| ໄຂກອງປະຊຸມໃຫຍ່ຄັ້ງທີ 22 ຂອງສະພາສັນຕິພາບໂລກ | |
| ເລື່ອງຈັດຕັ້ງກອງປະຊຸມໃຫຍ່ ຄັ້ງທີ 22 ສະພາສັນຕິພາບໂລກ ຢູ່ຫວຽດນາມ ແມ່ນຄວາມຍອດຍິ່ງ |
 |
| ທ່ານ ເຈິ່ນແທັງເໝີນ ກຳມະການກົມການເມືອງ, ຮອງປະທານຜູ້ປະຈຳການສະພາແຫ່ງຊາດ ມອບຫຼຽນກາມິດຕະພາບໃຫ້ແກ່ໝູ່ຄະນະສະພາສັນຕິພາບ ໂລກ (ພາບ: ທູຮ່າ) |
ປະຕິບັດສຳເລັດໂຄງການດຳເນີນງານທີ່ໄດ້ວາງອອກ
ກອງປະຊຸມໃຫຍ່ສະພາສັນຕິພາບໂລກ ຄັ້ງທີ 22 ໄດ້ຈັດຂຶ້ນເປັນຄັ້ງທຳອິດຢູ່ຫວຽດນາມ ດ້ວຍການເຂົ້າຮ່ວມຂອງຜູ້ແທນເກືອບ 100 ຄົນທີ່ມາຈາກເກືອບ 50 ປະເທດ, ໃນນັ້ນມີຜູ້ຕາງໜ້າບັນດາກຳລັງທີ່ກ້າວໜ້າ ແລະ ຮັກຫອມສັນຕິພາບໃນໂລກ, ມາຈາກບັນດາອົງການທີ່ມີການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືກັບສະພາສັນຕິພາບໂລກ ເຊັ່ນ: ສະຫະພັນແມ່ຍິງປະຊາທິປະໄຕໂລກ, ສະຫະພັນຊາວໜຸ່ມປະຊາທິປະໄຕໂລກ, ສະຫະພັນແມ່ຍິງປະຊາທິປະໄຕໂລກ, ສະຫະພັນຊາວໜຸ່ມປະຊາທິປະໄຕໂລກ, ອົງການການຄ້າໂລກ, ສະຫະພັນ ທະນາຍຄວາມປະຊາທິປະໄຕໂລກ.
ນີ້ແມ່ນເຫດການການທູດຫຼາຍຝ່າຍສຳຄັນ, ປະກອບສ່ວນເຂົ້າໃນການຍົກສູງທີ່ຕັ້ງ, ບົດບາດ, ພາບພົດຂອງ ຫວຽດນາມ ເວົ້າລວມ ແລະ ການທູດປະຊາຊົນເວົ້າສະເພາະ. ກອງປະຊຸມໃຫຍ່ແມ່ນໂອກາດເພື່ອໃຫ້ ຫວຽດນາມ ໂຄສະນາທັດສະນະ, ແນວທາງການທູດຂອງ ຫວຽດນາມ, ຊຸກຍູ້ຄວາມສາມັກຄີສາກົນ, ສືບຕໍ່ມານະພະຍາຍາມປະກອບສ່ວນເຂົ້າໃນຂະບວນການລວມຂອງປະຊາຊົນທີ່ຮັກຫອມສັນຕິພາບໂລກ.
ເຫດການດັ່ງກ່າວກໍ່ແມ່ນໂອກາດເພື່ອໃຫ້ ຫວຽດນາມ ສະແດງຄວາມຂອບອົກຂອບໃຈຕໍ່ການສະໜັບສະໜູນ ແລະ ການປະກອບສ່ວນຂອງສະພາແລະ ບັນດາອົງການສະມາຊິກສຳລັບ ຫວຽດນາມ ໃນຊຸມປີຜ່ານມາ ແລະ ພິເສດແມ່ນໃນພາລະກິດແຫ່ງການຕໍ່ສູ້ປົດປ່ອຍປະເທດຊາດ ແລະ ທ້ອນໂຮມປະເທດຊາດເປັນເອກະພາບ. ພ້ອມກັນນັ້ນ, ກໍ່ໄດ້ຮັບການສະໜັບສະໜູນຂອງສະພາ ແລະ ເພື່ອນມິດສາກົນກ່ຽວກັບບັນຫາທີ່ກ່ຽວຂ້ອງເຖິງຜົນປະໂຫຍດຂອງຊາດຫວຽດນາມໃນສະພາບການປະຈຸບັນ.
