| ຊາວຫວຽດນາມຢູ່ຕ່າງປະເທດນັບຮ້ອຍຄົນເຂົ້າຮ່ວມງານບຸນໃຫຍ່ຂອງຕະກຸນ ຫວູ-ຫວໍ ຫວຽດນາມ ຢູ່ ສ.ເຊັກໂກ | |
| ສົ່ງເສີມພາສາຫວຽດ ໃນປະຊາຄົມຊາວຫວຽດນາມຢູ່ຕ່າງປະເທດ |
ວັນທີ 30 ທັນວານີ້, ທີ່ກອງປະຊຸມຖະແຫຼງຂ່າວໃຫ້ຮູ້ກ່ຽວກັບສະພາບການຂອງປະຊາຄົມຊາວຫວຽດນາມຢູ່ຕ່າງປະເທດ, ຜົນງານໃນປີ 2022 ແລະ ທິດທາງໃນປີ 2023, ທ່ານຮອງລັດຖະມົນຕີການຕ່າງປະເທດ ຟ້າມກວາງຫ້ຽວ, ປະທານຄະນະກຳມະການແຫ່ງລັດ ກ່ຽວກັບຊາວຫວຽດນາມຢູ່ຕ່າງປະເທດ ໄດ້ສະແດງຄວາມດີໃຈທີ່ປະຊາຄົມຊາວຫວຽດນາມຢູ່ຕ່າງປະເທດ ໄດ້ນັບມື້ນັບສະໜິດແໜ້ນ ແລະ ມຸ່ງໄປເຖິງບ້ານເກີດເມືອງນອນ, ໄດ້ກາຍເປັນພາກສ່ວນທີ່ສຳຄັນ ແລະ ເປັນແຫຼ່ງຊັບພະຍາກອນທີ່ສຳຄັນຂອງປະຊາຄົມຊາວຫວຽດນາມ ...
ຄວາມພະຍາຍາມທີ່ກະໂດດຂັ້ນຂອງຊຸມຊົນ
ໃນຊຸມປີຜ່ານມາ, ປະຊາຄົມຊາວຫວຽດນາມຢູ່ຕ່າງປະເທດ ໄດ້ປະສົບກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ. ໂດຍສະເພາະ, ໄດ້ຮັບຜົນກະທົບຈາກຄວາມຂັດແຍ້ງລະຫວ່າງ ລັດເຊຍ - ຢູແກຼນ, ປະຊາຊົນໃນຫຼາຍບ່ອນ ປະເຊີນກັບໄພເງິນເຟີ້, ລາຍຮັບຫຼຸດລົງ, ລາຄາອາຫານ ແລະ ພະລັງງານສູງ, ໂດຍສະເພາະໃນພາກພື້ນເອີຣົບ.
ທ່ານຮອງລັດຖະມົນຕີ ຟ້າມກວາງຫ້ຽວ ໃຫ້ຮູ້ວ່າ: ນັບແຕ່ເມື່ອ ລັດເຊຍ ປະກາດປະຕິບັດການເຄື່ອນໄຫວທາງການທະຫານພິເສດຢູ່ ຢູແກຼນ (24ກຸມພາ) ຊາວຫວຽດນາມຈຳນວນ ເກືອບ 6.000 ຄົນ ຕ້ອງອົບພະຍົບຈາກ ຢູແກຼນ ໄປຍັງປະເທດບ້ານໃກ້ເຮືອນຄຽງ, ປະຈຸບັນນີ້ຍັງປະມານ 560 ຄົນ. ຫຼາຍປະເທດໄດ້ວາງມາດຕະການລົງໂທດຕໍ່ລັດເຊຍ ເພື່ອຄັດຄ້ານການປະທະກັນ, ສະນັ້ນ ໄດ້ສົ່ງຜົນສະທ້ອນເຖິງຊີວິດ, ການດຳເນີນທຸລະກິດ ແລະ ຈິດໃຈຂອງປະຊາຄົມຊາວຫວຽດນາມ ຢູ່ ລັດເຊຍ ແລະ ຢູແກຼນ.
ຄຽງຂ້າງນັ້ນ, ຊີວິດການເປັນຢູ່ຂອງຊາວຫວຽດນາມ ຍັງປະສົບກັບຄວາມຫຍຸ້ງຍາກ, ທີ່ຕັ້ງດ້ານນິຕິກຳບໍ່ໝັ້ນຄົງ. ສະພາບອາດຊະຍາກຳໃນປະຊາຄົມຊາວຫວຽດນາມຢູ່ຕ່າງປະເທດ ສືບຕໍ່ມີການຜັນແປທີ່ສັບສົນ, ຈຳນວນຊາວຫວຽດນາມອາໄສ ແລະ ເຮັດວຽກຢ່າງຜິດກົດໝາຍຢູ່ບາງທ້ອງຖິ່ນ (ສ.ເກົາຫຼີ, ຍີ່ປຸ່ນ, ໄຕ້ຫວັນ (ຈີນ), ມາເລເຊຍ...) ຍັງຄົງຢູ່ໃນລະດັບສູງ.
