ລາວຈັດຕັ້ງຜັນຂະຫຍາຍ ບັນດາເປົ້າໝາຍຂອງການພັດທະນາແບບຍືນຍົງ

ທ່ານ ສອນ​ໄຊ ສີ​ພັນ​ດອນ.(ພາບ: vientianemai.net)

ທ່ານ ສອນ​ໄຊ ສີ​ພັນ​ດອນ ໄດ້​ກ່າວ​ວ່າ: ລັດ­ຖະ­ບານ ສປປ ລາວ ໄດ້​ເອົາ­ໃຈ­ໃສ່​ໃນ​ການ­ຈັດ­ຕັ້ງ​ຜັນ​ຂະ­ຫຍາຍ​ບັນ­ດາ​ເປົ້າ​ໝາຍ​ຕ່າງໆ​ຂອງ​ການ​ພັດ­ທະ­ນາ​ແບບ​ຍືນ​ຍົງ (SDGs) ໂດຍ​ສະ­ເພາະ ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ 18 ຂອງ ສປປ ລາວ ກ່ຽວ​ກັບ​ການ​ເກັບ​ກູ້​ລະ­ເບີດ​ບໍ່​ທັນ​ແຕກ ເພື່ອ​ສຸມ​ໃສ່​ການ​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ການ​ເປັນ​ປະ ເທດ​ດ້ອຍ​ພັດ­ທະ­ນາ (LDC) ກໍ​ຈະ​ໄດ້​ຖືກ​ປະ​ເມີນ​ເປັນ​ຄັ້ງ​ທີ​ສອງ ໃນ​ປີ 2021 ຖ້າ​ຫາ​ກວ່າ​ຜ່ານ​ການ​ປະ​ເມີນ​ກໍ​ຈະ​ສາ­ມາດ​ປະ­ກາດ​ຫຼຸດ​ພົ້ນ​ອອກ​ໄດ້ ໃນ​ປີ 2024 ໃນ​ປັດ­ຈຸ­ບັນ ສປປ ລາວ ສາ­ມາດ​ບັນ­ລຸ​ໄດ້ 2 ໃນ 3 ເງື່ອນ­ໄຂ ຕາມ​ມາດ­ຖານ​ທີ່​ໄດ້​ກຳ­ນົດ​ໄວ້ ຄື: ລວມ​ຍອດ​ລາຍ​ໄດ້​ແຫ່ງ​ຊາດ​ຕໍ່​ຫົວ​ຄົນ (GNI) ແລະ ດັດ­ຊະ­ນີ​ຊັບ​ສິນ​ມະ­ນຸດ (HAI) ສຳ­ລັບ​ດັດ­ຊະ­ນີ​ຄວາມ​ບອບ​ບາງ​ດ້ານ​ເສດ­ຖະ­ກິດ (EVI) ຍັງ​ບໍ່​ສາ­ມາດ​ບັນ­ລຸ​ໄດ້​ຕາມ​ມາດ­ຖານ ໜຶ່ງ​ໃນ​ສາ­ເຫດ​ແມ່ນ ລັດ ຖະ​ບານ​ຈຳ­ເປັນ​ຕ້ອງ​ໄດ້​ຫັນ​ງົບ­ປະ­ມານ​ປົກ­ກະ­ຕິ ໄປ​ສູ່​ການ​ແກ້​ໄຂ​ໄພ­ພິ­ບັດ ແລະ ເລັ່ງ​ປັບ­ປຸງ​ພື້ນ­ຖານ​ໂຄງ​ລ່າງ​ທີ່​ຖືກ​ທຳ­ລາຍ ໃຫ້​ກັບ​ມາ​ນຳ​ໃຊ້​ໄດ້​ປົກ­ກະ­ຕິ​ໂດຍ​ໄວ.