ພາຍຫຼັງ 6 ວັນເຮັດວຽກຢ່າງມີປະສິດທິຜົນ ແລະ ຕັ້ງໜ້າ (21-26 ພະຈິກ 2022), ກອງປະຊຸມໃຫຍ່ສະພາສັນຕິພາບໂລກ ຄັ້ງທີ 22 ໄດ້ອັດລົງຢ່າງຈົບງາມ, ສຳເລັດໂຄງການດຳເນີນງານທີ່ໄດ້ວາງອອກຄື: ຮັບຮອງເອົາຖະແຫຼງການຮ່ວມດ້ານການເມືອງ, ເລືອກຕັ້ງຄະນະບໍລິຫານງານສະພາສັນຕິພາບໂລກ ອາຍຸການໃໝ່, ຈັດຕັ້ງກອງປະຊຸມສັນຕິພາບຮ່າໂນ້ຍ ຢ່າງສຳເລັດຜົນ...
ຖະແຫຼງການທາງການເມືອງຂອງສະພາສັນຕິພາບໂລກ ຄັ້ງທີ 22 ໄດ້ສະແດງໃຫ້ເຫັນສານຢ່າງແຮງກ່ຽວກັບຄວາມຕັດສິນໃຈ ແລະ ຄວາມມານະພະຍາຍາມເພີ່ມທະວີຄວາມສາມັກຄີ, ເພີ່ມທະວີການເຕົ້າໂຮມກຳລັງຮັກຫອມສັນຕິພາບ ແລະ ຄວາມກ້າວໜ້າໃນໂລກ ເພື່ອສືບຕໍ່ຕໍ່ສູ້ເພື່ອສັນຕິພາບ, ຄວາມຍຸຕິທຳ, ປະຊາທິປະໄຕ, ຍຸຕິທຳສັງຄົມ ແລະ ການພັດທະນາແບບຍືນຍົງ, ຕ້ານສົງຄາມ, ຕ້ານການກົດຂີຂູດຮີດ ແລະ ຄວາມບໍ່ຍຸດຕິທຳ.
ພາລະກຳສັນຕິພາບ ແລະ ຄວາມຊົງຈຳທີ່ສວຍງາມຂອງປະເທດຊາດ ແລະ ຊາວຫວຽດນາມ
ກອງປະຊຸມໃຫຍ່ຄັ້ງທີ 22 ຂອງສະພາສັນຕິພາບໂລກໄດ້ສິ້ນສຸດລົງ, ແຕ່ນ້ຳໃຈ, ຄວາມປະທັບໃຈກ່ຽວກັບຫວຽດນາມ ທີ່ສະໜິດສະໜົມ, ຮັກແພງແຂກຄົນ, ຮັກຫອມສັນຕິພາບ ແລະ ບັນດາຜົນງານພາຍຫຼັງ 36 ປີແຫ່ງການປ່ຽນແປງໃໝ່ຂອງຫວຽດນາມ ຍັງຄົງຕົວຢູ່. ທ່ານ ອວງຈູລຶວ - ອະດີດກຳມະການສູນກາງພັກ, ອະດີດຮອງປະທານສະພາແຫ່ງຊາດ, ປະທານຄະນະກຳມະການສັນຕິພາບຫວຽດນາມ ໃຫ້ຮູ້ວ່າ: ເຄື່ອງຂອງທີ່ນຳກັບເມືອປະເທດຂອງບັນດາຜູ້ແທນຈະມີພາລະກິດສັນຕິພາບຈາກກອງປະຊຸມໃຫຍ່ຄັ້ງທີ 22 ສະພາສັນຕິພາບໂລກ ດ້ວຍຄວາມຊົງຈຳທີ່ສວຍງາມຂອງປະເທດຊາດ ແລະ ຊາວ ຫວຽດນາມ”.
