| ສືບຕໍ່ຍົກສູງປະສິດທິຜົນການຮ່ວມມືດ້ານການທູດລະຫວ່າງຫວຽດນາມ ແລະກູບາ | |
| ແຂວງ ເຊີນລາ ເພີ່ມທະວີການຮ່ວມມືກັບບັນດາແຂວງທາງພາກເໜືອຂອງລາວ |
ບັນດາຕົວເລກທີ່ສະແດງອອກໃຫ້ເຫັນ
ໃນປີ 2019, ກ໊ວາງບິງ ແມ່ນແຂວງທຳອິດໃນ 10 ແຂວງຢູ່ເຂດຊາຍແດນ ຫວຽດນາມ - ລາວ ໄດ້ສຳເລັດບັນດາເນື້ອໃນຂອງການຕົກລົງລະຫວ່າງລັດຖະບານສອງປະເທດກ່ຽວກັບການແກ້ໄຂບັນຫາຄົນອົບພະຍົບຢ່າງເສລີ ແລະ ການແຕ່ງງານທີ່ບໍ່ຈົດທະບຽນຢູ່ເຂດຊາຍແດນ. ພ້ອມກັນນັ້ນ, ກໍແມ່ນທ້ອງຖິ່ນທຳອິດທີ່ປະທານປະເທດ ເຊັນຂໍ້ຕົກລົງອະນຸມັດໃຫ້ພົນລະເມືອງລາວໄດ້ຮັບສັນຊາດຫວຽດນາມ.
ຊຸມປີຜ່ານມາ, ຄົນອົບພະຍົບຢ່າງເສລີຈາກລາວຢູ່ເຂດຊາຍແດນໄດ້ຮັບສັນຊາດຫວຽດນາມນັບຮ້ອຍຄົນ. ພາຍຫຼັງໄດ້ສັນຊາດຫວຽດນາມແລ້ວ, ເຈົ້າໜ້າທີ່ຍຸຕິທຳຈິ່ງແນະນໍາວິທີເຮັດບັນດາລະບຽບການໃຫ້ພົນລະເມືອງຄື: ການຈົດທະບຽນການເກີດ, ການແຕ່ງດອງ, ພ້ອມກັນນັ້ນ ກໍໄດ້ແກ້ໄຂບັນດານະໂຍບາຍ, ສະຖຽນລະພາບການດໍາລົງຊີວິດ, ການເຊື່ອມຕົວເຂົ້າກັບຊີວິດປະຈໍາວັນທີ່ເຂດພັກພາອາໄສ.
ນັ້ນແມ່ນໜຶ່ງໃນບັນດາໝາກຜົນທີ່ແທດຈິງຈາກການພົວພັນຮ່ວມມືລະຫວ່າງກະຊວງ, ຂະແໜງການຍຸຕິທຳຂອງສອງປະເທດ. ການພົວພັນລະຫວ່າງສອງປະເທດໄດ້ຮັບການສ້າງຕັ້ງຂຶ້ນໃນປີ 1982 - ໜຶ່ງປີພາຍຫຼັງທີ່ກະຊວງຍຸຕິທຳ ຫວຽດນາມ ໄດ້ຮັບການສ້າງຕັ້ງຄືນໃໝ່, ດ້ວຍການລົງນາມໃນສັນຍາຮ່ວມມືດ້ານກົດໝາຍ ແລະ ຍຸຕິທໍາ ລະຫວ່າງ ສສ ຫວຽດນາມ ແລະ ສປປ ລາວ. ນີ້ແມ່ນເອກະສານສຳຄັນ, ເຊິ່ງເປັນພື້ນຖານດ້ານການເມືອງ - ຍຸຕິທໍາ ເພື່ອໃຫ້ບັນດາກະຊວງ, ຂະແໜງການຍຸຕິທຳຂອງສອງປະເທດພ້ອມກັນ ປະຕິບັດບັນດາການເຄື່ອນໄຫວຂອງການຮ່ວມມືດ້ານກົດໝາຍ ແລະ ຍຸຕິທຳ.
