ນະຄອນຫຼວງວຽງຈັນ ສືບຕໍ່ສະໜອງສິ່ງທີ່ຈຳເປັນ ໃຫ້ແກ່ປະຊາຊົນທີ່ປະສົບໄພນ້ຳຖ້ວມຢູ່ບັນດາແຂວງພາກກາງ ແລະ ພາກໃຕ້ຂອງລາວ.

19:17 | 30/09/2019

ວັນທີ 27 ກັນຍາ 2019, ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ ຕາງ-ໜ້າໃຫ້ຄະນະພັກ ອົງການປົກຄອງ ສະພາປະຊາຊົນ ແລະ ປະຊາຊົນ ຊາວນະຄອນຫຼວງວຽງຈັນ (ນວ) ສືບຕໍ່ນຳເງິນ 20 ລ້ານກີບ ແນວພັນເຂົ້າໜ່ຽວ 1.000 ກິໂລ ເຂົ້າສານ 1.500 ກິໂລ ເຄື່ອງນຸ່ງຫົ່ມ 150 ເປົາ ແລະ ເຄື່ອງອຸປະໂພກ-ບໍລິໂພກຈຳນວນໜຶ່ງ ລວມມູນຄ່າ 50.315.000 ກີບ ໄປມອບໃຫ້ແຂວງອັດຕະປື ເພື່ອຊ່ວຍເຫຼືອບັນເທົາທຸກໃຫ້ຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມໃນໄລຍະຜ່ານມາ.

ພິ­ທີ​ມອບ-ຮັບ​ເງິນ ແລະ ເຄື່ອງ​ຊ່ວຍ­ເຫຼືອ​ດັ່ງ­ກ່າວ ຈັດ​ຂຶ້ນ​ວັນ​ທີ 26 ກັນ­ຍາ 2019 ຢູ່​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ແຂວງ ເຊິ່ງ​ມອບ​ໂດຍ​ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ ຫຼວງ​ວຽງ​ຈັນ ແລະ ຮັບ​ໂດຍ​ທ່ານ ເລັດ ໄຊ​ຍະ​ພອນ ເຈົ້າ­ແຂວງ​ອັດ​ຕະ​ປື ໂດຍ​ມີ​ພະ­ແນກ­ການ​ກ່ຽວ­ຂ້ອງ​ເຂົ້າ​ຮ່ວມ.

ນະຄອນຫຼວງວຽງຈັນ ສືບຕໍ່ສະໜອງສິ່ງທີ່ຈຳເປັນ ໃຫ້ແກ່ປະຊາຊົນທີ່ປະສົບໄພນ້ຳຖ້ວມຢູ່ບັນດາແຂວງພາກກາງ ແລະ ພາກໃຕ້ຂອງລາວ.

ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ ມອບເງິນ ແລະ ສິ່ງທີ່ຈຳເປັນໃຫ້ປະຊາຊົນແຂວງ​ອັດ​ຕະ​ປື. (ພາບ: vientiane.net)

