 |
| ການເຮັດວຽກລະຫວ່າງສອງຝ່າຍ (ພາບ: congthuong.vn) |
ຕອນເຊົ້າວັນທີ 21 ກໍລະກົດ, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຫງວຽນຮົ່ງຢຽນ ໄດ້ໃຫ້ການຕ້ອນຮັບ ແລະ ປະດັບຫຼຽນໄຊໃຫ້ທ່ານເອກອັກຄະລັດຖະທູດ ອັງກິດ ແລະ ອຽກລັງເໜືອ ປະຈຳ ຫວຽດນາມ Gareth Ward.
ທີ່ການພົບປະແລກປ່ຽນໃນເວລາອັນສັ້ນໆ, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຫງວຽນຮົ່ງຢຽນ ເນັ້ນໜັກເຖິງການປະກອບສ່ວນພິເສດຂອງທ່ານເອກອັກຄະລັດຖະທູດ ອັງກິດ ໃນໄລຍະດຳລົງຕຳແໜ່ງ 4 ປີຢູ່ ຫວຽດນາມ. ຍ້ອນຄວາມມານະພະຍາຍາມຂອງທ່ານເອກອັກຄະລັດຖະທູດ, ການຮ່ວມມືທີ່ເປັນມູນເຊື້ອ ແລະ ໄມຕີຈິດມິດຕະພາບລະຫວ່າງ ຫວຽດນາມ ແລະ ອັງກິດ ໄດ້ຮັບການພັດທະນາ ແລະ ສະໜິດຕິດພັນກ່ວາເວລາໃດໝົດ.
ຫວ່າງມໍ່ໆມານີ້, ສອງຝ່າຍໄດ້ຍິນດີເປັນສັກຂີພິຍານການຢ້ຽມຢາມຂັ້ນສູງຫຼາຍຄັ້ງຂອງປະມຸກລັດ ແລະ ການນຳຂັ້ນສູງຂອງສອງປະເທດ. ພິເສດແມ່ນການຢ້ຽມຢາມອັງກິດ ຂອງນາຍົກລັດຖະມົນຕີຫວຽດນາມ ແລະ ເຂົ້າຮ່ວມ ກອງປະຊຸມ COP26 ເດືອນພະຈິກ 2021. ຫວ່າງມໍ່ໆມານີ້ແມ່ນການຢ້ຽມຢາມອັງກິດຂອງທ່ານປະທານສະພາແຫ່ງຊາດຫວຽດນາມ ເວືອງດິ່ງເຫ້ວ ໃນທ້າຍເດືອນ ມິຖຸນາ 2022. ກົງກັນຂ້າມ, ຝ່າຍອັງກິດກໍ່ຈັດຕັ້ງການຢ້ຽມຢາມຂອງການນຳຂັ້ນສູງ, ລັດຖະມົນຕີ, ລັດຖະມົນຕີການຕ່າງປະເທດໄປຍັງ ຫວຽດນາມ. ຫວຽດນາມ ແລະ ອັງກິດ ພວມມຸ່ງໄປເຖິງການສະເຫຼີມສະຫຼອງ 50 ປີແຫ່ງວັນສ້າງສາຍພົວພັນທາງການທູດໃນປີ 2023.
ໃນການພົບປະ ແລະ ເຮັດວຽກລະຫວ່າງການນຳສອງປະເທດໃນ 4 ປີຜ່ານມາ, ອັງກິດ ໄດ້ສະແດງໃຫ້ເຫັນຢ່າງຈະແຈ້ງກ່ຽວກັບການຊ່ວຍເຫຼືອ ຫວຽດນາມ ໃຫ້ມີບາດກ້າວພັດທະນາຢ່າງວ່ອງໄວໃນຂະບວນການພັດທະນາເສດຖະກິດ, ການຄ້າ ແລະ ອຸດສາຫະກຳ, ພິເສດແມ່ນໃນວິວັດການຫັນປ່ຽນພະລັງງານໄປສູ່ທິດສີຂຽວ, ຍືນຍົງກວ່າ ເພື່ອປັບຕົວເຂົ້າກັບການປ່ຽນແປງຂອງດິນຟ້າອາກາດ. ໃນຂອບເຂດການຢ້ຽມຢາມຂັ້ນສູງ, ບັນດາຂໍ້ຕົກລົງ ແລະ ບົດບັນທຶກຊ່ວຍຈຳທີ່ໄດ້ລົງນາມລະຫວ່າງບັນດາອົງການລັດຖະບານ ແລະ ບັນດາວິສາຫະກິດໃຫຍ່ຂອງ 2 ປະເທດໄດ້ຮັບການລົງນາມດ້ວຍມູນຄ່ານັບຫຼາຍສິບຕື້ໂດລາສະຫະລັດ. ປະຈຸບັນ, ມີວິສາຫະກິດອັງກິດຂະໜາດໃຫຍ່ຫຼາຍແຫ່ງມາລົງທຶນຢູ່ຫວຽດນາມ, ພິເສດແມ່ນດ້ານພະລັງງານ, ການທະນາຄານ ແລະ ການບໍລິການ.