ນັບແຕ່ນັ້ນມາ, ການພົວພັນຮ່ວມມືລະຫວ່າງກະຊວງຍຸຕິທຳຫວຽດນາມ ແລະ ກະຊວງຍຸຕິທຳລາວ ໄດ້ຮັບການເພິ່ມພູນຄູນສ້າງ, ພັດທະນາຢ່າງບໍ່ຢຸດຢັ້ງ ເຊິ່ງບັນລຸໄດ້ບັນດາໝາກຜົນທີ່ຕັ້ງໜ້າ. ສອງກະຊວງໄດ້ມີການແລກປ່ຽນຄະນະຂັ້ນການນຳກະຊວງ 30 ກວ່າຄະນະ; ຄະນະຂັ້ນກົມ ແລະ ວິຊາການ 80 ກວ່າຄະນະ ເພື່ອຊອກຮູ້ ແລະ ແລກປ່ຽນປະສົບການເຊິ່ງກັນ ແລະ ກັນ, ຮັບໃຊ້ວຽກງານເຮັດໃຫ້ລະບົບກົດໝາຍສົມບູນແບບ, ປັບປຸງວຽກງານຍຸຕິທໍາ, ສ້າງລັດແຫ່ງອຳນາດກົດໝາຍສັງຄົມນິຍົມຢູ່ທັງສອງປະເທດ.
ກະຊວງຍຸຕິທຳຫວຽດນາມ ໄດ້ໜູນຊ່ວຍກະຊວງຍຸຕິທຳລາວໃນການຄົ້ນຄວ້າ ແລະ ຍື່ນສະເໜີຜ່ານບັນດາເອກະສານກົດໝາຍສຳຄັນຄື ລັດຖະທຳມະນູນສະບັບທຳອິດປີ 1991, ປະມວນກົດໝາຍແພ່ງ 2019, ກົດໝາຍວ່າດ້ວຍຄວາມຮັບຜິດຊອບຊົດເຊີຍຂອງລັດ 2019, ກົດໝາຍວ່າດ້ວຍການຈັດຕັ້ງປະຕິບັດຄໍາຕັດສິນທາງແພ່ງ 2022 ແລະ ປະຈຸບັນພວມສືບຕໍ່ໜູນຊ່ວຍໃນການສ້າງກົດຫມາຍປະກາດໃຊ້ເອກະສານຂໍ້ກຳນົດກົດໝາຍ, ກົດໝາຍວ່າດ້ວຍການລົ້ມລະລາຍຂອງວິສາຫະກິດ...
| ໂດຍກ່າວຄຳເຫັນທີ່ພິທີສະເຫຼີມສະຫຼອງ 40 ປີແຫ່ງວັນສ້າງຕັ້ງການຮ່ວມມືດ້ານກົດໝາຍ ແລະ ຍຸຕິທໍາ ລະຫວ່າງກະຊວງຍຸຕິທຳ ຫວຽດນາມ ແລະ ກະຊວງຍຸຕິທຳ ລາວ ໃນວັນທີ 24 ສິງຫາ, ທ່ານນາງ ຫງວຽນທິຮ່ວາງເວີນ, ຮອງຫົວໜ້າຜູ້ປະຈໍາການຄະນະພົວພັນຕ່າງປະເທດສູນກາງ ໃຫ້ຮູ້ວ່າ: 40 ປີຜ່ານມາ ການພົວພັນຮ່ວມມືລະຫວ່າງຫວຽດນາມ - ລາວ ເວົ້າລວມ ແລະ ການຮ່ວມມືດ້ານກົດໝາຍ ແລະ ຍຸຕິທຳເວົ້າສະເພາະ ນັບມື້ນັບຕິດພັນກັນຢ່າງສະໜິດສະໜົມ, ພັດທະນາຢ່າງເລິກເຊິ່ງ ແລະ ມີປະສິດທິຜົນ. ກະຊວງຍຸຕິທຳສອງປະເທດພົວພັນຮ່ວມມືນຳກັນ ບໍ່ພຽງແຕ່ແກ້ໄຂບັນຫາມະຫາພາກເທົ່ານັ້ນ, ຫາກຍັງແກ້ໄຂບັນຫາສະເພາະຄື ສັນຊາດ, ສໍາມະໂນຄົວສໍາລັບພົນລະເມືອງທີ່ດໍາລົງຢູ່ເຂດຊາຍແດນ, ຊຸກຍູ້ວຽກງານຈັດຕັ້ງການປະຕິບັດຄໍາຕັດສິນທາງແພ່ງ. |
ກະຊວງຍຸຕິທຳຫວຽດນາມ (ໂດຍຜ່ານມະຫາວິທະຍາໄລກົດໝາຍຮ່າໂນ້ຍ) ໄດ້ບຳລຸງສ້າງນັກສຶກສາລາວລະດັບປະລິນຍາຕີ 193 ຄົນ, ລະດັບປະລິນຍາໂທ 166 ຄົນ, ແລະ ພິເສດແມ່ນນັກຄົ້ົ້ນຄວ້າລາວ 4 ຄົນທີ່ໄດ້ຮັບໃນປະກາດສະນີຍະບັດລະດັບປະລິນຍາເອກ. ວິທະຍາໄລກົດໝາຍພາກກາງ (ເມື່ອກ່ອນແມ່ນໂຮງຮຽນກົດໝາຍດົງເຮີ໊ຍ ຊັ້ນກາງ) ໄດ້ບຳລຸງສ້າງນັກສຶກສາ 300 ກວ່າຄົນໃຫ້ບັນດາທ້ອງຖິ່ນຢູ່ລາວ.
