງປະເທດ ໂດຍພັກ, ລັດ, ກະຊວງການຕ່າງປະເທດ ແລະ ປະຊາຊົນ ມອບໝາຍໜ້າທີ່ຮັບຜິດຊອບໃຫ້ເປັນຕົວແທນຂອງຫວຽດນາມ ປະຈຳຢູ່ຕ່າງປະເທດ; ທ່ານກໍ່ອວຍພອນໃຫ້ບັນດາສະຫາຍປະຕິບັດສຳເລັດໜ້າທີ່ໃນອາຍຸການປະຕິບັດງານຂອງຕົນ.
 |
| ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມ ແລະ ທ່ານລັດຖະມົນຕີກະຊວງການຕ່າງປະເທດ ຫວຽດນາມ ບຸຍແທັງເຊີນ ພ້ອມກັບບັນດາຜູ້ຕາງໜ້າຫວຽດນາມ ປະຈຳຕ່າງປະເທດ (ພາບ: TTXVN) |
ທ່ານລັດຖະມົນຕີ ໂຕເລິມ ເຊື່ອໝັ້ນວ່າ ທ່ານເອກອັກຄະລັດຖະທູດ, ຫົວໜ້າອົງການຜູ້ຕາງໜ້າຫວຽດນາມ ປະຈຳຕ່າງປະເທດ ຈະເສີມຂະຫຍາຍບົດບາດໜ້າທີ່ຄວາມຮັບຜິດຊອບ, ເປັນຂົວຕໍ່ພັດທະນາການພົວພັນຕ່າງປະເທດຂອງ ຫວຽດນາມ, ຍົກສູງຖານະບົດບາດຂອງ ຫວຽດນາມ ບົນເວທີສາກົນ ແລະ ແມ່ນບ່ອນອີງຢ່າງໝັ້ນແກ່ນຂອງປະຊາຄົມຊາວຫວຽດນາມພວມອາໄສ ຢູ່ຕ່າງປະເທດ ໄດ້ເປັນຢ່າງດີ.
ໂດຍອີງຕາມໝາກຜົນແຫ່ງການພົວພັນປະສານງານລະຫວ່າງກະຊວງຕຳຫຼວດ ແລະ ກະຊວງການຕ່າງປະເທດ, ທ່ານລັດຖະມົນຕີ ໂຕເລິມ ໃຫ້ຂໍ້ສັງເກດວ່າ: ກຳລັງຕຳຫຼວດປະຊາຊົນໄດ້ສົມທົບກັບຂະແໜງການຕ່າງປະເທດຢ່າງແໜ້ນແຟ້ນ ເພື່ອຜັນຂະຫຍາຍໜ້າທີ່ການຕ່າງປະເທດຢ່າງມີປະສິດທິຜົນ. ສອງກະຊວງໄດ້ສົມທົບກັນເປັນເສນາທິການໃຫ້ແກ່ພັກ ແລະ ລັດໃນຫຼາຍນະໂຍບາຍ ແລະ ແນວທາງການຕ່າງປະເທດທີ່ເໝາະສົມ, ນຳປະເທດຫວຽດນາມ ເຂົ້າສູ່ການເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ, ພ້ອມທັງປະກອບສ່ວນຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ ແລະ ສ້າງເງື່ອນໄຂສະດວກໃຫ້ແກ່ການພັດທະນາ. ປະເທດຊາດ.