ຜ່ານການແລກປ່ຽນ, ພົບປະ ບັນດາຜູ້ແທນເກືອບທັງໝົດໄດ້ຕີລາຄາສູງການກະກຽມຢ່າງລອບຄອບຖີ່ຖ້ວນຂອງຫວຽດນາມ ນັບແຕ່ຂັ້ນຕອນເນື້ອໃນ, ເສນາທິການ, ການສົມທົບກັບບັນດາການນຳ ແລະ ຄະນະເລຂາທິການສະພາສັນຕິພາບໂລກ. ທຸກສິ່ງທຸກຢ່າງນີ້ໄດ້ສ້າງເປັນບັນຍາກາດຈິງໃຈ, ເປີດເຜີຍ, ຕັ້ງໜ້າເພື່ອໃຫ້ບັນດາຜູ້ແທນອາດຈະແບ່ງບັນຄວາມຄິດ, ສະເໜີຂໍ້ລິເລີ່ມ, ແມ່ນກາລະໂອກາດທີ່ດີເພື່ອໃຫ້ບັນດາຜູ້ແທນມີຄວາມເຂົ້າໃຈກ່ຽວກັບປະເທດ ແລະ ຊາວຫວຽດນາມ ກ່ວາອີກ.
ຕາມທ່ານ Carlos Ron, ປະທານສະຖາບັນຄົ້ນຄວ້າກ່ຽວກັບສັນຕິພາບ ແລະ ສາມັກຄີ Venezuela (ISB) ແລ້ວ, ຈາກປະເທດທີ່ຜ່ານສົງຄາມ, ຫວຽດນາມ ບໍ່ພຽງແຕ່ກາຍເປັນປະເທດເອກະລາດເທົ່ານັ້ນ, ຫາກຍັງແມ່ນປະເທດທີ່ມີເສັ້ນທາງພັດທະນາໃໝ່, ມຸ່ງໄປເຖິງຄວາມຈະເລີນຮຸ່ງເຮືອງ, ສືບຕໍ່ເດີນຕາມເສັ້ນທາງສັງຄົມນິຍົມທີ່ໄດ້ເລືອກໄວ້.
ທ່ານ Carlos Ron ໃຫ້ຮູ້ວ່າ ບັນດາຄວາມສຳເລັດໃນການປະຕິບັດນະໂຍບາຍຂອງຫວຽດນາມ ດ້ວຍການກຳນົດທິດສັງຄົມນິຍົມ ແມ່ນສະແດງໃຫ້ໂລກເຫັນວ່າ ສັງຄົມນິຍົມ ສາມາດນຳມາເຊິ່ງຜົນປະໂຫຍດໃຫ້ແກ່ປະເທດຊາດ, ຊົນຊາດ ແລະ ຄວາມຜາສຸກຂອງປະຊາຊົນ.
ຕາມທ່ານ Ganim Gazawi, ສະມາຊິກຄະນະບໍລິຫານງານຄະນະກຳມະການສັນຕິພາບ ແລະ ຄວາມສາມັກຄີອິດສະຣາແອນ (PSCI) ແລ້ວ, ຫວຽດນາມ - ປະເທດສັນຕິພາບ, ແມ່ນສະຖານທີ່ທີ່ທ່ານລໍຄອຍໄດ້ໄປເຖິງມາແຕ່ດົນນານແລ້ວ. ໂດຍສະແດງຄວາມຊົມເຊີຍຕໍ່ປະຊາຊົນຫວຽດນາມ, ບັນດານັກວິລະຊົນໃນການຕໍ່ສູ້ປົດປ່ອຍຊາດ ແລະ ທ້ອນໂຮມປະເທດຊາດເປັນເອກະພາບ, ທ່ານ Ganim Gazawi ໃຫ້ຮູ້ວ່າ: ປະເທດຫວຽດນາມວິລະຊົນ ໃນທັງອະດີດຕະການ ແລະ ປະຈຸບັນ ພວມນັບມື້ນັບພັດທະນາຢ່າງຟົດຟື້ນ, ໄດ້ກາຍເປັນບົດຮຽນອັນເລິກເຊິ່ງໃຫ້ແກ່ຂະບວນການສັນຕິພາບຂອງໂລກ.
ສ່ວນຕາມທ່ານນາງ Socorro Gomes Coelho, ອະດີດປະທານ ສະພາສັນຕິພາບໂລກແລ້ວ, ຫວຽດນາມ ໄດ້ພັດທະນາກາຍເປັນປະເທດຂະຫຍັນຂັນເຄື່ອນ ແລະ ພັດທະນາໃນຂົງເຂດເສດຖະກິດ-ສັງຄົມ, ພິເສດແມ່ນຍົກສູງຄຸນນະພາບການດຳລົງຊີວິດຂອງປະຊາຊົນ. ບັນດາຜົນງານດັ່ງກ່າວຍິ່ງມີຄວາມໝາຍເມື່ອໄດ້ວາງອອກໃນສະພາບທີ່ຫວຽດນາມ ໄດ້ຜ່ານສົງຄາມຕໍ່ຕ້ານຫຼາຍຄັ້ງເພື່ອຍາດເອົາເອກະລາດ ແລະ ສັນຕິພາບ.
