ເມື່ອພີ່ນ້ອງຊາວຫວຽດນາມຢູ່ຕ່າງປະເທດປາດຖະໜາຢາກຊຸກຍູ້ຄວາມເຂົ້າອົກເຂົ້າໃຈກັນ ແລະ ຮ່ວມມືກັນລະຫວ່າງປະຊາຊົນຫວຽດນາມ ແລະ ບັນດາປະເທດ; ຄັ້ງທໍາອິດເຂົ້າເຖິງຂັ້ນຕອນລະບອບການບໍລິຫານ; ເຂົ້າຮ່ວມການພົບປະແລກປ່ຽນປະຊາຊົນ... ສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະ ບັນດາສະມາຊິກໄດ້ໜູນຊ່ວຍຢ່າງຕັ້ງໜ້າ ແລະ ມີປະສິດທິຜົນ. ເນື່ອງໃນໂອກາດສະເຫຼີມສະຫຼອງ 72 ປີແຫ່ງວັນມູນເຊື້ອຂອງສະຫະພັນບັນດາອົງການຈັດຕັ້ງມິດຕະພາບຫວຽດນາມ (ວັນທີ 17 ພະຈິກ 1950 – ວັນທີ 17 ພະຈິກ 2022), ຊາວຫວຽດນາມ ອາໄສຢູ່ຕ່າງປະເທດໃນ 5 ທະວີບໄດ້ແບ່ງປັນຄວາມປາດຖະໜາຢາກສືບຕໍ່ຮ່ວມເດີນທາງ ແລະ ສ້າງບັນດາໝາກຜົນລວມ.
ເຄົາລົບການສະໜັບສະໜູນ ແລະ ໜູນຊ່ວຍຂອງສະມາຄົມ ຫວຽດນາມ - ອາເມລິກາ
ທ່ານ ຈິ້ງຈູງ, ຜູ້ອຳນວຍການບໍລິຫານສະພາທຸລະກິດ ອາເມລິກາ - ຫວຽດນາມ (UVBC), ຊາວຫວຽດນາມອາໄສຢູ່ອາເມລິກາ ໃຫ້ຮູ້ວ່າ: ສະພາທຸລະກິດ ອາເມລິກາ - ຫວຽດນາມ ໄດ້ຮັບການສ້າງຕັ້ງໃນເດືອນ ກໍລະກົດ 2022 ໂດຍກຸ່ມນັກຊ່ຽວຊານທີ່ມີປະສົບການດຳເນີນທຸລະກິດກັບ ຫວຽດນາມ ນັບແຕ່ປີ 1995. ໂດຍແມ່ນອົງການບໍ່ຫວັງຜົນກຳໄລ, ສະພາທຸລະກິດອາເມລິກາ - ຫວຽດນາມ ໄດ້ສະໜອງບັນດາການບໍລິການພັດທະນາທຸລະກິດໃຫ້ບັນດາວິສາຫະກິດຂະໜາດກາງ ແລະ ນ້ອຍທີ່ສົນໃຈດຳເນີນທຸລະກິດຢູ່ ອາເມລິກາ ແລະ ຫວຽດນາມ.
ສະພາກໍພວມມານະພະຍາຍາມຊຸກຍູ້ຄວາມເຂົ້າໃຈ ແລະ ການຮ່ວມມືກັນລະຫວ່າງປະຊາຊົນຫວຽດນາມ ແລະ ອາເມລິກາ ຜ່ານບັນດາໂຄງການສິລະປະ, ການສຶກສາ, ວັດທະນະທຳຕ່າງໆ.
ທ່ານ ຈິ້ງຈູງ, ຜູ້ອຳນວຍການບໍລິຫານສະພາທຸລະກິດ ອາເມລິກາ - ຫວຽດນາມ (UVBC).