ໂຄງ­ການ​ພັດ­ທະ­ນາ​ຊົນ​ລະ​ກະ­ເສດ ແລະ ຊົນ­ນະ­ບົດ​ຮອບ­ດ້ານ ມີ​ຈຸດ­ປະ­ສົງ​ເພື່ອ​ຍົກ​ລະ­ດັບ​ການ​ປັບປຸງ​ການ​ດຳ­ລົງ​ຊີ­ວິດ ແລະ ເສດ­ຖະ­ກິດ-ສັງ­ຄົມ​ໃຫ້​ດີ​ຂຶ້ນ ເປັນ­ຕົ້ນ ການ​ສົ່ງ­ເສີມ​ໃຫ້​ມີ​ຜະ­ລິດ​ຕະ​ພັນ​ດ້ານ​ກະ­ສິ­ກຳ ໂດຍ​ຜ່ານ​ການ​ສະ­ໜອງ​ນ້ຳ​ຊົນ­ລະ­ປະ­ທານ​ໃຫ້​ໄດ້ 2 ລະ­ດູ​ຕໍ່​ປີ ປັບ­ປຸງ​ລະ­ບົບ​ຊົນ­ລະ­ປະ­ທານ​ເພື່ອ​ປ້ອງ​ກັນ​ໄພ​ນ້ຳ​ຖ້ວມ ແລະ ແຫ້ງ­ແລ້ງ ເພື່ອ​ເພີ່ມ​ລາຍ​ຮັບ ຫຼຸດ­ຜ່ອນ​ຄວາມ­ທຸກ​ຍາກ ສະ­ໜອງ​ເຄື່ອງ​ຈັກ​ກະ­ສິ­ກຳ​ດ້ວຍ​ຮູບ​ແບບ​ການ​ຖ່າຍ​ໂອນ​ຄວາມ​ຮູ້​ດ້ານ​ເຕັກ​ໂນ​ໂລ​ຊີ​ທັນ​ສະ­ໄໝ ເຝິກ­ອົບ­ຮົມ​ວຽກ​ງານ​ສົ່ງ­ເສີມ​ກະ­ສິ­ກຳ ແລະ ວຽກ​ງານ​ການ​ບໍ­ລິ­ຫານ​ຈັດ­ການ​ຄຸ້ມ​ຄອງ​ຊົນ­ລະ­ປະ­ທານ ໂຄງ­ການ​ດັ່ງ­ກ່າວ​ຕັ້ງ​ຢູ່​ເມືອງ​ສອງ​ຄອນ ແລະ ເມືອງ​ຈຳ​ພອນ ແຂວງ​ສະ­ຫວັນ​ນະ​ເຂດ ມີ​ປະ­ຊາ­ຊົນ​ໂດ້​ຮັບ​ຜົນ​ປະ­ໂຫຍດ​ກວມ​ເອົາ 13 ບ້ານ 2.855 ຄອບ­ຄົວ​ພົນ­ລະ­ເມືອງ 16.761 ຄົນ.

ບັນ­ດາ​ໜ້າ​ວຽກ​ທີ່​ຈະ​ຕ້ອງ​ປະ­ຕິ­ບັດ​ປະ­ກອບ​ມີ ຟື້ນ​ຟູ​ສ້ອມ­ແປງ ກໍ່­ສ້າງ​ຫົວ​ງານ​ຈັກ­ສູບ­ນ້ຳ ເມືອງ​ສອງ​ຄອນ ແລະ ຫົວ​ງານ​ຈັກ­ສູບ­ນ້ຳ​ໂພນ​ມ່ວງ ເມືອງ​ຈຳ​ພອນ 2 ແຫ່ງ ຟື້ນ​ຟູ​ສ້ອມ­ແປງ ກໍ່­ສ້າງ​ລະ­ບົບ​ຊົນ­ລະ­ປະ­ທານ ແລະ ເສັ້ນ­ທາງ​ຂົນ­ສົ່ງ​ຜົນ​ຜະ­ລິດ​ກະ­ສິ­ກຳ ພ້ອມ​ດ້ວຍ​ອາ­ຄານ​ຄົບ​ຊຸດ ຄວາມ​ຍາວ 38,8 ກິ­ໂລ­ແມັດ ໃຫ້​ຮັບ­ປະ­ກັນ​ການ​ສະ­ໜອງ​ນ້ຳ ເນື້ອ­ທີ່ 1.674 ເຮັກ­ຕາ ປັບ​ເນື້ອ­ທີ່​ນາ​ໄຮ່​ໃຫຍ່ ກໍ່­ສ້າງ​ລະ­ບົບ​ຊົນ­ລະ­ປະ­ທານ​ຄົບ​ຊຸດ ເມືອງ​ລະ 50 ເຮັກ­ຕາ ລວມ 100 ເຮັກ­ຕາ ກໍ່­ສ້າງ​ເສັ້ນ­ທາງ​ຊົນ­ນະ­ບົດ​ຈາກ​ບ້ານ​ໂພນ​ທອງ-ຫົວ​ງານ​ໂພນ​ມ່ວງ ໄລ­ຍະ 3,5 ກິ­ໂລ­ແມັດ ຢູ່​ເມືອງ​ຈຳ​ພອນ ກໍ່­ສ້າງ​ສູນ​ພັດ­ທະ­ນາ​ຊຸມ​ຊົນ ແລະ ເຕັກ­ນິກ​ກະ​ສິ ກຳ 2 ແຫ່ງ ກໍ່­ສ້າງ​ໂຮງ­ສີ​ເຂົ້າ​ທັນ​ສະ​ໃໝ ຢູ່​ບ້ານ​ແບ່ງ​ຄຳ​ໄຫຼ ເມືອງ​ຈຳ​ພອນ 1 ແຫ່ງ ແລະ ສະ­ໜອງ​ກົນ​ຈັກ​ກະ­ສິ­ກຳ ເມືອງ​ລະ 2 ຊຸດ ກໍ່­ສ້າງ​ສາງ​ເກັບ​ມ້ຽນ 2 ແຫ່ງ ໂດຍ​ໄລ­ຍະ​ການ­ຈັດ­ຕັ້ງ​ປະ­ຕິ­ບັດ ແມ່ນ​ນັບ​ແຕ່​ມື້​ລົງ​ລາຍ​ເຊັນ​ເປັນ­ຕົ້ນ​ໄປ ແລະ ຈະ​ສຳ­ເລັດ​ໃນ​ປີ 2022.

（ໄຊພອນ）