“ຫວຽດນາມ ແມ່ນແຫຼ່ງບັນດານໃຈ ແລະ ເພື່ອນມິດທີ່ດີຂອງປະຊາຊົນຕໍ່ສູ້ເພື່ອເອກະລາດ, ອະທິປະໄຕ ແລະ ສັນຕິພາບໃນໂລກ. ພວກຂ້າພະເຈົ້າຂໍສະແດງຄວາມເຄົາລົບ, ຊົມເຊີຍ ແລະ ຈະຮ່ວມເດີນທາງກັບບັນດາການນຳ ແລະ ປະຊາຊົນ ຫວຽດນາມ”.
ຕາມອະດີດປະທານ ສະພາສັນຕິພາບໂລກແລ້ວ, ຫວຽດນາມ ມີການສະໜັບສະໜູນຈາກສາກົນ ແລະ ປະສົບການໃນການເຕົ້າໂຮມ, ສາມັກຄີບັນດາແຫຼ່ງກຳລັງ ເພື່ອສະກັດກັ້ນສົງຄາມ. ສະນັ້ນ, ຫວຽດນາມ ແມ່ນຄູ່ຮ່ວມມືສຳຄັນຂອງ ສະພາສັນຕິພາບໂລກ. ປະຊາຄົມຊາວຫວຽດນາມ ທີ່ຮັກຫອມສັນຕິພາບ ແມ່ນພາກສ່ວນທີ່ຈຳເປັນຂອງປະຊາຄົມເພື່ອສັນຕິພາບສາກົນ ແລະ ຂອງອົງການສະພາສັນຕິພາບໂລກ. ຜ່ານປະຊາຄົມນີ້, ທ່ານນາງເຊື່ອໝັ້ນວ່າ ຫວຽດນາມ ຈະມີການປະກອບສ່ວນຢ່າງຕັ້ງໜ້າເຂົ້າໃນການເຄື່ອນໄຫວສັນຕິພາບຂອງໂລກ.
ສຳລັບທ່ານປະທານສະພາສັນຕິພາບໂລກຄົນໃໝ່ Pallab Sengupta, ຫວຽດນາມ ໄດ້ມີຄວາມສະໜິດສະໜົມ. ທ່ານແບ່ງປັນວ່າ "ທຸກໆຄັ້ງທີ່ຂ້າພະເຈົ້າມາຫວຽດນາມ, ຂ້າພະເຈົ້າຮູ້ສຶກຄືວ່າໄດ້ເມືອເຮືອນ". ຕາມທ່ານ Pallab Sengupta ແລ້ວ, ເຫດການກອງປະຊຸມໃຫຍ່ຄັ້ງທີ 22 ຂອງ ສະພາສັນຕິພາບໂລກ ໄດ້ຈັດຂຶ້ນຢູ່ຫວຽດນາມ ແມ່ນການຢັ້ງຢືນທີ່ຕັ້ງ ແລະ ບົດບາດສຳຄັນຂອງຫວຽດນາມ ໃນການເຄື່ອນໄຫວສັນຕິພາບຂອງໂລກ, ຫວຽດນາມ ແມ່ນສະມາຊິກທີ່ມີຄວາມຮັບຜິດຊອບ ແລະ ຕັ້ງໜ້າຂອງປະຊາຄົມສາກົນ. ທ່ານ Pallab Senguptaເນັ້ນໜັກ ວ່າ:
“ພວກເຮົາພວມດຳລົງຊີວິດໂລກດ້ວຍບັນດາການຜັນແປທີ່ສັບສົນຫຼາຍຢ່າງ, ຊ້ອນແຝງໄປດ້ວຍຫຼາຍຄວາມສ່ຽງນາບຂູ່ເຖິງສັນຕິພາບ, ສະຖຽນລະພາບ ແລະ ການພັດທະນາ. ຈຸດປະສົງຂອງສະພາສັນຕິພາບໂລກ ແມ່ນຮ່ວມກັນກະທຳ, ບໍ່ຈຳແນກແນວຄິດ, ທັດສະນະການເມືອງ, ສາສະໜາ ເພື່ອກ້າວໄປສູ່ສັນຕິພາບ ແລະ ການພັດທະນາທົ່ວໂລກ”.
ບຸນຄົງ