ທ່ານລັດຖະມົນຕີ ໂຕເລິມ ໄດ້ຮັບຮູ້ ແລະ ຕີລາຄາສູງຄວາມເອົາໃຈໃສ່ ແລະ ສົມທົບກັນຢ່າງແໜ້ນແຟ້ນເຊິ່ງກະຊວງການຕ່າງປະເທດໄດ້ສະຫງວນໃຫ້ແກ່ການຮ່ວມມື ແລະ ການພົວພັນສາກົນຂອງກະຊວງຕຳຫຼວດ. ທ່ານຢືນຢັນວ່າ ວຽກງານການຕ່າງປະເທດຂອງກຳລັງຕຳຫຼວດພວມສືບຕໍ່ມີການປ່ຽນແປງໃໝ່, ບັນລຸໄດ້ໝາກຜົນຫຼາຍຢ່າງ, ທ່ານລັດຖະມົນຕີປາດຖະໜາວ່າ ກະຊວງການຕ່າງປະເທດເວົ້າລວມ, ບັນດາເອກອັກຄະລັດຖະທູດ, ຫົວໜ້າອົງການຜູ້ຕາງໜ້າຫວຽດນາມ ປະຈຳຕ່າງປະເທດ ເວົ້າສະເພາະ ຈະສືບຕໍ່ເອົາໃຈໃສ່ ແລະ ຊ່ວຍກະຊວງຕຳຫຼວດເປີດກວ້າງການພົວພັນຮ່ວມມືສາກົນ, ເພີ່ມທະວີການພົວພັນກັບບັນດາອົງການປ້ອງກັນຄວາມສະຫງົບ, ອົງການປະຕິບັດກົດໝາຍຂອງປະເທດຕ່າງໆ, ອົງການຈັດຕັ້ງສາກົນ, ເວທີປາໄສສາກົນກ່ຽວກັບການປະຕິບັດກົດໝາຍ, ປ້ອງກັນ, ຕ້ານອາດຊະຍາກຳ, ປະຕິບັດກົດໝາຍ...
ຕາງໜ້າໃຫ້ການນຳກະຊວງການຕ່າງປະເທດ ແລະ ຫົວໜ້າອົງການຜູ້ຕາງໜ້າຫວຽດນາມ ປະຈຳຕ່າງປະເທດ, ທ່ານລັດຖະມົນຕີ ບຸຍແທັງເຊີນ ຂໍຂອບໃຈບັນດາການນຳກະຊວງຕຳຫຼວດ ແລະ ບັນດາກົມກອງຂອງກະຊວງຕຳຫຼວດທີ່ໄດ້ແບ່ງປັນນ້ຳໃຈຄວາມຮັກແພງ ແລະ ຄວາມເອົາໃຈໃສ່, ຊ່ວຍເຫຼືອກະຊວງການຕ່າງປະເທດໃນການປະຕິບັດສຳເລັດທຸກໜ້າທີ່ທີ່ໄດ້ຮັບມອບໝາຍ. ທ່ານລັດຖະມົນຕີ ບຸຍແທັງເຊີນ ຢືນຢັນວ່າ ວຽກງານສົມທົບ ແລະ ແລກປ່ຽນຂໍ້ມູນຂ່າວສານລະຫວ່າງກະຊວງຕຳຫຼວດ ແລະ ກະຊວງການຕ່າງປະເທດ ແມ່ນທັນການ ແລະ ມີປະສິດທິຜົນສູງທີ່ສຸດ.
ທ່ານລັດຖະມົນຕີການຕ່າງປະເທດ ໄດ້ຮັບຮູ້ ແລະ ຕີລາຄາສູງບົດບາດຂອງກຳລັງຕຳຫຼວດປະຊາຊົນຕໍ່ສັນຕິພາບ, ສະຖຽນລະພາບຂອງຊາດ ແລະ ການປະກອບສ່ວນເຂົ້າໃນການພັດທະນາການພົວພັນທາງການທູດຂອງປະເທດເຮົາໃນໄລຍະທີ່ຜ່ານມາ. ພ້ອມກັນນັ້ນ, ທ່ານລັດຖະມົນຕີ ບຸຍແທັງເຊີນ ກໍ່ເນັ້ນໜັກວ່າ: ບົດບາດ ແລະ ຄວາມໝາຍຂອງສາກົນແມ່ນສູງທີ່ສຸດ ເມື່ອກຳລັງຕຳຫຼວດປະຊາຊົນ ໄດ້ຈັດສົ່ງພະນັກງານ, ນັກຮົບເຂົ້າຮ່ວມບັນດາການເຄື່ອນໄຫວຮັກສາສັນຕິພາບຂອງ ສປຊ, ການຮ່ວມມືປ້ອງກັນຕ້ານອາດຊະຍາກຳສາກົນ, ພິເສດແມ່ນສົ່ງເຈົ້າໜ້າທີ່ເຂົ້າຮ່ວມການກູ້ໄພກູ້ຊີບຢູ່ຕວັກກີໃນຫວ່າງມໍ່ໆມານີ້.
ບຸນຄົງ