ບັນດາບຸກຄົນ ແລະ ອົງການລັດທິຫົວຮຸນແຮງຍັງສືບຕໍ່ສວຍໃຊ້ບັນດາບັນຫາ “ເຄັ່ງຮ້ອນ” ແລະ ລະອຽດອ່ອນຢູ່ໃນທົ່ວປະເທດ ເພື່ອແນໃສ່ຍົກໃຫ້ເຫັນອະດີດແຫ່ງຄວາມຄຽດແຄ້ນ, ໂຄສະນາບິດເບືອນແນວທາງຂອງພັກ ແລະ ລັດ; ຍຸແຍ່, ຊື້ຈ້າງຈອບອອຍຊາວໜຸ່ມ, ນັກສຶກສາ, ຄົນງານຊາວຫວຽດນາມຢູ່ຕ່າງປະເທດສ່ວນໜຶ່ງ ໃຫ້ເຂົ້າຮ່ວມບັນດາການເຄື່ອນໄຫວຕໍ່ຕ້ານປະເທດ.
 |
| ຄະນະຜູ້ແທນປະຊາຄົມຊາວຫວຽດນາມຢູ່ຕ່າງປະເທດ ໄປຢ້ຽມຢາມເຈື່ອງຊາໃນປີ 2022. (ພາບ: baoquocte) |
ເຖິງຢ່າງໃດກໍຕາມ, ທ່ານຮອງລັດຖະມົນຕີ ຟ້າມກວາງຫ້ຽວ ໄດ້ຖືວ່າ: ປະຊາຄົມຊາວຫວຽດນາມຢູ່ຕ່າງປະເທດ ສ່ວນຫຼາຍລ້ວນແຕ່ມີທີ່ຕັ້ງດ້ານນິຕິກຳ, ຊີວິດທີ່ໝັ້ນຄົງ, ເຊື່ອມໂຍງເຂົ້າກັບສັງຄົມປະຈຳຖິ່ນ ໃນທຸກຂົງເຂດນັບແຕ່ດ້ານການເມືອງ, ເສດຖະກິດ, ຕະຫຼອດຮອດວັດທະນະທຳ, ສັງຄົມ, ມີຄວາມສາມາດບົ່ມຊ້ອນດ້ານເຕັກໂນໂລຊີວິທະຍາສາດ, ເຕັກນິກ.
ນັກປັນຍາຊົນຊາວຫວຽດນາມຢູ່ຕ່າງປະເທດ ຫຼາຍຄົນໄດ້ມີຊື່ສຽງ, ໄດ້ຮັບລາງວັນລະດັບສູງ, ເປັນຂີດໝາຍສະແດງໃຫ້ເຫັນພູມປັນຍາຫວຽດນາມ ໃນເວທີສາກົນ. ເດັກນ້ອຍຫວຽດນາມ ຮຸ່ນທີ 2 ແລະ 3 ລ້ວນແຕ່ຮັກການຮ່ຳຮຽນ, ບັນລຸໄດ້ບັນດາຜົນງານດ້ານວິຊາການ ແລະ ມີໂອກາດເຮັດວຽກດີຢູ່ປະເທດປະຈຳຖິ່ນ.
ຮອງລັດຖະມົນຕີ ເນັ້ນໜັກວ່າ ນີ້ແມ່ນແຫຼ່ງຊັບພະຍາກອນທີ່ອ່ອນນວນ ແລະ ໝັ້ນຄົງ, ສືບຕໍ່ປະກອບສ່ວນຢ່າງຕັ້ງໜ້າໃຫ້ແກ່ສັງຄົມປະຈຳຖິ່ນ ແລະ ແມ່ນຂົວຕໍ່ສຳຄັນຂອງການພົວພັນລະຫວ່າງ ຫວຽດນາມ ກັບບັນດາປະເທດ. ເປັນໜ້າສົນໃຈ, ການນຳຂອງບາງປະເທດ ໄດ້ສົ່ງຄຳອວຍພອນປີໃໝ່ເຖິງປະຊາຄົມຊາວຫວຽດນາມ, ສະແດງໃຫ້ເຫັນຄວາມຖືເປັນສຳຄັນຂອງລັດຖະບານປະຈຳຖິ່ນ ຕໍ່ບົດບາດຂອງປະຊາຄົມຊາວຫວຽດນາມຢູ່ຕ່າງປະເທດ.