ໄລ່ຮອດເດືອນ ມິຖຸນາ 2022, ອັງກິດ ມີ 467 ໂຄງການລົງທຶນເຂົ້າຫວຽດນາມ, ດ້ວຍຍອດຈຳນວນທຶນຈົດທະບຽນເກືອບ 4,2 ຕື້ USD. ທັງໝົດນີ້ເນັ້ນໜັກເຖິງການພົວພັນດ້ານເສດຖະກິດລະຫວ່າງ 2 ປະເທດທີ່ພວມໄດ້ຮັບການເສີມຂະຫຍາຍ ແລະ ພັດທະນາຢ່າງເຂັ້ມແຂງໃນສະພາບການປ່ຽນແປງທີ່ສັບສົນຂອງເສດຖະກິດໂລກໃນປະຈຸບັນ.
2 ຝ່າຍທົບທວນຄືນບັນດາຜົນສຳເລັດໃນການພົວພັນເສດຖະກິດ ແລະ ການຄ້າ. ທ່ານເອກອັກຄະລັດຖະທູດໄດ້ປະກອບສ່ວນອັນໃຫຍ່ຫຼວງ, ພິເສດແມ່ນການຊຸກຍູ້ການເຈລະຈາ ແລະ ລົງນາມໃນສັນຍາການຄ້າເສລີ ຫວຽດນາມ - ອັງກິດ (UKVFTA) ແລະ ການຈັດຕັ້ງກອງປະຊຸມຄະນະກຳມະການການຄ້າ ຂອງສັນຍາ UKVFTA. ພາຍຫຼັງ 1 ປີແຫ່ງການຜັນຂະຫຍາຍ, ສາມາດເວົ້າໄດ້ວ່າ: ສັນຍາດັ່ງກ່າວໄດ້ນຳມາເຊິ່ງໝາກຜົນອັນຕັ້ງໜ້າໃນການເຕີບໂຕດ້ານການຄ້າສອງສົ້ນໃນປີ 2021, ເຖິງວ່າຈະມີການແຜ່ລະບາດຂອງພະຍາດກໍ່ຕາມ ແຕ່ກໍຍັງຮັກສາອັດຕາການເຕີບໂຕໃນ 6 ເດືອນຕົ້ນປີ 2022.
ນອກຈາກນັ້ນ, ຫວຽດນາມ ແລະ ອັງກິດ ຍັງໄດ້ຈັດຕັ້ງສຳເລັດກອງປະຊຸມຄະນະກຳມະການປະສົມກ່ຽວກັບການຮ່ວມມືດ້ານເສດຖະກິດ ແລະ ການຄ້າ (JETCO) ຄັ້ງທີ 12 ໃນເດືອນ ພຶດສະພາ 2022 ຢູ່ ລອນດອນ, ກອງປະຊຸມຄັ້ງທີ 11 ປີ 2019 ຢູ່ນະຄອນ ຮະລອງ ໃນໄລຍະອາຍຸການຂອງທ່ານເອກອັກຄະລັດຖະທູດ.
