ວິສາຫະກິດ ສາມປະເທດ ໄທ - ຫວຽດນາມ - ລາວ ເພີ່ມທະວີການຮ່ວມມືລົງທຶນ

16:20 | 01/12/2022

ຍສໝ - ວັນທີ 28 ພະຈິກ, ເວທີປາໄສວິສາຫະກິດ ໄທ - ຫວຽດນາມ - ລາວ ປີ 2022 ໂດຍສະມາຄົມນັກທຸລະກິດ ໄທ - ຫວຽດນາມ ຈັດ ໄດ້ໄຂຂຶ້ນຢູ່ໄທ. ເວທີປາໄສແມ່ນບ່ອນດຳເນີນບັນດາການເຄື່ອນໄຫວວາງສະແດງຜະລິດຕະພັນ, ສົ່ງເສີມການຄ້າ, ແລກປ່ຽນເຕັກໂນໂລຢີເພື່ອແນໃສ່ເພີ່ມທະວີການແລກປ່ຽນການຄ້າ, ເຊື່ອມຕໍ່ ແລະ ສ້າງເຄືອຂ່າຍລະຫວ່າງບັນດາວິສາຫະກິດ ຫວຽດນາມ ກັບບັນດາວິສາຫະກິດ ໄທ ແລະ ລາວ.

	ແນວໂຮມປະເທດຊາດ ຫວຽດນາມ ແລະ ສະມັດຊາໃຫຍ່ ສັນຕິພາບໂລກ ຄວນເພີ່ມທະວີການຮ່ວມມືເພື່ອສັນຕິພາບ
	ເພີ່ມທະວີການຮ່ວມມືດ້ານການບຳລຸງສ້າງ ພະນັກງານການນຳ, ຄຸ້ມຄອງ ໃຫ້ແກ່ພັກ ແລະ ລັດລາວ

ວິສາຫະກິດ ສາມປະເທດ ໄທ - ຫວຽດນາມ - ລາວ ເພີ່ມທະວີການຮ່ວມມືລົງທຶນ

ເວທີປາໄສວິສາຫະກິດ ໄທ - ຫວຽດນາມ - ລາວ (ພາບ: ຕວນກວຽນ)

ກ່າວຄຳເຫັນທີ່ເວທີປາໄສ, ທ່ານ ປີເຕີ ຮົ່ງ, ຮອງປະທານຜູ້ປະຈຳການ, ທັງເປັນເລຂາທິການ ສະມາຄົມນັກທຸລະກິດ ຫວຽດນາມ ປະຈຳ ຕ່າງປະເທດ ໃຫ້ຮູ້ວ່າ: ເວທີປາໄສວິສາຫະກິດ ໄທ - ຫວຽດນາມ - ລາວແມ່ນໂອກາດເພື່ອໃຫ້ບັນດາວິສາຫະກິດ, ນັກທຸລະກິດ 3 ປະເທດ ແບ່ງປັນບົດຮຽນປະສົບການ, ເພີ່ມທະວີການແລກປ່ຽນ, ຮ່ວມມືໃນບັນດາຂົງເຂດການຄ້າ, ກະສິກຳໝູນໃຊ້ເຕັກໂນໂລຢີສູງ, ວັດທະນະທຳ, ການທ່ອງທ່ຽວ ແລະ ການບໍລິການ, ການນຳເຂົ້າສົ່ງອອກ, ປະກອບສ່ວນຍົກສູງປະສິດທິຜົນໃນການປະຕິບັດແຜນຮ່າງ 1797 ຂອງນາຍົກລັດຖະມົນຕີ ຫວຽດນາມ ກ່ຽວກັບການລະດົມຊາວຫວຽດາມ ອາໄສຢູ່ຕ່າງປະເທດ ເຂົ້າຮ່ວມການແນະນຳ, ຊົມໃຊ້ຜະລິດຕະພັນ ແລະ ພັດທະນາບັນດາຊ່ອງທາງແຈກຢາຍສິນຄ້າ ຫວຽດນາມ ຢູ່ຕ່າງປະເທດ, ໄລຍະ 2020 – 2024.