ຢູ່ ຫວຽດນາມ, ສະມາຄົມ ຫວຽດນາມ - ອາເມລິກາ (ເປັນຫົວໜ່ວຍຂຶ້ນກັບສະຫະພັນບັນດາອົງການຈັດຕັ້ງມິດຕະພາບ ຫວຽດນາມ), ໂດຍກົງແມ່ນສະໂມສອນວິສາຫະກິດ ຫວຽດນາມ - ອາເມລິກາ, ແມ່ນຄູ່ຮ່ວມມືທາງການຂອງສະພາທຸລະກິດ ອາເມລິກາ - ຫວຽດນາມ. ຂ້າພະເຈົ້າເຄົາລົບການສະໜັບສະໜູນ ແລະ ໜູນຊ່ວຍຂອງສະມາຄົມ ຫວຽດນາມ - ອາເມລິກາ ເມື່ອສະພາທຸລະກິດ ອາເມລິກາ - ຫວຽດນາມ ກັບຄືນເຂົ້າສູ່ການເຄື່ອນໄຫວຢູ່ປະເທດ ຫວຽດນາມ. ພວກຂ້າພະເຈົ້າຈະສ້າງສາງຂໍ້ມູນກ່ຽວກັບວິສາຫະກິດສະມາຊິກ, ຄວາມຕ້ອງການສະເພາະຂອງການນໍາເຂົ້າ, ສົ່ງອອກ, ປະລິມານ, ປະເພດສິນຄ້າ... ຂອງແຕ່ລະຝ່າຍ. ພ້ອມກັນນັ້ນ, ກໍ່ຈັດຕັ້ງຊຸດອົບຮົມກ່ຽວກັບບັນດາບັນຫາທີ່ພວມໄດ້ຮັບຄວາມສົນໃຈຄື ຫຼັກອະນາໄມຄວາມປອດໄພ ດ້ານສະບຽງອາຫານ ແລະ ຕົ້ນກໍາເນີດຂອງສະບຽງອາຫານຕາມຄວາມຮຽກຮ້ອງຕ້ອງການຂອງອາເມລິກາ ຫຼື ການນຳໃຊ້ເຕັກໂນໂລຊີເຂົ້າກະສິກຳ ປະຈຸບັນເຊັ່ນ ເຕັກໂນໂລຊີເກັບຮັກສາຫຼັງການເກັບກ່ຽວ, ເຕັກໂນໂລຊີປຸງແຕ່ງ, ຜະລິດບັນດາຜະລິດຕະພັນຄຸນນະພາບສູງສໍາລັບການສົ່ງອອກ...
ໂດຍໄດ້ຮັບການສະຫນັບສະຫນູນຢ່າງຕັ້ງໜ້າ ແລະ ມີປະສິດທິພາບຂອງ PACCOM
ທ່ານ ຫວໍງວຽນກວາງລວນ (ຊາວເຢຍລະມັນ ເຊື້ອຊາດຫວຽດນາມ), ຜູ້ອຳນວຍການອົງການບໍ່ຂຶ້ນກັບລັດຖະບານ FIT ໃຫ້ຮູ້ວ່າ: FIT ແມ່ນອົງການ ບໍ່ຂຶ້ນກັບລັດຖະບານຕ່າງປະເທດທີ່ມີສໍານັກງານຢູ່ເຢຍລະມັນ ແລະ ໄດ້ຮັບໃບອະນຸຍາດດຳເນີນການເຄື່ອນໄຫວຢູ່ ຫວຽດນາມ ໃນວັນທີ 11 ເມສາ 2017. ນັບແຕ່ເມື່ອໄດ້ຮັບການສ້າງຕັ້ງ, FIT ໄດ້ ແລະ ພວມໄດ້ຮັບການໜູນຊ່ວຍຢ່າງຕັ້ງໜ້າ ແລະ ມີປະສິດທິຜົນຈາກຄະນະປະສານງານການຊ່ວຍເຫຼືອປະຊາຊົນ (PACCOM), ໂດຍສະເພາະແມ່ນວຽກງານບໍລິຫານ ເພື່ອບໍ່ໃຫ້ບັນດາການເຄື່ອນໄຫວຢຸດສະງັກ. ສິ່ງເຫຼົ່ານີ້ສາມາດເວົ້າເຖິງຄື ວິວັດການຕໍ່ການນົດ ວີຊາໃຫ້ບັນດານັກຊ່ຽວຊານທີ່ພວມເຮັດວຽກຢູ່ອົງການ ແລະ ຍື່ນຂໍວີຊາ ໃໝ່ໃຫ້ນັກຊ່ຽວຊານທີ່ໄປເຮັດວຽກໄລຍະສັ້ນຢູ່ຫວຽດນາມ ໃນໄລຍະທີ່ ພະຍາດໂຄວິດ-19 ຜັນແປຢ່າງສັບສົນ.
ທ່ານ ຫວໍງວຽນກວາງລວນ (ຊາວເຢຍລະມັນ ເຊື້ອຊາດຫວຽດນາມ), ຜູ້ອຳນວຍການອົງການບໍ່ຂຶ້ນກັບລັດຖະບານ FIT.
ໃນໄລຍະຈະມາເຖິງ, ອົງການ FIT ມີແຜນທີ່ຈະຂະຫຍາຍຂອບເຂດການດໍາເນີນງານ ໄປຍັງບັນດາແຂວງໃໝ່. ອົງການ FIT ຫວັງວ່າ PACCOM ຈະສືບຕໍ່ຮ່ວມເດີນທາງ ແລະ ໜູນຊ່ວຍການເຮັດວຽກກັບອົງການທີ່ກ່ຽວຂ້ອງອື່ນໆ ເພື່ອໃຫ້ລະບຽບການເປີດກວ້າງຂອບເຂດການເຄື່ອນໄຫວຂອງ ອົງການ FIT ສາມາດໄດ້ປະຕິບັດສຳເລັດໂດຍໄວ.
