ມຸ່ງໄປສູ່ການຮັບຮອງເອົາ “ໜັງສືຜ່ານແດນວັກຊີນ” ລະຫວ່າງ ຫວຽດນາມ ແລະອິນໂດເນເຊຍ
	ຫວຽດນາມ ແລະອິນໂດເນເຊຍ ແມ່ນສອງຄູ່ຮ່ວມມືທີ່ສຳຄັນຢູ່ພາກພື້ນ ແລະ ໃນໂລກ

ທ່ານ ເຈິ່ນແທັງເໝິນ ແລະທ່ານນາງ Sylviana Murin. ພາບ: daibieunhandan.vn

ທ່ານ ເຈິ່ນແທັງເໝິນ ເນັ້ນໜັກວ່າ ຫວຽດນາມ ຍາມໃດກໍ່ຖືເປັນສໍາຄັນ ແລະປາດຖະໜາຢາກພັດທະນາການພົວພັນມິດຕະພາບທີ່ເປັນມູນເຊື້ອ ແລະຄູ່ຮ່ວມມືຍຸດທະສາດກັບອິນໂດເນເຊຍ ກວ່າອີກ. ໃນໄລຍະຈະມາເຖິງ, ສອງຝ່າຍຕ້ອງຮ່ວມມືກັນຢ່າງແໜ້ນແຟ້ນກວ່າ ເພື່ອນໍາການພົວພັນຄູ່ຮ່ວມມືຍຸດທະສາດຂຶ້ນສູ່ລະດັບສູງໃໝ່, ໂດຍສະເພາະແມ່ນຊ່ອງຮ່ວມມືລັດຖະສະພາເພື່ອໃຫ້ສົມກັບການພົວພັນຄູ່ຮ່ວມມືຍຸດທະສາດສອງປະເທດ. ທ່ານນາງ Sylviana Murin ເນັ້ນໜັກວ່າ ລັດຖະສະພາອິນໂດເນເຊຍ ຈະສືບຕໍ່ສົມທົບກັນຢ່າງແໜ້ນແຟ້ນກັບສະພາແຫ່ງຊາດຫວຽດນາມ ຢູ່່ເວທີປາໄສລັດຖະສະພາສາກົນ ແລະພາກພື້ນຄືສະຫະພັນລັດຖະສະພາໂລກ (IPU).

ກ່ຽວກັບບັນຫາທະເລຕາເວັນອອກ, ສອງຝ່າຍເຫັນດີເປັນເອກະພາບສືບຕໍ່ສົມທົບກັນພ້ອມກັບບັນດາປະເທດອາຊຽນ ຮຽກຮ້ອງໃຫ້ລະງັບໃຈ, ບໍ່ນໍາໃຊ້ອາວຸດ ຫຼື ນາບຂູ່ນໍາໃຊ້ອາວຸດ, ຕ້ານການກະທໍາຈັດວາງ, ລ່ວງລ້ຳອະທິປະໄຕຜືນແຜ່ນດິນບົນພື້ນຖານເຄົາລົບກົດໝາຍສາກົນ, ໃນນັ້ນມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ 1982. ສົມທົບກັນໃນວິວັດການຜັນຂະຫຍາຍ ແລະຮັບປະກັນການປະຕິບັດຖະແຫຼງການ DOC; ເຈລະຈາເພື່ອບັນລຸ COC ໂດຍໄວ, ແທດຈິງ, ມີປະສິດທິພາບ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍ ທະເລ 1982. ສອງຝ່າຍສືບຕໍ່ເພີ່ມທະວີການແລກປ່ຽນ, ມີບັນດາມາດຕະການຢ່າງມີໄຫວພິບ, ບັນລຸໝາກຜົນຕາມຄວາມເໝາະສົມ, ຍຸຕິທໍາເຊິ່ງສອງຝ່າຍຍອມຮັບໄດ້ກ່ຽວກັບການຂີດເສັ້ນເຂດເສດຖະກິດພິເສດ.