| ມອບຫຼຽນກາລະນຶກ “ເພື່ອສັນຕິພາບ, ມິດຕະພາບລະຫວ່າງຊາດຕ່າງໆ” ໃຫ້ເອກອັກຄະລັດຖະທູດເດນມາກ ປະຈໍາ ຫວຽດນາມ | |
| ຫວຽດນາມ ຖືເປັນສຳຄັນການພົວພັນກັບ EU ແລະ ຮຸງກາຣີ |
ການຢ້ຽມຢາມ ແລະ ເຮັດວຽກຢູ່ ຫວຽດນາມ ຂອງຄະນະຜູ້ແທນວິສາຫະກິດ ເດນມາກ ໃນຂົງເຂດກະສິກຳ ແລະ ສະບຽງອາຫານ ແມ່ນສ່ວນໜຶ່ງໃນຄວາມມານະພະຍາຍາມຂອງສະຖານທູດ ເດນມາກ ປະຈຳຮ່າໂນ້ຍ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ, ສະມາຄົມກະສິກຳ ແລະ ສະບຽງອາຫານເດນມາກ ເພື່ອແນໃສ່ຟື້ນຟູການພົວພັນຮ່ວມມືທີ່ມີມາແຕ່ດົນນານ ລະຫວ່າງສອງປະເທດໃນຂົງເຂດກະສິກຳ ແລະ ສະບຽງອາຫານ ພາຍຫຼັງເກືອບ 2 ປີທີ່ຖືກຂາດວັກຂາດຕອນ ຍ້ອນການແຜ່ລະບາດຂອງພະຍາດໂຄວິດ-19.
ຈຸດປະສົງຕົ້ນຕໍຂອງຄະນະຜູ້ແທນວິສາຫະກິດ ເດນມາກ ແມ່ນແບ່ງປັນປະສົບການ ແລະ ແນະນຳບັນດາວິທີການແກ້ໄຂແຖວໜ້າໂລກ ເຊິ່ງໄດ້ຮັບການກວດກາຢັ້ງຢືນຂອງເດນມາກໃນການຜະລິດກະສິກຳ,ສະບຽງອາຫານ ແລະ ຊອກຫາກາລະໂອກາດຮ່ວມມືກັບບັນດາວິສາຫະກິດ ຫວຽດນາມ ໃນຂົງເຂດນີ້.
ເນື່ອງໃນໂອກາດນີ້, ສະຖານທູດເດນມາກ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ, ກົມສັດຕະວະແພດ ແລະ ອາຫານ ເດນມາກ ແລະ ສະມາຄົມກະສິກຳ ແລະ ສະບຽງອາຫານເດນມາກ ກໍ່ໄດ້ສົມທົບກັນຈັດຕັ້ງກອງປະຊຸມສຳມະນາ "ປະສົບການ ແລະ ວິທີການແກ້ໄຂຂອງເດນມາກ ໃນການຜະລິດສະບຽງອາຫານ ແລະ ກະສິກໍາແບບຍືນຍົງ" ຢູ່ນະຄອນຮ່າໂນ້ຍ ແລະ ນະຄອນໂຮ່ຈີມິນ ໃນວັນທີ 17 ແລະ 19 ສິງຫາ ຕາມລຳດັບ.
 |
| ເດນມາກ ພ້ອມແລ້ວທີ່ຈະໜູນຊ່ວຍ ຫວຽດນາມ ບຸກເຂົ້າສູ່ຕະຫຼາດ EU ຢ່າງເລິກເຊິ່ງກວ່າເກົ່າ. (ພາບ: vietnamplus) |
ກອງປະຊຸມຈະສ້າງເວທີປາໄສ ເພື່ອເຊື່ອມໂຍງ ແລະ ອຳນວຍຄວາມສະດວກໃຫ້ແກ່ການແລກປ່ຽນປະສົບການ, ຄວາມຮູ້ ແລະ ເຕັກໂນໂລຊີລະຫວ່າງບັນດານັກວາງແຜນກຳນົດນະໂຍບາຍ ແລະ ຜູ້ຄຸ້ມຄອງຂະແໜງການ ກໍຄືບັນດາວິສາຫະກິດ ເດນມາກ ແລະ ຫວຽດນາມ. ພາຍຫຼັງກອງປະຊຸມສຳມະນາ, ຈະມີການພົບປະ ແລະ ເຮັດວຽກຢ່າງເລິກເຊິ່ງ ລະຫວ່າງວິສາຫະກິດ ຫວຽດນາມ ແລະ ເດນມາກ.
ທ່ານຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຟຸ່ງດຶກຕ໋ຽນ ໄດ້ຕີລາຄາສູງການຢ້ຽມຢາມ ແລະ ເຮັດວຽກຂອງຄະນະຜູ້ແທນ 13 ວິສາຫະກິດ ເດນມາກ ໃນຂົງເຂດກະສິກຳ - ສະບຽງອາຫານ. ຖືວ່ານີ້ແມ່ນຄວາມມານະພະຍາຍາມອັນໃຫຍ່ຫຼວງຂອງຫວຽດນາມ ແລະ ເດນມາກ ເພື່ອຟື້ນຟູການພົວພັນຮ່ວມມືອັນຍາວນານລະຫວ່າງ 2 ປະເທດ ໃນຂົງເຂດກະສິກຳ ແລະ ສະບຽງອາຫານ ພາຍຫຼັງເກືອບ 2 ປີທີ່ຖືກຂາດວັກຂາດຕອນ ຍ້ອນການແຜ່ລະບາດຂອງພະຍາດໂຄວິດ-19.
