 |
| ສະຫາຍ ໂດ໊ວັນຈ໊ຽນ ມອບຂອງຂວັນທີ່ລະນຶກໃຫ້ສະຫາຍ ຄໍາເຜີຍ ບຸດດາວຽງ. ພາບ: ສໍານັກຂ່າວສານຫວຽດນາມ. |
ຕາງໜ້າຄະນະກໍາມະການສູນກາງແນວໂຮມປະເທດຊາດຫວຽດນາມ, ສະຫາຍ ໂດ໊ວັນຈ໊ຽນ ສະແດງຄວາມປິຕິຊົມຊື່ນທີ່ໄດ້ຕ້ອນຮັບຄະນະຜູ້ແທນຂັ້ນສູງຄະນະກໍາມະການສູນກາງແນວລາວສ້າງຊາດ ມາຢ້ຽມຢາມ ແລະເຮັດວຽກຢູ່ ຫວຽດນາມ.
ພ້ອມທັງເນັ້ນໜັກວ່າ ປີ 2022 ແມ່ນປີທີ່ສອງປະເທດ ຈັດຫຼາຍການເຄື່ອນໄຫວສະເຫຼີມສະຫຼອງວັນສ້າງຕັ້ງການພົວພັນທາງການທູດ ຄົບຮອບ 60 ປີ (5-9-1962/5-9-2022) ແລະວັນເຊັນສົນທິສັນຍາມິດຕະພາບ ແລະການຮ່ວມມື ຫວຽດນາມ-ລາວ ຄົບຮອບ 45 ປີ (18-7-1977/18-7-2022), ສະຫາຍ ໂດ໊ວັນຈ໊ຽນ ຢັ້ງຢືນວ່າ ພັກ, ລັດ, ແນວໂຮມປະເທດຊາດ ແລະປະຊາຊົນຫວຽດນາມ ຍາມໃດກໍ່ຖືເປັນສໍາຄັນ ແລະໃຫ້ບຸລິມະສິດສູງສຸດໃນການປັບປຸງ, ເພີ່ມທະວີສາຍພົວພັນອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ-ລາວ.
ໃນປີສາມັກຄີມິດຕະພາບຫວຽດນາມ-ລາວ ປີ 2022, ພັກ, ລັດຫວຽດນາມ, ບັນດາກະຊວງ, ຂະແໜງການ, ແນວໂຮມປະເທດຊາດຫວຽດນາມ, ອົງການຈັດຕັ້ງມະຫາຊົນ ແລະປະຊາຊົນຂອງຫວຽດນາມ ໄດ້ສົມທົບຢ່າງແໜ້ນແຟ້ນກັບບັນດາອົງການຂອງລາວ ເພື່ອຈັດຕັ້ງສໍາເລັດພິທີສະເຫຼີມສະຫຼອງ ກໍ່ຄືບັນດາການເຄື່ອນໄຫວທີ່ມີຄວາມໝາຍເພື່ອສືບຕໍ່ເພີ່ມພູນຄູນສ້າງ, ປັບປຸງສາຍພົວພັນມິດຕະພາບທີ່ດີງາມລະຫວ່າງສອງພັກ ແລະປະຊາຊົນສອງປະເທດ ຢ່າງໝັ້ນຄົງ.
ສະຫາຍ ໂດ໊ວັນຈ໊ຽນ ປາດຖະໜາວ່າ, ໃນການຢ້ຽມຢາມ, ເຮັດວຽກຢູ່ ຫວຽດນາມ, ອົງການແນວໂຮມສອງປະເທດ ຈະພ້ອມກັນແລກປ່ຽນ, ເຫັນດີເປັນເອກະພາບຕໍ່ມາດຕະການ ເພື່ອຜັນຂະຫຍາຍຂໍ້ຕົກລົງຮ່ວມມື ໄລຍະ 2022-2027 ທີ່ຫາກໍ່ລົງນາມ ຢ່າງມີປະສິດທິຜົນ; ສົມທົບກັນຈັດຕັ້ງກອງປະຊຸມສາກົນ ກ່ຽວກັບການກໍ່ສ້າງເສັ້ນຊາຍແດນ ລາວ-ຫວຽດນາມ ແຫ່ງສັນຕິພາບ, ມິດຕະພາບ, ຮ່ວມມື ພ້ອມກັນພັດທະນາປີ 2022 ຢູ່ ສປປ ລາວ ໃຫ້ປະສົບຜົນສໍາເລັດ ກໍ່ຄືບາງເນື້ອໃນທີ່ຕ່າງຝ່າຍຕ່າງມີຄວາມສົນໃຈ, ຈາກນັ້ນຊຸກຍູ້ວຽກງານສົມທົບກັນລະຫວ່າງສອງອົງການ ໃຫ້ນັບມື້ນັບເຂົ້າສູ່ລວງເລິກ, ແທດຈິງ ແລະມີປະສິດທິຜົນ.
ກອງທັບ