ສະມາຄົມມິດຕະພາບມີຫຼາຍກິດຈະກຳທີ່ແທດຈິງ ແລະ ມີຄວາມໝາຍ
ທ່ານ ເລວັນມຸ້ຍ, ປະທານສະມາຄົມຊາວຫວຽດນາມ ອາໄສຢູ່ນະຄອນຫຼວງວຽງຈັນ (ລາວ) ແບ່ງປັນວ່າ: ປີ 2022 ແມ່ນປີສາມັກຄີມິດຕະພາບລາວ - ຫວຽດນາມ, ຫວຽດນາມ - ລາວ, ສະຫະພັນບັນດາອົງການຈັດຕັ້ງມິດຕະພາບ ຫວຽດນາມ - ລາວ, ສະມາຄົມມິດຕະພາບ ຫວຽດນາມ - ລາວ ໄດ້ຈັດຕັ້ງ ຫຼາຍກິດຈະກໍາການເຄື່ອນໄຫວພົບປະແລກປ່ຽນລະຫວ່າງປະຊາຊົນສອງປະເທດ. ໃນຖານະເປັນຊາວຫວຽດນາມອາໄສຢູ່ຕ່າງປະເທດ, ຂ້າພະເຈົ້າໄດ້ໄປຫວຽດນາມ ເພື່ອເຂົ້າຮ່ວມບັນດາການເຄື່ອນໄຫວພົບປະແລກປ່ຽນມິດຕະພາບໂດຍສະມາຄົມມິດຕະພາບ ຫວຽດນາມ - ລາວ ແລະ VUFO ຈັດຕັ້ງ. ບັນດາການເຄື່ອນໄຫວແມ່ນມີຄວາມອຸດົມສົມບູນ, ແທດຈິງ, ມີຄວາມໝາຍ ແລະ ສະໜິດຕິດພັນປະຊາຊົນສອງປະເທດ.
ທ່ານ ເລວັນມຸ້ຍ, ປະທານສະມາຄົມຊາວຫວຽດນາມ ອາໄສຢູ່ນະຄອນຫຼວງວຽງຈັນ (ລາວ).
ນອກຈາກນັ້ນ, ໃນຊຸມປີມໍ່ໆມານີ້, ພາຍໃຕ້ການຊີ້ນຳຂອງສະຫະພັນບັນດາ ອົງການຈັດຕັ້ງມິດຕະພາບ ຫວຽດນາມ, ບັນດາສະມາຊິກສະມາຄົມມິດຕະພາບ ຫວຽດນາມ - ລາວ ໄດ້ໜູນຊ່ວຍລູກຫຼານຊາວຫວຽດນາມອາໄສຢູ່ລາວ ໄປຮ່ຳຮຽນຢູ່ຫວຽດນາມ ເປັນຈຳນວນຫຼວງຫຼາຍ. ການເຄື່ອນໄຫວນີ້ມີຄວາມໝາຍ, ຊ່ວຍໃຫ້ຊາວຫວຽດນາມ ອາໄສຢູ່ຕ່າງປະເທດ, ພິເສດແມ່ນໄວໜຸ່ມຫວຽດນາມ ອາໄສຢູ່ຕ່າງປະເທດ ຫັນໜ້າເມືອຫາບ້ານເກີດເມືອງນອນ, ປະເທດຊາດ, ມີຄວາມຮັບຮູ້ຢ່າງຈະແຈ້ງເຖິງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດລາວ ແລະ ຫວຽດນາມ ໂດຍປະທານ ໂຮ່ຈິີມິນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ເປັນຜູ້ສ້າງພື້ນຖານ.
 |
ໃນໄລຍະຈະມາເຖິງ, ຂ້າພະເຈົ້າຫວັງວ່າ VUFO ແລະ ສະມາຄົມມິດຕະພາບ ຫວຽດນາມ - ລາວ ຈະສືບຕໍ່ມີຫຼາຍໂຄງການມຸ່ງໄປເຖິງຊາວຫວຽດນາມ ອາໄສຢູ່ລາວ, ໜູນຊ່ວຍບັນດາຄອບຄົວຊາວຫວຽດນາມ ຢູ່ຕ່າງປະເທດ ທີ່ປະສົບກັບຄວາມຫຍຸ້ງຍາກຢູ່ເຂດຫ່າງໄກສອກຫຼີກ, ມີທຶນການສຶກສາໃຫ້ລູກຫຼານ ຊາວຫວຽດນາມອາໄສຢູ່ລາວ ໄປຮ່ຳຮຽນຢູ່ ຫວຽດນາມ ຫຼື ຮັບເບິ່ງແຍງດູແລລູກຫຼານເມື່ອເຂົາເຈົ້າມາຮຽນຢູ່ຫວຽດນາມ ຕື່ມອີກ.
ບູນມີ
