ຕອນເຊົ້າວັນທີ 4 ມັງກອນ, ຢູ່ໂຮງຮຽນການທະຫານເຂດ 2, ກົມໃຫຍ່ເສນາທິການກອງທັບປະຊາຊົນຫວຽດນາມ ໄດ້ຈັດຕັ້ງພິທີປິດຊຸດຝຶກອົບຮົມວຽກງານການທະຫານທ້ອງຖິ່ນໃຫ້ແກ່ພະນັກງານກອງທັບປະຊາຊົນລາວ 2022.
 |
| ການນຳໂຮງຮຽນການທະຫານເຂດ 2 ມອບໃບຢັ້ງຢືນໃຫ້ແກ່ພະນັກງານ, ນັກຮົບກອງທັບປະຊາຊົນລາວ ທີ່ເຂົ້າຮ່ວມຊຸດຝຶກອົບຮົມ. ພາບ: qdnd.vn |
ໃນໄລຍະ 2 ເດືອນ, ບັນດານັກສໍາມະນາກອນໄດ້ຮ່ຳຮຽນ ແລະ ແລກປ່ຽນຫຼາຍຫົວເລື່ອງສະເພາະ ຄື: ບັນດາບັນຫາພື້ນຖານຂອງທິດສະດີລັດທິມາກ - ເລນິນ, ແນວຄິດ ໂຮ່ຈີມິນ ກ່ຽວກັບສົງຄາມ, ກອງທັບ ແລະ ການປ້ອງກັນປະເທດສັງຄົມນິຍົມ; ສະກັດກັ້ນ ແລະ ຕ້ານຍຸດທະສາດ "ການຜັນແປສັນຕິພາບ", ຈະລາຈົນ ແລະ ການໂຄ່ນລົ້ມ; ການເຊື່ອມໂຍງເຂົ້າກັບສາກົນ ແລະ ການທູດດ້ານປ້ອງກັນປະເທດຂອງຫວຽດນາມ; ພັກນຳພາ ແລະ ການຄຸ້ມຄອງລັດດ້ານປ້ອງກັນຊາດຢູ່ບັນດາກະຊວງ, ອົງການທຽບເທົ່າກະຊວງ ແລະ ທ້ອງຖິ່ນ; ບາງບັນຫາພື້ນຖານກ່ຽວກັບ ແຜນນະໂຍບາຍປ້ອງກັນຊາດຂອງຫວຽດນາມ; ບັນຫາຊົນເຜົ່າ ແລະ ສາສະໜາ; ຫັນການເຄື່ອນໄຫວຂອງທ້ອງຖິ່ນຈາກສະໄໝສັນຕິພາບມາເປັນສະໄໝສົງຄາມ; ສົມທົບກັນພັດທະນາເສດຖະກິດ, ວັດທະນະທຳ-ສັງຄົມ ຕິດພັນກັບການປັບປຸງ ປ້ອງກັນຊາດ-ປ້ອງກັນຄວາມສະຫງົບໃນຂະບວນວິວັດການຫັນປະເທດເປັນອຸດສາຫະກຳ ແລະ ທັນສະໄໝ... ນອກນີ້, ນັກສຳມະນາກອນຍັງໄດ້ໄປທັດສະນະສຶກສາຕົວຈິງ ແລະ ຢ້ຽມຢາມບັນດາກົມກອງ, ທ້ອງຖິ່ນຈຳນວນໜຶ່ງໃນບໍລິເວນທະຫານເຂດ 2.
ສິ້ນສຸດການຝຶກອົບຮົມ, ນັກສໍາມະນາກອນທັງໝົດໄດ້ສຳເລັດເນື້ອໃນໂຄງການທີ່ວາງອອກ, ໃນນັ້ນ 60% ໄດ້ຮັບການຈັດອັນດັບດີເດັ່ນ ແລະ 6 ສະຫາຍໄດ້ຮັບໃບຍ້ອງຍໍຂອງກົມໃຫຍ່ເສນາທິການກອງທັບປະຊາຊົນຫວຽດນາມ.
ບູນມີ