ທ່ານເອກອັກຄະລັດຖະທູດຫວຽດນາມ ປະຈຳ ໄທ ຫງວຽນຈີ້ແທ່ງ ເນັ້ນໜັກວ່າ: ປະຊາຄົມວິສາຫະກິດຊາວຫວຽດນາມ ຢູ່ ໄທ ແລະ ລາວ ແມ່ນປະຊາຄົມທີ່ມີຄວາມສາມາດບົ່ມຊ້ອນດ້ານເສດຖະກິດ ແລະ ມີຄວາມຫວັງຢາກພ້ອມກັນຮ່ວມມືກັບຫວຽດນາມ. ບັນດາວິສາຫະກິດ ຫວຽດນາມ ກໍ່ມີຄວາມຂະຫຍັນຂັນເຄື່ອນ, ປາດຖະໜາຢາກເປີດກວ້າງການລົງທຶນ ແລະ ດຳເນີນທຸລະກິດເຂົ້າຕະຫຼາດໄທ. ເວທີປາໄສແມ່ນຊ່ອງທາງເຊື່ອມຕໍ່ທີ່ເໝາະສົມ ແລະ ມີປະສິດທິຜົນເພື່ອໃຫ້ບັນດາວິສາຫະກິດຜັນຂະຫຍາຍກາລະໂອກາດຮ່ວມມືໃນອະນາຄົດ.

ທ່ານເອກອັກຄະລັດຖະທູດ ຫງວຽນຈີແທ່ງ ສະເໜີໃຫ້ອຳນາດການປົກຄອງແຂວງ ອຸດອນທານີ ໜູນຊ່ວຍການເຊື່ອມຕໍ່ດ້ານເສດຖະກິດລະຫວ່າງວົງຄະນາຍາດວິສາຫະກິດຊາວຫວຽດນາມອາໄສຢູ່ລາວ ແລະ ວິສາຫະກິດ ຫວຽດນາມ; ສະໜອງບັນດານະໂຍບາຍສົ່ງເສີມ ແລະ ຊຸກຍູ້ການລົງທຶນ, ການຄ້າ ແລະ ທ່ອງທ່ຽວຂອງແຂວງ, ກໍ່ຄືບັນດາໂຄງການລົງທຶນທີ່ຈຳເປັນເພື່ອດຶງດູດການເຂົ້າຮ່ວມຂອງບັນດາວິສາຫະກິດ ຫວຽດນາມ ແລະ ວິສາຫະກິດຫວຽດນາມ ຢູ່ລາວ; ແນະນຳບັນດາທ່າໄດ້ປຽບຂອງສິນຄ້າ ແລະ ຜະລິດຕະພັນການທ່ອງທ່ຽວທີ່ພົ້ນເດັ່ນຂອງແຂວງ; ແນະນຳບັນດາວິສາຫະກິດອຸດອນທານີ ທີ່ມີຄວາມສົນໃຈເຖິງຕະຫຼາດຫວຽດນາມ ແລະ ລາວ, ມີຄວາມຕ້ອງການຢາກຮ່ວມມືກັບວິສາຫະກິດ ຫວຽດນາມ ເພື່ອເຊື່ອມຕໍ່ຢ່າງວ່ອງໄວ ແລະ ມີປະສິດທິຜົນ.

ທີ່ເວທີປາໄສ, ສະມາຄົມນັກທຸລະກິດໄທ - ຫວຽດນາມ, ສະມາຄົມວິສາຫະກິດ ຫວຽດນາມ ປະຈຳ ລາວ ແລະ ສະມາຄົມນັກທຸລະກິດ ຫວຽດນາມ ໄດ້ແລກປ່ຽນ, ປຶກສາຫາລື ແລະ ລົງນາມໃນບົດບັນທຶກຊ່ວຍຈຳການຮ່ວມມືເພື່ອສ້າງຕັ້ງການພົວພັນຮ່ວມມືໄລຍະຍາວ; ສວມບົດບາດເປັນຜູ້ເຊື່ອມຕໍ່, ສະໜອງຂໍ້ມູນຂ່າວສານ ແລະ ໜູນຊ່ວຍວິສາຫະກິດສະມາຊິກຢ່າງມີປະສິດທິຜົນ; ສືບຕໍ່ຈັດຕັ້ງການໄປຢ້ຽມຢາມ ແລະ ເວທີປາໄສເຊື່ອມຕໍ່ລະຫວ່າງ ຫວຽດນາມ, ລາວ ແລະ ໄທ; ບັນດາວິສາຫະກິດໄດ້ຕັ້ງໜ້າແລກປ່ຽນກ່ຽວກັບຄວາມສາມາດບົ່ມຊ້ອນ, ທ່າແຮງ ແລະ ຄວາມຕ້ອງການຮ່ວມມືລະອຽດເພື່ອສ້າງການພົວພັນທາງທຸລະກິດ, ລົງນາມ ແລະ ຜັນຂະຫຍາຍບັນດາໂຄງການຮ່ວມມື; ຊຸກຍູ້ການນຳເຂົ້າ ແລະ ສົ່ງອອກສິນຄ້າທີ່ມີຄຸນນະພາບສູງລະຫວ່າງ 3 ປະເທດ.

ບຸນຄົງ