ແຂວງ​ອັດ​ຕະ​ປື ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ໂດຍ​ສະ­ເພາະ ພາ­ຍຸ​ດີ​ເປລ​ຊັນ​ພັດ​ຜ່ານ ສົ່ງ​ຜົນ​ກະ­ທົບ​ໂດຍ​ກົງ​ໃຫ້​ເມືອງ​ສາ­ມັກ­ຄີ​ໄຊ ໄຊ​ເສດ​ຖາ ຊານ​ໄຊ ສະ­ໜາມ​ໄຊ ແລະ ເມືອງ​ພູ​ວົງ ເລີ່ມ​ແຕ່​ວັນ​ທີ 2-13 ກັນ­ຍາ 2019 ໃນ​ນີ້ ເມືອງ​ໄຊ​ເສດ​ຖາ ໄດ້​ຮັບ​ຜົນ​ກະ­ທົບ 8 ບ້ານ 1.724 ຄອບ­ຄົວ ພົນ­ລະ­ເມືອງ 7.998 ຄົນ ທີ່­ຢູ່​ອາ­ໄສ​ເສຍ​ຫາຍ 38 ຫຼັງ ເນື້ອ­ທີ່​ນາ​ເສຍ​ຫາຍ​ກວມ​ເອົາ 70% ສວນ 32.729 ເຮັກ­ຕາ ງົວ-ຄວາຍ ແບ້ ໝູ 264 ໂຕ ສັດ​ປີກ 7.000 ກວ່າ​ໂຕ ໜອງ​ປາ 100 ໜອງ ແລະ ພື້ນ­ຖານ​ໂຄງ​ລ່າງ​ຈຳ­ນວນ​ໜຶ່ງ ເມືອງ​ສາ­ມັກ­ຄີ​ໄຊ ໄດ້​ຮັບ​ຜົນ​ກະ­ທົບ 24 ບ້ານ 2.899 ຄອບ­ຄົວ ພົນ­ລະ­ເມືອງ 15.847 ຄົນ ເຮືອນ​ເຄິ່ງ​ຖາ­ວອນ​ເສຍ​ຫາຍ 24 ຫຼັງ ເສັ້ນ­ທາງ​ເປ່​ເພ 22 ເສັ້ນ ເນື້ອ­ທີ່​ນາ​ເສຍ​ຫາຍ 1.700 ກວ່າ​ເຮັກ­ຕາ ສວນ 276 ເຮັກ­ຕາ ຄວາຍ-ງົວ ໝູ ແບ້ 318 ໂຕ ສັດ​ປີກ 13.000 ກວ່າ​ໂຕ ໜອງ​ປາ 246 ໜອງ ເມືອງ​ພູ​ວົງ ໄດ້​ຮັບ​ຜົນ​ກະ­ທົບ 10 ບ້ານ 2.229 ຄອບ­ຄົວ ພົນ­ລະ­ເມືອງ 10.267 ຄົນ ເນື້ອ­ທີ່​ນາ​ເສຍ​ຫາຍ 400 ກວ່າ​ເຮັກ­ຕາ ສວນ 15 ກວ່າ​ເຮັກ­ຕາ ເສັ້ນ­ທາງ​ເປ່​ເພ 2 ເສັ້ນ ແລະ ສັດ­ລ້ຽງ​ຈຳ­ນວນ​ໜື່ງ ເມືອງ​ຊານ​ໄຊ ໄດ້​ຮັບ​ຜົນ​ກະ­ທົບ 5 ບ້ານ 37 ຄອບ­ຄົວ ໃນ​ນີ້ ບ້ານ​ດາກ​ຂະ­ໜາດ ມີ​ນ້ຳ​ປ່າ​ໄຫຼ­ຊຸ ສ່ວນ​ອີກ 4 ບ້ານ ຍັງ​ສັງ​ລວມ​ຂໍ້​ມູນ​ບໍ່​ທັນ​ສຳ­ເລັດ ເມືອງ​ສະ­ໜາມ​ໄຊ ໄດ້​ຮັບ​ຜົນ​ກະ­ທົບ 38 ບ້ານ 8.100 ກວ່າ​ຄອບ­ຄົວ ພົນ­ລະ­ເມືອງ 34.769 ຄົນ ຄວາຍ 7.000 ກວ່າ​ໂຕ ງົວ 11.300 ກວ່າ​ໂຕ ໝູ 6.400 ກວ່າ​ໂຕ ແບ້ 966 ໂຕ ສັດ​ປີກ 49.000 ກວ່າ​ໂຕ ໜອງ​ປາ 174 ໜອງ ເລົ້າ​ເຂົ້າ 253 ເລົ້າ ສຸກ­ສາ­ລາ 4 ແຫ່ງ.

ຕອນບ່າຍມື້ດຽວກັນ, ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ໄດ້​ຕາງ­ໜ້າ​ໃຫ້​ຄະ­ນະ​ພັກ ອົງ­ການ​ປົກ­ຄອງ ສະ­ພາ​ປະ­ຊາ­ຊົນ ແລະ ປະ­ຊາ­ຊົນ​ຊາວ ນວ ສືບ­ຕໍ່​ນຳ​ເງິນ 15 ລ້ານ​ກີບ ແນວ​ພັນ​ພືດ​ມູນ​ຄ່າ 4.550.000 ກີບ ເຂົ້າ­ສານ 1.500 ກິ​ໂລ ເຄື່ອງ­ນຸ່ງ​ຫົ່ມ 150 ເປົາ ແລະ ເຄື່ອງ​ອຸ­ປະ­ໂພກ-ບໍ­ລິ­ໂພກ​ຈຳ­ນວນ​ໜຶ່ງ ລວມ​ມູນ​ຄ່າ 43.000.000 ກີບ ໄປ​ມອບ​ໃຫ້​ແຂວງ​ເຊ​ກອງ ຢູ່​ຫ້ອງ​ວ່າ­ການ​ປົກ­ຄອງ​ແຂວງ​ດັ່ງ­ກ່າວ ເຊິ່ງ​ຮັບ​ໂດຍ​ທ່ານ ຖາ­ວອນ ພົມ​ມະ​ໄລ​ລຸນ ຮອງ​ເຈົ້າ­ແຂວງ​ເຊ​ກອງ ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຂວງ ມີ​ທ່ານ ເຫຼັກ­ໄຫຼ ສີ­ວິ­ໄລ ຮອງ​ເຈົ້າ­ແຂວງ​ເຊ​ກອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ນະຄອນຫຼວງວຽງຈັນ ສືບຕໍ່ສະໜອງສິ່ງທີ່ຈຳເປັນ ໃຫ້ແກ່ປະຊາຊົນທີ່ປະສົບໄພນ້ຳຖ້ວມຢູ່ບັນດາແຂວງພາກກາງ ແລະ ພາກໃຕ້ຂອງລາວ.

ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ​ມອບເງິນ​ໃຫ້​ແຂວງ​ເຊ​ກອງ ຢູ່​ຫ້ອງ​ວ່າ­ການ​ປົກ­ຄອງ​ແຂວງ. (ພາບ: vientiane.net)

ນັບ​ແຕ່​ທ້າຍ​ເດືອນ​ສິງ­ຫາ-ຕົ້ນ​ເດືອນ​ກັນ­ຍາ 2019 ໄດ້​ມີ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ ບວກ​ກັບ​ພາ­ຍຸ​ເດ​ເປຣ​ຊັນ ພັດ​ຜ່ານ​ແຂວງ​ເຊ​ກອງ​ຢ່າງ​ຮ້າຍ​ແຮງ ເຮັດ​ໃຫ້​ລະ­ດັບ​ນ້ຳ​ເຊ​ກອງ​ສູງ​ກວ່າ​ໄພ​ອັນ­ຕະ­ລາຍ ສົ່ງ​ຜົນ​ກະ­ທົບ​ໃຫ້ 4 ເມືອງ ຄື: ເມືອງ​ລະ​ມາມ ທ່າ​ແຕງ ກະ­ລຶມ ແລະ ເມືອງ​ດາກ​ຈຶງ ລວມ 145 ບ້ານ 16.017 ຄອບ­ຄົວ ພົນ­ລະ­ເມືອງ 86.130 ຄົນ ກວມ 74% ຂອງ​ບ້ານ​ທັງ​ໝົດ ລວມ​ຜົນ​ເສຍ​ຫາຍ 124,16 ຕື້​ກີບ ໃນ​ນີ້ ຂະ­ແໜງ​ກະ­ສິ­ກຳ ແລະ ປ່າ­ໄມ້ ເສຍ​ຫາຍ 18 ຕື້​ກີບ ໂຍ­ທາ​ທິ​ການ ແລະ ຂົນ­ສົ່ງ 92,59 ຕື້​ກີບ ສຶກ​ສາ​ທິ​ການ ແລະ ກີ­ລາ 1,94 ຕື້​ກີບ ສາ­ທາ­ລະ­ນະ​ສຸກ 5,46 ຕື້​ກີບ ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ 1,4 ຕື້​ກີບ ພະ­ລັງ­ງານ ແລະ ບໍ່​ແຮ່ 2,5 ຕື້​ກີບ ຊັບ­ພະ­ຍາ­ກອນ​ນ້ຳ ແລະ ສິ່ງ­ແວ­ດລ້ອມ 350 ລ້ານ​ກີບ ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ 908 ລ້ານ​ກີບ.

ໂອ­ກາດ​ນີ້ ທ່ານ ອາດ​ສະ­ພັງ​ທອງ ສີ​ພັນ​ດອນ ຍັງ​ໄດ້​ມອບ​ເງິນ 10 ລ້ານ​ກີບ ຊ່ວຍ­ເຫຼືອ​ເມືອງ​ລະ​ມາມ ເຊິ່ງ​ຮັບ​ໂດຍ​ທ່ານ ຂັນ­ຕີ ສີ​ລະ​ວົງ­ສາ ເຈົ້າ­ເມືອງ​ລະ​ມາມ ແລະ ມອບ​ເງິນ 5 ລ້ານ​ກີບ ຊ່ວຍ­ເຫຼືອ​ເມືອງ​ທ່າ​ແຕງ ເຊິ່ງ​ຮັບ​ໂດຍ​ທ່ານ ສົມ​ເພັດ ເອີດ​ລັດ­ດາ ເຈົ້າ­ເມືອງ​ທ່າ​ແຕງ ຕື່ມ​ອີກ.

(ຄຳຮຸ່ງ)

ທ່ານອາດຈະມັກ

ເຫດການ