ທ່ານລັດຖະມົນຕີຖືວ່າ, ນີ້ແມ່ນໝາກຜົນການຮ່ວມມືທີ່ດີເດັ່ນໃນໄລຍະດຳລົງຕຳແໜ່ງຂອງທ່ານເອກອັກຄະລັດຖະທູດ, ຊ່ວຍໜູນກອງປະຊຸມດຳເນີນໄປຢ່າງສະດວກ, ບັນລຸໄດ້ຫຼາຍຂໍ້ຕົກລົງກ່ຽວກັບການຮ່ວມມືດ້ານເສດຖະກິດ - ການຄ້າຕາມຄາດໝາຍທີ່ໄດ້ວາງອອກ. ທີ່ກອງປະຊຸມ JETCO 12 ຄັ້ງຫຼ້າສຸດໂດຍທ່ານຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ດັ້ງຮ່ວາງອານ ແລະ ທ່ານລັດຖະມົນຕີກະຊວງການຕ່າງປະເທດ, ກົມການຄ້າສາກົນ ອັງກິດ Penny Mordaunt, 2 ຝ່າຍໄດ້ມີການປຶກສາຫາລືຢ່າງຕັ້ງໜ້າ, ເຫັນດີເປັນເອກະສັນກ່ຽວກັບການຮ່ວມມືທີ່ແທດຈິງ ແລະ ລະອຽດຄື: ການທູດ; COP26 ແລະ ພະລັງງານທົດແທນ; ຜະລິດຕະພັນກະເສດ, ອາຫານ ແລະ ເຄື່ອງດື່ມ; ເຕັກໂນໂລຊີ ແລະ ເຕັກໂນໂລຊີທາງດ້ານການເງິນ; ການດູແລສຸຂະພາບ ແລະ ການຢາ; ການສຶກສາ; ອຸດສາຫະກໍາ; ການຄຸ້ມຄອງຕະຫຼາດ ແລະ ການປ້ອງກັນການຄ້າ.
ທ່ານເອກອັກຄະລັດຖະທູດອັງກິດ Gareth Ward ກໍ່ເນັ້ນໜັກເຖິງຄວາມມຸ່ງມາດປາດຖະໜາ ເຂົ້າຮ່ວມ CPTPP ຂອງ ອັງກິດ ແລະ ຮຽກຮ້ອງຫວຽດນາມ ສະໜັບສະໜູນ. ພາຍຫຼັງໄດ້ຮັບຟັງ, ທ່ານລັດຖະມົນຕີ ຫງວຽນຮົ່ງຢຽນ ຢືນຢັນຄືນໃໝ່ການສະໜັບສະໜູນ ອັງກິດ ເຂົ້າຮ່ວມ CPTPP ໂດຍໄວ. ທ່ານລັດຖະມົນຕີຖືວ່າ: ການເຂົ້າຮ່ວມຂອງອັງກິດບໍ່ພຽງແຕ່ຈະເປີດກວ້າງຂອບເຂດເປີດຕະຫຼາດຂອງອັງກິດ ແລະ ບັນດາສະມາຊິກ CPTPP ເທົ່ານັ້ນ, ຫາກຍັງຈະເພີ່ມທະວີທີ່ຕັ້ງຂອງສັນຍາໃນບົດບາດເປັນ FTA ຮຸ່ນໃໝ່, ມາດຕະຖານສູງ, ແມ່ນຮູບແບບການຮ່ວມມືດ້ານການຄ້າຂອງສະຕະວັດທີ 21. ທ່ານລັດຖະມົນຕີກໍ່ຂອບໃຈສະຖານທູດອັງກິດ ປະຈຳ ຫວຽດນາມ ທີ່ໄດ້ສົມທົບກັນຢ່າງແໜ້ນແຟ້ນ ແລະ ທັນການ, ສ້າງຄວາມສະດວກໃຫ້ແກ່ຂະບວນການພົວພັນຮ່ວມມື 2 ຝ່າຍ ຫວຽດນາມ - ອັງກິດ ໃນຂອບເຂດການເຈລະຈາເພື່ອເຂົ້າຮ່ວມ CPTPP ໃຫ້ເປັນຢ່າງດີ.