ນອກຈາກນັ້ນ, ໂຄງການ ODA ໂດຍລັດຖະບານມອບໝາຍໃຫ້ກະຊວງຍຸຕິທຳຫວຽດນາມ ເປັນປະທານໜູນຊ່ວຍກະຊວງຍຸຕິທຳຂອງລາວ (ສະຖາບັນຍຸຕິທຳແຫ່ງຊາດລາວ) ກໍພວມເຂົ້າສູ່ໄລຍະສະຫຼຸບ. ໂດຍຜ່ານກົນໄກກອງປະຊຸມຍຸຕິທໍາຂອງບັນດາແຂວງທີ່ຮ່ວມເສັ້ນຊາຍແດນ ເຊິ່ງໄດ້ຈັດຂຶ້ນໃນປີ 2011, ສອງກະຊວງໄດ້ສົມທົບກັນແກ້ໄຂໄດ້ຫຼາຍວຽກງານສະເພາະ ເຊັ່ນ: ສໍາລັບຝ່າຍຫວຽດນາມໄດ້ແກ້ໄຂບັນຫາຄື ໃຫ້ພົນລະເມືອງລາວທີ່ອົບພະຍົບຢ່າງເສລີ ຮັບສັນຊາດຫວຽດນາມ ແລະ ການແຕ່ງດອງທີ່ບໍ່ຈົດທະບຽນ ຈໍານວນ 1.516 / 1.836 ກໍລະນີ (82,6%); ຝ່າຍລາວ, ແກ້ໄຂບັນຫາຮັບສັນຊາດລາວບັນລຸ 2.726 / 6.571 ກໍລະນີ (41.5%); ເພີ່ມທະວີວຽກງານເຜີຍແຜ່, ສຶກສາກ່ຽວກັບກົດໝາຍ, ໜູນຊ່ວຍດ້ານກົດໝາຍໃຫ້ປະຊາຊົນສອງປະເທດຢູ່ເຂດຊາຍແດນ, ປະກອບສ່ວນເຂົ້າໃນການສ້າງເຂດຊາຍແດນຫວຽດນາມ - ລາວ ສັນຕິພາບ, ສະຖຽນລະພາບ .
ເພີ່ມທະວີການພົວພັນຮ່ວມມື
ໂດຍຕາມທ່ານລັດຖະມົນຕີກະຊວງຍຸຕິທຳລາວ ໄພວີ ສີບົວລະພາ, ມູນເຊື້ອ 40 ປີແຫ່ງການຮ່ວມມືດ້ານກົດໝາຍ ແລະ ຍຸຕິທໍາ ລະຫວ່າງ ຫວຽດນາມ - ລາວ ໄດ້ນຳມາເຊິ່ງຜົນປະໂຫຍດທີ່ແທດຈິງຫຼາຍຢ່າງ, ບໍ່ພຽງແຕ່ຊ່ວຍໃຫ້ປະຊາຊົນບັນດາບ້ານທີ່ຢູ່ສອງຝັ່ງຊາຍແດນມີຊີວິດການເປັນຢູ່ຢ່າງໝັ້ນຄົງ, ພ້ອມກັນປົກປັກຮັກສາເສັ້ນຊາຍແດນຂອງປະເທດຊາດ, ຫາກຍັງປະກອບສ່ວນເຂົ້າໃນການເພີ່ມພູນຄູນສ້າງນໍ້າໃຈມິດຕະພາບແບບພິເສດ, ຊື່ສັດບໍລຸສຸດລະຫວ່າງສອງຊາດອີກດ້ວຍ.