ໃນຊຸມປີມໍ່ໆມານີ້, ປະຊາຄົມຊາວຫວຽດນາມຢູ່ຕ່າງປະເທດ ໄດ້ຈັດຕັ້ງການເຄື່ອນໄຫວຫຼາຍຢ່າງ ແລະ ຕອບສະໜອງບັນດາການເຄື່ອນໄຫວ ມຸ່ງໄປເຖິງບ້ານເກີດເມືອງນອນ ແລະ ປະເທດ ຢ່າງຕັ້ງໜ້າຄື: ໜູນຊ່ວຍສ້າງ “ເຮືອແຫ່ງອະທິປະໄຕ” ແລະ ຂອງຂວັນໃຫ້ທະຫານ, ປະຊາຊົນເມືອງເກາະ ເຈື່ອງຊາ ດ້ວຍຈຳນວນເງິນທັງໝົດຫຼາຍກວ່າ 2,8 ຕື້ດົ່ງ. ນັບແຕ່ເມື່ອເກີດພະຍາດລະບາດ, ນອກຈາກເງິນສົດກວ່າ 80 ຕື້ດົ່ງ ແລະ ບັນດາຜະລິດຕະພັນການແພດທີ່ມີມູນຄ່າຫຼາຍສິບລ້ານໂດລາ ທີ່ໄດ້ມອບໃຫ້ພາຍໃນປະເທດແລ້ວ, ປະຊາຄົມຊາວຫວຽດນາມຢູ່ຕ່າງປະເທດ ຍັງໄດ້ສົມທົບກັບບັນດາອົງການຜູ້ຕາງໜ້າຫວຽດນາມ ຢູ່ຕ່າງປະເທດ ໄດ້ຜັນຂະຫຍາຍການທູດດ້ານວັກແຊງ, ລະດົມບັນດາປະເທດ ປະຈຳຖິ່ນ ໜູນຊ່ວຍວັກແຊງ ແລະ ຜະລິດຕະພັນການແພດໃຫ້ຫວຽດນາມ.
ສະມາຄົມຊາວຫວຽດນາມອາໄສຢູ່ຕ່າງປະເທດ ສືບຕໍ່ສົມທົບກັນປັບປຸງ ແລະ ພັດທະນາ, ປະກອບສ່ວນເພີ່ມທະວີຄວາມສາມັກຄີໃນປະຊາຄົມ, ໂຄສະນາ ແລະ ເຜີຍແຜ່ບັນດາເອກະລັກສະເພາະ ແລະ ຮີດຄອງປະເພນີຂອງຊາດ, ເປັນຂົວເຊື່ອມຕໍ່ມິດຕະພາບລະຫວ່າງຫວຽດນາມ ແລະ ບັນດາປະເທດ, ພ້ອມກັນນັ້ນ ກໍສວມບົດບາດສຳຄັນຫຼັກແຫຼ່ງແກ່ນສານ, ຈັດຕັ້ງຫຼາຍກິດຈະກໍາ ເພື່ອມຸ່ງໄປເຖິງບ້ານເກີດເມືອງນອນ.
ຫຼາຍຈຸດທີ່ໃສແຈ້ງ ໃນວຽກງານປີ 2022
ອາດເຫັນໄດ້ວ່າ ໃນປີ 2022, ງຽກງານການຄົ້ນຄ້ວາ, ເສນາທິການ ແລະ ສະເໜີນະໂຍບາຍກ່ຽວກັບວຽກງານການຕ່າງປະເທດໄດ້ຮັບການປັບປຸງ, ເໝາະສົມກັບສະພາບການໃໝ່, ບັນລຸໄດ້ບັນດາໝາກຜົນທີ່ພົ້ນເດັ່ນ. ກະຊວງການຕ່າງປະເທດ ໄດ້ອອກຖະແຫຼງການກ່ຽວກັບການຈັດຕັ້ງປະຕິບັດຂໍ້ສະຫຼຸບ 12-KL/TW ແລະ ມະຕິ 169-NQ/CP, ໄດ້ຈັດຕັ້ງກອງປະຊຸມສຳມະນາເຊື່ອມຊຶມ ແລະ ຜັນຂະຫຍາຍບົດສະຫຼຸບ 12-KL/ TW ແລະ ມະຕິເລກທີ 169/NQ-CP ກ່ຽວກັບຊາວຫວຽດນາມຢູ່ຕ່າງປະເທດ ໃນສະພາບການໃໝ່ ຢ່າງສຳເລັດຜົນ.
ຄຳຮຸ່ງ