ພາຍຫຼັງການໂອ້ລົມສົນທະນາ, ເພື່ອຮັບຮູ້ບັນດາການປະກອບສ່ວນຢ່າງຕັ້ງໜ້າຂອງທ່ານເອກອັກຄະລັດຖະທູດ, ໂດຍຕາງໜ້າໃຫ້ກະຊວງອຸດສາຫະກຳ ແລະ ການຄ້າ ສາທາລະນະລັດ ສັງຄົມນິຍົມ ຫວຽດນາມ ທ່ານລັດຖະມົນຕີ ໄດ້ປະດັບຫຼຽນໄຊ “ເພື່ອພາລະກິດພັດທະນາອຸດສາຫະກຳ ແລະ ການຄ້າ ຫວຽດນາມ” ໃຫ້ທ່ານເອກອັກຄະລັດຖະທູດ ອັງກິດ ປະຈຳ ຫວຽດນາມ Gareth Ward ທີ່ໄດ້ມີການເຄື່ອນໄຫວຢ່າງຕັ້ງໜ້າ ແລະ ມີການປະກອບສ່ວນອັນໃຫຍ່ຫຼວງເຂົ້າໃນການພັດທະນາ ແລະ ການຮ່ວມມືລະຫວ່າງ ຫວຽດນາມ - ອັງກິດ ໃນຂົງເຂດອຸດສາຫະກຳ ແລະ ການຄ້າ ແລະ ເພື່ອຄວາມສາມັກຄີ, ມິດຕະພາບລະຫວ່າງປະຊາຊົນສອງປະເທດ ຫວຽດນາມ - ອັງກິດ. , ທ່ານເອກອັກຄະລັດຖະທູດຈະສິ້ນສຸດອາຍຸການໃນທ້າຍເດືອນ ກໍລະກົດ 2022. ທ່ານລັດຖະມົນຕີຫວັງວ່າ, ພາຍຫຼັງສິ້ນສຸດການເຮັດວຽກຢູ່ຫວຽດນາມ, ໃນພາລະກິດໃໝ່ຂອງຕົນ, ທ່ານເອກອັກຄະລັດຖະທູດ ຈະສືບຕໍ່ປະກອບສ່ວນໃຫ້ແກ່ການພັດທະນາຂອງຫວຽດນາມ ແລະ ແຕ່ລະການພົວພັນລະຫວ່າງສອງປະເທດ, ຖືຫວຽດນາມແມ່ນບ້ານເກີດແຫ່ງທີສອງຂອງຕົນ ແລະ ກັບຄືນມາເລື້ອຍໆ.
ປີ 2021, ຍ້ອນສັນຍາການຄ້າເສລີອັງກິດ-ຫວຽດນາມ (UKVFTA), ວົງເງິນການຄ້າສອງສົ້ນລະຫວ່າງ ຫວຽດນາມ ແລະ ອັງກິດ ໄດ້ຮັບການເຕີບໂຕຢ່າງກະໂດດຂັ້ນ, ໂດຍບໍ່ຫົວຊາຕໍ່ພະຍາດໂຄວິດ - 19, ກໍບັນລຸ 6,6 ຕື້ USD, ເພີ່ມຂຶ້ນ 17,2% ເມື່ອທຽບໃສ່ປີ 2020.ໃນນັ້ນ ການສົ່ງອອກຂອງ ຫວຽດນາມ ບັນລຸເກືອບ 5,8 ຕື້ USD, ເພີ່ມຂຶ້ນ 16,4%, ການສົ່ງອອກຂອງອັງກິດບັນລຸ 849 ລ້ານ USD, ເພີ່ມຂຶ້ນ 23,6%.
ໃນ 6 ເດືອນຕົ້ນປີ 2022, ວົງເງິນການນຳເຂົ້າ-ສົ່ງອອກຂອງ ຫວຽດນາມ - ອັງກິດ ບັນລຸເກືອບ 3,3 ຕື້ USD, ເພີ່ມຂຶ້ນ 2,5% ເມື່ອທຽບໃສ່ໄລຍະດຽວກັນຂອງປີ 2021. ໃນນັ້ນ, ວົງເງິນສົ່ງອອກບັນລຸ 2,9 ຕື້ USD, ເພີ່ມຂຶ້ນເລັກໜ້ອຍ 1,2% ເມື່ອທຽບໃສ່ໄລຍະດຽວກັນ. ວົງເງິນການນຳເຂົ້າບັນລຸ 372,5 ລ້ານ USD, ເພີ່ມຂຶ້ນ 14,6%.
ບຸນຄົງ