 |
| ຕາງໜ້າກົມຮ່ວມມືສາກົນ ( ກະຊວງຍຸຕິທໍາຂອງສອງປະເທດ) ລົງນາມໂຄງການຮ່ວມມືໃນປີ 2023 (ພາບ: ທູຮັ່ງ). |
ໃນສະພາບການໃໝ່ຄືປະຈຸບັນ, ຫຼາຍບັນຫາສືບຕໍ່ໄດ້ຍົກອອກມາໃຫ້ກະຊວງ, ຂະແໜງການຍຸຕິທຳຂອງສອງປະເທດຄື ວຽກງານດ້ານສໍາມະໂນຄົວ, ສັນຊາດ, ການຢັ້ງຢືນຢູ່ເຂດຊາຍແດນ; ການໂຄສະນາ, ສຶກສາ ແລະ ໜູນຊ່ວຍດ້ານກົດໝາຍໃຫ້ແກ່ປະຊາຊົນຢູ່ເຂດຊາຍແດນ ຫວຽດນາມ-ລາວ; ການສົມທົບກັນເພື່ອຝຶກອົບຮົມຖັນແຖວພະນັກງານຍຸຕິທໍາ...
ໂດຍເສີມຂະຫຍາຍບັນດາໝາກຜົນທີ່ບັນລຸໄດ້, ໃນໄລຍະຈະມາເຖິງ ສອງກະຊວງຍຸຕິທຳຈະສືບຕໍ່ນໍາບັນດາການເຄື່ອນໄຫວຂອງການຮ່ວມມືເຂົ້າສູ່ລວງເລິກ ແລະ ມີປະສິດທິຜົນ. ສອງຝ່າຍຈະສຳເລັດການເຈລະຈາໂດຍໄວ ເພື່ອເຊັນສັນຍາວ່າດ້ວຍການໜູນຊ່ວຍດ້ານຍຸຕິທໍາທາງແພ່ງ, ຍົກສູງປະສິດທິຜົນຂອງການປະຕິບັດຄວາມຮຽກຮ້ອງຕ້ອງການດ້ານຍຸຕິທໍາທາງແພ່ງ, ເພີ່ມທະວີການສົມທົບກັນໃນບັນດາການເຄື່ອນໄຫວຮ່ວມມືກ່ຽວກັບການໜູນຊ່ວຍດ້ານຍຸຕິທໍາຫຼາຍຝ່າຍ ແລະ ພາກພື້ນ, ໃນນັ້ນມີການສົມທົບຜັນຂະຫຍາຍເພື່ອປະຕິບັດ ຫົວຄິດປະດິດສ້າງຂອງຫວຽດນາມ ກ່ຽວກັບການເພີ່ມທະວີໜູນຊ່ວຍດ້ານຍຸຕິທໍາທາງແພ່ງໃນອາຊຽນ.
ກະຊວງຍຸຕິທຳລາວ ຈະສືບຕໍ່ເພີ່ມທະວີສົ່ງນັກສຶກສາມາຫວຽດນາມຮຽນກົດໝາຍຢູ່ມະຫາວິທະຍາໄລກົດໝາຍຮ່າໂນ້ຍ ແລະ ວິທະຍາໄລກົດໝາຍພາກກາງ, ສົ່ງພະນັກງານໄປຮ່ຳຮຽນຢູ່ ຫວຽດນາມ ຕາມບັນດາທຶນການສຶກສາເພື່ອບໍາງລຸງສ້າງລະດັບປະລິນຍາໂທ ແລະ ລະດັບປະລິນຍາເອກດ້ານກົດໝາຍ.
ສອງອົງການຈັດຕັ້ງກໍຈະເພີ່ມທະວີການແລກປ່ຽນ ແລະ ປຶກສາຫາລື ເພື່ອຊຸກຍູ້ການຮ່ວມມືແກ້ໄຂບັນດາກໍລະນີກ່ຽວກັບສັນຊາດທີ່ກ່ຽວຂ້ອງກັບພົນລະເມືອງ ຫວຽດນາມ ແລະ ລາວ. ກ່ຽວກັບໂຄງການ ODA ທີ່ໜູນຊ່ວຍສະຖາບັນຍຸຕິທໍາແຫ່ງຊາດລາວ, ສອງກະຊວງຍຸຕິທຳຈະສົມທົບກັນຢ່າງແໜ້ນແຟ້ນເພື່ອສໍາເລັດໂຄງການໃນເດືອນທັນວາ 2022 ຕາມຂໍ້ກໍານົດຂອງເອກະສານໂຄງການ, ຮັບປະກັນມີປະສິດທິຜົນຢ່າງແທດຈິງ, ຕອບສະໜອງຄວາມຕ້ອງການກ່ຽວກັບການບໍາລຸງສ້າງຊັບພະຍາກອນມະນຸດໃຫ້ຝ່າຍລາວ.