ທ່ານຮອງລັດຖະມົນຕີ ຟຸ່ງດຶກຕ໋ຽນ ຢືນຢັນວ່າ: “ໂຄງການຮ່ວມມືລະຫວ່າງ ຫວຽດນາມ ແລະ ເດນມາກ ໃນຂົງເຂດຜະລິດກະສິກຳ ແລະ ສະບຽງອາຫານ ແມ່ນມີຄວາມໝາຍສຳຄັນໃນການພັດທະນາຂະແໜງການກະສິກຳຂອງ ຫວຽດນາມ. ບັນດາອົງການລັດຖະບານ ແລະ ບັນດາວິສາຫະກິດ ຫວຽດນາມ ສາມາດຖອດຖອນບົດຮຽນຈາກບັນດາຄູ່ຮ່ວມມື ເດນມາກ ແລະ ນຳໃຊ້ໃນສະພາບທີ່ຂະແໜງກະສິກຳ ຫວຽດນາມ ພວມມານະພະຍາຍາມພັດທະນາ ຕາມຕ່ອງໂສ້ມູນຄ່າ ແລະ ການຜະລິດແບບຍືນຍົງ, ມຸ່ງໄປເຖິງເປົ້າໝາຍພື້ນຖານກະສິກຳທັນສະໄໝ ແລະ ເຕັກໂນໂລຊີສູງ”.
ທ່ານ Troels Jakobsen ທີ່ປຶກສາຝ່າຍການຄ້າຢູ່ສະຖານທູດເດນມາກ ກ່າວວ່າ: ໃນຫຼາຍປີ, ບັນດາບໍລິສັດກະສິກຳຂອງເດນມາກ ໄດ້ລົງທຶນຢ່າງບໍ່ຢຸດຢັ້ງ ໃນການຜະລິດອຸປະກອນ ແລະ ວິທີການແກ້ໄຂການຜະລິດໃໝ່ເພື່ອຊຸກຍູ້ການຜະລິດ ແລະ ປັບປຸງຄຸນນະພາບຂອງຜະລິດຕະພັນໃນຂະນະທີ່ມີຄວາມປະຢັດນ້ຳ ແລະ ພະລັງງານຫຼາຍກວ່າ”.
ທ່ານ Troels Vensild, ຫົວໜ້າອົງການຮ່ວມມືສາກົນ, ກົມອາຫານ ແລະ ສັດຕະວະແພດ ເດນມາກ ແບ່ງປັນວ່າ: “ເມື່ອຫວຽດນາມ ພ້ອມແລ້ວທີ່ຈະເປັນຂົວຕໍ່ໃຫ້ເດນມາກເຂົ້າສູ່ຕະຫຼາດ ອາຊຽນ, ເດນມາກ ກໍພ້ອມແລ້ວທີ່ຈະເປັນຂົວຕໍ່ໃຫ້ຫວຽດນາມ ເຂົ້າສູ່ຕະຫຼາດ EU ຢ່າງເລິກເຊິ່ງກວ່າອີກ. ດ້ວຍຄວາມສາມາດບົ່ມຊ້ອນ ແລະ ທ່າໄດ້ປຽບຫລາຍຢ່າງ, ຂ້າພະເຈົ້າຄາດວ່າ ບັນດາອົງການລັດຖະບານ, ວິສາຫະກິດ ແລະ ບັນດາຫົວໜ່ວຍຂອງ 2 ຝ່າຍ ຈະຮ່ວມມືຢ່າງເລິກເຊິ່ງກວ້າງຂວາງໃນໄລຍະຈະມາເຖິງ”.
ຄະນະຜູ້ແທນວິສາຫະກິດ ເດນມາກ ໃນຂົງເຂດກະສີກຳ - ສະບຽງອາຫານ ແມ່ນສ່ວນໜຶ່ງຂອງການພົວພັນຄູ່ຮ່ວມມືໄລຍະຍາວລະຫວ່າງ ເດນມາກ ແລະ ຫວຽດນາມ ເພື່ອໜູນຊ່ວຍ ຫວຽດນາມ ເພື່ອຫັນຂະແໜງກະສິກຳ ແລະ ສະບຽງອາຫານ ມຸ່ງໄປຕາມທິດສີຂຽວ ແລະ ໝັ້ນຄົງ.
ນັບແຕ່ເມື່ອສ້າງຕັ້ງການພົວພັນທາງການທູດເມື່ອປີ 1971, ຫວຽດນາມ ແລະ ເດນມາກ ໄດ້ມີການພົວພັນຮ່ວມມືຢ່າງແໜ້ນແຟ້ນ. ປະຈຸບັນ, ຫວຽດນາມ ສືບຕໍ່ແມ່ນປະເທດຄູ່ຮ່ວມມືສຳຄັນຂອງລັດຖະບານ ເດນມາກ ໃນບັນດາຂົງເຂດ ຄື: ການເຕີບໂຕສີຂຽວ, ພະລັງງານ, ນ້ຳ, ສຸຂະພາບ, ການສຶກສາ, ຄວາມປອດໄພດ້ານສະບຽງອາຫານ, ວັດທະນະທຳ ແລະ ການຄ້າ.
ຄຳຮຸ່ງ
