ຫວ່າງແລ້ວນີ້, ຢູ່ຮ່າໂນ້ຍ, ໄດ້ດຳເນີນການພົບປະສັງສັນສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດຫວຽດນາມ - ເບລາຣຸດ (1992 - 2022) ແລະ 65 ປີແຫ່ງການຢ້ຽມຢາມຂອງປະທານໂຮ່ຈີມິນ ຢູ່ Minsk (ນະຄອນຫຼວງເບລາຣຸດ).
ການພົບປະສັງສັນສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ ແລະ ເບລາຣຸດ. ພາບ: ຫວູແຄ໊ງ
ກ່າວຄຳເຫັນທີ່ພິທີເປີດ, ທ່ານເອກອັກຄະລັດຖະທູດ ເບລາຣຸດ Vladimir Borovikov ໃຫ້ຮູ້ວ່າ: ເຫດການນີ້ແມ່ນໜຶ່ງໃນບັນດາການເຄື່ອນໄຫວສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ເບລາຣຸດ. ສາຍພົວພັນມິດຕະພາບທີ່ເປັນມູນເຊື້ອອັນສະໜິດສະໜົມ ແລະ ເລິກເຊິ່ງລະຫວ່າງປະຊາຊົນສອງປະເທດທີ່ມີປະຫວັດສາດອັນຍາວນານກັບ ພົນລະເມືອງຫວຽດນາມນັບພັນຄົນທີ່ພວມຮໍ່າຮຽນ ແລະ ເຮັດວຽກຢູ່ເບລາຣຸດ ໃນຊຸມປີເປັນໂຊຫວຽດ.
ຕາມທ່ານປະທານສະມາຄົມມິດຕະພາບ ຫວຽດນາມ - ເບລາຣຸດ ຫງວຽນຕ໋ວນຟອງ ແລ້ວ, ປະຈຸບັນ, ການພົວພັນແລກປ່ຽນ ແລະ ການຮ່ວມມືລະຫວ່າງສະມາຄົມມິດຕະພາບ ເບລາຣຸດ - ຫວຽດນາມ ແລະ ສະມາຄົມມິດຕະພາບ ຫວຽດນາມ - ເບລາຣຸດ ໄດ້ຮັບການຮັກສາເປັນປະຈຳ ບົນພື້ນຖານສາມັກຄີ.
ນັບແຕ່ກ່ອນການພົວພັນທາງການທູດລະຫວ່າງສອງປະເທດໄດ້ຮັບການສ້າງຕັ້ງຂຶ້ນ, ສອງຝ່າຍໄດ້ມີການເຄື່ອນໄຫວຫຼາຍຢ່າງໃນຂົງເຂດການຄ້າ, ການລົງທຶນ, ການສຶກສາ ແລະ ບຳລຸງສ້າງ... ບົນພື້ນຖານການພົວພັນທາງການທູດໄດ້ຮັບການສ້າງຕັ້ງຂຶ້ນພ້ອມກັບມູນເຊື້ອອັນດີງາມ, ການ ພົວພັນຮ່ວມມືລະຫວ່າງສອງປະເທດສືບຕໍ່ໄດ້ຮັບການເປີດຫວ້າງ ແລະ ພັດທະນາໃນຫຼາຍຂົງເຂດຢ່າງແທດຈິງ ແລະ ມີປະສິດທິຜົນ.
ບູນມີ