ບັນດາອົງການຍຸຕິທໍາທ້ອງຖິ່ນສືບຕໍ່ຊຸກຍູ້ກວ່າອີກກ່ຽວກັບການໂຄສະນາເຜີຍແຜ່, ສຶກສາທາງກົດໝາຍ, ການຊ່ວຍເຫຼືອດ້ານກົດໝາຍດ້ວຍຫຼາຍຮູບແບບຢ່າງມີໄຫວພິບ, ມີຫົວຄິດປະດິດສ້າງ ເພື່ອຊ່ວຍໃຫ້ພົນລະເມືອງຂອງສອງປະເທດທີ່ດຳລົງຊີວິດຢູ່ເຂດຊາຍແດນໄດ້ເຂົ້າໃຈຢ່າງຄົບຖ້ວນບັນດາເນື້ອໃນຂອງສົນທິສັນຍາສາກົນ ແລະ ຂໍ້ຕົກລົງສາກົນທີ່ໄດ້ເຊັນລະຫວ່າງສອງປະເທດທີ່ກ່ຽວຂ້ອງກັບເຂດຊາຍແດນ, ຈາກນັ້ນ ຕ້ອງມີສະຕິປະຕິບັດຢ່າງເຂັ້ມງວດ, ບໍ່ລະເມີດກົດໝາຍເພື່ອຕ້ອງຖືກການແກ້ໄຂ, ຮູ້ວິທີນຳໃຊ້ກົດໝາຍເພື່ອເຂົ້າຮ່ວມການພົວພັນທາງສັງຄົມ, ປ້ອງກັນສິດ ແລະ ຜົນປະໂຫຍດອັນຊອບທຳຂອງຕົນ.
ທີ່ການຕ້ອນຮັບທ່ານລັດຖະມົນຕີ ກະຊວງຍຸຕິທຳລາວ ໄພວີ ສີບົວລີພາ ໃນວັນທີ 22 ສິງຫາ, ທ່ານນາຍົກລັດຖະມົນຕີ ຟ້າມມິງຈິ໋ງ ໄດ້ຕີລາຄາສູງບັນດາໝາກຜົນແຫ່ງການຮ່ວມມືດ້ານກົດໝາຍ ແລະ ຍຸຕິທໍາລະຫວ່າງ ຫວຽດນາມ ແລະ ລາວ ໃນຕະຫຼອດ 40 ປີຜ່ານມາ, ປະກອບສ່ວນອັນໃຫຍ່ຫຼວງເຂົ້າໃນການເຮັດໃຫ້ກົດໝາຍສົມບູນແບບ, ມຸ່ງໄປເຖິງການປັບປຸງກົດໝາຍຂອງສອງກະຊວງຍຸຕິທຳເວົ້າສະເພາະ ແລະ ລະຫວ່າງສອງພັກ, ສອງລັດ ແລະ ສອງປະເທດ ຫວຽດນາມ - ລາວ ເວົ້າລວມ; ຢືນຢັນວ່າ ຫວຽດນາມ ຍາມໃດກໍຖືການປັບປຸງກົດບັນຢັດແມ່ນໜຶ່ງໃນສາມຂັ້ນຕອນເພື່ອບຸກທະລຸຍຸດທະສາດຕາມຈິດໃຈເອກະສານກອງປະຊຸມໃຫຍ່ຂອງພັກຄັ້ງທີ XII, XIII.
ທ່ານນາຍົກລັດຖະມົນຕີ ໃຫ້ຮູ້ວ່າ, ຫວຽດນາມ ພ້ອມແລ້ວທີ່ຈະສືບຕໍ່ໜູນຊ່ວຍລາວໃນຂົງເຂດກົດໝາຍ ແລະ ຍຸຕິທຳ, ພິເສດແມ່ນການຊຸກຍູ້ຮ່ວມມືບຳລຸງສ້າງແຫຼ່ງຊັບພະຍາກອນມະນຸດ, ຝ່າຍລາວເພີ່ມທະວີໃນການສົ່ງນັກສຶກສາ, ນັກຮຽນ, ນັກຄົ້ນຄວ້າບຳລຸງສ້າງກ່ຽວກັບກົດໝາຍຢູ່ບັນດາສະຖານທີ່ບຳລຸງສ້າງຂອງຫວຽດນາມ, ແບ່ງປັນປະສົບການໃນການເຮັດໃຫ້ກົດບັນຍັດສົມບູນແບບ ແລະ ສ້າງລັດແຫ່ງອຳນາດກົດໝາຍສັງຄົມນິຍົມ.
ຫອມມາລາ
